Ioane 4
4
1Opole umele gaire Faresaio aserare, kega, Iesu ko taraisare a bapataiso kaimeg giz tumege Ioane,
2(Epe Iesu nole bapataiso kak, mamoro abara kaimeg giz),
3E Iudaia dekaelu, a iako Galilaiem bakeamulu.
4Abara dorge ko eipu Samaria bakeamulu.
5E nerute utebem Samaria tabarki, nei Sikara, maike abele kebi ged Iakobo de tabara uerem Iosefaim ikuar:
6Iabobo ra ni peike. Iesu ni padige emri memelam, gem barapare: eipu gerger.
7Nerute Samaria kosker tabaruk, ni atatkoem: Iesu abi detager, kega, Kari ni nakuar ko areem.
8Abara kaimeg giz utebem bakeuare ko leuer arapem.
9Samaria kosker abi detager, kega, Nako, ma Iudaia le, karim niem namosi, Samaria kosker? (Gaire Iudaia le a Samaria le nole meme kak.)
10Iesu detaut, a abi detager, kega, Ese mama umele abele lu Ade ikuar, pako le dali mari natager, Kari ni nakuar; ese mama emetu abi damos, E ko mari nakuar eded ni.
11Ege kosker abi detager, kega, Kole, ma nole nisor kak, ni kopkopni: nagelam mari dog eded ni?
12Nako, ma aule tumem keriba aba Iakobo, abele ni keribi ikuar, E ko eri abele ni, a abara uerem giz, a abara ebur giz?
13Iesu detaut, a abi detager, kega, Gaire le uridili ereare abele ni ge, uiaba iako niap ge:
14Eko le aree abele ni kaka ikuar, E nole niap kak niai karem; abele ni kaka ko abi ikuar, mena abi kem ge ni tomeili eded aseamur kak.
15Koskeret iako abi detager, kega, Opole, karim abele ni tekau, iako nole niap kak, iako kaka nole tabakeam ko ni tigur.
16Iesu abi detager, kega, Bakeamu, mabara kimiar tegared, iako tabakeam.
17Koskeret etkalu, kega, Kaka nole kimiar kak. Ege Iesu de abi detager, kega, Ageakar mama detaut, kega, Kaka nole kimiar kak:
18Epe faif mara gaire kimiar; E dali mari dog emri, nole mara kimiar: peik ageakar mama detager.
19Koskeret abi detager, kega, Kole, kaka erdali mama perofeta.
20Keriba kaied abele paser ge esorerapare, ege uaba detager, Ierusalema uteb kar esorerapare.
21Iesu abi detager, kega, Kosker, kari asoli, kerker tabarki, uaba nole esorerapare Abem abele paser ge, a nole Ierusalema ge.
22Uaba umer kak uaba esorerapare nitim; ki umele abele keriba esoreraparem: Iudaia gizelam edede.
23Kerker ia uatabu, a peirdi, gaire le esorerapare, ko Abem esorerapare lamarem, a ageakarem; abelelam Aba deraimer gaire le mokakalam ko abim esorerapare.
24Ade Lamar; uiaba abim esorerapare, mamoro lamarem esorerapare, a ageakarem.
25Kosker abi detager, kega, Kaka umele Mesaia ia uatabu (nei atker, Keriso:) E emetu tabi, E keribi detomereta gaire lu uridili.
26Iesu abi detager, kega, Eko, kakanali mari mer atagere.
27Abara kaimeg giz tabarki, a ezigmada, abelelam E koskerim mer detager; epe nole nerute le abi detager, kega, Nalu ma deraimer? a nalugem ma abi mer atagerem?
28Kosker tabara nisor ikedilu, a utebem bakeamulu, a gaire le daratagerare, kega,
29Tabakeuare, dasmerare abele le kari natagere gaire lu kaka ikeli: nako, Keriso dali?
30Uiaba uteblam tabaosi, a abi dog tabarki.
31Inoka dali, kaimeg giz abi ekailu, a detager, kega, Rabi, ero.
32E uiabi daratagerare, kega, Kara nagri leuer ko ero uaba nole umer kak.
33Abelelam kaimeg giz mer atager, kega, Nako, nerute le abi leuer ikuar?
34Iesu uiabi detager, kega, Kara leuer ko ikeli abara lag, kari namarida, a ko eseamuda abara dorge.
35Nako, uaba nole detager, kega, Foa gaire meb nur tabarki? Dasmer, kaka uabi detager, kega, Uaba eti, a gaire gedub dasmer, nunur kerker nur abi.
36Le ikid bodomalam nagri, a leuer ageg etag ededem aseamur kak; ko le emor, a le ikid okakis sererge.
37Mokakalam, ageakar abele mer detaut, kega, Nerute le emor, a nerute ikid.
38Kaka uabi demarid ko ikid abele uaba sagim kak: uader le sagim, epe uaba barot uiaba sagim.
39Gaire Samaria le abi oituli abele uteblam, abele kosker merlam, kega, E kari natager gaire lu uridili kaka ikeli.
40Epe gaire Samaria le abi dog tabarki, uiaba abi damos uiaba kemem emri: E abele ge emri neis gerger.
41Gaire uader le oituli abi merlam;
42Uiaba koskerem detager, kega, Keriba nole oituli mara mer atautelam; abelelam keribibu asoli, a keriba umele, ageakar Keriso idali, geseb uridili ededem.
43Abele neis gerger iobaru, E bakeamaulu Galilaiem.
44Abelelam Iesu detager, kega, Perofeta nole ekosili abi ged ge.
45E Galilaia tabarki, gaire Galilaia le abi egared, abelelam uiaba dasmer gaire lu E ikeli Ierusalema ge, abele uetpur ge; abelelam uiaba kemem uetpurim bakeam.
46Iesu iako Kana Galilaia tabarki, abele uteb E ikeli ni iauaeakai uaina. Nerute kole ra uerem gimgim Kaperenauma.
47E asoli, kega, Iesu Galilaia tabarki Iudaialam, E abim tabakeam, a abim bali ko tabakeam abara uerem idigiri, abelelam E maike eumida.
48Iesu abi detager, kega, Ese uaba nole asmer kak gaire atamelam pako adigir, uaba nole uatur kak.
49Kolelut abi detager, kega, Opole, ma tabakeam, kara uerem ue eumi.
50Iesu abi detager, kega, Bakeam, mara uerem eded akaida. Abele le oituli abele mer Iesu de abi detager, E bakeamulu.
51E penoka ekas, abara memeg giz abi obapit, a abi detaut, kega, Mara uerem eded akaida.
52E uiaba nautumer, abele haua E ko ditimeda ko eded. Uiaba abi detaut, kega, Ab gerger haua sefen, urueri abi dekaerti.
53Baba umele abele haua, Iesu abi detager, kega, Mara uerem eded akaida: E pako abara boai uridili oituli.
54Abele neisem adigiri Iesu ikeli, kerker ge tabarki Galilaia Iudaialam.
Currently Selected:
Ioane 4: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
