Shıǵıw 16
16
Manna hám bódeneler
1Izrail xalqınıń pútkil jámiyeti Elimnen shıqtı. Olar Mısırdan shıqqanınan keyingi ekinshi aydıń on besinshi kúni Elim hám Sinay arasında jaylasqan Sin shóline keldi. 2Shólde hámmesi Muwsa menen Xaronǵa narazı bolıp, 3olarǵa bılay dep tońqıldadı:
– Qánekey, Mısırda-aq Jaratqan Iyeniń qolınan ólip qoya qoyǵanda bolar edi. Hesh bolmasa, ol jerde gósh salınǵan qazanlardıń qasında otırıp, toyǵanımızsha nan jer edik. Biraq sizler pútkil xalıqtı ashlıqtan óltiriw ushın, bizlerdi usı shólge alıp keldińiz.
4Sonda Jaratqan Iye Muwsaǵa bılay dedi:
– Mine, Men sizlerge aspannan nan jawdıraman. Xalıq hár kúni shıǵıp, bir kúnlik nanın jıynap alsın. Usılayınsha Men olardı sınap, olardıń Meniń kórsetpelerim boyınsha jasaytuǵının yamasa jasamaytuǵının kórejaqpan. 5Al altınshı kúni#16:5 Altınshı kúni – evrey kalendarı boyınsha juma kúni altınshı kún dep esaplanǵan. olar hár kúni jıynaǵanınan eki ese artıq qılıp toplap, tayarlap qoysın.
6Muwsa menen Xaron pútkil izraillılarǵa bılay dedi:
– Sizlerdi Mısırdan Jaratqan Iyeniń Ózi alıp shıqqanın búgin keshte bilip alasızlar. 7Al erteń azanda Jaratqan Iyeniń saltanatın kóresizler. Sebebi Ol sizlerdiń Ózine narazı bolıp, tońqıldaǵanıńızdı esitti. Biraq bizlerge narazı bolatuǵınday, bizler kim bolıppız?
8Keyin Muwsa bılay dedi:
– Keshqurın sizlerge jew ushın gósh, azanda toyǵanıńızsha nan berilgende, sizler Jaratqan Iyeniń saltanatın kóresizler. Óytkeni Jaratqan Iye sizlerdiń Ózine qarsı narazılıq bildirgenińizdi esitti. Al bizler kim bolıppız? Sizler bizlerge emes, al Jaratqan Iyege narazılıq bildirip atırsızlar.
9Keyin Muwsa Xaronǵa:
– Izrail xalqınıń pútkil jámiyetine ayt, Jaratqan Iyeniń aldına kelsin. Sebebi Jaratqan Iye olardıń tońqıldıların esitti, – dedi.
10Xaron Izrail xalqınıń pútkil jámiyetine usılardı aytıp turǵanda, olar shólge qaradı. Sonda Jaratqan Iyeniń saltanatı bult ishinde kórindi.
11Jaratqan Iye Muwsaǵa bılay dedi:
12– Men izraillılardıń tońqıldıların esittim. Olarǵa mınaday dep ayt: «Keshqurın gósh jep, azanda nanǵa toyatuǵın bolasızlar. Sonda sizler Meniń – Qudayıńız Jaratqan Iye ekenimdi bilip alasızlar».
13Keshqurın bódeneler ushıp kelip, ordanı basıp ketti. Al azanda ordanıń átirapın shıq qapladı. 14Shıq kepkende, shóldegi jerdiń betinde qırawǵa uqsaǵan, mayda dán sıyaqlı bir nárse kórindi. 15Bunı kórgende, izraillılar bir-birinen: «Bul ne?» – dep sorastı. Sebebi olar bunıń ne ekenin bilmeytuǵın edi.
Muwsa olarǵa:
– Bul – Jaratqan Iyeniń sizlerge jew ushın bergen nanı. 16Jaratqan Iye bılay dep buyıradı: «Hár bir adam jey alǵandayın jıynap alsın. Shatırıńızdaǵı hár bir adam ushın bir omerden#16:16 Bir omer – shama menen 2,2 l. alıńlar».
17Izraillılar solay islep, kimisi kóp, kimisi az jıynadı. 18Omer menen ólshegende, kóp jıynaǵannıń artıǵı, az jıynaǵannıń kemisi bolmadı. Hár bir adam jey alatuǵın muǵdarda jıynaǵan edi.
19Muwsa olarǵa:
– Hesh kim onnan azanǵa deyin bir túyir qaldırmasın, – dedi.
20Degen menen, ayırımlar Muwsanı tıńlamay, azanǵa deyin qaldırǵanda, ol qurtlap, sasıy basladı hám Muwsanıń olarǵa ǵázebi keldi.
21Hár kúni azanda hár bir adam ózi jey alatuǵın muǵdarda jıynaytuǵın edi. Al quyash qızǵan waqıtta jerde qalǵanları erip ketetuǵın edi. 22Altınshı kúni adam basına eki omerden, yaǵnıy eki ese jıynaytuǵın edi. Jámiyet basshıları kelip, awhaldı Muwsaǵa bildirdi. 23Muwsa olarǵa bılay dedi:
– Jaratqan Iyeniń buyrıǵı mınaw: erteń Jaratqan Iyege arnalǵan tolıq dem alatuǵın muxaddes Shabbat kúni. Sonıń ushın, búgin pisiretuǵınıńızdı pisirip, qaynatatuǵınıńızdı qaynatıp alıńlar. Al awısıp qalǵanın azanǵa deyin saqlap qoyıńlar.
24Muwsanıń buyırǵanınday, xalıq awısıp qalǵandı azanǵa deyin saqlap qoyǵanda, ol sasımadı da, qurtlap ta ketpedi. 25Sonda Muwsa olarǵa bılay dedi:
– Awısıp qalǵandı búgin jeńler. Sebebi búgin Jaratqan Iye ushın Shabbat kúni. Búgin daladan manna taba almaysızlar. 26Sizler onı altı kún jıynańlar. Biraq jetinshi kúni bolǵan Shabbat kúni ol ulıwma bolmaydı.
27Jetinshi kúni ayırımlar nan jıynaw ushın sırtqa shıqqanda, hesh nárse taba almadı. 28Sonda Jaratqan Iye Muwsaǵa bılay dedi:
– Qashanǵa shekem buyrıqlarım hám kórsetpelerimdi orınlawdan moyın tawlaysızlar? 29Minekey, Men sizlerge Shabbat kúnin berdim. Sonlıqtan altınshı kúni sizlerge eki kúnlik nan berip atırman. Jetinshi kúni hár bir adam qay jerde jasap atırǵan bolsa, sol jerde qalsın, sırtqa shıqpasın.
30Solay etip, xalıq jetinshi kúni dem aldı.
31Izraillılar sol nandı manna#16:31 Manna – evreyshe sóz bolıp, «Bul ne?» sózine únles. 15-ayatqa qarań. dep atadı. Onıń kórinisi kinza tuqımı sıyaqlı bolıp, dámi pal qosılǵan shórekke uqsaytuǵın edi. 32Muwsa xalıqqa bılay dedi:
– Jaratqan Iye bılay dep buyıradı: «Sizlerdi Mısırdan alıp shıqqanımda, Meniń sizlerge shólde bergen nanımdı keleshek áwladlardıń kóriwi ushın, onıń bir omerin saqlap qoyıńlar».
33Muwsa Xaronǵa:
– Bir ıdıstı alıp, ishine bir omer manna sal. Keleshek áwladlarǵa saqlanıp qalıwı ushın, onı Jaratqan Iyeniń aldına qoy, – dedi.
34Jaratqan Iyeniń Muwsaǵa buyırǵanınday, Xaron mannanı saqlap qoyıw ushın, onı Kelisim sandıǵınıń aldına qoydı.
35Izraillılar mákan etilgen Qanan jerine jetip barǵansha, qırıq jıl manna jedi. 36Bir omer efanıń#16:36 Efa – bir efa shama menen 22 l. onnan bir bólegine tuwrı keletuǵın edi.
Currently Selected:
Shıǵıw 16: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
