मत्ती 23

यहूदी धरमशास्त्रके पण्डित आर फरिसी समूहके आदमीसिके चेतावनी

(मर्कू १२:३८-३९; लूक ११:४३,४६; २०:४५-४६)

1तब येशू भीडके आदमीसिके आर आपन चेलासिके एरं कहैल्कै, 2“यहूदी धरमशास्त्रके पण्डित आर फरिसी समूहके आदमीसब मूसाके विधि-विधानके मतलब सम्झाबैके अधिकार पैल आदमीसब छै। 3सेल्याके ओकरसिके कहेल बात कर आर मान, मगर ऊसब जेरं करैछै ओरं नैकर, कहिनेकी ऊसब शिक्षा ते दैछै, मगर उटा शिक्षाके खुद पालन नैकरैछै। 4ऊसब सभे किसिमके नियम कानून बनाबैछै जे पालन करैले आदमीसिके लिए कठिन हैछै। मगर ऊसब खुद ही उटा नियम कानूनसिके पालन करैके कोशिश भी नैकरैछै। 5मगर ऊसब आपन सभे काम आदमीसिके देखाबैले करैछै। ऊसब धरमशास्त्रके पदके पत्री बडका बन्याके आपन मथामे आर हातमे बान्हैछै, आर धर्मी छियै कहिके देखाबैके लिए आपन कपडाके कोनामे लम्बा-लम्बा झालर बनाबैछै। 6ऊसब भोजसिमे सम्मानके जगह आर यहूदी आदमीसिके सभाघरसिमे खास आसनमे बैठैले पसन्द करैछै। 7बजारसिमे घुमैके समयमे आदमीसब ओकरासिके आदरके साथ नमस्कार करै आर गुरुजी कहिके बोलाबै कहिके ऊसब चाहैछै। 8तोरासिके कोय आदमी गुरुजी नैकहौ, कहिनेकी तुहेंसब सभेको भ्या-बहिनके जुगुर एक समानके छैं। तोरसिके खाली एक्केटा गुरु छौ। 9जे आदर तुहेंसब आपन स्वर्गीय पिताके दैछैं उटा आदर यी धर्तीमे कक्रहौ नैदिहैं। 10तोरासिके कोय भी आदमी मालिक नैकहौ, कहिनेकी तोरसिके एक्केटा मालिक छौ जे हमे ख्रीष्ट छियै। 11तोरासिमेसे जे सभैसे महान छौ, ओकरा तोरसिके सेवा करे पड्तौ। 12जे अपने आपके महान बनैतै, ओकरा छोटका बनैल जैतै, आर जे अपने आपके छोटका बनैतै ओकरा महान बनैल जैतै।”

कपटी आदमीसिके विरुद्धमे चेतावनी

(मर्कू १२:४०; लूक ११:३९-४२,४४,५२; २०:४७)

13“हे यहूदी धरमशास्त्रके पण्डितसब आर फरिसी समूहके आदमीसब, तोरसिके लिए यी बहुते भयानक हैतौ! हे ढोंगीसब! कहिनेकी तुहेंसब आदमीसिके लिए परमेश्वरके राज्यके केबाड बन्द करैछैं। तुहेंसब आपनहौं भी भितर नैढुकैछैं, आर ढुके चाहेवालाके भी भितर ढुकैले नैदैछैं। 14हे यहूदी धरमशास्त्रके पण्डितसब आर फरिसी समूहके आदमीसब, तोरसिके लिए यी बहुते भयानक हैतौ! तुहेंसब ढोंगी छैं! कहिनेकी तुहेंसब धोखा करिके मोसामातसिके सम्पति हडपी लैछैं, मगर तुहेंसब सामूहिक रुपसे लम्बा समयतक प्रार्थना करैछै ताकी आदमीसब यी सोचै कि तुहेंसब बढियाँ छैं। एरंको आदमीसिके परमेश्वर निश्चित रुपसे आरहौ बेसी कडा सजाय देतै।”

15“हे यहूदी धरमशास्त्रके पण्डितसब आर फरिसी समूहके आदमीसब, तोरसिके लिए यी बहुते भयानक हैतौ! हे ढोंगीसब! तुहेंसब एकटा आदमीके आपन विश्वासमे आनैके लिए दूर-दूरके यात्रा करैछैं, मगर जब ऊ तोर विश्वासमे आबी जैछौ ते तुहेंसब ओकरा दोब्बर नरक जैके लायक बन्या दैछैं जेरं तुहें खुद छैं।

16अनराह अगुवासब, तोरसिके लिए यी बहुते भयानक हैतौ! तुहेंसब ढोंगी छैं! तुहेंसब कहैछैं, अगर कोय परमेश्वरके मन्दिरके कसम खैतै ते कुछु नैहैतै, मगर मन्दिरके सोनाके कसम खैतै ते ओकरा आपन कसम पुरा करैले पड्तै। 17तुहेंसब केरंको मूर्ख आर अनराह आदमीसब छै। कोन्टा बडका छै, सोना कि सोनाके पवित्र करेवाला परमेश्वरके मन्दिर? 18तुहेंसब यी भी सिखाबैछैं अगर कोय वेदीके कसम खैतै ते कुछु नैहैतै, मगर ओकरामे चढैल दानके कसम खैतै ते ओकरा आपन कसम पुरा करैले पड्तै। 19तुहेंसब केरंको अनराह आदमीसब छैं। कोन्टा बडका छै, दान कि दानके पवित्र बनाबेवाला वेदी? 20सेल्याके वेदीके कसम ख्यावाला आदमी वेदी आर ओकरामे चढैल दानके छुबिके कसम खैछै। 21परमेश्वरके मन्दिरके कसम ख्यावाला आदमी परमेश्वरके मन्दिर आर ओकरामे बास करेवाला परमेश्वरके कसम खैछै। 22स्वर्गके नाममे कसम ख्यावाला आदमी परमेश्वरके सिंहासनके आर ओकरामे विराजमान हुएवाला परमेश्वरके कसम खैछै।

23हे यहूदी धरमशास्त्रके पण्डितसब आर फरिसी समूहके आदमीसब, तोरसिके लिए यी बहुते भयानक हैतौ! तुहेंसब ढोंगी छैं! कहिनेकी तुहेंसब पुदिना, सोंप आर जिराके दशांश दैछैं मगर विधि-विधानके महत्वपूर्ण विषयसब न्याय, दया आर विश्वासयोग्यताके बेवास्ता कैल्हैं छे। तोरासिके दशांश देना रहौ मगर यी अन्य महत्वपूर्ण विषयसिके बेवास्ता नैकर। 24अनराह अगुवासब, तुहेंसब छोटका नियमके पालन करैके विषयमे बहुते सावधान छैं। जेरं कि तुहेंसब कुछु पियेवाला चीजसे माछीके दूर राखैछैं, मगर फेर तुहेंसब परमेश्वरके महत्वपूर्ण आज्ञासिके उलंघन करैछैं! उटा ऊँटके निगलैके जुगुर छै!

25हे यहूदी धरमशास्त्रके पण्डितसब आर फरिसी समूहके आदमीसब, तोरसिके लिए यी बहुते भयानक हैतौ! तुहेंसब ढोंगी छैं! तुहेंसब बर्तनके जुगुर छैं जे बाहारसे साफ हैछै मगर भितरसे गन्दे हैछै। अहिने करिके तुहेंसब दोसर आदमीके समनामे अपने आपके बढियाँ आदमीके रुपमे देखाबैछैं। मगर तोरसिके मनमे लोभ आर स्वार्थीपन भर्ल हैछौ। 26अनराह फरिसी समूहके आदमीसब पहेला बाटीके आर थारीके भितरसे साफ कर आर ओकर बाहार भी साफ भ्याजैतौ।

27हे यहूदी धरमशास्त्रके पण्डितसब आर फरिसी समूहके आदमीसब, तोरसिके लिए यी बहुते भयानक हैतौ! तुहेंसब ढोंगी छैं! कहिनेकी तुहेंसब चुन लगैल साराके जुगुर छैं, जे बाहारसे देखैमे बढियाँ हैछै, मगर अन्दरमे मर्ल आदमीके हड्डीसब आर सभे अशुद्धतासे भर्ल हैछै। 28अहिने करिके तुहेंसब बाहारमे आदमीसिके समनामे धर्मी दिखाई पडैछैं मगर भितरमे छल-कपटी आर दुष्ट कामसे भर्ल छैं।

29हे यहूदी धरमशास्त्रके पण्डितसब आर फरिसी समूहके आदमीसब, तोरसिके लिए यी बहुते भयानक हैतौ! तुहेंसब ढोंगी छैं! कहिनेकी तुहेंसब तोरसिके पूर्वजसिके द्वारा जान मार्ल गेल परमेश्वरके वक्तासिके सारापर मकबरा बनाबैछैं, आर धर्मी आदमीसिके साराके सम्मानित करैछैं। 30आर कहैछैं, अगर हमेसब आपन बाप-पुर्खाके समयमे हैतियै ते हमेसब परमेश्वरके वक्तासिके खून करैमे ओकरासिके सहायता नैकर्तियै। 31एरंके तुहेंसब परमेश्वरके वक्तासिके हत्या करेवालासिके सन्तान छैं कहिके आपनहैं सबूत दैछैं। 32हमरा पता छै कि तुहेंसब उटा खराब कामके पुरा करेवाला छैं जकरा तोरसिके बाप-पुर्खासब शुरु कैल्कै रहे। 33तुहेंसब जहरिला साँपके बच्चासिके जुगुर छैं, तुहेंसब नरकके न्यायसे नैबचे सक्भैं। 34सेल्याके हमे तोरसिकेलगत परमेश्वरके वक्तासब, बुद्धिमान आदमीसब आर यहूदी धरमशास्त्रके पण्डितसिके पठैबौ। ओकरासिमे कतनें झनके तुहेंसब जान मार्भैं आर कतनें झनके क्रूसमे काँटी ठोकिके जान मार्भैं, आर कतनें झनके आपन यहूदी आदमीसिके सभाघरसिमे कोडा लगैभैं आर सहर सहरसिमे खेदाडभैं। 35अहिने करिके जतनें धर्मी आदमीसिके खून धर्तीपर बहैल गेलै छे: धर्मी हाबिलके हत्यासे ल्याके बेरेक्याहके बेटा जकरियाके हत्या तक, जकरा तुहेंसब परमेश्वरके मन्दिरके ‘पवित्रस्थान’ आर बलि-वेदीके बीचमे हत्या कैल्हैं ओकर दोष तोरसिके कपारपर पड्तौ। 36हमे तोरासिके सच कहैछियौ, यी सभे बातके हिसाब इहे पिढीके आदमीसिसे लेल जैतै।”

येशू यरूशलेम सहरके विषयमे विलाप कैल्कै

(लूक १३:३४-३५)

37“हे यरूशलेम सहरके आदमीसब, हे यरूशलेम सहरके आदमीसब, तुहें ऊ परमेश्वरके वक्तासिके पत्थल ल्याके जान मारलहैं जे बहुते पहेलाके समयमे रहै। जेरंके मुर्गी आपन बच्चासिके डेनके तरमे रखवाली करैछै ओहिने करिके कतनें बेर हमे इस्राएलीसिके रखवाली करैके इच्छा कैलियौ मगर तुहेंसब नैमान्लहैं। 38देख्, तोर घर सुनसान भेल छौ। 39कहिनेकी हमे तोरासिके कहैछियौ, जबतक तुहें नैकहभैं कि,

‘परमेश्वरके अधिकारसे आबेवाला धन्यके छै’

तबतक तुहेंसब हमरा नैदेख्भैं।”

Currently Selected:

मत्ती 23: KYVNT

Highlight

Copy