Jaratılıs 50
50
1Sonda Yusup ózin ákesiniń ústine taslap, jılap turıp, onı súydi. 2Ol óz xızmetindegi shıpakerlerge ákesiniń denesin mumiyalawdı buyırdı. Olar Izraildı mumiyaladı. 3Bul is qırıq kúnge sozıldı. Sebebi mumiyalawǵa sonsha waqıt kerek edi. Mısırlılar Izrail ushın jetpis kún aza tuttı.
4Azalaw kúnleri ótkennen keyin, Yusup faraonnıń wázirlerine:
– Maǵan miyrim kórsetip, faraonǵa mınalardı jetkizińler. 5Ákem maǵan ant ishtirip: «Meniń ólimim jaqınlastı. Meni Qanan jerindegi ózim ushın qazdırǵan qábirge aparıp qoy», – degen edi. Endi faraon ákemdi jerlep qaytıwıma ruxsat bersin, – dedi.
6Sonda faraon Yusupke:
– Ákeńe bergen antıńdı orınlap, onı jerlep qayt, – dedi.
7Solay etip, Yusup ákesin jerlewge ketti. Faraonnıń barlıq xızmetshileri, saraydıń hám Mısır eliniń basshıları onıń menen birge ketti. 8Sonday-aq, Yusuptiń pútkil xojalıǵı, tuwısqanları hám ákesiniń úy-ishi de onıń menen birge edi. Tek balalardı, mayda hám iri mallardı Goshen jerinde qaldırdı. 9Sawash arbalar hám onıń ústindegi áskerler de olarǵa qosılıp, úlken kóshke aylandı.
10Olar Iordan dáryasınıń shıǵısındaǵı Atad qırmanına jetip barǵanda, way-waylap jılap, dawıs shıǵardı. Yusup ákesi ushın jeti kún aza tuttı. 11Sol jerde jasaytuǵın qananlılar Atad qırmanındaǵı azalaw máresimin kórip: «Mısırlılar qanshelli awır aza tutıp atır!» – desti. Sol sebepli Iordannıń shıǵısındaǵı bul jerge Abel-Misrayım#50:11 Abel-Misrayım – «mısırlılardıń aza tutıwı» degendi bildiredi. atı berildi.
12Yaqıptıń ulları ákesiniń wásiyatın tolıq orınladı. 13Onıń denesin Qanan jerine ákelip, Mamrege jaqın jerdegi Maxpela atızındaǵı úńgirge qoydı. Bul úńgirdi Ibrayım xet xalqınan bolǵan Efronnan mazar qılıw ushın atız benen birge satıp alǵan edi. 14Yusup ákesin jerlep bolǵannan soń, onıń ózi, tuwısqanları hám onıń menen birge ákesin jerlewge barǵanlardıń hámmesi Mısırǵa qayttı.
Yusuptiń aǵalarına táselle beriwi
15Ákesi ólgennen keyin, Yusuptiń aǵaları bir-birine: «Eger Yusup bizlerge ele de kek saqlap júrgen bolıp, oǵan islegen jamanlıqlarımız ushın bizlerden ósh almaqshı bolsa ne qılamız?» – desti. 16Solay etip, olar Yusupke mınaday xabar jolladı: «Ákemiz ólmesinen aldın wásiyat etip, 17saǵan: „Aǵalarıńnıń saǵan islegen jamanlıǵın, olardıń ayıp hám gúnasın keshir“, – dep aytıwımızdı tapsırǵan edi. Endi sen ákeńniń Qudayınıń qulları bolǵan bizlerdiń gúnamızdı keshir!» Yusup bul xabardı esitkende jılap jiberdi.
18Sonnan keyin, aǵalarınıń ózleri Yusupke kelip, onıń aldında jerge jıǵılıp:
– Bizler seniń qullarıńbız, – dedi.
19Biraq Yusup olarǵa:
– Qorqpańlar! Men Quday emespen. 20Sizler maǵan jamanlıq oylaǵan edińiz. Biraq Quday kóp adamlardıń ómirin saqlap qalıw ushın, házir ózlerińiz kórip turǵanıńızday, bul jamanlıqtı jaqsılıqqa aylandırdı. 21Sonlıqtan qorqpańlar, men sizlerdi de, balalarıńızdı da baǵaman, – dedi de, aǵalarınıń júregine jaǵatuǵın jıllı sózler aytıp, olarǵa táselle berdi.
Yusuptiń ólimi
22Solay etip, Yusup hám onıń ákesiniń úy-ishi Mısırda jasap qaldı. Yusup bir júz on jıl jasadı. 23Yusup Efrayımnıń aqlıq-shawlıqların kórdi. Menashsheniń ulı Maxirdiń ulların bawırına bastı.
24Yusup tuwısqanlarına:
– Meniń ólimim jaqınlastı. Biraq Quday sizlerge sózsiz názer saladı. Ol sizlerdi bul jerden alıp shıǵıp, Ózi Ibrayımǵa, Ísaqqa hám Yaqıpqa beremen dep ant ishken jerine aparadı, – dedi.
25Sońınan olarǵa ant ishtirip:
– Quday sizlerge sózsiz názer saladı. Sonda sizler meniń súyegimdi bul jerden alıp ketińler, – dedi.
26Yusup bir júz on jasqa shıǵıp qaytıs boldı. Onıń denesin mumiyalap, Mısırda bir tabıtqa salıp qoydı.
Currently Selected:
Jaratılıs 50: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
