Jaratılıs 47
47
Yusuptiń ákesi hám tuwısqanlarınıń faraon menen ushırasıwı
1Yusup faraonǵa barıp:
– Ákem hám tuwısqanlarım súriwleri, padaları hám barlıq mal-múlki menen Qanan jerinen keldi. Olar házir Goshen jerinde, – dep xabarladı.
2Keyin Yusup ájaǵalarınıń ishinen besewin tańlap alıp, faraonnıń aldına alıp keldi.
3Faraon Yusuptiń aǵalarınan:
– Kásip-kárińiz ne? – dep soradı.
Olar bılay dep juwap berdi:
– Siziń qullarıńız bolǵan bizler ata-babalarımız sıyaqlı shopanbız. 4Bizler bul elge waqıtsha jasaw ushın keldik. Qanan jerinde kúshli ashlıq bolıp, mallarımız jayılatuǵın óris qalmadı. Ruxsat etseńiz, Goshen jerine ornalasayıq.
5Sonda faraon Yusupke:
– Ákeń hám tuwısqanlarıń saǵan kelipti. 6Mısır jeri seniń ıqtıyarıńda. Olardı eldiń eń jaqsı jerine ornalastır. Olar Goshen jerinde jasasın. Eger olardıń arasında uqıplı adamlar bar bolsa, olardı meniń sharwam ústinen baqlawshı etip qoy, – dedi.
7Keyin Yusup ákesi Yaqıptı faraonnıń aldına apardı. Yaqıp faraonǵa pátiyasın berdi. 8Faraon Yaqıptan:
– Jasıńız neshede? – dep soradı.
9Yaqıp oǵan:
– Men bir júz otız jıldan beri dúnyaǵa miymanman. Meniń ómirim tez hám mashaqatlı ótti, biraq men ata-babalarımnıń miyman bolıp jasap ketken jasına ele jetpedim, – dep juwap berdi.
10Sońınan Yaqıp faraonǵa pátiyasın berip, onıń aldınan shıǵıp ketti.
11Solay etip, Yusup ákesin hám tuwısqanların Mısırǵa ornalastırıp, faraonnıń buyırǵanınday, olarǵa eldiń eń jaqsı jerinen, Ramses úlkesinen menshik jer berdi. 12Jáne de, Yusup ákesin, tuwısqanların hám ákesiniń úy-ishin balalarınıń sanına qaray azıq-awqat penen támiyinledi.
Ashlıq jılları Yusuptiń Mısırdı basqarıwı
13Ashlıqtıń kúsheygeni sonshelli, hesh bir elde jeytuǵın nárse qalmadı. Mısır hám Qanan elleri qırılıp kete jazladı. 14Yusup satqan dáni ushın Mısırdaǵı hám Qanandaǵı barlıq gúmislerdi jıynap, faraonnıń sarayına apardı. 15Mısırda da, Qananda da gúmis tawısılǵanda, mısırlılar Yusupke kelip:
– Bizlerge jeytuǵın nárse beriń! Bizler siziń kóz aldıńızda ólip keteyik pe? Gúmislerimiz de tawısıldı, – dedi. 16Yusup olarǵa:
– Eger gúmisińiz tawısılǵan bolsa, mallarıńızdı alıp keliń. Men olardıń ornına sizlerge azıq-awqat beremen, – dedi.
17Solay etip, olar malların Yusupke alıp keldi. Yusup olardıń atları, mayda-iri malları hám eshekleriniń ornına azıq-awqat berdi. Yusup bir jıl boyı olardı mallarınıń ornına azıq-awqat penen támiyinledi.
18Sol jıl ótkennen soń, keyingi jılı xalıq jáne Yusuptiń aldına kelip:
– Mırzamız, sizden haqıyqattı jasırmaymız: gúmisimiz tawısıldı, mallarımızdı sizge berdik. Endi sizge ózimizden hám jerimizden basqa beretuǵın hesh nársemiz qalmadı. 19Bizler siziń kóz aldıńızda ólip keteyik pe? Jerlerimiz de shólge aylansın ba? Siz bizlerdi hám jerlerimizdi satıp alıp, ornına azıq-awqat beriń. Bizler jerimiz benen birge faraonnıń qulı bolayıq. Bizlerge tuqım beriń, ólmey, tiri qalayıq, jer de qańırap qalmasın, – dedi.
20Solay etip, Yusup Mısırdaǵı barlıq jerlerdi faraon ushın satıp aldı. Mısırlılardıń hámmesi atızların sattı. Óytkeni ashlıq olardı buǵan májbúr etti. Jerlerdiń hámmesi faraondiki boldı. 21Yusup Mısırdıń bir shetinen ekinshi shetine deyin pútkil xalıqtı faraonnıń qulına aylandırdı. 22Ol tek ruwxaniylerdiń jerlerin ǵana satıp almadı. Sebebi olar faraon tárepinen támiyinlenip, sol arqalı kún keshirgenlikten, jerlerin satpadı.
23Yusup xalıqqa:
– Men sizlerdi hám jerlerińizdi faraon ushın satıp aldım. Mine, sizlerge tuqım, onı jerge egińler. 24Zúráát jıynaǵanıńızda, zúrááttiń besten bir bólegin faraonǵa beresiz. Al qalǵan tórt bólegin atızǵa egetuǵın tuqım retinde qollanasız, jáne de, ózińiz, xojalıǵıńız hám balalarıńız ushın awqat qılasız, – dedi.
25Xalıq Yusupke:
– Siz bizlerdiń ómirimizdi saqlap qaldıńız. Mırzamızdıń kewlinen shıǵayıq hám bizler faraonnıń qulı bolayıq, – dedi.
26Yusup zúrááttiń besten birin faraonǵa beriw haqqında Mısırda nızam shıǵardı hám bul nızam házirgi kúnge deyin saqlanıp keledi. Tek ruwxaniylerdiń jerleri ǵana faraonǵa berilmedi.
Yaqıptıń sońǵı tilegi
27Izrail Mısırda Goshen jerine ornalastı. Olar sol jerde múlik iyesi boldı hám ósip-ónip, júdá kóbeydi.
28Yaqıp Mısırda on jeti jıl jasadı. Ol barlıǵı bolıp bir júz qırıq jeti jıl ómir súrdi.
29Ólimi jaqınlasqanda, Yaqıp ulı Yusupti shaqırıp alıp, oǵan bılay dedi:
– Maǵan miyrim kórset. Sanımnıń astına qolıńdı qoy da, maǵan jaqsılıq islep, sadıqlıq kórsetetuǵınıńa hám meni Mısırda jerlemeytuǵınıńa ant ish. 30Men qaytıs bolǵanımnan soń, meni Mısırdan alıp ketip, ata-babalarımnıń janına jerle.
Yusup ákesine:
– Men aytqanıńızday isleymen, – dedi.
31Izrail oǵan:
– Maǵan ant ish! – dedi.
Yusup ant ishti. Izrail tóseginiń bas ushında iyilip, Qudayǵa sıyındı.
Currently Selected:
Jaratılıs 47: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
