लूका 18
18
ह्युग्मो दाङ ठिम-पेनगी पे
1 ओहले “सेम मा़हस्यीबा पेहती नाहम-माना किन्ज्योला सोल्वाङ ताप्ती तेह कोहएँ” म़ेदी स्याहप्च्यीया़ला टेहम्बा साल च्य़ूज्येला येशूगी दि स्याहल पे ज़्या़दी सुङ नाङसीन– 2“क्याहसा च्यी़ला ठिम ताङगेन मिह च्यी़ येहकें। खो किन्ज्योॱलाङ मी़हन्ज्यी येहकें ओहले मिहया़ला ची़नाङ मेहबेएँ येहकें। 3ओहले ओ़ह क्याहसाला ह्युग्मो च्यी़ येहकें। ओहले मोह ओ़ह ठिम ताङगेन्गी मिहसाला नाहम माॱनाङ काहल्दी, ‘ङाहला ठ़ूस्यी पेहकें मिह दाङ ङाहगी पाहरक्यीला ठिम ताङ नाङदोङ।’ म़ेदी माउ येहकें। 4ङ्यिहमा तोबा थु ठिम ताङगेन मिहगी मोहगी तामला नाङदाराङ माहताङ। यिहॱनाङ तोबा तिङले खोगी राहङगी सेम नाहङला मासीन, ‘यिहन्ज्येनी ङाहला किन्ज्योगी ज्यिक्पाॱआङ म़ेह ओहले मिहया़गी च्योल्दोॱआङ म़ेह! 5यिहॱनाङ, दि पी़हमीगीनी ङाहला ज्यिबुराङ तुहक्पु तेरक्यो सोङबे, ता़ह ते़ तेर कोहसीन, मिहन्सीमाना मोह नाहम माॱनाङ ओहङदी ङाहला चिप्सा पेहती ना लो़ह च्य़ूज्ये येह’।”
6 ओहले चो़वोगी सुङ नाङसीन, “ओ़ह तिहक्च्येम्बा ठिम-पेनगी च्यी़ माउ दु या़हबु पेहते ङ्यिहन्दोङ। 7ओ़ह ल़ेहमुराङ पेहते ङ्यिहन-नुहप किन्ज्योला क्याप्केन राहङगी मिहया़ला किन्ज्योगी रो़हराम जे मेहनाङगे ले? च्यि किन्ज्योगी राहङगी मिहया़ला रो़हराम जे नाङज्येला फिमु जे नाङगेन ले? 8ङाहगी ख्याला माएँ, किन्ज्योगी खुङया़ला ठिम ताङ नाङज्ये येह, यिहॱनाङ ङाह मिहगी स़ेबु ओहङगेमु च्यि ङाहगी जाम्बुलीङला किन्ज्योला तेहपा पेहकें मिह ज्योर्टो ले?”
सोल्वाङ ताप्केन मेहन्दा ङ्यी़गी तेहन्दाला पे
9राहङगी राहङलाराङ टाहङबु ने़गेन, ओहले लेहमेन मिहला क्येन ताएँगी मिहया़ला येशूगी दि पे ज़्या़दी सुङ ख्येप्टा नाङसीन– 10“ङ्यिहमा च्यी़ फरिसी दाङ ठाल तुहएँ मिह ङ्यी़ छ्योखाङला सोल्वाङ ताप्च्येला काहल्सीन।”
11 “ओहले फरिसीगी लाहङदी सेम सेमलाॱराङ दि ल़ेहमु म़ेदी सोल्वाङ ताप्सीन, ‘ओ़ किन्ज्यो, ङाह राहङला थुज्यी-छ्ये़ फुल्गे! च्यिबेमाना ङाह राहङसा मिहया़गी ल़ेहमु च्याहक्पा पेहती म़ेह। यिह-छ्य़े मी़हखुएँगी ल़ेह पेहती म़ेह। ङाहगी छ्येउ-छ्येंमु पेहती म़ेह। ओहले ङाह दि ठाल तुहएँ मिह ल़ेहमु मिहन। 12ङाह साता च्यी़ला लेहमा ङ्यी़ ङ्युङने तेहको येह, ङाहगी ज़्योरक्योगी नोहरया़लेगी बो च्युला बो च्यी़ फुल्गो येह’!”
13 “ओहले ठाल तुहएँ मिहगीदी क्याहङलेराङ लाहङदी स्यिहङगाम ङो़ले ता मा़हखुबा पेहती राहङगी प्राहङगो तुहङदी किन्ज्योला दि ल़ेहमु म़ेदी सोल्वाङ ताप्सीन, ‘ओ़ किन्ज्यो, ङाह तिहक्च्येम्बा यिहन, ङाहला थुज्यी ज़ी़-नाङदोङ!’ 14ङाहगी ख्याला माएँ, ओ़ह फरिसी म़ेदी ठाल तुहएँ मिहती किन्ज्योगी ज़ी़लुला या़हबु थेन्सीन ओहले खो खाङबाला लो़ह काहल्सीन। च्यिबेमाना सुगी राहङगी राहङला छ्यिम्बु ज़ोज्ये छोल्गे खो फेमा ओहङज्ये येह ओहले सुगी राहङला फेमा ज़ोएँ खो छ्यिम्बु ओहङज्ये येह।”#मत्ती २३:१२; लूक १४:११
येशूगी पेहजाया़ला मेलाम क्याहप नाङग्यो
(मत्ती १९:१३-१५; मर्क १०:१३-१६)
15ङ्यिहमा च्यी़ मिहया़ राहङ-राहङगी पेहजाया़ ख्योङदी येशूसाला ओहङसीन। येशूगी पेहजाया़गी गो़ थो़ला छ्या़ ज़्या़दी मेलाम क्याहप नाङज्यु माएँ ओ़ह मिहया़गी सेमला येहकें। दि थोङदी स्याहप्च्यीया़गी ओ़ह मिहया़ला बार्ता लाङसीन। 16यिहॱनाङ येशूगी खुङया़ला क़े क्याहप्ती सुङ नाङसीन, “पेहजाया़ ङाहसाला ओहङ च्य़ूदोङ, खुङया़ला मा़हका! च्यिबेमाना किन्ज्योगी क्याहल्सीनी पेहजा ल़ेहमु सेम थो़क्यो मिहया़गी तेहन्दालाराङ यिहम्बा। 17तेहम्बाराङ ङाहगी ख्याला माएँ, किन्ज्योगी क्याहल्सीला पेहजाया़गी ल़ेहमु पेहती लोक माहबे थु सुॱआङ ओ़ह नाहङला स्य़ूह ङ्युहङज्ये म़ेह।”
छ्युक्पु पोम्बो
(मत्ती १९:१६-३०; मर्क १०:१७-३१)
18इस्राएली पोम्बो च्यी़गी येशूला स्युहसीन, “ओ़ थाम्ज्यी म़ेदी या़हबु लोबेन लाह, था़ म़ेहबा मिहली ज़ाङबु ज्योर्च्येला ङाहगी च्यि पेह कोहएँ?” 19ओहले येशूगी खोला सुङ नाङसीन, “ख्येगी ङाहला च्यिबे थाम्ज्यी म़ेदी या़हबु माएँ? किन्ज्यो च्यी़ मिहम्बा नि लेहमेन सुॱआङ या़हबु म़ेह। 20ओहले किन्ज्योगी कानी ख्येला क्यी़ह येहॱराङ येह, ‘मिहगी ख्योवा दाङ पी़हमी थो़ला सेमङेन माहच्याङ, मिहला माहसे, कुमेन माहक्याहप, तेहन्दाम म़ेहबागी तामला पाङबु माहतेह, ओहले राहङगी आबा-आमाला ची़नाङ पेहतोङ’।”#प्रस २०:१४; व्य ५:१८; प्रस २०:१३; व्य ५:१७; प्रस २०:१५; व्य ५:१९; प्रस २०:१६; व्य ५:२०; प्रस २०:१२; व्य ५:१ 21ओहले खोगी मासीन, “दि काया़नी ङाहगी फेमा यिहन्ज्युराङ ची़दी ओहङदी येहबा ला़ह!” 22दि सेन्दी येशूगी खोला सुङ नाङसीन, “ओ़ह ल़ेहमु यिहन्सीमाना, ख्येगी येहपाराङॱआङ पेह कोहएँगी ल़ेह च्यी़ येहबा। ख्ये राहङगी का़ह येहकेन्दी क्युह थाम्ज्यीराङ चोङदी प्राङबुया़ला के़ह तेर, ओहले ख्येला स्यिहङगामकी क्युह ज्योर्च्ये येह ओहले ङाहगी तिङदा तिङ स्यो।” 23दि केच्या थे़दी खो सेम स्यिसीन च्यिबेमाना खो ज्यिबुराङ छ्युक्पु येहकें।
24खोगी सेम स्यिक्यो येशूगी ज़ी़दी सुङ नाङसीन, “मिह छ्युक्पुया़ला किन्ज्योगी क्याहल्सीला स्य़ूहज्येला काहन्डुमु का़हबु ओहङगु दु! 25छ्युक्पु मिहला किन्ज्योगी क्याहल्सीला स्य़ूहगे म़ेदीनी ङबुङला खापकी मी़-ओङ नाहङले स्य़ूहज्येला का तेहमु ओहङडो!” 26दि केच्या थे़गे मिहया़गी येशूला टी़हसीन, “ओ़ह ल़ेहमु यिहन्सीमाना सुगी थार्पा ज्योर ख़ूएँ ले?” 27ओहजेला येशूगी, “मिहगी पेहॱराङ मी़हखुएँगी ल़ेहॱआङ किन्ज्योगी जे थुप्कें!” म़ेदी सुङ नाङसीन।
28ओहजेला पत्रुसगी, “ज़ी़दोङ लोबेन ला़ह, ङ्यिहगीनी खाङबाराङ क्युर ज़्या़दी लोबेनकी तिङदा तिङ ओहङग्यो येह” म़ेदी स्युहसीन। 29ओहले येशूगी सुङ नाङसीन, “तेहम्बाराङ ङाहगी ख्याला माएँ, किन्ज्योगी क्याहल्सीगी तेहन्दाला राहङगी खाङबा, पी़हमी, आबा-आमा, पिन-पिन्दाया़, पुह पोहमोया़ला क्युर ज़्या़एँ मिहगी 30दि ती़हजीलाराङ ओ़ह म़ेदीॱआङ माहङबु ज्योर्च्ये येह ओहले ओहङगे छे-छ्यिमाला था़ म़ेहबा मिहली ज़ाङबु ज्योर्च्ये येह।”
येशूगी येहपाराङ राहङ टोहङ कोहएँगी तेहन्दाला सुङ नाङग्यो
(मत्ती २०:१७-१९; मर्क १०:३२-३४)
31ओहले ओ़ह तिङले येशूगी स्याहप्च्यी च्यिङ्यी़ला ग्या़ च्यी़ला नोम फेप्ते सुङ नाङसीन, “ते़, ताहन्दा ओहराङ यरूशलेमला डोॱराङ येह ओहले लुहङतेम्बाया़गी मिहगी स़ेबुगी तेहन्दाला प्रुहक्योगी केच्या थाम्ज्यीराङ तेहन्दा डुप्च्ये येह। 32यहूदी गोबाया़गी खोला लेहमेन क्यिहपागी मिहगी लाहक्पाला चि क्याहप्च्ये येह, ओहले खुङया़गी खोला फ्याज्ये येह ओहले स्याहम्डेन तेन्ज्ये येह ओहले खोला थुक्स्याल क्याहप्च्ये येह। 33खुङया़गी खोला ताक्स्यु क्याहप्च्ये येह, ओहले सेच्ये येह यिहॱनाङ, ङ्यिहमा सुम्बाला खो सोम्बो लाहङज्ये येह” म़ेदी येशूगी स्याहप्च्यीया़ला स्ये नाङसीन। 34यिहॱनाङ स्याहप्च्यीया़गी दि केच्याया़ च्यिॱआङ ङोह मा़हस्ये। दि केच्या खुङया़गी तेहन्दाला सङदे ज़्या़दी येहकें, येशूगी च्यि सुङ नाङग्यो यिहम्बा म़ेदी खुङया़गी साम्लुॱराङ ताङ मा़हखु।
येशूगी मी़ मेहथोङगेन मिह च्यी़ला मी़ थोङ च्य़ू नाङग्यो
(मत्ती २०:२९-३४; मर्क १०:४६-५२)
35ओहले येशू यरीहो क्याहसाला लेप्च्ये जेकेमु लाहमला मी़ मेहथोङगेन मिह च्यी़ लाङदे तेहती येहकें। 36ओहले खोगी लाहमला मिह माहङबुराङ डोएँ छोर्ती, “दि च्यि यिहम्बा?” म़ेदी टी़हसीन। 37ओहले मिहया़गी, “नासरतकी येशू फेप्कु दु” म़ेदी मासीन। 38ओहले खोगी क़े तेन्दी, “ओ़ दाऊदगी स़ेबु येशू, ङाहला थुज्यी ज़ी़-नाङदोङ ला़ह!” म़ेदी मासीन। 39ओहले येशूगी तोहङदा-तोहङ डोएँ मिहया़गी खोला खाजुम तेह म़ेदी बार्ता लाङसीन। यिहॱनाङ खोगी तोहरोङ क़े छ्यिम्बु तेन्दी, “ओ़ दाऊदगी स़ेबु, ङाहला थुज्यी ज़ी़-नाङदोङ ला़ह!” म़ेदी मासीन 40ओहले येशू फेप्कें फेप्केमुराङ थेमे जेती, “ओ़ह मिह देला ख्येर-स्यो ले!” म़ेदी का नाङसीन। ओहले खो ओहङ फान्ज्यो येशूगी टी़ह नाङसीन, 41“म़ेदोङ, ख्येगी तेहन्दाला ङाहगी च्यि रो़ह पेह कोहएँ?” “चो़वो ला़ह, ङाहला मी़ थोङ ख़ूएँ ज़ो नाङदोङ ला़ह” म़ेदी खोगी स्युहसीन। 42येशूगी सुङ नाङसीन, “ता़ह ख्येगी तेहपागी पेहती ख्ये मी़ थोङगे काहल्सीन।” 43ओहले ओहजे ती़हजीलाराङ खो मी़ थोङ ख़ूएँ काहल्सीन। ओहले खो किन्ज्योला त़ेरा फुल्गेराङ येशूगी तिङदा तिङ काहल्सीन। दि थोङदी लेहमेन मिहया़गीॱआङ किन्ज्योला त़ेरा फुल्सीन।
Currently Selected:
लूका 18: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
