लूका 22
22
येशूला सेकेन्गी लाहम ताक्यो
(मत्ती २६:१-५,१४-१६; मर्क १४:१-२,१०-११; यूह ११:४५-५३)
1खमिर मा़हलुबागी खुरा साएँगी थार्पा छ्येपा पोहलाराङ लेप्ते येहकें।#प्रस १२:१-२७ 2पूजाहारी छ्यिम्बु दाङ छ्य़े-ठिमकी लोबेनया़गी येशूला सेच्ये छोल्गो येहकें, यिहॱनाङ खुङ मिह मिह-माहङया़गी ज्यी़सुगी येशूला खाजुम पेहती सेच्येला लाहम छोल्सीन।
3येशूगी स्याहप्च्यी च्यिङ्यी़ नाहङला यहूदा इस्करियोत माएँगी स्याहप्च्यी च्यी़ येहकें ओहले खो नाहङला ती़ह गो-छ्येवा स्य़ूहसीन। 4ओहले खो पूजाहारी छ्यिम्बु दाङ छ्योखाङ सुङगे मिहया़गी गोबाया़साला काहल्दी येशूला काहन्डुमु पेहती गोबाया़गी लाहक्पाला छ्यि च्य़ू खू़रो म़ेदी खुङ ङ्याम्बु टे़ह क्याहप्सीन। 5ओहले खुङया़ क़ेहनाङ पेहती खोला टाङगा तेर्के म़ेदी ताहम्ज्या ज़्या़सीन। 6खोगी टी़हगे मासीन, ओहले मिह मिह-माहङया़गी माहछोर्पा पेहती येशूला ज़ुङदे खुङगी लाहक्पाला चि क्याहप्च्ये लाहम छोल्सीन।
तिङस्यो डेन
(मत्ती २६:१७-३०; मर्क १४:१२-२६; यूह १३:२१-३०; १ कोर ११:२३-२५)
7खमिर मा़हलुबागी खुरा साएँ थार्पा छ्येपागी ङ्यिहमाला ल़ूह पी़हरु मार्च्ये फुल कोहउ येहकें। 8ओहले येशूगी पत्रुस दाङ यूहन्नाला, “ख्या ङ्यी़ काहल्दी थार्पा छ्येपागी डेन ठाबे पेह सोङ” म़ेदी सुङ नाङसीन। 9खुङया़गी येशूला, “ङ्यिहगी दि डेन का़ह ग्या़ला ठाबे पेहतोङ?” म़ेदी स्युहसीन 10ओहले येशूगी खुङ ङ्यी़ला सुङ नाङसीन, “त़ेदोङ, ख्या ङ्यी़ क्याहसाला लेप्केमु साहङबुङला छ्यु खुरक्यो मिह च्यी़ ङ्याम्बु थू़ज्ये येह। ओ़ह मिहगी तिङदा तिङ सोङ, 11का़हन्दी खाङबाला खो स्य़ूहगे, ओ़ह खाङबागी ताहक्पुला ‘ङाह राहङगी स्याहप्च्यीया़ ङ्याम्बु थार्पा छ्येपागी डेन साहएँगी ग्या़ का़हला येहबा?’ म़ेदी लोबेनगी टी़ह नाङगु दु म़ेदी म़ेदोङ। 12ओहले खोगी ख्याला खाङबा थो़गी तेङला ज़ाप्ती ज़्या़क्योगी ग्या़ छ्यिम्बुच्यी तेन्ज्ये येह। ओ़हलाराङ ठाबे पेहतोङ!” म़ेदी येशूगी सुङ नाङसीन। 13ओहले खुङ ङ्यी़ काहल्सीन ओहले येशूगी सुङ नाङग्यो ल़ेहमुराङ च्य़ेह सिहन्सीन ओहले खुङ ङ्यी़गी थार्पा छ्येपागी डेन ओ़हलाराङ ठाबे पेहसीन।
14डेन ठाबे काहल फान्ज्यो येशू ल़ेह-पेन ङ्याम्बु छ्येच्येला ज़्य़ू नाङसीन। 15येशूगी खुङया़ला सुङ नाङसीन, “तुहक्पु खुर कोहएँ म़ेदी तोहङले ख्या ङ्याम्बु थार्पा छ्येपागी डेन साहज्येला ङाहगी ज्यिबुराङ सेम पेहती येहकें। 16ता़ह ङाह ख्याला माएँ, किन्ज्योगी क्याहल्सीला दि थार्पा छ्येपागी डेनगी तेहन्दा माहन्डुप थु ङाह येहपाराङ दि थार्पा छ्येपागी डेन साहज्ये म़ेह” म़ेदी येशूगी सुङ नाङसीन। 17ओहले येशूगी कुहन्डुमकी-निङगु लू़क्योगी स्याहलु नोम्दी किन्ज्योला थुज्यी-छ्ये़ फुल्दी सुङ नाङसीन, “ता़ह दि लेहन्दोङ, ख्या थाम्ज्यीराङ के़हदी थुङ। 18ओहले येहपाराङ ङाहगी ख्याला माएँ, ता़ह यिहन्ज्यु ओहराङ किन्ज्योगी क्याहल्सीला माहन्जोम थु ङाहगी कुहन्डुमकी-निङगु थुङज्ये म़ेह” म़ेदी सुङ नाङसीन। 19ओ़ह तिङले येशूगी खुरा ल़ेहन नाङसीन ओहले किन्ज्योला थुज्यी-छ्ये़ फुल्दी खुरा च्या़दी खुङया़ला नाङदी सुङ नाङसीन, “ख्याया़ला तेरक्योगी दि ङाहगी ज़ुबु यिहम्बा। ता़ह यिहन्ज्यु ङाहला टेहम्बा साल्ज्येला दि ल़ेहमु पेहती सोह।” 20ओहले डेन छ्ये सिहन फान्ज्यो येशूगी येहपाराङ स्याहलु नोम्दे सुङ नाङसीन, “दि स्याहलु ङाहगी ठा़ला ज़्या़क्योगी साम्बा ताहम्ज्या यिहम्बा। दि ठा़ ख्याया़गी तेहन्दाला स्याहल च्य़ूदी येह।#यर ३१:३१-३४
21 त़ेदोङ, ङाहला ज़ुङ च्य़ूएँगी मिह ङाह ङ्याम्बुराङ साहज्येला तेहते येह। #
भज ४१:९
22किन्ज्योगी थुला ठुङग्यो ल़ेहमुराङ किन्ज्योगी ताङ नाङग्योकी मिह स्यिॱराङ कोहच्ये येह। यिहॱनाङ, खोला ज़ुङ च्य़ूएँगी मिहला काहजे छा़ तुहवा!” म़ेदी येशूगी सुङ नाङसीन। 23ओहजेला स्याहप्च्यीया़गी राहङ नाहङदुङ, “दि ल़ेहमु ल़ेह पेहकेन मिह सु यिहन्डो?” म़ेदी ताम मामा चासीन।
सु छ्यिम्बु माएँगी तेहन्दाला स्याहप्च्यीया़ ताम मामा चाक्यो
(मत्ती २०:२५-२८; १९:२८; मर्क १०:४२-४५)
24ओ़ह तिङले स्याहप्च्यीया़ नाहङदुङ, “सु छ्यिम्बु यिहम्बा?” म़ेदी कालाम काहल्सीन।#मत्ती १८:१; मर्क ९:३४; लूक ९:४६ 25ओहले येशूगी सुङ नाङसीन, “जाम्बुलीङगी क्याहल्बुया़गी राहङगी क्याहल-खाप थो़ला ओङ छ्य़ेएँ, ओहले ओहङ छ्य़ेएँ मिहया़गी राहङला ल़ेहरो पेहकेन मिह म़ेदी मा च्य़ूगे 26ख्या नाहङदुङ दि ल़ेहमु ओहङज्ये मेहयोहङगे। ख्या नाहङला थाम्ज्यी म़ेदी का़हन्दी छ्यिम्बु येहबा ओ़हदी थाम्ज्यी म़ेदी फेमा ल़ेहमु पेहती तेह कोहएँ, ओहले गोबा ओहङज्ये सेम पेहकेनया़गी योक्पुकी ल़ेहमुराङ पेहती स्याहप्तो स्युह कोहएँ।#मत्ती २३:११; मर्क ९:३५; मत्ती २०:२५-२७; मर्क १०:४२-४४ 27छ्येच्येला ज़्यू़गेन्गी ने़बु दाङ साहज्ये स्युहएँगी योक्पु, खुङ ङ्यी़ला सु छ्यिम्बु? ऩेबुराङ मिहम्बा ले? ङाहनी ख्या नाहङला साहज्ये स्युहएँगी योक्पु ल़ेहमुराङ यिहम्बा।#यूह १३:१२-१५
28 ङाहला ङ्याहम्छे ओहङगे ङ्यिहमाया़ला ख्यागी ङाहला रो़हराम पेहसीन। 29ङाहगी याहपगी ङाहला ठिम ताङगेन्गी ओङ नाङसीन ओ़ह ल़ेहमुराङ पेहते ङाहगीॱआङ ख्याया़ला ओङ तेर्च्ये येह। 30ख्या ङाहगी क्याहल्सीला ङाह ङ्याम्बुराङ तेहती साहज्ये येह, ओहले ठिला तेहती इस्राएली छाङ च्यिङ्यी़ थो़ला ठिम ताङज्ये येह” म़ेदी येशूगी सुङ नाङसीन।#मत्ती १९:२८
येशूगी पत्रुसला लोप्ताम क्याहप नाङग्यो
(मत्ती २६:३१-३५; मर्क १४:२७-३१; यूह १३:३६-३८)
31ओहले येहपाराङ येशूगी सिमोनला सुङ नाङसीन, “सिमोन, ए सिमोन ङ्यिहन्दोङ ती़हगी ख्या थाम्ज्यीलाराङ ने़ह ल़ेहमु टाप्च्येला ओङ लाङदे येह। 32यिहॱनाङ ख्येगी तेहपा माहतोर्च्यु म़ेदी ङाहगी सोल्वाङ ताप्ते येह। ख्ये येहपाराङ ङाह ङो़ले लो़ह फान्ज्यो ख्येती नो़हया़ला तेहपाला स्युक छ्यिम्बु जे़दोङ” म़ेदी येशूगी सुङ नाङसीन। 33ओहजेला सिमोनगी “चो़वो ला़ह, ङाह चो़वो ङ्याम्बुराङ चोन-खाङला छ्यि कोहॱनाङ छ्यिकें, स्यि कोहॱनाङ स्यिएँ!” म़ेदी मासीन। 34ओहले येशूगी, “पत्रुस, माज्ये मानानी, नाहङबार ङाटु च्याहबु क़े तेन्गे म़ेदी तोहङलेराङ ख्येगी लेहमा सुम थु ङाहला ङोह मे़हस्येएँ म़ेदी माज्ये येह!” म़ेदी सुङ नाङसीन।
ङ्याहम्छे ओहङगे म़ेदी तोहङलेराङ ठाबे पेह कोहएँ
35ओहले येशूगी स्याहप्च्यीया़ला, “ङाहगी ख्याला काहल्दा, लेकाम दाङ टाङगा माहख्येर्पा पेहती सोङ म़ेदी ताङगेमु ओहजेला ख्याला च्यिॱआङ कोम्बु काहल्बा?” म़ेदी टी़ह नाङसीन। ओहले स्याहप्च्यीया़गी, “च्यिॱआङ कोम्बु माहकाहल ला़ह” म़ेदी स्युहसीन।#मत्ती १०:९,१०; मर्क ६:८,९; लूक ९:३; १०:४
36ओहले येशूगी सुङ नाङसीन, “ता़हनी टाङगा येहकेन्दीगी टाङगा खुर, काहल्दा येहकेन्दीगी काहल्दा खुर, ओहले पादाङ मे़हसीमाना राहङगी काप्च्या चोङदी यिहॱनाङ पादाङ ङ्ये़हदोङ। 37च्यिबे मासीमाना सुङरापला ‘मिहरोला नाहग-च्येन मिहया़ ङ्याम्बुराङ टाहङमा क्याहप्सीन’ म़ेदी प्रुहक्योगी केच्याया़ ङाहगी मिहलीला तेहन्दा डुपॱराङ कोहएँ। तेहम्बाराङ ङाहगी तेहन्दाला प्रुहक्योगी केच्याया़ तेहन्दा डुप्तेराङ येह!” म़ेदी येशूगी सुङ नाङसीन।#यशै ५३:१२ 38ओहजेला स्याहप्च्यीया़गी, “ज़ी़दोङ चो़वो ला़ह, देला पादाङ ङ्यी़ येहबा!” म़ेदी स्युहसीन। येशूगी, “ओहजे येहना टी़हगे” सुङदी ल़ेहन क्याहप नाङसीन।
जैतून काहङला येशूगी सोल्वाङ ताप नाङग्यो
(मत्ती २६:३६-४६; मर्क १४:३२-४२)
39ओहले येशू तोहङमा ल़ेहमु जेते जैतून काहङला फेप नाङसीन, ओहले स्याहप्च्यीया़ॱआङ येशूगी तिङदा तिङ काहल्सीन। 40जैतून काहङला लेप्ती येशूगी स्याहप्च्यीया़ला, “ङ्याहम्छेला माहछ्यीज्यु म़ेदी ख्यागी सोल्वाङ ताप्तेॱराङ तेहतोङ” म़ेदी सुङ नाङसीन। 41ओ़ह तिङले येशू फाच्चीला फार फेप नाङदी पी़मु च़ू नाङदी सोल्वाङ ताप नाङसीन, 42“ओ़ याहप, राहङगी थुला येहसीमाना दि स्याहलु ङाह ङो़ले फार जे नाङदोङ। यिहॱनाङ, ङाहगी सेमला ने़क्यो ल़ेहमु मिहम्बा, याहपगी थुला ठुङग्यो ल़ेहमुराङ तेहन्दा डुप्च्यु!” सुङदी सोल्वाङ ताप नाङसीन। 43[सोल्वाङ ताप-ताप्पा काहङला स्यिहङगामकी स्याहप्च्यी च्यी़ ओहङदी येशूला तुहक्पु ना़ थुप्केन्गी ओङ नाङसीन। 44येशूगी थु ज्यिबुराङ ङ्युङदी येहकें यिहॱनाङ येशूगी तोहरोङॱआङ माहङबु सोल्वाङ ताप नाङसीन, ओहजेला येशूगी ङुल्ज्यु ठा़गी थी़बा ल़ेहमुराङ साला ताहप्सीन।]#२२:४४ माहङबुराङ ग्रीक तामगी बाइबलया़ला ४३ दाङ ४४ आङ-टा़हङ म़ेह। 45येशूगी सोल्वाङ ताप छार फान्ज्यो ज़्याङदी स्याहप्च्यीया़ येहकेन ग्या़ला लो़ह फेप नाङगेमु खुङ तुहङालगी थाङ छ्येती ङ्यि लो़हक्यो ज़ी़ नाङसीन। 46ओहले येशूगी, “ख्या च्यिबे ङ्यि लो़हदी तेहक्यो? ङ्याहम्छेला माहछ्यी च्यू़ज्यु म़ेदी लाहङदी सोल्वाङ ताप्तोङ!” म़ेदी सुङ नाङसीन।
येशूला ज़ुङग्यो
(मत्ती २६:४७-५६; मर्क १४:४३-५०; यूह १८:३-११)
47येशूगी दि स्याहल सुङ नाङगेमुराङ मिह बा़ल च्यी़ लेप्सीन। ल़ेह-पेन च्यिङ्यी़ नाहङला यहूदा माएँदी ओ़ह मिहया़गी गोबा पेहती येशूला च्युक पेहच्येला येशूगी पोहला ओहङसीन। 48ओहजेला येशूगी, “ए यहूदा, ख्येगी किन्ज्योगी ताङ नाङग्योकी मिहला च्युक पेहती ज़ुङ च्य़ूएँ?” म़ेदी सुङ नाङसीन। 49ओहले स्याहप्च्यीया़गी ल़ेह कोहटोहवा च्यी़ थोङदी, “चो़वो ला़ह, ता़हनी पादाङ तेन्दी क्याहप्तोङ?” म़ेदी टी़हसीन। 50ओ़हजेलाराङ स्याहप्च्यी च्यी़गी पादाङ तेन्दी पूजाहारी गो-छ्येवागी योक्पुगी योबा ङो़गी नाम्ज्यो रेहप च्ये तेर्सीन। 51ओहले येशूगी, “माहक्याहप, खोला ले ताङदोङ!” म़ेदी सुङ नाङदी ओ़ह योक्पुगी नाम्ज्यो दे़दी टा़ह च्य़ू नाङसीन।
52ओहले राहङला ज़ुङ ओहङगेन्गी पूजाहारी छ्यिम्बु, छ्योखाङ सुङगेन मिहया़गी गोबा दाङ लेहमेन गोबाया़ ङो़ले ज़ी़दी येशूगी सुङ नाङसीन, “च्यि ङाह ज्याक्पा यिहम्बा म़ेदी ख्या ङाहला जु़ङज्येला प्रेहका दाङ पादाङ थो़दी ओहङग्यो? 53ङ्यिहमा-टाहङमाराङ ङाह ख्या ङ्याम्बुराङ छ्योखाङगी यिल्दोला तेहकेमुनी ख्यागी ङाहला माहजु़ङ ले! यिहॱनाङ ता़ह ख्याया़गी ल़ेह पेहकेन्गी ती़हजी लेप्सीन ओहले ता़ह ना़-जुबेगी ओङ पेहकें।”#लूक १९:४७; २१:३७
पत्रुसकी येशूला ङोह मे़हस्येएँ म़ेदी माक्यो
(मत्ती २६:५७-५८,६९-७५; मर्क १४:५३-५४,६६-७२; यूह १८:१२-१८,२५-२७)
54ओहले ओ़ह मिहया़गी येशूला ज़ुङदे पूजाहारी गो-छ्येवागी खाङबाला ख्येर्सीन। पत्रुसती क्याहङलेराङ येशूगी तिङदा तिङ ओहङसीन। 55यिल्दोला मिहया़ मेह फी़दे तू़हदी तेहती येहकें, ओहले पत्रुसॱआङ खुङ ङ्याम्बुराङ तेहसीन। 56ओहले यो़मु च्यी़गी मेह येहसेरगी पेहती पत्रुसला ङोह स्य़ेदी खोगी तोहङबाला छ्यारे त़ेदी मासीन, “दि मिहॱआङ येशू ङ्याम्बुराङ येहकें ले!” 57ओहले पत्रुसगी, “मिहम्बा नुहमु, ङाहगीनी खोला ङोह मे़हस्येएँ!” म़ेदी मासीन।
58याहम्बीज्यी तिङले लेहमेन मिह च्यी़गीॱआङ पत्रुसला थोङदी, “ख्येॱआङ खुङ नाहङदीॱराङ मिह यिहम्बा!” म़ेदी मासीन। “मिहम्बा आदा, ङाहनी मिहम्बा!” म़ेदी पत्रुसगी ताम फ्रुक प्रू़दे मासीन।
59ओहले येहपाराङ छ्युजी च्यी़चे तिङले लेहमेन मिह च्यी़गी मासीन, “दि मिहनी गालील साने़दी दुबा। तेहम्बाराङ, खोॱआङ येशू ङ्याम्बुराङ डोउ येहकें!” 60“आदा, ख्येगी च्यिगी तेहन्दाला ताम माउ येहबा, ङाहगीनी ङोह मे़हस्ये दु!” म़ेदी पत्रुसगी माएँ माएँराङ च्याहबुॱआङ क़े तेन्सीन। 61ओहजेला चो़वोगी क्याहङलेगी पत्रुसगी तोहङबाला ज़ी़ नाङसीन। ओहले पत्रुसगी, “नाहङबार ङाटु च्याहबु क़े तेन्गे म़ेदी तोहङलेराङ लेहमा सुम थु ख्येगी ङाहला ङोह मे़हस्ये म़ेदी माज्ये येह” म़ेदी चो़वोगी सुङ नाङग्योगी स्याहल टेहम्बा साल्सीन। 62खो यिल्दोलेगी थेन्दी काहल्दी ज्यिबुराङ सेम नाहमु पेहती ङुहसीन।
गोबाया़ छो़क्योगी दिनला येशू
(मत्ती २६:५९-६८; मर्क १४:५५-६५; यूह १८:१९-२४)
63येशूला सुङगेन मिहया़गी येशूला स्ये़हन्डील पेहती तुहङसीन। 64खुङगी येशूगी स्याहल्दोङ उप्ती तुहङगेनॱराङ टी़हसीन, “ख्ये ख्येम्बा-ताहक्पुराङ यिहन्सीमाना ख्येला सुगी तुहङबा, ङ्यिहला म़ेदोङ ले?” म़ेदी टी़हसीन। 65ओहले खुङया़गी येशूला स्ये़हन्डील पेहती यिहन्जेराङ ताम चोक्पाया़ तेन्दी बार्ता लाङसीन।
66नाहम लाहङ फान्ज्यो यहूदी गोबा, पूजाहारी छ्यिम्बु दाङ छ्य़े-ठिमकी लोबेनया़ छो़बा क्याहप्ती येशूला छो़खाङला ख्योङदी मासीन, 67“ख्ये मास्यीका यिहम्बा यिहनानी ङ्यिहला म़ेदोङ।” ओहले येशूगी खुङला सुङ नाङसीन, “ङाहगी मासीमानाॱआङ ख्यागी यिह मे़हछ्ये दु। 68ओहले ङाहगी च्यिॱआङ ताम टी़हसीमाना राहङया़गी ङाहला ल़ेहन क्याहप मेहनाङ दु। 69यिहॱनाङ, ता़ह यिहन्ज्यु किन्ज्योगी ताङ नाङग्योकी मिह ओङज्या छ्यिम्बु नोम्गेन्गी किन्ज्योगी योबा ङो़गी टाहलगी थो़स्योला तेहच्ये येह!” म़ेदी येशूगी सुङ नाङसीन। 70ओहजेला खुङ थाम्ज्यीगी, “आहनानी ख्ये किन्ज्योगी स़ेबुराङ यिहम्बा?” म़ेदी टी़हसीन। ओहले येशूगी, “यिहम्बा, राहङया़गी सुङ नाङग्यो ल़ेहमुराङ यिहम्बा!” सुङदी सुङ नाङसीन। 71दि स्याहल थ़े फान्ज्यो खुङ थाम्ज्यीगी मासीन, “ता़हनी ओहराङला लेहमेन ताम क़ू च्यिॱआङ मेहकोहएँ, खोगी खा लाहमलेॱराङ ताम थ़ेसीन!” म़ेदी मासीन।
Currently Selected:
लूका 22: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
