लूका 19
19
ठाल तुहएँ जखायस
1येशू यरीहो क्याहसाले जेती फेप नाङगेराङ येहकें। 2ओ़ह क्याहसाला जखायस मिहन थो़क्योगी मिह छ्युक्पु च्यी़ येहकें। खो ठाल तुहएँया़गी मिह छ्यिम्बु यिहन्गे। 3खोगी येशूला ताज्ये छोल्गेराङ येहकें, यिहॱनाङ खो ज़ुबु थे़मु येहकें सोङगोराङ मिह मिह-माहङ नाहङलेगी येशूला थोङ मा़हखु। 4ओहले खो तोहङले छ्योङदी काहल्दी को़स्यीङ तोहङबोला#१९:४ को़स्यीङ तोहङबो : दि तोहङबोला नेपालीला नेभारा दाङ अञ्जीर माउ येहबा। दि तोहङबोदी छ्यिम्बु को़स्यीङ तोहङबो यिहम्बा। जा़सीन च्यिबेमाना येशू ओ़ह लाहमले फेप नाङगेराङ येहकें। 5ओहले येशू ओ़ह तोहङबो चो़ला लेप्ती याहर ज़ी़दी सुङ नाङसीन, “ए जखायस, ग्यो़बा माहर फाप्ती स्यो ले! तिहरीङ ङाह ख्येगी खाङबाला तेह कोहसीन।” 6ओहले जखायस क़ेहनाङगी ग्यो़बा-ग्यो़बा फाप्ती ओहङदी येशूला फेप स्य़ूहसीन। 7ओहले येशू जखायस ङ्याम्बु फेप्कें थोङगोराङ मिहया़गी, “दि मिहनी तिहक्च्येम्बागी खाङबाला गा तेह डोउ दु!” म़ेदी च्यी़गी च्यी़ला मामा चासीन। 8यिहॱनाङ जखायसगी ह्ओप लाहङदी मासीन, “सेन नाङदोङ चो़वो ला़ह, ता़ह ङाह राहङगी क्युहगी बो फे़ प्राङबुया़ला के़हदी तेर्कें, ओहले लो़हलो मिहती टाङगा साहक्यो येहना खुङला बो ज़्यि ल्हा़मा पेहती लो़ तेर्कें।” 9ओहले येशूगी खोला सुङ नाङसीन, “तिहरीङ दि खाङबा मे़हमेया़गी थार्पा ज्योर्ती येह। च्यिबेमाना जखायस अब्राहामगी छार्क्यीन यिहम्बा। 10ङाह मिहगी स़ेबु तोरक्यो मिहया़लाॱराङ छोल्ज्ये दाङ थार्पा तेर्च्ये म़ेदी ओहङग्यो यिहम्बा” म़ेदी येशूगी सुङ नाङसीन।#मत्ती १८:११
सेर-टाङगी पे
(मत्ती २५:१४-३०)
11येशू यरूशलेम पोहला लेप नाङग्यो येहकें। मिहया़ किन्ज्योगी क्याहल्सी ता़ह ग्यो़बाराङ ओहङज्ये येह माएँ सेमला ने़दी येशूगी स्याहल ङ्यिहन्गेराङ येहकें। ओहले येशूगी पे च्यी़ ज़्या़दी खुङया़ला किन्ज्योगी क्याहल्सीगी तेहन्दाला दि ल़ेहमु पे सुङ नाङसीन, 12“मिह छ्यिम्बु च्यी़गी, ‘ङाह था़-रिहङबुगी क्याहल-खापला काहल्दी राहङ क्याहल-खापगी थो़ला क्याहल्बु पेहकेन्गी ओङ ज्योर्ती लो़ह ओहङगे साम्लु ताङसीन!’ 13ओहले खोगी राहङगी योक्पु च्युला क़े क्याहप्ती सेर-टाङ रे़ह-रे़ह तेर्ती मासीन ‘ङाह लो़हदी माहयोहङ थु ख्यागी दि सेर-टाङ ङो़ले छोङ क्याहप्ती ख्येप्साङ तेन्दोङ!’ 14ओ़ह क्याहल-खापगी मिहया़गी ओ़ह मिहला सेम थेप्ती म़ेहबा येहकें, ओ़ह सोङबे खुङया़गी ‘दि मिहला ङ्यिह क्याहल-खापगी क्याहल्बु मे़हज्या’ म़ेदी लेहमेन क्याहल-खापगी मिहया़ला लेहङगु ताङसीन।”
15 “यिहॱनाङ, ओ़ह मिह क्याहल्बुराङ काहल्दी लो़ह ओहङसीन। लो़ह ओहङलुङ मे़हबाराङ खोगी योक्पुया़ला क़े क्याहप्ती खुङला तेर ज़्या़क्योगी सेर-टाङ ङो़ले ख्येप्साङ काहजे थेन दुबा म़ेदी टी़हज्येला राहङगी दिनला लाहङ च्य़ूसीन। 16ओहले तोहङस्यो योक्पु ओहङदी मासीन, ‘ने़बु ला़ह, राहङगी नाङग्यो सेर-टाङ च्यी़गी ङाहगी सेर-टाङ च्यु ज़ोसीन।’ 17ओहले क्याहल्बुगी, ‘ख्येगी या़हबु पेहसीन ख्ये ज्यिबुराङ या़हबु योक्पु दुबा! ख्ये ल़ेह फेमाज्यीॱलाङ यिह-छ्य़ेबु ओहङ ख़ूसीन, ता़ह ख्येगी क्याहसा च्यु थो़ला ओङ छ्य़े ङ्युहङज्ये येह’ म़ेदी मासीन। 18ओहले राहङसा योक्पु ओहङदी मासीन, ‘ने़बु ला़ह, राहङगी नाङग्यो सेर-टाङ च्यी़ ङो़ले ङाहगी लेहमेन सेर-टाङ ङा ज़ोसीन’। 19ओहले क्याहल्बुगी खोला मासीन, ‘ता़ह ख्येगी क्याहसा ङा थो़ला ओङ छ्य़े ङ्युहङज्ये येह’। 20ओहले लेहमेन योक्पु च्यी़ ओहङदी मासीन, ‘ने़बु ला़ह, राहङगी नाङग्यो सेर-टाङ ङाहगी कप्च्या च्यी़ला तुम्दी ज़्या़क्यो येह, ओ़ह देलाराङ येह। 21राहङगी सेम सान्दी येहकें सोङगोराङ ङाह ज्यी़सीन। राहङगी का़हन्दी स़ेह ज़्या़ माहनाङबा ओ़हदीॱराङ ल़ेहन नाङगेन, ओहले का़हन्दी माहताप्पा ओ़हदीॱराङ ट़ूह नाङगे।’ 22ओहजेला क्याहल्बुगी मासीन, ‘ए फेन मे़हथोएँगी योक्पु, ख्येगी खाले थेन्ग्यो तामलेराङ ङाह ख्येला ठिम ताङगे। का़हन्दी मा़हज्याबा ओ़हदीॱराङ लेहन्गे ओहले का़हन्दी माहताप्पा ओ़हदीॱराङ टू़हगेन ङाह सेम सान्दी मिह यिहन म़ेदी ख्येला क्यी़ह दु ले! 23ओ़हदी क्यी़ह येहतीॱआङ ख्येगी ङाहगी टाङगा चोगेला माहताङबा पेहती च्यिबे काप्च्याला तुम्दी ज़्या़क्यो? चोगेला ताङबा यिहनानी ङाह लो़ह ओहङगेमु ङाहगी टाङगा ङ्याम्बुराङ चोगे यिहॱनाङ ज्योर्च्ये येहकें।’ 24ओहले ओ़हला लाहङदी तेहक्यो योक्पुया़ला मासीन, ‘खोगी सेर-टाङ लेहन्दी सेर-टाङ च्यु ज़ोएँदीला तेर!’ 25ओहले लेहमेन योक्पुया़गी, ‘ने़बु ला़ह, खो ङ्याम्बुनी सेर-टाङ च्यु येहॱराङ येहबा!’ म़ेदी मासीन 26ओहजेला ऩेबुगी मासीन, ‘ङाहगी ख्याला माएँ, सु ङ्याम्बु येहबा खोला तोहरोङ तेर्च्ये येह, ओहले सु ङ्याम्बु म़ेहबा खो ङ्याम्बु येहकेदीॱआङ फ्रो़ज्ये येह’।”#मत्ती १३:१२; मर्क ४:२५; लूक ८:१८
27 “ता़हनी ङाहला टाह पेहती क्याहल्बु पेह मिहङ्युहङ माएँ मिहया़ला देला ख्योङदी ङाहगी दिनलाराङ सेतोङ!” #
मत्ती २५:१४-३०
म़ेदी ओ़ह क्याहल्बुगी मासीन।
यरूशलेमला येशूला मिहया़गी फेप स्युहक्यो
(मत्ती २१:१-११; मर्क ११:१-११; यूह १२:१२-१९)
28येशूगी दि पे स्ये छार फान्ज्यो यरूशलेम ङो़ले फेप नाङसीन। 29ओहले येशू, यरूशलेम पोहगी जैतून काहङला येहकेन बेथफागे दाङ बेथानिया माएँ युहल पोहला लेप नाङगेमु येशूगी स्याहप्च्यी ङ्यी़ला सुङ नाङसीन, 30“ख्या ङ्यी़ फार्केन देपकी युहलला सोङ, ओहले ख्या ओ़ह युहल नाहङला स्य़ूहएँमु ख्यागी सुगीॱआङ माहस्येहम्बा पुहङगु पी़हरु च्यी़ ता़दी ज़्या़क्यो च्य़ेह सिहन्ज्ये येह। ओ़हदी ताङदी ङाहसाला ख्येर-स्यो। 31सुज्यीगी च्यिबे पुहङगु ताङगे? म़ेदी ख्याला टी़हसीमाना, ‘चो़वोला दिगी कोहप्पु येह’ म़ेदी म़ेदोङ।”
32ओहले ओ़ह स्याहप्च्यी ङ्यी़ युहलला काहल्सीन ओहले येशूगी सुङ नाङग्यो ल़ेहमुराङ खुङया़गी च्य़ेह सिहन्सीन। 33पुहङगु ताङगेमु पुहङगुगी ताहक्पुया़गी टी़हसीन, “ङ्यिहगी पुहङगु च्यिबे ताङगे ले?” 34स्याहप्च्यी ङ्यी़गी, “ङ्यिहगी चो़वोला दिगी कोहप्पु येह!” म़ेदी मासीन। 35ओहले खुङया़गी पुहङगुगी पी़हरुला ख्योङदी, राहङगी काप्च्याया़ पुहङगु थो़ला तिङदे येशूला स्येहन च्य़ूसीन। 36ओहले येशू पुहङगु थो़ला स्येहन्दे फेप नाङगेमु मिहया़गी राहङ-राहङगी काप्च्याया़ पित्ते लाहमला तिङसीन।
37ओहले येशू यरूशलेम पोहगी जैतून काहङगी थुर्चुला लेप नाङगेमु स्याहप्च्यी थाम्ज्यीगी येशूगी जे नाङग्योकी याहम्जेन छ्येवागी छ्या़लेया़ टेहम्बा साल्दी किन्ज्योला त़ेरा तेच्या फुल्सीन–
38“चो़वो किन्ज्योगी छेनला फेप नाङगेन क्याहल्बु
सोनाम-साक्पु यिहम्बा!
स्यिहङगामला स्य़िहदे ओहङज्यु,
किन्ज्योला ज़िज्यिद ओहङज्यु!”
39ओहले मिह मिह-माहङ नाहङले लाहला फरिसीया़गी मासीन, “ओ़ लोबेन लाह, राहङगी स्याहप्च्यीया़ला खाजुम तेह म़ेदी काप्क्येन नाङदोङ नाह!” म़ेदी स्युहसीन। 40ओहले येशूगी ल़ेहन क्याहप नाङसीन, “ङाह ख्याया़ला माएँ, दि मिहया़ खाजुम तेहसीमानानी तोहया़ॱआङ क़े तेन्ज्ये येह!”
यरूशलेमगी तेहन्दाला येशू स्योम नाङग्यो
41ओहले येशू यरूशलेम पोहला लेप्च्ये जेकेमु क्याहसाला ज़ी़दी येशूगी स्योम्दी सुङ नाङसीन, 42“ख्येगी तिहरीङ स्य़िहदेगी तेहन्दाला च्यि कोहएँ म़ेदी ह्अ के़हबा यिहॱना़ ओहङज्ये येहकें। यिहॱनाङ ख्येगी दि थोङ मा़हखु! 43ओ़ह सोङबे तिहरीङ ख्ये थो़ला दि रोहवा ती़हजी च्यी़ ओहङज्ये येह, ख्यागी टाहया़गी ख्येगी छ्यो़ ज़्यिलेराङ मिह मिह-माहङ ओहङदी कोर्च्ये येह, ओहले छ्यो़ ज़्यिलेराङ ख्येला का़ज्ये येह। 44खुङया़गी ख्येला ओहले ख्ये नाहङला तेहके ख्येगी छार्क्यीनया़ला साला च्यार-ताप क्याहप्च्ये येह, ओहले तोह च्यी़ थो़ला राहङसा तोह लिहच्ये म़ेह। च्यिबेमाना किन्ज्योगी ख्येला थार च्य़ूज्येला फेप नाङग्योकी ङ्यिहमाला ख्येगी ङोह मा़हस्ये।”
येशू छ्योखाङला
(मत्ती २१:१२-१७; मर्क ११:१५-१९; यूह २:१३-२२)
45ओहले येशू छ्योखाङला फेप नाङसीन। ओहले कोहम्ज्युरला छोङ क्याहप्केन मिहया़ला ओहलेगी ङेती ताङ नाङसीन। 46ओहले येशूगी खुङया़ला सुङ नाङसीन, “सुङरापला प्री़हदी येहबा, ङाहगी खाङबा सोल्वाङगी खाङबा ओहङज्ये येह, ओहले ख्यागीनी दि छ्योखाङला ज्याक्पाया़ जोम्गेन्गी फुक्पा का ज़ोसीन।”#यशै ५६:७; यर ७:११
47ओहले येशूगी ङ्यिहमा-टाहङमाराङ छ्योखाङला सुङदेन नाङगो येहकें। पूजाहारी छ्यिम्बु, छ्य़े-ठिमकी लोबेन दाङ यहूदी गोबाया़ थुल्दी येशूला सेच्ये छोल्गो येहकें,#लूक २१:३७ 48यिहॱनाङ खुङया़ला छ्या़ डी़राङ मा़हखु च्यिबेमाना मिह थाम्ज्यीगी येशूगी सुङदेन ज्यिबुराङ निङरु पेहती ङ्यिहन्गो येहकें।#भज ११८:२६
Currently Selected:
लूका 19: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
