Jaratılıs 13
13
Ibram menen Luttıń bir-birinen bóliniwi
1Ibram hayalın hám óziniń barlıq mal-múlkin aldı da, Mısırdan shıǵıp, Negebke ketti. Lut ta olar menen birge ketti. 2Ibram mallarǵa, gúmis hám altınlarǵa oǵada bay edi. 3Ol Negebten Beyt-Elge shekem kóship-qonıp júrdi hám Beyt-El menen Ay qalasınıń ortasındaǵı burın ózi shatır qurǵan orınǵa keldi. 4Sol jerde burın ózi qurǵan qurbanlıq orınǵa barıp, Jaratqan Iyeniń atın aytıp shaqırdı.
5Ibram menen birge kóshken Luttıń da iri hám mayda malları, shatırları bar edi. 6Olardıń mal-múlki sonshelli kóp bolǵanlıqtan jer jetispey, birge jasaw múmkin bolmay qaldı. 7Sonlıqtan Ibram menen Luttıń shopanları arasında jánjel payda boldı. Sol waqıtları qanan hám periz xalıqları da usı elde jasaytuǵın edi.
8Sonda Ibram Lutqa: «Bizlerdiń aramızda da, shopanlarımızdıń arasında da jánjel bolmasın. Aqırı, bizler tuwısqanbız-ǵo! 9Barlıq jer seniń kóz aldıńda. Kel, bólineyik. Eger sen solǵa ketseń, men ońǵa ketemen. Eger sen ońǵa ketseń, men solǵa ketemen», – dedi.
10Lut átirapına qarap, pútkil Iordan tegisliginiń Soarǵa shekemgi mol suwlı jerlerin kórdi. Jaratqan Iye Sodom hám Gomoranı joq etpesten aldın, bul jerler Jaratqan Iyeniń baǵınday, Mısır jerindey edi. 11Lut pútkil Iordan tegisligin tańlap, shıǵısqa qaray ketti. Solay etip, olar bir-birinen bólindi. 12Ibram Qanan jerinde qaldı, al Lut tegisliktegi qalalardıń arasına jaylasıp, Sodomǵa jaqın jerge shatır qurdı. 13Sodom xalqı jawız bolıp, Jaratqan Iyege qarsı kóp gúnalar isleytuǵın edi.
14Lut Ibramnan bólingennen soń, Jaratqan Iye Ibramǵa bılay dedi: «Óziń turǵan jerden arqaǵa hám qublaǵa, shıǵısqa hám batısqa qara! 15Óziń kórip turǵan jerdiń hámmesin saǵan hám seniń urpaqlarıńa máńgige beremen. 16Urpaqlarıńdı jerdiń qumı sıyaqlı kóbeytemen. Kim de kim jerdegi qumlardı sanay alsa, seniń urpaqlarıńdı da sanay aladı. 17Qánekey, bar da, Meniń saǵan beretuǵın jerlerimdi bastan ayaǵına shekem aylanıp shıq».
18Ibram Xebronǵa jaqın jerdegi Mamreniń terebinf terekligi janına shatırların kóshirip aparıp ornalastı. Sol jerde ol Jaratqan Iyege arnap qurbanlıq orın qurdı.
Currently Selected:
Jaratılıs 13: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
