यूहन्ना 19
19
येशूला ङ्य़ेहबा काल्ग्यो
1ओहले पिलातसगी येशूला ख्येर्ती ताक्स्यु क्याहप च्य़ूसीन। 2ओहले माक्मीया़गी छेर्मागी थ़े जे़दी येशूगी उला केन तेर्सीम्बाराङ क्याहल्बुया़गी केहन्गेन ल़ेहमु मुहक्पु काप्च्या केन तेर्सीन। 3ओहले येशू पोहला ओहङदी, “यहूदीया़की क्याहल्बु क्याहल्स्यो-क्याहल्स्यो ओहङज्यु!” म़ेदी स्ये़हन्डील पेहकेनॱराङ डाम्ज्या क्याहप्सीन।
4ओहले पिलातस येहपाराङ लेहमा च्यी़ फिला थेन्दी मिह मिह-माहङया़ला मासीन, “त़ेदोङ, दि मिहला फातुर च़ू कोहएँ थु ल़ेह चोक्पा पेहक्योनी ङाहगी च्यिॱआङ च्य़ेह माहसीहन। दि ताम ख्याला क्यी़ह ज्योर्च्यु म़ेदी ङाहगी खोला ख्याया़गी दिनला ख्योङगेराङ येह।” 5ओहले येशू छेर्मागी थ़े दाङ मुहक्पु नाहम्सा नोम्दी फिला फेप नाङसीन, ओहले पिलातसगी खुङया़ला मासीन, “लो त़ेदोङ, दि मिहला!”
6पूजाहारी छ्यिम्बु दाङ कोह सुङगे मिहया़गी येशूला थोङ-लुहङ मे़हबाराङ क़े तेन्दी मासीन, “खोला क्याहङस्यीङला च्याङ नाङदोङ, खोला क्याहङस्यीङला च्याङ नाङदोङ!” पिलातसगी खुङया़ला मासीन, “ओ़हठी यिहन्सीमाना ख्यागीराङ खोला ख्येर्ती क्याहङस्यीङला च्याङदोङ। ङाहगीनी खोला फातुर च़ू कोहएँ थुकी ल़ेह चोक्पा पेहक्योनी च्यिॱआङ मेहथोङ दु!”
7ओहले यहूदी गोबाया़गी, “दि मिहगी, ‘ङाहराङ किन्ज्योगी स़ेबु यिहन’ म़ेदी माक्यो सोङगोराङ ङ्यिहगी छ्य़े-ठिमगी तादाङलानी खोला सेॱराङ कोहएँ!” म़ेदी मासीन।
8दि केच्या थे़दी पिलातस तोहरोङ ज्यी़सीन। 9ओहले खो येहपाराङ क्याहल-गाङ नाहङला स्य़ूहदी येशूला टी़हसीन, “ख्ये का़ह ग्या़दी यिहम्बा?” यिहॱनाङ येशूगी खोला च्यिॱआङ ल़ेहन क्याहप माहनाङ। 10ओहले पिलातसगी मासीन, “ङाहला च्यिबे मेहस्येके? ख्येला ताङ तेर्केन्गी ओङ ङाह ङ्याम्बु येह, ओहले ख्येला क्याहङस्यीङला च्याङगेन्गी ओङॱआङ ङाह ङ्याम्बु येह माएँ ताम च्यि ख्येला क्यी़ह म़ेहबा?”
11ओहले येशूगी सुङ नाङसीन, “किन्ज्योगी याहर यिहन्ज्यु माहनाङबा यिहनानी राहङदी ङाह थो़ला च्यिॱआङ ओङ मेहयोङज्ये येहकें। ओ़ह सोङबे ङाहला राहङगी छ्या़ला चि क्याहप्केन्दीला तोहरोङ माहङबु तिहक्पाकी फातुर फो़ज्ये येह।”
12दि केच्या थ़े फान्ज्यो पिलातसगी येशूला येहपाराङ ताङ तेर्च्ये म़ेदी ज्यिबुराङ स्युक पेहसीन यिहॱनाङ यहूदीया़गी दि ल़ेहमु म़ेदी क़े तेन्गेॱराङ येहकें, “का़हलेॱआङ राहङगी दि मिहला ताङ नाङसीन मानानी राहङ कैसरकी रो़ह मिहम्बा। सुगी राहङला क्याहल्बु यिहन म़ेदी माएँ खोगी रोमी गो-छ्येवा क्याहल्बु कैसरलाॱराङ टाह पेहक्यो ओहङगे।”
13दि केच्या थे़दी पिलातसगी येशूला फिला ख्योङसीन, ओहले खो ठिम ताएँगी ठिला तेहसीन। (ओ़ह ग्या़ला तोह तिङग्यो सोङगोराङ गब्बथा माएँ मिहन ज़्या़दी येहकें। गब्बथा माक्योदी हिब्रू तामला “तोह तिङग्यो” म़ेदी ह्अ कोहएँ।) 14ओ़ह ङ्यिहमा थार्पा छ्येपा लेप्कें म़ेदी ङ्यिहमा च्यी़ तोहङले यिहन्गे। ओहजेला ङ्यिहमागी छ्युजी च्यिङ्यी़जे काहल्दी येहकें। पिलातसगी यहूदीया़ला मासीन, “त़ेदोङ, ख्यागी क्याहल्बु!”
15यिहॱनाङ खुङया़गी दि ल़ेहमु म़ेदी क़े तेन्सीन, “नोम फेप नाङदोङ, नोम फेप नाङदोङ, खोला क्याहङस्यीङला च्याङ नाङदोङ!” पिलातसगी खुङला टी़हसीन, “च्यि ङाहगी ख्यागी क्याहल्बुला क्याहङस्यीङला च्याङज्ये ले?” पूजाहारी छ्यिम्बुया़गी मासीन, “कैसर मिहम्बानी ङ्यिहती लेहमेन सुज्यीॱआङ क्याहल्बु म़ेह।”
16ओहले पिलातसगी येशूला क्याहङस्यीङला च्याङज्येला खुङया़गी लाहक्पा चि क्याहप्सीन।
येशूला क्याहङस्यीङला च्याङग्यो
(मत्ती २७:३२-४४; मर्क १५:२१-३२; लूक २३:२६-४३)
ओहले माक्मीया़गी येशूला चि लेहन्सीन। 17येशूगी राहङगी क्याहङस्यीङ खुर्ती काब्ली माएँ ग्या़ला फेप नाङसीन, हिब्रू ताम ङो़ले ओ़ह ग्या़ला गल्गथा म़ेदी माएँ। 18ओ़ह ग्या़ला लेप फान्ज्यो खुङया़गी येशूला क्याहङस्यीङला च्याङसीन ओहले येशू ङ्याम्बुराङ लेहमेन मेहन्दा ङ्यी़ॱलाङ येशूकी योबा दाङ योमा ङो़ले ज़्या़दी क्याहङस्यीङला च्याङसीन। येशू खुङ ङ्यी़गी पाहरक्यीला च्याङ नाङदी येहकें। 19ओहले पिलातसगी, “नासरतकी येशू दाङ यहूदीया़की क्याहल्बु” म़ेदी फातुर च्य़ूक्योकी यिहगी च्यी़ प्री़हदी क्याहङस्यीङ थो़ला च्यार्सीन।
20ओ़ह फातुर केन्ग्योकी यिहगी माहङबुराङ यहूदीया़गी टा़हसीन च्यिबेमाना येशूला क्याहङस्यीङला च्याङग्योगी ग्या़दी क्याहसा पोहलाराङ येहकें। दि यिहगी हिब्रू, ल्याटिन दाङ ग्रीक तामला प्रुहक्यो येहकें। 21यहूदीया़की पूजाहारी छ्यिम्बुया़गी पिलातसला मासीन, “यहूदीया़की क्याहल्बु म़ेदी प्रुह माहनाङ, खोगी, ‘ङाह यहूदीया़की क्याहल्बु यिहन म़ेदी माएँराङ येहकें’ म़ेदी गा प्रुह नाङदोङ।” 22ओहले पिलातसगी ल़ेहन क्याहप्सीन, “ता़ह ङाहगी लेहमा च्यी़ प्रुह सिहन फान्ज्यो प्रुहसीन प्रुहसीन।”
23माक्मीया़गी येशूला क्याहङस्यीङला च्याङ सिहन फान्ज्यो येशूगी नाहम्सा खुङया़गी थाम्ज्यी माक्मीया़ला बो रे़ह-रे़ह थोप्केन्गी छ्याप्सी पेहती बो ज़्यि ताङसीन। ओहले खुङया़गी येशूगी फि ङो़गी नाहम्साॱआङ लेहन्सीन, ओ़ह नाहम्साती याहर यिहन्ज्यु माहर थुराङ चेम मेहकोहएँ पेहती था़क्यो येहकें। 24ओ़ह सोङबे खुङया़गी राहङ नाहङदुङ मासीन, “दिदीला माहराल, यिहॱनाङ दि सुगी पोहला थोप्कें यिहम्बा म़ेदी ओहराङ क्येहन क्याहप्च्ये।” “खुङया़गी ङाहती काप्च्या राहङ नाहङदुङ कोहसीन ओहले ङाहती फि ङो़गी काप्च्याती क्येहन क्याहप्सीन” म़ेदी सुङरापला प्रुहक्योगी स्याहल तेहन्दा डुप्च्येला दि रोहवा काहल्ग्यो यिहम्बा।#भज २२:१८
25ओ़ह सोङबे माक्मीया़गी दि ल़ेह पेहसीन। ओहले येशूकी क्याहङस्यीङ पोहला येशूकी आमा ङ्याम्बु आमाकी नुहमु दाङ क्लोपासकी पी़हमी मरियम दाङ मरियम मग्दलिनी लाहङ तेहती येहकें। 26राहङगी आमा दाङ मिहरोगी च्याहम्बा जे नाङग्योकी स्याहप्च्यीला राहङ पोहलाराङ लाहङदी तेहक्यो ज़ी़दी येशूगी राहङगी आमाला सुङ नाङसीन, “आमा ज़ी़-नाङदोङ, राहङगी पुह!” 27ओहले ओ़ह स्याहप्च्यीॱलाङ येशूगी सुङ नाङसीन, “त़ेदोङ, ख्येती आमा!” ओ़ह ङ्यिहमा यिहन्ज्यु ओ़ह स्याहप्च्यीगी येशूगी आमाला राहङगी खाङबाला ख्येर्सीन।
येशू टोहङ नाङग्यो
(मत्ती २७:४५-५६; मर्क १५:३३-४१; लूक २३:४४-४९)
28ता़हनी ङाहती ल़ेह थाम्ज्यीराङ सिहन्सीन म़ेदी येशूला थुयी़ ओहङ फान्ज्यो सुङरापला सुङ नाङग्योकी स्याहलया़ ऱेह-ऱेह पेहती तेहन्दा डुप ख़ूज्यु म़ेदी येशूगी, “ङाह खा कोम्सीन” म़ेदी सुङ नाङसीन।#भज ६९:२१; २२:१५ 29ओ़हला कुहन्डुमकी-निङगु क्युर्पु काङ ज़्या़क्योगी निकी च्यी़ येहकें। ओहले माक्मीया़गी ओ़ह कुहन्डुमकी-निङगु क्युर्पुला काबे च्यी़ पा़दे हिसप माएँ तोहङबोगी याहल्गाला ज़्या़दी येशूकी स्याहलला ज़्या़ तेर्सीन। 30ओहले येशूगी ओ़ह कुहन्डुमकी-निङगु क्युर्पु छ्ये नाङसीन ओहले येशूगी, “ता़हनी ङाहती ल़ेह थाम्ज्यीराङ सिहन्सीन” म़ेदी सुङ नाङसीम्बाराङ उ माहर कुहर जेती टोहङ नाङसीन।
येशूकी ची़मा चो़ला दुङगी चो़क्यो
31दि जा पासाङ ङ्यिहमु यिहन्गे। ओहले नाहङबार ल़ेहमुती यहूदीया़की थाङ सोएँ ङ्यिहमा दाङ थार्पा छ्येपा यिहन्गे। ओ़ह सोङगोराङ यहूदी गोबाया़गी, “ओ़ह चा़ छ्यिम्बु ङ्यिहमाला रोह क्याहङस्यीङला च्याङदी ज़्या़ज्ये मेहयोहङगे” म़ेदी टे़ह क्याहप्सीन ओहले खुङ पिलातससाला काहल्दी, “स्यिएँगी ङ्य़ेहबा फो़क्यो मिहया़गी काङबा च्या़दी खुङया़गी रोह ता़ह ङ्यिहला ख्येर च्य़ू नाङदोङ लाह” म़ेदी ओहर-छ्य़े स्युहसीन। 32ओहले माक्मीया़ ओहङदी तोहङस्यो येशू ङ्याम्बु च्याङग्योगी मिह ङ्यी़दी काङबा च्या़सीन। 33ओ़ह तिङले येशूगी स्याहप च्या़ज्ये छोल्गेमु मिहरोनी टोहङ सिहन्ग्यो दुबा। ओ़ह सोङबे खुङया़गी येशूकी स्याहप मा़हच्या। 34यिहॱनाङ माक्मी च्यी़गी येशूकी ची़मा चो़ला दुङगी चो़सीन, ओहले चो़लुङ म़ेहबा ठा़ दाङ छ्यु थेन्सीन।
35(ख्याया़गीॱआङ यिह-छ्य़े ख़ूज्यु म़ेदी दि थोङगे मिहगी काह-ठि थोङबा ओ़हठीॱराङ स्येती येह ओहले खोगी पाङबु तेहन्दाम येह) 36“मिहरोकी रेहको च्यी़ॱआङ च्या़ज्ये म़ेह” म़ेदी सुङरापला प्रुहक्योगी स्याहल तेहन्दा डुप्च्यु म़ेदीराङ दि रोहवा काहल्ग्यो यिहम्बा।#प्रस १२:४६; गन्ती ९:१२; भज ३४:२० 37ओहले लेहमेन ग्या़ॱलाङ सुङरापला दि ल़ेहमु म़ेदी येहबा, “दुङगी चो़क्योदीला खुङया़गी ताज्ये येह।”#जक १२:१०; मत्ती २७:५७-६१; मर्क १५:४२-४७; लूक २३:५०-५६
येशूकी फुङबु फुक्पाला तो़हक्यो
(मत्ती २७:५७-६१; मर्क १५:४२-४७; लूक २३:५०-५६)
38अरिमाथिया क्याहसाला योसेफ मिहन थो़क्यो मिह च्यी़ येहकें। खो यहूदी गोबाया़गी ज्यी़सुगी पेहती सुगीॱआङ माहछोर्पा पेहती येशूगी स्याहप्च्यी काहल्दी येहकें। ओहले खो पिलातससाला काहल्दी, “येशूगी कुबुर ङाहला ख्येर च्य़ू नाङदोङ” म़ेदी ओहर-छ्य़े स्युहसीन। ओहले पिलातसगीॱआङ “ओहङगे ख्येर्ती सोङ,” म़ेदी मासीन। ओहले योसेफ काहल्दी येशूगी कुबुर क्याहङस्यीङले पाप्ते ख्येर्सीन। 39ओहले येशूला कुहङमु थु डोएँगी निकोदेमसॱआङ योसेफ ङ्याम्बुराङ येहकें। खोगी फुलु खाल च्यी़ दाङ च्यू़सुमचे मूर्र दाङ एलवा तोहङबोले ज़ोक्योगी टिहमा स्यिहम्बु खाएँगी नुम ख्योङसीन।#यूह ३:१,२ 40दि ल़ेहमु पेहती खुङ ङ्यी़गी यहूदीया़की पे-ठिम ङो़ले येशूकी कुबुरला टिहमा स्यिहम्बु खाएँगी नुम टुहल्दी रे़हगी टिल्दी फुक्पाला तो़हसीन। 41येशूला क्याहङस्यीङला च्याङग्योगी ग्या़ पोहलाराङ तुहम्रा च्यी़ येहकें। ओ़ह तुहम्राला स्यिक्यो मिह सुज्यीॱआङ मा़हज्याबाकी फुक्पा साम्बा च्यी़ येहकें। 42च्यिबेमाना नाहङबार ङ्यिहमु यहूदीया़दी थाङ सोएँगी ङ्यिहमा येहकें, ओहले ओ़ह फुक्पा पोहलाराङ येहकें सोङबे खुङया़गी येशूगी कुबुरला ओ़ह फुक्पालाॱराङ तो़ह ज़्या़सीन।
Currently Selected:
यूहन्ना 19: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
