Jaratılıs 37
37
Yusuptiń túsleri
1Yaqıp ákesi kelgindi bolıp jasaǵan Qanan jerinde jasay berdi. 2Yaqıptıń urpaqlarınıń tariyxı tómendegishe: Yusup on jeti jasar waqtında ájaǵalarına, yaǵnıy ákesiniń hayalları Bilha menen Zilpanıń ullarına qoy-eshkilerdi baǵısatuǵın edi. Ol ákesine ájaǵalarınıń jaman isleri haqqında jetkizip turatuǵın edi. 3Izrail Yusupti basqa barlıq ullarınan góre kóbirek jaqsı kórdi, óytkeni ol Izraildıń qartayǵan shaǵında kórgen ulı edi. Ákesi Yusupke naǵıslı shapan tikkizip berdi. 4Yusuptiń ájaǵaları ákesiniń onı ózlerinen góre kóbirek jaqsı kóretuǵının bilgende, onı jek kórip qaldı hám endi onıń menen jıllı sóylese almaytuǵın boldı.
5Bir kúni Yusup tús kórdi. Ol óz túsin ájaǵalarına aytıp bergende, olar Yusupti burınǵıdan da beter jek kórip qaldı. 6Yusup ájaǵalarına:
– Men kórgen túsimdi aytıp bereyin, tıńlańlar! 7Túsimde bizler atızda dástelerdi bawlap atırǵan ekenbiz. Birden meniń bawlaǵan bawım jerden kóterilip, tik turdı. Al sizlerdiń bawlarıńız meniń bawımdı dógereklep, oǵan tájim etti, – dedi.
8Yusuptiń ájaǵaları oǵan:
– Sen ele bizlerdiń ústimizden patsha bolıp, bizlerdi basqarmaqshımısań? – dedi.
Kórgen túsin aytqanı sebepli ájaǵaları onı burınǵıdan da beter jek kórip qaldı.
9Keyin Yusup taǵı bir tús kórdi hám onı da ájaǵalarına aytıp berip bılay dedi:
– Tıńlańlar, men jáne bir tús kórdim. Túsimde quyash, ay hám on bir juldız maǵan tájim etip atırǵan eken.
10Yusup bul túsin ákesine de aytıp bergende, ákesi oǵan keyip:
– Sen qanday tús kórdiń ózi? Sonda ne men, anań hám ájaǵalarıń aldıńa kelip, jerge deyin iyilip, tájim etemiz be? – dedi.
11Ájaǵaları Yusupke qızǵanısh penen qarawdı dawam etti, biraq ákesi onıń sózlerin esinde saqlap qaldı.
Yusuptiń qullıqqa satılıwı
12Bir kúni Yusuptiń ájaǵaları ákesiniń qoy-eshkilerin baǵıw ushın Shexemge ketti. 13Izrail Yusupke:
– Ájaǵalarıńnıń Shexemde qoy-eshkilerdi baǵıp atırǵanın bileseń. Bar, men seni olarǵa jibereyin, – dedi.
– Yaqshı, – dedi Yusup.
14Ákesi oǵan:
– Barıp, ájaǵalarıńnıń hám súriwdiń jaǵdayın bilip qayt, – dep onı Xebron oypatlıǵınan Shexemge jiberdi.
Yusup Shexemge jetip barıp, 15dalada adasıp júrgende, bir adam onı kórip:
– Ne izlep júrseń? – dep soradı.
16Yusup oǵan:
– Men ájaǵalarımdı izlep júrmen. Olardıń qoy-eshkilerdi qay jerde baǵıp júrgenin bilmeysiz be? – dedi.
17Ol adam Yusupke:
– Olar bul jerden ketip qaldı. «Dotanǵa baramız», degenin esitip qaldım, – dedi.
Solay etip, Yusup ájaǵalarınıń izinen ketip, olardı Dotannan taptı.
18Ájaǵaları Yusupti uzaqtan kórdi hám ol ele qaslarına jetip kelmesten burın, onı óltiriwge til biriktire basladı. 19Olar bir-birine:
– Áne, tús kórgish kiyatır! 20Kelińler, onı óltirip, bir suw saqlanatuǵın shuqırǵa taslayıq. Sońınan onı jırtqısh haywan jep ketipti, dep aytamız. Sonda onıń kórgen túsleriniń ne bolatuǵının kóremiz! – dedi.
21Ruben bunı esitkende, Yusupti olardıń qolınan qutqarmaqshı bolıp, olarǵa:
– Onı óltirmeyik. 22Qan tókpeyik, onı usı shóldegi bir suw saqlanatuǵın shuqırǵa taslayıq, biraq ózine tiymeyik, – dedi.
Onıń niyeti Yusupti qutqarıp, ákesine qaytarıw edi. 23Yusup ájaǵalarınıń janına kelgende, olar onıń ústindegi naǵıslı shapandı sheship alıp, 24ózin bir suwsız, bos shuqırǵa taslap jiberdi.
25Ájaǵaları awqatlanıw ushın jayǵasıp otırǵanda, Gilad tárepten kiyatırǵan ismayıllılardıń kárwanın kórdi. Olar túyelerine mum, balzam hám ladan#37:25 Ladan – xosh iyisli shayır. júklep, Mısırǵa ketip baratır edi. 26Yahuda aǵa-inilerine:
– Inimizdi óltirip, onıń qanın jasırǵanımızdan ne payda? 27Jaqsısı, onı ismayıllılarǵa satayıq, sonda qolımız onıń qanına bılǵanbaydı. Sebebi ol bizler menen qanı bir tuwısqanımız-ǵo, – dedi.
Tuwısqanlar buǵan ırazı boldı. 28Midyanlı sawdagerler, yaǵnıy ismayıllılar sol jerden ótip baratırǵanda, ájaǵaları Yusupti shuqırdan shıǵarıp aldı da, onı sol sawdagerlerge jigirma shekel gúmiske satıp jiberdi. Olar Yusupti Mısırǵa alıp ketti.
29Ruben shuqırǵa qaytıp kelgende, Yusuptiń shuqırdıń ishinde joq ekenin kórip, qayǵıdan kiyimlerin jırttı. 30Ol inileriniń janına qaytıp barıp, olarǵa:
– Bala ol jerde joq, endi men ne qılaman, – dedi.
31Sonda olar bir tekeni soyıp, Yusuptiń naǵıslı shapanın alıp, onı tekeniń qanına bılǵadı. 32Sońınan shapandı ákesine jiberip:
– Bizler mınanı tawıp aldıq. Qara, bul ulıńnıń shapanı emes pe? – dep sorattı.
33Yaqıp shapandı tanıp:
– Awa, bul – ulımnıń shapanı! Onı jırtqısh haywan jep ketip, Yusup tilkim-tilkim bolǵan eken-ǵo, – dedi. 34Yaqıp qayǵıdan kiyimin jırtıp, aza kiyimin kiyip aldı hám ulı ushın uzaq waqıt aza tuttı.
35Barlıq ul-qızları oǵan táselle berse de, ol jubanǵısı kelmey: «Men ulımnıń janına, óliler mákanına usı qayǵım menen ketemen», – dep ulın joqlawdı dawam etti.
36Sol arada midyanlılar Yusupti Mısırda faraonnıń saray xızmetshisi Potifarǵa satıp jiberdi. Ol saqshılardıń basshısı edi.
Currently Selected:
Jaratılıs 37: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
