Luka 2
2
1Abele kerker ge Kaisara Augusto mer tigri, kega, Detaruem gesepem uridili.
2Abele kerker ditimedare abele jauali Kurenio sirdamu Suria ge.
3Ui ge uridili bakeauare ga detarare, taba gedlam.
4Ege Iosefa ge tabakeamulu Galilaia, Nazareta uteblam, Iudaiaim Dauida ra uteb, nei atker Bethelema, abelelam Dauida ra boai abara kus;
5Detalei okakis Maria taba kosker ei, E dikiapor abi kem ko eskemer.
6Ui ge emrilei, abele kerker ge abi esmelu.
7Ege abara kimiar uerem esmelu; E sursur derap, egaredlu kau meta ge irdilu, abelelam uiaba meta mitkar nolea abkoreb emeri okakis.
8Abele ged ge daralei sumez ge mamoe asesered, ui ki ge daralei mamoe asesered.
9Dasmer, Iehoua ra angela ege ekue ireder, au zoromzorom deraueirer Iehoua ra zorom: uiaba geum barkei.
10Ege angela de uiabi daratagerare, Uaba nole geum kak; abelelam dasmerare, kaka tais peka uabim debe mer, obaker gaire le uridili au sererserer ober:
11Abelelam ge abele gerger ge eosmelu, Dauida uteb ge, Iesu Keriso, uaba Azigmoareta.
12Abele atamelam; Uaba erdar sursur uerem eid kau ra meta ge.
13Ege dumdumge angela de okakis gaire urker ge kotor ge, epe uiaba desperare Iehoua, kega,
14Ua ge desperare Ade ra kotor lu, uerkab ge gesepem, au omare le uridili.
15Ege angela giz bakeauare kotorem, ui ge mamoe giz naseseredlare a mer nakesmurare, kega, Debele mi nabakeauare Bethelemaem, ko dasmerare abele lu Iehoua de meribi uadetametare.
16Ui ge dudum bakeauare, ege Maria uiaba nardardare, a Iosefa, a sursur uerem kau meta ge iperedare.
17Ege uiaba erdali, epe uiaba etomeret abele mer uiaba emetu asoli abele ueremlam.
18Epe uiaba uridili emetu asoli abele mer; epe uiaba au damreda abele lu mamoe asesered le etomeret uiabim.
19Ege Maria de erpei gaire mer uridili, abara nerkep dikiapor.
20Ege mamoe asesered le takomed, uiaba despereda pako esoao Adim, abelelam gaire lu uridili uiaba emetu asoli, pako dasmer etomeret uiabim.
21Ege abara kerker tabarki, eit gerger abele uerem peritom, epe uiaba abi nei atker Iesu, angela kekiam nei detker, abara apu nolea kem kak.
22Ege eseamulu uiaba gerger ogdirup abi, mokakalam Mose ra gelar giz, epe uiaba tais abim Ierusalemaem, irdilei Iehoua ra opem,
23(Mokakalam detarer Iehoua ra gelar giz, kega, Ese kimiar uerem narbet uridili zogo Iehouaim,)
24Ese ikuar abele baokeilu, mokakalam etomeret Iehoua ra gelar giz, kega, Neis luk, ua nako neis kebi dibadib.
25Ege dasmer, nerute le emeri Ierusalema ge, nei Simeona; abara tonar barkak E au geum Adim, epe abim naokaili upinati Isaraela; ege Lamar Zogo abi tumge.
26Ege abi natomelu Lamar Zogo, nolea eumida, kekiam erdali Iehoua ra Keriso.
27Ege E bakeamulu zogo meta Lamar Zogolam; abele uerem Iesu abara aba a apu uiaba abi tegaret, uiaba ikeli abkoreb mokakalam gelar giz,
28Epe abi tegaret abele uerem abara tag, ege esoao Adim, kega,
29Iehoua ae, debele ma ikuar mara memeg le uerkab bakeamulu, mokakalam mara mer;
30Abelelam kara pone emetu dasmer abele mara azigmoaret,
31Ege ma derser opem gaire ged uridili;
32Abele datki erperida gaire zuber ged, pako zoromzorom mara ged Isaraela.
33Ege Iosefa pako abara apu uiaba damered gaire lu etomeret abim.
34Ege Simeona E uerkab uiabim, ege abi detager Maria abara apu, kega Dasmer, abele uerem iridi uader ekesmeri a ko ekuei gaire le lakub Isaraela; abele atamelam uiaba abi dedkoli;
35Ege ekos dikedilu mara nerkep teibur aosos tulik; ueakai paret kak dikiapor nerkep gaire le.
36Nerute perofeta kosker dauere, abara nei Ana, Fanuelu ra neur, Asera ra nosik; ege emetu aule, E ge taba kimiar okakis daralei abele kerker ge E neur dauer, ege sefen abara urut tabarki.
37Abele kosker zogo meta ge emeri, nako eiti foa abara urut, nole akaeret kak abele zogo metalam, E Ade ra memeg le, pako leuer baili, a esorerapare gerger ge a ki ge.
38Abele kerker ge, E bakeamulu esoao Adim, E abi detagerare uiabim gaire le giz naokaili Ierusalema ra azigmoaret.
39Ege ui ge eseamulei gaire lu ikeli abkoreb Iehoua ra gelar giz, epe ui ge akomelei Galilaiaem, uiaba uteb Nazareta.
40Ege abele uerem ge batai, abara nerkep au saserim, no au pardar dauer: Ada ra omare abi tum ge.
41Ege abara aba a apu ui bakeamulei Ierusalemaem, nerute urut a nerute urut netpur paseka ge.
42Ege abara urut tuelf tabarki, epe uiaba bakeauare Ierusalemaem, mokakalam tonar uetpur.
43Ege abara gerger desmulu, epe uiaba akomeda, abele uerem Iesu emeri Ierusalema ge; ege Iosefa pako abara apu uiaba nolea umer kak.
44Ui ge dikiapore abele uerem uiabi okakis, ege uiaba ki gab ge asameilu; ui ge abi ge deraimerare taba boai giz pako uader umele abim.
45Ui ge nole abi ardar kak, a ui gako akomelei Ierusalemaem, abi deraimerei.
46Ege thri gerger barkare, ui ge abi erdali zogo meta ge, ege emeri muige ereuerem ge, E lagelage asoli, a gako uiabi nautumerare ereuerem tonarem.
47Ege uiaba asolare abim au pardar mer detaut, uiaba au damerare.
48Ege ui ge au kase damerei emetu abi erdarei; ege abi apuet detaut, kega, Kara uerem ma nalu pem a keribim? Dasmer, kaka pako mara aba ki au asi ki darasardei mari naraimerei.
49Epe tabara mer uiabi daratager, kega, Nalugem naba kari naraimereie? Uaba nole umer kak, abkoreb kaka emeri kara Aba ra meta ge idali?
50A ui ge nole abi mer asor kak nakueiredar.
51Ege ui ge okakis bakeauare Nazareta tabarki; a uiaba memeg: ege apu ge gaire lu giz nerkep derpeilare.
52Ege pardar ge omeilu a gako Iesu ra gem, ege Ade au omare abi gako le uridili.
Currently Selected:
Luka 2: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
