Jaratılıs 44
44
Joytılǵan gúmis kese
1Yusup óziniń úy basqarıwshısına bılay dep buyırdı:
– Bul adamlardıń qapların ózleri kótere alǵansha azıq-awqatqa toltır hám hár biriniń gúmisin qabınıń awzına sal. 2Eń genjesiniń qabınıń awzına ǵálle ushın tólengen gúmisine qosa, meniń gúmis kesemdi de salıp qoy.
Úy basqarıwshısı Yusuptiń aytqanınday etip isledi.
3Erteńine tań atıwdan, sol adamlar eshekleri menen birge jolǵa atlandırıldı. 4Olar qaladan uzaqlap ketpey turıp, Yusup óziniń úy basqarıwshısına bılay dep buyırdı:
– Bar, sol adamlardıń izinen quw. Jetip alǵanıńnan keyin, olarǵa bılay dep ayt: «Ne ushın sizler jaqsılıqqa jamanlıq qaytardıńız? 5Ne ushın xojayınımnıń gúmis kesesin urlap kettińiz? Xojayınım onnan iship, onı pal ashıw ushın qollanadı-ǵo. Sizler jaman is isledińler».
6Úy basqarıwshısı aǵalı-inililerdiń izinen quwıp jetip, olarǵa usı gáplerdi ayttı.
7Aǵalı-inililer oǵan:
– Mırzamız, ne ushın bunday sózlerdi aytıp tursız? Siziń qullarıńız bolǵan bizler bunday islerdi islewden awlaqpız. 8Hátte, bizler qaplarımızdıń awzınan tapqan gúmisti Qanan jerinen sizge qaytarıp ákelip bergen edik-ǵo. Qalay bizler xojayınıńızdıń úyinen gúmis yamasa altın urlaymız? 9Gúmis kese qullarıńızdıń qaysı birinen tabılsa, sol óltirilsin, al qalǵanlarımız xojayınımızǵa qul bolayıq, – dedi.
10Úy basqarıwshısı:
– Meyli, sizler aytqanday bolsın. Kese kimnen tabılsa, sol meniń qulım boladı. Al qalǵanlarıńız ayıpsız bolasız, – dedi.
11Olar dárhal qapların jerge túsirip, awızların ashtı. 12Úy basqarıwshı úlkeninen baslap, kishisine deyin, hámmesiniń qapların tekserip shıqtı. Kese Benyaminniń qabınan tabıldı. 13Tuwısqanlar qayǵıdan kiyimlerin jırttı hám júklerin esheklerine artıp, qalaǵa qaytıp bardı.
14Yahuda hám tuwısqanları Yusuptiń úyine kelgende, ol ele úyde edi. Olar Yusuptiń aldında jerge jıǵıldı. 15Yusup olarǵa:
– Nege bunday isledińiz? Mendey adamnıń pal ashıp, bilip alatuǵının bilmedińiz be? – dedi. 16Sonda Yahuda:
– Mırzamızǵa bizler ne ayta alamız? Ne dep túsindire alamız? Ózlerimizdi qalay aqlay alamız? Quday qullarıńızdıń ayıbın áshkara etti. Bizler de, kese tabılǵan adam da sizge qul bolamız, – dedi.
17Yusup:
– Yaq, men bunday islewden awlaqpan. Kese kimnen tabılǵan bolsa, tek sol maǵan qul boladı. Al sizler aman-esen ákeńizdiń aldına qayta beriń, – dedi.
Yahudanıń Benyamin ushın jalbarınıwı
18Sonda Yahuda Yusupke jaqınıraq kelip bılay dedi:
– Mırzam, maǵan bir sóz aytıwǵa ruxsat etiń. Siz faraon menen birdey biylikke iyesiz, qulıńızǵa ashıwlanbań. 19Mırzam, siz qullarıńız bolǵan bizlerden: «Ákeńiz yamasa basqa tuwısqanıńız bar ma?» – dep soraǵanıńızda, 20bizler sizge: «Ǵarrı ákemiz hám onıń qartayǵanda kórgen genje ulı bar. Onıń tuwısqanı ólip, anasınan jalǵız qalǵan edi hám ákemiz onı jaqsı kóredi», – degen edik. 21Sonda siz qullarıńız bolǵan bizlerge: «Onı maǵan alıp keliń, bir kóreyin», – degen edińiz. 22Biraq bizler sizge: «Bala ákesin taslap kete almaydı. Eger ákesi onnan ayırılsa, ólip qaladı», – degen edik. 23Siz qullarıńız bolǵan bizlerge: «Eger genje inińiz sizler menen birge kelmese, kózime kórinbeń», – degen edińiz. 24Bizler siziń qulıńız bolǵan ákemizge qaytıp barǵanımızda, siziń sózlerińizdi oǵan aytıp berdik. 25Ákemiz: «Jáne barıp, bizlerge az-maz azıq-awqat satıp alıńlar», – degende, 26bizler oǵan: «Bara almaymız, eger genje inimiz bizler menen birge barsa ǵana, baramız. Genje inimiz bizler menen birge bolmasa, ol adamnıń júzin kóre almaymız», – dedik. 27Sonda qulıńız bolǵan ákemiz bizlerge: «Hayalım Rahilanıń maǵan eki ul tuwıp bergenin bilesiz. 28Birewinen ayırıldım. Onı bir haywan tilkim-tilkim etip taslaǵan, sonnan beri onı qaytıp kórmedim. 29Eger sizler bunı da alıp ketseńiz hám ol bir bálege jolıqsa, onda sizler meniń ǵarrı basımdı sol qayǵı menen óliler mákanına jiberesizler», – dedi. 30Endi men siziń qulıńız bolǵan ákemizge qaytıp barǵanımda, onıń janınan artıq kóretuǵın ulı qasımda bolmasa, 31ol ulınıń joq ekenin kórip, ólip qaladı. Sonda siziń qulıńız bolǵan bizler qulıńız bolǵan ákemizdiń ǵarrı basın sol qayǵı menen óliler mákanına jiberemiz. 32Siziń qulıńız bolǵan men bul bala ushın basım menen juwap beremen dep, ákeme: «Eger onı saǵan qaytarıp alıp kelmesem, onda men bir ómir seniń aldıńda ayıpker bolayın», – dedim. 33Sonlıqtan endi balanıń ornına sizge men qul bolıp qalayın. Al bala tuwısqanları menen birlikte qayta bersin. 34Sebebi bala janımda bolmasa, ákeme qalay qaytıp baraman? Men ákemniń basına túsetuǵın baxıtsızlıqqa shıday almayman.
Currently Selected:
Jaratılıs 44: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
