यूहन्ना 20
20
फुक्पा तोङबा
(मत्ती २८:१-८; मर्क १६:१-८; लूक २४:१-१२)
1ज़ा-ङ्यिहमा क्या र्हाबा-र्हिबेलाॱराङ मरियम मग्दलिनी येशूगी कुबुर तो़ह ज़्या़क्योगी फुक्पाला काहल्सीन। फुक्पाला लेप्केमुनी फुक्पागी कोहला क्याहप्क्योगी तोह खा फे़क्यो थोङसीन। 2ओहले मोह सिमोन-पत्रुस दाङ येशूगी चेवा जे नाङग्योकी लेहमेन स्याहप्च्यी साला छ्योङदी काहल्दी खुङया़ला मासीन, “खुङया़गी चो़वोला फुक्पालेगी तेन्दी ख्येर्सीन दुबा! यिहॱनाङ का़हला ख्येर्ती ज़्या़बा यिहम्बानी ओ़ह ङ्यिहगी क्यी़ह माहन्ज्योर।” 3दि थे़-लुहङ म़ेहबा पत्रुस दाङ लेहमेन स्याहप्च्यी फुक्पाला छ्योङदी काहल्सीन। 4खुङ ङ्यिकाराङ ङ्याम्बु-ङ्याम्बु छ्योङदी काहल्सीन यिहॱनाङ पत्रुस म़ेदी तोहङले लेहमेन स्याहप्च्यी फुक्पाला लेप्सीन। 5ओहले खोगी कुहर पेहती नाहङला ताएँमुनी येशूकी कुबुरला टिल्ग्योकी रे़ह च्यी़राङ थोङसीन। यिहॱनाङ खो फुक्पा नाहङलाती मा़हस्युह। 6सिमोन-पत्रुसॱआङ खोगी तिङदा तिङराङ लेप्सीन ओहले खोती थेका सिरेराङ फुक्पा नाहङला स्य़ूहसीन। ओहले खोगी येशूकी कुबुरला टिल्ग्योकी रे़ह च्यी़राङ थोङसीन। 7ओहले येशूगी उला ताहम्ग्योगी नाहम्सादी रे़ह ङ्याम्बु म़ेहबा येहकें, यिहॱनाङ ओ़हदी लेहमेनॱराङ ग्या़ च्यी़ला लाप्ती ज़्या़क्यो येहकें। 8ओहले तोहङस्यो फुक्पाला लेप्क्योगी लेहमेन स्याहप्च्यीॱआङ फुक्पा नाहङला स्य़ूहसीन। दि थोङदी खोगी यिह छ्य़ेसीन। 9(सुङरापला दि ल़ेहमु म़ेदी प्रुहक्यो येहबा “येशू टोहङदी तिङले येहपाराङ सोम्बो ज़्याङ नाङज्ये येह।” दि केच्या खुङया़गी ताहन्दा थु ङोह मा़हस्येबा येहकें।) 10ओ़ह तिङले ओ़ह स्याहप्च्यी ङ्यी़ खाङबाला लो़ह काहल्सीन।
येशू मरियम मग्दलिनी ङ्याम्बु थ़ू नाङग्यो
(मत्ती २८:९-१०; मर्क १६:९-११)
11यिहॱनाङ मरियम फुक्पा फिला लाहङदी ङी़ह तेहती येहकें। ओहले मोहगी ङी़हदी फुक्पा ङो़ले कुहर पेहती तासीन। 12येशूकी कुबुर ज़्या़क्यो ग्या़ला कार्पु नाहम्सा नोम्ग्योकी स्यिहङगामकी स्याहप्च्यी ङ्यी़ला, मेहन्दा च्यी़ उ ङो़ले ओहले मेहन्दा च्यी़ स्याहप ङो़ले ज़्य़ू नाङग्यो मोहगी थोङसीन। 13ओहले खुङया़गी मोहला टी़हसीन, “पोहमो, ख्ये च्यिबे ङुहएँ?” मोहगी खुङया़ला मासीन, “खुङया़गी ङाहती चो़वोला ख्येर्ती का़हला ज़्या़बा यिहम्बानी ओ़ह ङाहला क्यी़ह म़ेह।”
14दि केच्या मा सिहन फान्ज्यो मोह क्याहप ङो़ले लो़हसीन, ओहले मोहगी येशूला लाहङदी ज़्य़ू नाङग्यो थोङसीन, यिहॱनाङ ओ़ह येशूॱराङ यिहन म़ेदीनी मोहगी ङोह स्य़े मा़हखु।
15ओहले येशूगी मोहला टी़ह नाङसीन, “ए पोहमो, ख्ये च्यिबे ङुहएँ ले? ख्येगी सुला छोल्ग्यो यिहम्बा?” ओहले मोहगी येशूला तुहम्राला ल़ेह पेहकेन्गी मिह यिहम्बा छे दुबा ने़दी मासीन, “लाहसो लाह, राहङगी येशूगी कुबुरला दि ग्या़ले नोम फेप्क्यो यिहनानी का़हला ज़्या़ नाङबा ओ़ह ङाहला सुङ नाङदोङ, ओहले ङाह काहल्दी येशूकी कुबुरला ख्येर्के।”
16येशूगी मोहला सुङ नाङसीन, “ए मरियम!” ओहले मोहगी लो़हदी येशूला हिब्रू ताम ङो़ले “रब्बोनी” म़ेदी मासीन। दिगी तेहन्दा “ओ़ लोबेन लाह” म़ेदी माक्यो यिहम्बा।
17ओहले येशूगी मोहला सुङ नाङसीन, “ङाहला मा़हदे, च्यिबेमाना ङाह ताहन्दा थु याहप्च्येन आबासाला काहल्दी म़ेह। यिहॱनाङ ङाहती नो़हया़साला काहल्दी म़े तेर, ‘ङाहती याहप दाङ ख्यागी याहप, ओहले ङाहती किन्ज्यो दाङ ख्यागी किन्ज्यो साला ङाह डोॱराङ येह’।”
18ओहले मरियम मग्दलिनी काहल्दी स्याहप्च्यीया़ला राहङगी चो़वोला थोङग्योकी केच्या दाङ येशूगी सुङ नाङग्योकी स्याहल थाम्ज्यीराङ स्येसीन।
स्याहप्च्यीया़गी येशूला थोङग्यो
(मत्ती २८:१६-२०; मर्क १६:१४-१८; लूक २४:३६-४९)
19साताकी तोहङस्यो ङ्यिहमा जा ङ्यिहमाकी कुहङॱसे, स्याहप्च्यीया़ यहूदी गोबाया़गी ज्यी़सुगी पेहती कोह क्याहप्ती तेहक्यो येहकें। ओ़ह ती़हजीलाराङ येशू याहङमे-याहङ फेप्ती खुङया़गी पाहरक्यीला ज़्याङदी ज़्य़ू नाङसीन ओहले येशूगी खुङया़ला सुङ नाङसीन, “ख्याया़ ङ्याम्बु स्य़िहदे ओहङज्यु!” 20दि सुङदी येशूगी खुङया़ला राहङगी छ्या़ ओहले ची़मा चो़ला तेन नाङसीन। चो़वोला थोङदी स्याहप्च्यीया़ ज्यिबुराङ क़ेहनाङ लाहङसीन। 21ओहले येशूगी येहपाराङ खुङया़ला सुङ नाङसीन, “ख्याया़ ङ्याम्बु स्य़िहदे ओहङज्यु! याहपगी ङाहला ताङ नाङग्यो ल़ेहमुराङ ङाहॱआङ ख्याला ताङगेराङ येह।” 22दे़ज्ये सुङदी येशूगी खुङया़ला फू़ जेती सुङ नाङसीन, “ता़ह नाम्पार-ताहक्पा थु लेहन्दोङ। 23ख्यागी मिहला तिहक्पा स्या़बा तेर्सीमाना खुङया़गी तिहक्पा ता़हज्ये ओहले ख्यागी खुङला तिहक्पागी स्या़बा मेहतेर्सीमाना खुङगी तिहक्पा ता़हज्ये म़ेह।”#मत्ती १६:१९; १८:१८
थोमागी येशूला थोङग्यो
24येशू स्याहप्च्यीया़साला फेप नाङगेमु स्याहप्च्यी च्यिङ्यी़ नाहङला थोमा माएँ स्याहप्च्यीती म़ेहबा येहकें। खोला “दिदुमस” म़ेदीॱआङ माउ येहकें। 25ओहले लेहमेन स्याहप्च्यीया़गी थोमाला मासीन, “ङ्यिहगी चो़वोला थोङसीन।” यिहॱनाङ थोमागी खुङया़ला मासीन, “ङाहगी चो़वोगी छ्या़ला च्या़जार तिहप्क्योदी मेम्बाया़ माहथोङ थु, ओहले ओ़ह च्या़जारकी मेम्बाला ङाहती लाहक्पा-जु़बी मा़हलु थु, ओहले चो़वोगी ची़मा चो़ला ङाहती लाहक्पागी मा़हदे थु ङाह यिह मे़हछ्ये।”
26ङ्यिहमा क्ये़ह तिङले येशूकी स्याहप्च्यीया़ येहपाराङ खाङबा नाहङला कोह क्याहप्ती तेहक्यो येहकें। थोमाॱआङ खुङ ङ्याम्बुराङ येहकें। कोह क्याहप्क्यो येहकें यिहॱनाङ येशू नाहङला स्य़ूह नाङसीन, ओहले खुङया़गी पाहरक्यीला ज़्याङदी सुङ नाङसीन “ख्याया़ ङ्याम्बु स्य़िहदे ओहङज्यु!” 27ओहले येशूगी थोमाला सुङ नाङसीन, “ख्येती लाहक्पा देला ज़्यो़, ओहले ङाहती लाहक्पाया़ त़ेदोङ। ख्ये लाहक्पा क्या़दी ङाहती ची़मा चो़ला दे़दोङ। थेचुम मेहबेकें, यिहॱनाङ यिह-छ्य़े पेहतोङ।”
28थोमागी येशूला मासीन, “ओ़, ङाहती चो़वो दाङ ङाहती किन्ज्यो!” 29ओहले येशूगी खोला सुङ नाङसीन, “थोमा, ख्येगीनी ङाहला थोङदी च्यी़राङ यिह छ्य़ेसीन यिहॱनाङ ङाहला थोङॱराङ माहथोङबा पेहती यिह छ्य़ेगेया़ काहजे सोनाम-साक्पु।”
दि छ्य़े प्रुहक्योकी तेहन्दा
30येशूगी लेहमेनॱआङ माहङबुराङ याहम्जेन छ्येवागी छ्या़लेया़ स्याहप्च्यीया़गी दिनला जे नाङसीन, ओ़ह छ्या़लेया़ दि छ्य़ेला प्री़हदी म़ेह। 31ख्यागी येशूला किन्ज्योगी स़ेबु, मास्यीका यिहन म़ेदी यिह छ्य़ेदोङ, ओहले ख्यागी येशूकी छेनला यिह छ्य़ेदी था़ म़ेहबाकी मिहली ज़ाङबु ज्योर ख़ूज्यु म़ेदी प्रुहक्यो यिहम्बा।
Currently Selected:
यूहन्ना 20: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
