यूहन्ना 18
18
येशूला ज़ुङग्यो
(मत्ती २६:४७-५६; मर्क १४:४३-५०; लूक २२:४७-५३)
1दि स्याहल सुङ छार फान्ज्यो येशू राहङ स्याहप्च्यीया़ ङ्याम्बु किद्रोन माएँ लुहङ च्येती तुहम्रा च्यी़ला फेप नाङसीन। 2ओ़ह ग्या़ येशूला ज़ुङ च्य़ूगे यहूदाॱलाङ या़हबु पेहती क्यी़ह येहकें च्यिबेमाना येशू राहङगी स्याहप्च्यीया़ ङ्याम्बु ओ़ह ग्या़ला लेहमा माहङबुराङ फेप नाङग्यो येहकें। 3ओहजे काहङला लो, मेहदाङ दाङ छेन्ज्याया़ थो़दी माक्मीया़गी मिह बा़ल च्यी़, ओहले पूजाहारी छ्यिम्बु दाङ फरिसीया़गी ताङग्यो कोह सुङगे मिहया़ ख्योङदी यहूदा ओ़हला ओहङसीन।
4राहङ थो़ला बाप ओहङगेन केच्याया़गी तेहन्दाला येशूला तोहङलेराङ थुयी़ येहकें। ओ़ह सोङबे येशू तोहङले फेप्ती ओ़ह मिहया़ला टी़ह नाङसीन, “ख्यागी सुला छोल्ग्यो?” 5ओहले खुङया़गी मासीन, “नासरतकी येशूला।” येशूगी खुङया़ला सुङ नाङसीन, “ङाह ओ़हदीॱराङ यिहन।” येशूला ज़ुङ च्य़ूगेन्गी यहूदाॱआङ खुङ ङ्याम्बुराङ लाहङ तेहती येहकें। 6ओहले येशूगी, “ङाह ओ़हदीॱराङ यिहन” म़ेदी सुङ-लुहङ म़ेहबा खुङया़ क्याहप लो़ह काहल्सीन ओहले साला रिहल्सीन। 7येहपाराङ येशूगी खुङया़ला टी़ह नाङसीन, “ख्यागी सुला छोल्ग्यो यिहम्बा?” ओहले खुङया़गी मासीन “नासरतकी येशूला।” 8ओहले येशूगी सुङ नाङसीन, “ङाह ओ़हदीॱराङ यिहन म़ेदी ङाहगी ख्याला मा सिहन्सीन ले। तेहम्बाराङ ख्यागी ङाहलाराङ छोल्ग्यो यिहनानी दि खुङया़लादी ताङदोङ नाह।” 9“राहङगी ङाहला नाङग्योया़ नाहङला मेहन्दा च्यी़ॱआङ तोर च्य़ूदी म़ेह” म़ेदी मिहरोगी सुङ नाङग्योकी स्याहल तेहन्दा डुप्च्यु म़ेदी दि काहल्ग्यो यिहम्बा। 10सिमोन-पत्रुसगी राहङ ङ्याम्बु येहकेन्गी पादाङ तेन्दी पूजाहारी छ्यिम्बुगी योक्पुला क्याहप्ती खोती योबा ङो़गी नाम्ज्यो रेहप च्ये तेर्सीन। खोती मिहन माल्खस यिहन्गे। 11येशूगी पत्रुसला सुङ नाङसीन, “पादाङ स्युपला ज़्या़दोङ! च्यि ङाहला याहपगी नाङग्योकी स्याहलु ङाहगी मिहथुङज्ये ले?”#मत्ती २६:३९; मर्क १४:३६; लूक २२:४२
हन्नासकी दिनला येशू
12ओ़ह तिङले माक्मीया़गी मिह बा़ल च्यी़, खुङया़गी माक्पेन दाङ यहूदीया़की कोह सुङगे मिहया़गी येशूला ज़ुङदी ताहम्सीन। 13थाम्ज्यी म़ेदी तोहङले खुङया़गी येशूला हन्नाससाला ख्येर्सीन। हन्नासती ओ़ह लोहगी पूजाहारी गो-छ्येवा कैयाफाकी क्यू़हबु यिहन्गे। 14दि कैयाफागीराङ, “लुहङबागी मिह थाम्ज्यी तोङगे म़ेदीनी मेहन्दा च्यी़ स्यिएँदीॱराङ सोनाम-साक्पु” म़ेदी यहूदी गोबाया़ला टे़ह-रिहम तेरक्यो येहकें। #यूह ११:४९,५०
पत्रुसगी येशूला मा-लोक पेहक्यो
(मत्ती २६:६९-७०; मर्क १४:६६-६८; लूक २२:५५-५७)
15सिमोन-पत्रुस दाङ येशूगी लेहमेन स्याहप्च्यी च्यी़ येशूगी तिङदा तिङ काहल्सीन। पूजाहारी गो-छ्येवा ङ्याम्बु ओ़ह लेहमेन स्याहप्च्यीती ङोहस्यी येहकें। ओ़ह सोङबे खो येशू ङ्याम्बुराङ पूजाहारी गो-छ्येवागी यिल्दो नाहङला स्य़ूहसीन। 16पत्रुसती कोहकी फिला लाहङ तेहती येहकें। ओहले पूजाहारी गो-छ्येवागी ङोह स्ये़एँगी स्याहप्च्यी फिला थेन्दी कोह सुङज्येला तेहक्योगी पी़हमी ङ्याम्बु ताम म़ेदी पत्रुसला नाहङला ख्योङसीन। 17पत्रुस नाहङला डोएँॱराङ पेहकेमु ओ़ह पी़हमीगी खोला टी़हसीन, “च्यि ख्ये आङ ओ़ह मिहगी स्याहप्च्यी मिहम्बा ले?” पत्रुसगी मासीन, “अहँ, ङाहनी मिहन।”
18ओ़हला योक्पुया़ दाङ कोह सुङगे मिहया़ लाहङदी मेह तू़ह तेहती येहकें, च्यिबेमाना ओहजेला ख्या़बु येहकें। ओहले पत्रुसॱआङ खुङ ङ्याम्बु लाहङदी मेह तू़ह तेहसीन।
पूजाहारी गो-छ्येवागी येशूला टी़हक्यो
(मत्ती २६:५९-६६; मर्क १४:५५-६४; लूक २२:६६-७१)
19ता़ह पूजाहारी गो-छ्येवागी येशूला राहङगी स्याहप्च्यी दाङ मिहरोगी सुङदेनगी तेहन्दाला टी़हज्ये छ़ूसीन। 20ओहले येशूगी खोला ल़ेहन क्याहप नाङसीन, “ङाहगी लुहङबा थाम्ज्यीगी दिनला मा सिहन्दी येह। थाम्ज्यी यहूदीया़ जोम्गेन्गी ग्या़ छो़खाङ दाङ छ्योखाङया़ला ङाहगी नाहम पेहॱनाङ सुङदेन तेर्ती येह। ङाहगी यिहप्ती-यिहप्ती सुङदेन तेर्ती म़ेह। 21च्यिबे राहङगी ङाहलाराङ टी़ह नाङगेन? ङाहगी सुङदेन ङ्यिहन्गेनया़लाराङ टी़ह नाङदोङ। ङाहगी च्यि मे़बा, च्यि लोप्पा, ओ़ह खुङला थाम्ज्यीराङ क्यी़ह येह।” 22येशूगी दि स्याहल सुङ नाङगेमु पोहला लाहङदी तेहक्योगी कोह सुङगे मिहया़ नाहङगी मिह च्यी़गी येशूला दि ल़ेहमु म़ेदी थाल्ज्या क्याहप्सीन, “च्यि पूजाहारी गो-छ्येवा ङ्याम्बु ख्येती ताम मालु दि रोहवाॱराङ यिहम्बा?” 23ओहले येशूगी खोला सुङ नाङसीन, “ङाहगी च्यिरा जोल्ग्यो यिहनानी ङाहगी जोल्ग्यो तेन्दोङ, ङाहगी ठाबेराङ माक्यो यिहन्सीमानानी ख्येगी ङाहला स्यिती काम्बुलाराङ च्यिबे थाल्ज्या क्याहप्पा?” 24ओ़ह ती़हजी थु येशूला ताहम्दीॱराङ येहकें ओहले हन्नासगी येशूला ताहम्दीॱराङ पूजाहारी गो-छ्येवा कैयाफा साला ताङसीन।
पत्रुसगी येहपाराङ येशूला मा-लोक पेहक्यो
(मत्ती २६:७१-७५; मर्क १४:६९-७२; लूक २२:५८-६२)
25ओ़ह ती़हजी थुॱआङ सिमोन-पत्रुस लाहङदी मेह तू़ह तेहती येहकें। ओहले लेहमेन मेह तू़हगेया़गी पत्रुसला टी़हसीन, “च्यि ख्येॱआङ ओ़ह मिहगी स्याहप्च्यीया़ नाहङगी मिह च्यी़ मिहन ले?” ओहले पत्रुसगी मा-लोक पेहती मासीन, “अहँ, ङाह मिहन।”
26ओ़हला मेह तू़हगेनया़ नाहङला पत्रुसगी नाम्ज्यो रेहप च्ये तेरक्यो मिहगी ङ्येहवा च्यी़ॱआङ येहकें। खोॱआङ पूजाहारी गो-छ्येवागी योक्पु यिहन्गे। ओहले खोगी मासीन, “ङाहगी ख्येला ओ़ह मिह ङ्याम्बु तुहम्राला थोङग्यो मिहम्बा ले?” 27पत्रुसगी येहपाराङॱआङ मिहन म़ेदी ल़ेहन क्याहप्सीन। ओ़ह ती़हजीलाराङ च्याहबुॱआङ पेहसीन।
येशू पिलातसकी दिनला
(मत्ती २७:१-२,११-३१; मर्क १५:१-२०; लूक २३:१-५,१३-२५)
28ङाटु नाहम-सिमुराङ खुङया़गी येशूला कैयाफाकी खाङबाले रोमी स्युहङ-पेन छ्यिम्बुकी क्याहल-गाङला ख्येर्सीन। यहूदी गोबाया़ क्याहल-गाङ नाहङला मा़हस्युह च्यिबेमाना थार्पा छ्येपाकी डेन साहज्येकी तेहन्दाला खुङया़गी राहङला चाङमा ज़्या़ज्ये छोल्ग्यो येहकें।#१८:२८ च्यिबेमाना पिलातस यहूदी क्यिहपाकी मिह मिहम्बा यिहन्गे, ओ़ह सोङगोराङ यहूदीया़की ठिमला खुङया़ लेहमेन क्यिहपाकी खाङबाला स्युह फान्ज्यो मेहचाङा डोएँ म़ेदी माउ येहकें। 29ओ़ह सोङबे पिलातस खुङया़ला थुज्येला फिला थेन्दी ओहङसीन। ओहले खोगी खुङया़ला टी़हसीन, “ख्याया़गी दि मिहला च्यिगी तेहन्दाला फातुर च़ूज्ये छोल्ग्यो यिहम्बा?”
30खुङया़गी क़े च्यी़ टी़हदी मासीन, “का़हलेॱआङ खो नाहग-च्येन मिहम्बा यिहनानी ङ्यिहगी खोला राहङसाला ख्योङज्येराङ म़ेहबा येहकें।”
31ओहले पिलातसकी खुङया़ला मासीन, “दि मिहला ख्याराङ ख्येर्ती सोङ ओहले राहङगी छ्य़े-ठिमला ते़बे खोला ठिम ताङदोङ।” ओहले यहूदी गोबाया़गी मासीन, “फातुर च़ूदी सेकेन्गी ओङनी ङ्यिह ङ्याम्बु म़ेह।”
32राहङ काह-ठि पेहती टोहङ कोहकें यिहम्बा म़ेदी येशू राहङगीराङ सुङ नाङग्योकी स्याहल तेहन्दा डुप्च्येला दि रोहवा काहल्सीन। #यूह ३:१४; १२:३२
33ओहले पिलातस येहपाराङ नाहङला स्य़ूहदी येशूला क़े क्याहप्ती टी़हसीन, “च्यि ख्ये यहूदीया़गी क्याहल्बु यिहम्बा?”
34ओहले येशूगी सुङ नाङसीन, “च्यि दि राहङगी थुला ने़दी टी़ह नाङग्यो नि लेहमेन सुज्यीगी ङाहगी तेहन्दाला राहङला स्येक्यो यिहम्बा?”
35ओहले पिलातसगी मासीन, “च्यि ङाह यहूदी यिहम्बा ले? ख्ये राहङगी क्यिहपा दाङ पूजाहारी छ्यिम्बुया़गीराङ ख्येला ङाहगी लाहक्पाला च्योल्सीन। ख्येगी च्यि पेहपा?”
36ओहले येशूगी ल़ेहन क्याहप नाङसीन, “ङाहती क्याहल्सी दि जाम्बुलीङदी मिहन। ङाहती क्याहल्सी दि जाम्बुलीङदी यिहन्गे यिहनानी ङाहला तिङ ङ्या़गेया़गी ङाहला यहूदीया़की लाहक्पाले थार च्य़ूज्ये म़ेदी जिङज्ये येहकें। यिहॱनाङ ङाहती क्याहल्सी दि जाम्बुलीङदी मिहन।”
37ओहले पिलातसगी येशूला टी़हसीन, “च्यि ख्ये क्याहल्बुराङ यिहम्बा ले?” ओहले येशूगी ल़ेहन क्याहप नाङसीन, “ङाह क्याहल्बु यिहन म़ेदीनी राहङगीराङ सुङ नाङगु दु। ङाह दिगी तेहन्दालाराङ क्येक्यो यिहम्बा, ओहले दिगी तेहन्दालाराङ तेहन्दामकी पाङबु तेर्च्येला ङाह दि जाम्बुलीङला ओहङग्यो यिहम्बा। तेहन्दामला यिह छ्य़ेगे थाम्ज्यीगी ङाहती ताम ङ्यिहन्गे।”
38पिलातसगी येशूला टी़हसीन, “तेहन्दाम च्यि यिहम्बा ले?” देजे म़ेदी खो फिला थेन्दी यहूदी गोबाया़साला काहल्दे मासीन, “ङाहगी दि मिहला फातुर च़ू कोहकेन्गी तेहन्दानी च्यिॱआङ मेहथोङ दु।
39थार्पा छ्येपाकी ती़हजीला ङाहगी ख्याया़गी तेहन्दाला चोन्पा मेहन्दा च्यी़ला ताङ तेर्केन्की पे-ठिम येहबा। ओ़ह सोङबे दि पा़लो ओ़ह यहूदीया़की क्याहल्बु माएँदीला ताङ तेर्तोङ ले?”
40“खोला मिहम्बा, यिहॱनाङ बारब्बाला ताङ नाङदोङ!” म़ेदी खुङया़ क़े छ्यिम्बु तेन्दी मासीन। (बारब्बा माएँ मिहदी च्याहक्पा यिहन्गे।)
Currently Selected:
यूहन्ना 18: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
