मर्कूस 7
7
पे-ठिमगी तेहन्दाला लोप्च्युङ
(मत्ती १५:१-९)
1यरूशलेम क्याहसाले ओहङग्योगी फरिसी दाङ छ्य़े-ठिमकी लोबेनया़ येशूसाला जोम ओहङसीन। 2ओहले येशूगी लाहला स्याहप्च्यीया़गी लाहक्पा मा़हठी़बा पेहती तोप्च्याया़ से़हदी तेहक्यो खुङया़गी थोङसीन। 3फरिसीया़ दाङ थाम्ज्यी यहूदीया़गी खुङया़गी आख्ये मे़हमेया़गी ज़ोक्यो ठिमला ल़ेहमु लाहक्पा मा़हठी़बा पेहती साहज्ये से़हया़ मेहसाह येहकें। 4छोङ-ठोमले ओहङदीॱआङ खुङया़गी राहङला चाङमा मा़हजेबा पेहती च्यिॱआङ साहज्ये से़हया़ मेहसाहएँ ओहले खुङया़गी लेहमेन माहङबुराङ ठिमया़ॱआङ ची़गे, पे यिहॱना़: तेहर्मा, मेहन्ज्या, ओहले निक्यीया़ॱआङ चाङस्याल माहक्याहप्पा पेहती चाल मी़हतीएँ।
5ओ़ह सोङबे फरिसी दाङ छ्य़े-ठिमकी लोबेनया़गी येशूला, “च्यिबे राहङगी स्याहप्च्यीया़गी आख्ये मे़हमेया़गी पे-ठिमला मा़हचीबा पेहती लाहक्पा मा़हठीबाॱराङ साहज्ये से़हया़ साहएँ?” म़ेदी टी़हसीन। 6येशूगी खुङया़ला सुङ नाङसीन, “यशैया लुहङतेम्बागी प्रुहक्योगी दि स्याहल ख्या यिहन्दो तेन्गेनया़ ङ्याम्बु ठाबेराङ डी़गे– ‘दि मिहया़गी ङाहला खागीनी ची़नाङ पेहचेनज्यी तेन्गे,
यिहॱनाङ खुङगी सेमनी ङाहलेगी ज्यिबुराङ था़-रिहङबु येह। #यशै २९:१३
7 खुङया़गी ङाहला छ्येपा फुल्ग्यो नि स्यिती काम्बु यिहम्बा च्यिबेमाना खुङया़नी मिहगी ज़ोक्योगी पे-ठिमया़ च्यी़राङ लोप्कें,’
8 तेहम्बाराङ ख्यागी किन्ज्योगी काला क्याहपला क्युर्ती मिहया़गी ज़ोक्योगी पे-ठिमया़ गा ची़उ दु” म़ेदी येशूगी सुङ नाङसीन।
9ओहले येहपाराङ येशूगी सुङ नाङसीन, “राहङगी ज़ोक्योगी ठिम्दाया़ ची़ज्ये म़ेदी किन्ज्योगी नाङग्योगी काया़ला गोम्दी तेहच्येला ख्या ज्यिबुराङ ख़ेबा दु! 10पे यिहॱना़: मोशागी दि ल़ेहमु सुङ नाङदी येह, ‘राहङगी आबा-आमाला चा़ पेहतोङ!’ ओहले, ‘राहङगी आबा-आमाला मे़मु क्याहप्केनया़लादी सेकेन्गी ङ्य़ेहबा काल्दोङ।’” #प्रस २०:१२; व्य ५:१६; प्रस २१:१७; लेवी २०:९
11 “यिहॱनाङ ख्यागी दि ल़ेहमु तामया़ गा लोप्कु दु– सुज्यीगीॱआङ राहङगी आबा-आमाला, ‘ज़ी़-नाङदोङ राहङगी ङाहलेगी ज्योर्केन्गी स़ेह “कुर्बान” यिहम्बा’ म़ेदी मासीमाना, (दि माक्योगी तेहन्दादी, ‘दि स़ेह ङाहगी किन्ज्योलाॱराङ फुल सिहन्सीन’ म़ेदी माक्यो यिहम्बा) 12ओ़ह सोङगोराङ खोगीदी राहङगी आबा-आमाला स्याहप्तो स्युह मेहकोहएँ म़ेदी का़गे! 13दि ल़ेहमु पेहती ख्या राहङगी पे-ठिमगी तिङ ङ्ये़दी किन्ज्योगी काया़ला फेन मे़हथोएँ ज़ोएँ ओहले ओ़ह ल़ेहमु लेहमेन माहङबुराङ से़हया़ ख्यागी पेहकेनॱराङ येहबा।”
मिहया़ला मेहचाङा ज़ोएँगी से़हया़
(मत्ती १५:१०-२०)
14ओहले येशूगी मिह मिह-माहङया़ला येहपाराङ क़े क्याहप्ती सुङ नाङसीन, “ता़ह, ख्या थाम्ज्यीगीराङ ङाहगी ताम या़हबु पेहती ङ्यिहन्दी ह्अ के़हदोङ। 15खाले पेहती मिह ज़ुबु नाहङला लेप्कें च्यि से़हज्यीगीॱआङ मिहला मेहचाङा ज़ो मी़हखुएँ, यिहॱनाङ मिहगी सेम नाहङले फिला थेन्गे से़हया़गी गा मिहला मेहचाङा ज़ोएँ। 16[का़हन्दी ङ्याम्बु ङ्यिहन्गेन्गी नाम्ज्यो येहबा ओ़हदीगी ङ्यिहन्ज्यु!”#७:१६ दि आङ-टा़हङकी केच्यादी माहङबुराङ निङबा ग्रीक बाइबलला प्री़हदी म़ेह। ]
17ओहले येशू मिह मिह-माहङया़ला क्युर ज़्या़दी खाङबा नाहङला स्य़ूह नाङ फान्ज्यो स्याहप्च्यीया़गी, “ओ़ह पेगी तेहन्दा च्यि यिहम्बा?” म़ेदी स्युहसीन। 18ओहले येशूगी सुङ नाङसीन, “च्यि ख्यागी तोहरोङॱआङ ह्अ मा़हकेहबा? खाले पेहती नाहङला स्य़ूहगे से़हया़गी मिहया़ला मेहचाङा ज़ो मी़हखुएँ म़ेदी ख्याला क्यी़ह म़ेहबा ले? 19ओ़हदीनी सेमला स्य़ूहगे स़ेह मिहम्बा, यिहॱनाङ टेहपाला लेप्ती ओ़हलेगीॱआङ फिला थेन्दी डोएँ।” दि ल़ेहमु पेहती येशूगी थाम्ज्यीराङ नामे-नाजोगी साहज्ये से़हया़ चाङमा ओहङगे म़ेदी प्रा साल नाङग्यो यिहम्बा।
20येशूगी येहपाराङ सुङ नाङसीन, “सेम नाहङले थेन्गे से़हया़गी गा मिहला मेहचाङा ज़ोएँ। 21च्यिबेमाना थाम्ज्यीराङ चोक्पा तामया़ सेम नाहङलेगीॱराङ थेन्दी ओहङगे ओहले खोला ल़ेह चोक्पा ङो़ले ॱठिके, पे यिहॱना़ छ्येउ-छ्येंमु पेहकें, कुमेन क्याहप्कें, मिह सेकें ओहले, लेहमेन पी़हमीला तेहच्यागी सेमङेन च्याङगे, 22ह्अम्बा पेहकें, ल़ेह ङ्येहम्बा पेहकें, ठाक तीएँ, छा़रा डोएँ, ठादो पेहकें, स्ये़हन्डील पेहकें, छ्य़ेन्दो तेन्गे ओहले उल्दुम्बा ल़ेह पेहकें।
23 दि थाम्ज्यीराङ से़हया़ मिहगी सेम नाहङलेॱराङ थेन्गे ओहले ओ़ह से़हया़गीॱराङ खोला मेहचाङा ज़ोएँ यिहम्बा” म़ेदी येशूगी सुङ नाङसीन।
लेहमेन क्यिहपागी पी़हमी-पेहजागी यिह-छ्य़े
(मत्ती १५:२१-२८)
24ओ़ह तिङले येशू ओ़ह ग्या़ क्युर ज़्या़दी टुरोस दाङ सीदोन क्याहसाला फार फेप नाङसीन। सुज्यीगीॱआङ क्यी़ह माहन्ज्योर्च्यु म़ेदी येशू मिह च्यी़गी खाङबाला फेप नाङसीन। यिहॱनाङ मिहया़गी क्यी़ह ज्योर्सीन। 25मेहचाङा नाम्स्यी स्य़ूहक्यो पोहमो च्यी़गी आमागी येशूगी तेहन्दाला थे़-लुहङ मे़हबाराङ मोह येशूसाला ओहङसीन ओहले येशूगी स्याहपला खेप्चु क्याहप्सीन। 26मोहती सिरिया क्याहल-खापगी फोनिके माएँ ग्या़ला क्येक्योगी ग्रीक पी़हमी च्यी़ यिहन्गे। ओहले मोहगी “ङाहगी ल्हेन्डी स्य़ूहक्योगी पोहमोला टा़ह च्य़ू नाङदोङ ला़ह!” म़ेदी येशूला स्युहसीन। 27यिहॱनाङ येशूगी, “तोहङले पुह पोहमोया़ला साहज्ये से़हया़ तेर च्यिबेमाना पुह पोहमोया़गी खुरा लेहन्दी क्यिबुया़ला तेर्च्ये या़हबु मेहयोहङगे!” म़ेदी सुङ नाङसीन। 28ओहले मोहगी, “यिहम्बा लाह! ओ़ह नि ठाबे यिहम्बा! यिहॱनाङ क्यिबुया़गीॱआङ पेहजाया़गी च्योक्चीलेगी माहर ताहप्क्योगी से़हया़ साहएँ।” 29दि सेन्दी येशूगी मोहला सुङ नाङसीन, “ख्येगी दि ल़ेहमु माक्यो सोङबे ख्ये सेम लो तेहमु पेहती खाङबाला सोङ, ख्येगी पोहमोलेगी ल्हेन्डी थेन्दी काहल सिहन्दी येह!” 30मोह लो़हदी खाङबाला लेप्केमु नि पोहमो टा़हदी ङ्याहल्दी तेहक्यो थोङसीन। ओ़ह पोहमोलेगी ल्हेन्डी थेन्दी काहल सिहन्ग्यो येहकें।
येशूगी मिह लेम्बाला टा़ह च्य़ू नाङग्यो
31येशू टुरोसले थेन्दी सीदोन क्याहसाले जेती डेकापोलिस दाङ गालील छोला फेप नाङसीन। 32ओहले ओ़हला मिहया़गी नाम्ज्यो मे़हथेगेन दाङ ताम मे़हथेगेन मिह च्यी़ला येशूसाला ख्योङदी, “दि मिहला राहङगी छ्या़गी दे़ नाङदोङ ला़ह!” म़ेदी स्युहसीन। 33ओहले येशूगी ओ़ह मिहला मिह मिह-माहङया़लेगी तेन्दी याहम्बी फाच्चीला नोम फेप्सीन ओहले येशूगी खोगी नाम्ज्योला छ्या़-जुबी चाहङ नाङसीन, ओहले राहङगी छ्या़ला च्या़ह-छ्युक जेती खोगी च्येलेला दे़ नाङसीन। 34ओ़ह तिङले येशूगी स्यिहङगाम ङो़ले ऊ रिहङबुज्यी टिह-नाङदी, “इफ्फाता,” म़ेदी सुङ नाङसीन। दि माक्योगी तेहन्दादी “खा फ़ेज्यु” म़ेदी माक्यो यिहम्बा। 35दि ल़ेहमु सुङ-लुहङ मे़हबाराङ ओ़ह मिहगी नाम्ज्यो थे़गेन काहल्सीन, ओहले खोगी च्येले युङ ख़ूसीन ओहले खोगी तामॱआङ टाक्पु पेहती माज्ये छ़ूसीन। 36ओहले येशूगी मिहया़ला “दि ताम सुॱलाङ माहस्ये” म़ेदी का नाङसीन। येशूगी काहजे का नाङॱनाङ मिहया़गी ओहजेराङ क़ेहनाङ पेहती स्येती काहल्सीन। 37दि केच्या थे़गेनया़ मिह थाम्ज्यीगी ज्यिबुराङ ह्अ ल़ेहदी, “मिहरोगी थाम्ज्यीराङ छ्या़लेया़ या़हबु जे-नाङदी येह। मिहरोगी नाम्ज्यो मे़हथेगेनया़ला थ़े ख़ूएँ ज़ो नाङगे ओहले ताम मेहथेन्गेनया़ॱलाङ ताम मा ख़ूएँ ज़ो थुप्कें” म़ेदी मासीन।
Currently Selected:
मर्कूस 7: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
