लूका 7
7
रोमी माक्पेनगी यिह-छ्य़े
(मत्ती ८:५-१३)
1मिह मिह-माहङया़ला दि सुङदेन नाङ छार फान्ज्यो येशू कफर्नहुम क्याहसाला फेप नाङसीन। 2ओहले ओ़ह ग्या़ला रोमी माक्पेनगी#७:२ रोमी माक्पेन : ओ़ह ती़हजीगी रोमी माक्पेनया़गी काप्च्या पारला तेन्ग्यो ल़ेहमुराङ केहन्गो येहकें, ओहले खोगी माक्मी क्याह च्यी़गी थो़ला ओङ छ्ये़उ येहकें। ज्यिबुराङ च्याहम्बा पेहक्योगी योक्पु च्यी़ ने़हदी स्यिज्ये पेहती येहकें। 3ओहले खोगी येशूगी तेहन्दाला थे़वाराङ यहूदीगी लाहला एल्डरया़ला, “राहङ फेप नाङदी ङाहगी योक्पुला टा़ह च्य़ू नाङदोङ” म़ेदी फेप स्य़ूहज्येला येशूसाला ताङ चाहङसीन। 4ओहले यहूदी एल्डरया़ येशूसाला काहल्दी, “रोमी माक्पेन तेहम्बाराङ राहङगी रो़हराम ज्योर्च्ये सी़हगेन्गी मिह यिहम्बा। 5च्यिबेमाना खोगी ङ्यिहगी क्यिहपाला चेवा पेहकें, ओहले खोगी ङ्यिहगी तेहन्दाला छो़खाङ च्यी़ॱआङ जे तेर्ती येह” म़ेदी स्युहसीन। 6ओहले येशू खुङ ङ्याम्बुराङ फेप नाङसीन। ओहले येशू रोमी माक्पेनगी खाङबा पोहला लेप्च्ये जेकेमु माक्पेनगी राङगी रो़हया़ला दि ल़ेहमु लेहङगु येशूसाला ताङसीन, “ओ़ चो़वो छ्येवा, राहङगी ओहप्क्याल जे नाङ मेहकोहएँ ला़ह, च्यिबेमाना राहङला ङाहगी खाङबा नाहङला फेप स्य़ूहज्येला ङाह सी़हज्ये म़ेह, 7ओहले ङाहॱआङ राहङसाला ओहङज्येला सी़हज्ये म़ेह। यिहॱनाङ राङगी का नाङदोङ ओहले ङाहगी योक्पु टा़हज्ये येह। 8ङाहॱआङ स्युहङ-पेनया़गी ओङ चो़ला ज्युल्दी तेहको येहबा ओहले ङाहगी चो़ॱलाङ माक्मीया़ ज्युल्दी तेहको येह। ओहले च्यी़ला ‘सोङ’ माना खो डोएँ ओहले राहङसाला ‘स्यो’ माना खो ओहङगे ओ़हठीॱराङ ङाहगी योक्पुॱलाङ ‘आहन्डा पेह’ माना खोगी पेहकें।”
9ओहले दि केच्या सेन्दी येशू ह्अ ल़ेह नाङसीन। ओहले राहङगी तिङदा तिङ ओहङग्योगी मिह मिह-माहङया़ला ज़ी़दी सुङ नाङसीन, “त़ेदोङ, देजेबा यिह-छ्य़े छ्यिम्बु पेहकेन मिहनी ङाहगी इस्राएली मिहया़गी पाहरक्यीॱलाङ च्य़ेह सिहन्दी म़ेह।” 10रोमी माक्पेनगी ताङग्योगी मिहया़ खाङबाला लो़ह लेप्केमु ओ़ह योक्पु टा़ह सिहन्ग्यो येहकें।
ह्युग्मोगी पुहला येशूगी थार च्य़ू नाङग्यो
11ङ्यिहमा तोबा तिङले येशू नाइन क्याहसाला फेप नाङसीन। येशूगी स्याहप्च्यीया़ दाङ लेहमेन मिह माहङबुराङ येशूगी तिङदा तिङ काहल्सीन। 12ओहले येशू क्याहसागी कोह ग्या़ला लेप्केमु मिह बा़लया़ रोह च्यी़ खुर्ती तुहर्साला डोएँॱराङ येहकें। ओ़ह खुर्ते ख्येर्केन रोहदी, ह्युग्मोकी पुह च्यिमे च्यी़राङ यिहन्गे। 13ओहले ओ़ह ह्युग्मोगी क्यिदु ज़ी़दी चो़वो छ्येवा येशूगी थु ङ्युङदी ओहङसीन, ओहले येशूगी, “ख्ये माहङुह” म़ेदी सुङ नाङसीन। 14ओहले येशू तोहङले फेप्ती रोहगी टोहमला ज़ुङदी का नाङसीन। ओहले रोह खुर्केन मिहया़ थेमे पेहती क़ूहसीन। ओहले येशूगी रोहला, “ङाहगी माएँ, ए नो़ह, ख्ये लाहङदोङ!” म़ेदी सुङ नाङसीन। 15ओहले ओहजे ती़हजीलाराङ ओ़ह स्यिक्यो पुह-पेहजा लाहङदी तेहसीन ओहले ताम माज्ये छ़ूसीन। ओहले येशूगी ओ़ह पेहजा आमादीला चि क्याहप नाङसीन।
16येशूगी याहम्जेम्बागी छ्या़ले थोङदी मिह थाम्ज्यीराङ ह्अ ल़ेहसीन। ओहले किन्ज्योला ज्यिक्पा पेहती त़ेरा फुल्दी मासीन “ज्यिबुराङ चा़ छ्यिम्बुगी लुहङतेम्बा च्यी़ ओहराङगी पाहरक्यीलाॱआङ फेप नाङसीन दु, ओहले किन्ज्यो राहङगी मिहया़ला थार च्य़ूज्येला फेप नाङग्यो यिहन!” 17ओहले येशूगी ओ़ह स्यारा पेहजाला थार च्य़ू नाङग्योगी केच्या यहूदीया साने़ दाङ ओ़ह साहर-सुहरला येहकेन लुहङबाया़लाॱआङ फेल्सीन।
यूहन्नागी येशूगी तेहन्दाला ताम टी़हज्येला ताङग्यो
(मत्ती ११:२-१९)
18ओहले यूहन्नागी स्याहप्च्यीया़गी दि केच्या थाम्ज्यीराङ राहङगी लोबेनला स्येसीन। ओहले यूहन्नागी राहङगी स्याहप्च्यी ङ्यी़ला क़े क्याहप्ती 19चो़वो येशूसाला दि ताम टी़हज्येला ताङसीन, “ङ्यिहगी कू़हदे तेहक्यो थार्पा नाङगेन्दी राहङराङ यिहम्बा नि लेहमेनला कू़हदे तेह कोहएँ?”#७:१९ देला यूहन्नागी स्याहप्च्यीया़ला लुहङतेम्बाया़गी किन्ज्योगी लो़ह माहङबुराङ तोहङले थार्पा नाङगेन्गी क्याहल्बु ताङ ना़गेन सुङदी सुङ नाङग्यो मास्यीका राहङराङ यिहम्बा नि लेहमेनराङ यिहम्बा? म़ेदी येशूसाला टी़हज्येला ताङग्यो येहकें। 20ओहले खुङ ङ्यी़गी येशूसाला ओहङदी स्युहसीन, “बप्तिस्मा तेर्केन यूहन्नागी ङ्यिहला दि ल़ेहमु म़ेदी टी़हज्येला ताङ नाङग्यो यिहम्बा– ‘ङ्यिहगी कू़हदे तेहक्योगी थार्पा नाङगेन्दी राहङराङ यिहम्बा नि लेहमेन सुज्यीला कू़हदे तेह कोहएँ?’”
21ओहजे काहङलाराङ येशूगी मिह माहङबुलाराङ खुङया़गी नाहजा, नेहपा दाङ ङ्येहम्बा नाम्स्यीया़ लाहमले खा फे़ नाङसीन ओहले मी़ मेहथोङगेन मिह माहङबुलाराङ मी़ थोङगेन ज़ो नाङसीन। 22ओहले येशूगी खुङया़ला सुङ नाङसीन, “ख्यागी देला च्यि च्यि थोङबा, थे़बा, ओ़हदी राहङगी लोबेन यूहन्नासाला लो़ह काहल्दी स्येतोङ। मी़ मेहथोङगेनया़गी मी़ थोङगेॱराङ येह, काङबा लाहक्पा स्योरक्यो मिहया़ लाहङदी डो ख़ूएँराङ येह, जे थेन्ग्योया़ टा़हगेॱराङ येह, नाम्ज्यो मे़हथेगेनया़ थे़गेनराङ येह, स्यिक्यो मिहया़ सोम्बो लो़हगेॱराङ येह, ओहले प्राङबुया़गी या़हबु लेहङगुया़ ङ्यिहन ङ्युहङगेनॱराङ येह।#यशै ३५:५,६; यशै ६१:१ 23ङाहला थेचुम मेहबेकें मिह तेहम्बाराङ सोनाम-साक्पु यिहम्बा!” म़ेदी येशूगी सुङ नाङसीन।
24यूहन्नागी ताङग्योगी स्याहप्च्यी ङ्यी़ लो़हदी काहल फान्ज्यो येशूगी मिह मिह-माहङया़ला यूहन्नागी तेहन्दाला ह्अ कोह च्य़ूज्येला, “ख्या रिह-काम्बुला च्यि ता काहल्ग्यो? ल्हा़बागी युङगेन्गी ङ्युङमाया़ला? 25दि मिहन्सीमाना, लेहमेन च्यि ता काहल्ग्यो? काप्च्या या़हबु-या़हबु केहन्ग्योकी मिह ता काहल्ग्यो? रिहन माहङबु डोएँगी काप्च्या केहन्गेन दाङ ङ्याहम छ्यिम्बु पेहती साहएँगी मिहया़नी क्याहल-गाङला गा तेहकें। 26तेहम्बाराङ म़ेदोङ ले, ख्या च्यि ता काहल्ग्यो? लुहङतेम्बाला? यिहम्बा, माज्येराङ मानानी ख्यागी लुहङतेम्बा म़ेदीॱआङ मिह छ्यिम्बुज्यीला थोङदी येह। 27च्यिबेमाना यूहन्नागी तेहन्दाला सुङरापला दि ल़ेहमु प्री़हदी येह–
‘ते़, ख्येगी तोहङदा-तोहङ ङाहगी लेहङगु ख्योङगेन मिह च्यी़ला ताङज्ये येह,
ओहले खोगी ख्येती लाहम साल्ज्ये येह’।” #
मला ३:१
28 “ङाहगी ख्याला माएँ, पी़हमी पेहजाया़ ङो़ले क्येक्योगी पेहजाया़ नाहङला, यूहन्ना म़ेदी छ्यिम्बु मी़ह सुॱआङ म़ेह। यिहॱनाङ, किन्ज्योगी क्याहल्सीला सु थाम्ज्यी म़ेदी फेमा येहबा, खो यूहन्ना म़ेदीॱआङ छ्यिम्बु यिहम्बा” म़ेदी येशूगी सुङ नाङसीन। 29ओहले यूहन्नागी लोप्च्युङ ङ्यिहन्गेन मिह थाम्ज्यीगीराङ किन्ज्योगी सुङदेनला यिह छ्य़ेदी यूहन्नागी तेर्केन्गी बप्तिस्मा लेहन्सीन, ओहले ठाल तुहएँ मिहया़गीॱआङ ङ्यिहन्दी बप्तिस्मा लेहन्सीन।#मत्ती २१:३२; लूक ३:१२ 30यिहॱनाङ फरिसी दाङ छ्य़े-ठिमकी लोबेनया़गी किन्ज्योगी तेन नाङग्योगी लाहमला फेन मे़हथोएँ ने़दी यूहन्ना लाहमले बप्तिस्मा माहलेहन। 31ओ़ह सोङबे येशूगी येहपाराङ सुङ नाङसीन, “ओ़ह ल़ेहमु मिहया़ला ङाह सु ङ्याम्बु तुहर्च्ये? खुङया़ काह-ठि येहबा? 32खुङनी छोङ-ठोमला तेहकेन्गी पेहजाया़ ल़ेहमु यिहम्बा, खुङगी च्यी़गी च्यी़ला दि ल़ेहमु म़ेदी क़े तेन्गे,
‘ङ्यिहगी ख्यागी तेहन्दाला लेमु फी़ तेर्सीन, यिहॱनाङ ख्यानी माहच्याम।
ङ्यिहगी खेलाङगी लु लेहन्गेमु, ख्याया़नी माहङ्यी़ह!’”
33 “बप्तिस्मा तेर्केन यूहन्ना ओहङसीन, खो नाह खुरा साहउ येहकें, नाह खो कुहन्डुमकी निङगुराङ थुङगो येहकें। यिहॱनाङ ख्यागी यूहन्नाला ल्हेन्डी स्य़ूहक्योगी मिह म़ेदी मासीन। 34ङाह मिहगी स़ेबु ओहङदी साहसीन, थुङसीन ओहले ख्यागी, ‘ते़ साहउ, छ्याङसीवा, ठाल तुहएँ मिह दाङ तिहक्च्येम्बाया़गी रो़ह’ म़ेदी क्येन ता़गेॱराङ येह। 35किन्ज्योलेगी रिहक्स्यी ज्योर्केया़गीॱराङ मिहरोगी रिहक्स्यीला ठाबे सी़ह च्य़ूगे!” म़ेदी येशूगी सुङ नाङसीन।
येशू सिमोन माएँ फरिसीगी खाङबाला फेप्क्यो
36सिमोन मिहन थो़क्यो फरिसी च्यी़गी येशूला सोल छ्येच्येला फेप स्युहसीन। ओहले येशू सिमोनगी खाङबाला फेप्ती सोल छ्येच्येला ज़्य़ू नाङसीन। 37ओ़ह क्याहसाला तिहक्च्येम्बा पी़हमी च्यी़ येहकें, ओहले येशू फरिसी सिमोनगी खाङबाला सोल छ्येच्येला फेप दु माएँ थ़े फान्ज्यो मोह ज़ाप्केन्गी स्येल्बुङ#७:३७ स्येल्बुङ : ओ़ह स्येल्बुङदी सिलखडी माएँ तोह लाहमले ज़ोक्यो ओहङगो येहकें। मत्ती २६:७; मर्क १४:३; यूह १२:३ काहङग्या टिहमा स्यिहम्बु खाएँगी नुम ख्योङदी सिमोनगी खाङबाला ओहङसीन। 38ओहले मोह क्याहपले ओहङदी येशूगी स्याहप पोहला लाहङदी ङी़हदी तेहसीन, आहन्डा पेहती ङी़हदी तेहकेमु मोहगी मिज्यु माहङबु स्योर्ती येशूगी स्याहपला लेप्सीन, ओहले मोहगी येशूगी स्याहपला राहङगी टागी फी़ तेर्ती येशूगी स्याहपला च्युक पेहती टिहमा स्यिहम्बु खाएँगी नुम पे़दी स्याहपला टुहल्सीन।
39ओहले येशूला सोल छ्येच्येला फेप स्युहक्योगी फरिसी सिमोनगी, “येशू तेहम्बाराङ लुहङतेम्बा यिहम्बा यिहनानी राहङला दे़गेन्गी पी़हमी काहजे तिहक्च्येम्बा यिहन म़ेदी ङोह ख्येन्ज्ये येहकें” म़ेदी खोगी सेमला ऩेसीन। 40ओहले येशूगी, “ए सिमोन, ङाहगी ख्येला मा कोहच्ये ताम च्यी़ येहबा” म़ेदी सुङ नाङसीन। ओहले “सुङ नाङदोङ लोबेन ला़ह” म़ेदी फरिसी सिमोनगी स्युहसीन। 41ओहले येशूगी सुङ नाङसीन, “मेहन्दा ङ्यी़गी मिह च्यी़ला पेहलेन सेहसीन दु। ओहले च्यी़गी ङुल-टाङ ङाप्क्या सेहसीन दु, ओहले लेहमेनदीगी ङुल-टाङ ङाप्च्यु सेहसीन दु। 42ओहले खुङ ङ्यिकागीराङ पेहलेन च्याल मा़हखुबा सोङबे पेहलेन तेर्केन्गी ताहक्पुगी ङ्यिकालाराङ ल़े ताङसीन दु। ता़ह खुङ ङ्यी़ नाहङला का़हन्दीगी पेहलेन तेर्केन्गी ताहक्पुला चेवा पेहटो?” म़ेदी टी़ह नाङसीन।
43ओहजेला सिमोनगी, “पेहलेन माहङबु च्याल कोहएँदीगी ला़ह” म़ेदी स्युहसीन। “यिहम्बा, ख्येगी ठाबेराङ मासीन” म़ेदी येशूगी सुङ नाङसीन। 44ओहले पी़हमी ङो़ले ज़ी़दी सिमोनला सुङ नाङसीन, “दि पी़हमीला त़ेदोङ ले। ङाह ख्येगी खाङबाला ओहङसीन, ख्येगी ङाहला काङबा ठुएँगी छ्यु माहतेर, दि पी़हमीगीनी ङाहगी काङबा राहङगी मिज्युगी ठी़दी राहङगी टागी फी़सीन। 45ख्येगी ङाहला च्युक पेहती फेप माहस्यु, मोहगीनी ङाह ओहङ यिहन्ज्युराङ ङाहगी काङबाला च्युक पेहती तेहसीन। 46ख्येगी ङाहगी गो़ला जैतूनगी नुम च्यिॱआङ की़ माहतेर, मोहगीनी ङाहगी काङबाला टिहमा स्यिहम्बु खाएँगी नुम पे़दी टुहल तेर्सीन।#७:४६ यहूदीया़की खाङबाला डोम्बोया़ ओहङसीमाना काङबा ठुज्येला छ्यु तेर कोहउ येहकें, डाम्बाला च्युक पेह कोहउ येहकें, ओहले खुङया़दी गो़ला जैतूनती नुम की़ तेर कोहउ येहकें। 47मोहगी च्यिबे दि ल़ेहमु पेहक्यो माएँ ताम ङाह ख्येला माएँ, मोहती माहङबुराङ तिहक्पाया़ ता़ह सिहन्दी येह। ओ़ह सोङबे मोहगी ङाहला चेवा तेन्सीन। ओहले ङ्ये़हमु तिहक्पा येहकें मिहगीदी ङ्ये़हमुराङ चेवा पेहकें” म़ेदी येशूगी सुङ नाङसीन। 48ओहले येशूगी ओ़ह पी़हमीला, “ख्येगी तिहक्पा ता़हसीन” म़ेदी सुङ नाङसीन। 49ओहले डेन साहज्येला तेहक्योया़गी राहङ नाहङदोङराङ दि ल़ेहमु म़ेदी ताम मामा चासीन, “तिहक्पा ता़ह च्य़ूगे दि मिह सु यिहम्बा?” 50ओहले येशूगी ओ़ह पी़हमीला, “ख्येगी ङाहला तेहपा पेहक्यो सोङगोराङ ख्ये थार्सीन, ता़हनी सेम लो तेहमु पेहती लो़ह सोङ” म़ेदी सुङ नाङसीन।
Currently Selected:
लूका 7: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
