Shıǵıw 14
14
1Sońınan Jaratqan Iye Muwsaǵa bılay dedi:
2– Izraillılarǵa ayt, olar izge qaytıp, Piy-Haxirottıń qasına, Migdol menen teńiz arasına, Baal-Sefonnıń qarsısındaǵı teńiz jaǵasına ornalassın. 3Sonda faraon: «Izraillılar el gezip, adasıp ketti, olar shól qorshawında qaldı», – dep oylaydı. 4Men faraonnıń júregin qatal qılaman hám ol izraillılardıń izinen quwadı. Solay etip, Men faraondı hám onıń pútkil áskerlerin jeńip, Óz saltanatımdı kórsetemen. Sonda mısırlılar Meniń Jaratqan Iye ekenimdi bilip aladı.
Izraillılar aytılǵandı isledi. 5«Izrail xalqı qashıp ketipti», – degen xabar Mısır patshasına jetkende, ol hám onıń xızmetkerleri izraillılar tuwralı kóz qarasların ózgertip: «Bizler ne islep qoydıq? Izraillılardı jiberemiz dep, qullarımızdan ayırıldıq-ǵo!» – desti. 6Faraon óziniń sawash arbasın jektirip, láshkerlerin tayarladı. 7Ol altı júz saylandı sawash arbasın, Mısırdıń basqa barlıq sawash arbaların hám olardıń basshıların janına aldı. 8Jaratqan Iye Mısır patshası faraonnıń júregin qatal qılıp qoydı. Ol nıq qádem atıp baratırǵan izraillılardıń izinen quwıp ketti. 9Mısırlılar faraonnıń pútkil áskerleri, atlarǵa jegilgen sawash arbaları hám onıń ústindegi áskerleri menen izraillılardıń izine túsip, teńiz jaǵasına, Piy-Haxirot jaqınına, Baal-Sefonnıń qarsısına ordasın qurǵan izraillılarǵa jetip aldı.
10Faraon jaqınlasıp qaldı. Izraillılar artına burılıp qarasa, mısırlılardıń izlerinen quwıp kiyatırǵanın kórdi. Sonda olardıń zárreleri ushıp, Jaratqan Iyege páriyad etti. 11Olar Muwsaǵa bılay dedi:
– Mısırda qábir joqtay, bizlerdi shólde óliwge alıp keldiń be? Mısırdan alıp shıǵıp, bizlerge ne qılǵanıń? 12Mısırda bolǵanımızda, saǵan: «Bizlerdi tınıshımızǵa qoy, mısırlılarǵa xızmet ete bereyik», – degen joq pa edik? Shólde ólgennen góre, mısırlılarǵa qul bolǵanımız jaqsıraq edi-ǵo!
13Biraq Muwsa olarǵa:
– Qorqpańlar! Ornıńızda bekkem turıp, Jaratqan Iyeniń búgin sizlerdi qalay qutqaratuǵının kórińler. Búgin ózlerińiz kórip turǵan mısırlılardı endi hesh qashan kórmeysizler. 14Jaratqan Iye sizler ushın urısadı. Al sizler tınısh tursańız boldı, – dedi.
15Sonda Jaratqan Iye Muwsaǵa bılay dedi:
– Nege Maǵan páriyad etip atırsań? Izraillılarǵa ayt, alǵa qaray jıljıy bersin. 16Al sen tayaǵıńdı kóterip, onı teńizdiń ústine qaray soz da, suwdı qaq ayır. Sonda izraillılar teńizdiń ishinen qurǵaq jer arqalı júrip ótedi. 17Men mısırlılardıń júregin qatal qılaman. Olar izraillılardıń izinen quwadı. Men faraondı, onıń barlıq áskerlerin, sawash arbaların hám onıń ústindegi áskerlerin jeńip, Óz saltanatımdı kórsetemen. 18Faraon, onıń sawash arbaları hám onıń ústindegi áskerleri sebepli saltanatqa eriskenimde, mısırlılar Meniń Jaratqan Iye ekenimdi bilip aladı.
19Izrail ordasınıń aldında baratırǵan Qudaydıń perishtesi ornın ózgertip, artqa ótti. Xalıqtıń aldındaǵı minara sıyaqlı bult ta ornın ózgertip, artqa, 20Mısır áskerleriniń hám Izrail xalqınıń ortasına barıp turdı. Bult mısırlılar tárepte qarańǵılıq ornatıp, izraillılar tárepti jaqtı qılıp turdı. Sol sebepten tún boyı eki tárep bir-birine jaqınlasa almadı.
21Muwsa qolın teńizdiń ústine qaray sozdı. Jaratqan Iye pútkil tún boyı shıǵıstan kúshli samal estirip, teńiz suwın izge iyterdi hám teńizdi qurǵaq jerge aylandırdı. Suw ekige bólindi. 22Izraillılar qurǵaq jerdi basıp, teńizdiń ortasınan ótti. Teńiz suwı oń hám shep tárepte olarǵa diywal bolıp turdı. 23Al mısırlılar olardıń izinen quwdı, faraonnıń barlıq atları, sawash arbaları hám onıń ústindegi áskerleri teńizdiń ishine kirip ketti. 24Tań atarda Jaratqan Iye minara sıyaqlı ot hám bult ishinen Mısır ordasına názerin taslap, olardı albıratıp tasladı. 25Quday olardıń sawash arbalarınıń dóńgeleklerin shıǵarıp taslaǵanda, olar zorǵa qozǵaldı. Sonda mısırlılar: «Izraillılardan qashayıq. Óytkeni olar ushın Jaratqan Iyeniń Ózi bizlerge qarsı urısıp atır», – desti.
26Keyin Jaratqan Iye Muwsaǵa:
– Qolıńdı teńizdiń ústine qaray soz. Suwlar mısırlılardı, olardıń sawash arbaların hám onıń ústindegi áskerlerin basıp ketsin, – dedi. 27Solay etip, Muwsa qolın teńizdiń ústine qaray sozdı hám tańǵa jaqın teńiz óz halına qayttı. Sonda qashıp atırǵan mısırlılar suwǵa duwshar bolıp, Jaratqan Iye olardı teńizdiń ishine batırıp jiberdi. 28Óz halına qaytqan suw sawash arbalardı, onıń ústindegi áskerlerdi, yaǵnıy izraillılardıń izinen teńizge túsken faraonnıń pútkil áskerlerin jutıp ketti. Olardan birde bir adam aman qalmadı.
29Al izraillılar bolsa, teńizdiń ishinen qurǵaq jer arqalı júrip ótken edi. Suwlar oń hám shep tárepte turıp, olarǵa diywal bolǵan edi. 30Jaratqan Iye sol kúni izraillılardı mısırlılardıń qolınan qutqardı. Izraillılar mısırlılardıń teńiz jaǵasında ólip jatırǵanın kórdi. 31Jaratqan Iyeniń mısırlılarǵa kórsetken ullı qúdiretin kórgen Izrail xalqı Jaratqan Iyeden qorqıp, Oǵan hám Onıń qulı Muwsaǵa isendi.
Currently Selected:
Shıǵıw 14: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
