मर्कूस 8
8
येशूगी मिह तोङरा ज़्यिला साहज्ये नाङग्यो
(मत्ती १५:३२-३९)
1ङ्यिहमा तोबा तिङले येहपाराङ मिह मिह-माहङ छ्यिम्बुच्यी जोम ओहङसीन। खुङगी ख्योङग्योगी साहएँ से़हया़ चो़हक्यो सोङबे येशूगी स्याहप्च्यीया़ला राहङसाला क़े क्याहप्ती सुङ नाङसीन, 2“दि मिहया़ला थोङदी ङाहला ज्यिबुराङ निङ च्येहसीन। दि मिहया़ ङाह ङ्याम्बुराङ तेहती तिहरीङ ङ्यिहमा सुम काहल सिहन्सीन। ता़ह खुङया़गी साहज्ये से़हया़ॱआङ चो़ह सिहन्दी येह। 3ता़ह खुङला साहएँ स़ेह च्यिॱआङ माहतेर्पा पेहती लो़ ताङज्ये माना नि खुङ तो़दी लाहमलाराङ लुङला डोरो। त़ेदोङ, काहजेनी था़-रिहङबुले ओहङदी येहबा” म़ेदी येशूगी सुङ नाङसीन। 4ओहले स्याहप्च्यीया़गी, “आबी, ओहजे माहङा मिहला दि च्यिॱआङ म़ेहबा ग्या़ला ताहङस्यी पेहती का़हलेगी साहज्ये से़हया़ ख्योङदी तेर्च्ये ले?” म़ेदी मासीन। 5ओहले येशूगी, “ख्या ङ्याम्बु खुरा काहजे येहबा ले?” म़ेदी टी़ह नाङसीन। “ङ्यिह ङ्याम्बु खुरा तिहन येहबा” म़ेदी खुङगी ल़ेहन क्याहप्सीन।
6ओहले येशूगी मिहया़ला, “ओ़ह पाङगाया़ला तेहतोङ” म़ेदी सुङ नाङसीन। ओहले येशूगी खुरा तिहन नोम्दी किन्ज्योला थुज्यी-छ्ये़ फुल नाङसीन। ओहले खुरा राल्दी स्याहप्च्यीया़ला के़हदी तेर्तोङ म़ेदी सुङ नाङसीन, ओहले स्याहप्च्यीया़गी मिहया़ला के़हदी तेर्सीन। 7ओहले खुङ ङ्याम्बु ङ्याह फेमा फेमाॱआङ सिपाज्यी येहकें। ओहले येशूगी ओ़ह ङ्याहगी तेहन्दाॱलाङ थुज्यी-छ्ये़ फुल्दी स्याहप्च्यीया़ला के़हदी तेर्तोङ म़ेदी सुङ नाङसीन। 8ओहले मिह थाम्ज्यीगीराङ साह ख़ूएँ थु साहसीन ओहले स्याहप्च्यीया़गी ल्हा़स्युलया़ तुहएँमुनी डा़लो तिहन काहङसीन। 9ओ़हला साहएँ मिहया़ तोङरा ज़्यिजे येहकें। साह सिहन फान्ज्यो येशूगी खुङया़ला कोहङबा नाङसीन। 10ओ़ह तिङले येशू लाहम्साङराङ स्याहप्च्यीया़ ङ्याम्बु टुह-छ्युङला जा़दे दलमनुथा माएँ ग्या़दी दे-खामला फार फेप नाङसीन।
फरिसीया़गी येशूला ताक्छेन तेन नाङदोङ म़ेदी स्युहक्यो
(मत्ती १६:१-४)
11ओहले फरिसीया़ येशूसाला ओहङदी स्येपा तुहर्च्ये छ़ूसीन। खुङगी येशूगी खोक्पा ताज्ये छोल्दी, “ङ्यिहला स्यिहङगामले माहर ओहङगेन्गी ताक्छेन च्यी़ तेन नाङदोङ” म़ेदी स्युहसीन।#मत्ती १२:३८; लूक ११:१६ 12दि सेन्दी येशूगी ऊ रिहङबुज्यी टिहती सुङ नाङसीन, “दाङ-तिहरीङगी मिहया़गी च्यिबे ताक्छेन ताज्ये छोल्गे? तेहम्बाराङ ङाह ख्याला माएँ, दि ल़ेहमु मिहया़गी च्यिॱआङ ताक्छेनया़ थोङ ङ्युहङज्ये म़ेह!”#मत्ती १२:३९; लूक ११:२९ 13देजे सुङदी येशू खुङया़ला ओ़हला क्युर ज़्या़दी टुह-छ्युङला जा़दे येहपाराङ फार्केन देपला फेप नाङसीन।
फरिसी दाङ हेरोदती खमिरकी तेहन्दाला लोप्च्युङ
(मत्ती १६:५-१२)
14स्याहप्च्यीया़गी खुरा ख्योङज्ये टेहम्बा च्येहती येहकें, ओहले टुह-छ्युङला खुङया़ ङ्याम्बु खुरा च्यी़ज्यीॱराङ येहकें। 15ओहले येशूगी स्याहप्च्यीया़ला सुङ नाङसीन, “जेम्बु पेहतोङ! फरिसी दाङ हेरोदकी खमिरलेगी जेम्दी तेह।”#लूक १२:१ 16ओहले स्याहप्च्यीया़गी राहङ नाहङदोङ, “ओहराङगी खुरा माहख्योङबा सोङबे येशूगी दि ल़ेहमु सुङ नाङग्यो यिहम्बा नि,” म़ेदी ताम माज्ये छ़ूसीन। 17खुङगी दि ल़ेहमु पेहती ताम माक्यो ङोह ख्येन्दी येशूगी खुङया़ला सुङ नाङसीन, “खुरा माहख्योङबा सोङबे माक्यो यिहम्बा म़ेदी ख्या च्यिबे म़े तेहकें? च्यि ख्याला क्यी़ह म़ेहबा? च्यि ख्यागी तोहरोङॱआङ ह्अ मा़हकेहबा? च्यि ख्यागी सेम तोहरोङॱआङ सान्दीॱराङ येहबा? 18ख्यागी मी़ नि येहबा यिहॱनाङ मेहथोङ दु, नाम्ज्यो येहतीॱआङ ख्यागी मे़हथे दु, च्यि ख्याला टेहम्बा म़ेहबा, #यर ५:२१; इज १२:२; मर्क ४:१२ 19ङाहगी खुरा ङागी मिह तोङरा ङाला साहज्ये तेरक्यो येहकें, ओहजेला ख्यागी ल्हा़स्युलया़ तुहएँमु काहजे डा़लो तुहक्यो येहकें?” खुङया़गी येशूला “डा़लो च्यिङ्यी़ लाह” म़ेदी ल़ेहन क्याहप्सीन। 20येशूगी येहपाराङ टी़ह नाङसीन, “ओहले खुरा तिहनगी मिह तोङरा ज़्यिला साहज्ये तेर्केमु ख्याया़गी ल्हा़स्युलया़ काहजे डा़लो ती़हबा ले?” ओहले खुङया़गी, “डा़लो तिहन लाह” म़ेदी ल़ेहन क्याहप्सीन। 21येहपाराङ येशूगी खुङला टी़ह नाङसीन, “ओहले! च्यि ख्यागी तोहरोङॱआङ ह्अ मा़हकेहबा?”
येशूगी मी़ मेहथोङगे मिहला टा़ह च्य़ू नाङग्यो
22खुङ फ़ेबेॱया बेथसेदा युहलला लेप नाङगेमु मिहया़गी मी़ मेहथोङगेन मिह च्यी़ ख्योङदी, “खोला राहङगी छ्या़गी दे़ नाङदोङ लाह” म़ेदी येशूला स्युहसीन। 23ओहले येशूगी खोगी लाहक्पाला ज़ुङदी ठिती युहललेगी फिला नोम फेप्सीन। ओहले येशूगी ओ़ह मिहगी मी़ला च्या़ह-छ्युक जेती राहङगी छ्या़ खो थो़ला ज़्या़दी टी़ह नाङसीन, “च्यि ख्येगी च्यिॱआङ थोङगो दु नि?” 24ओहले खोगी गो़ क्या़दी मासीन, “मिहया़ला थोङज्ये नि थोङगो दु, यिहॱनाङ खुङला तोहङबोया़ ल़ेहमुराङ पेहती गा डोएँ थोङगो दु।” 25येशूगी येहपाराङ खोगी मी़ला राहङगी छ्या़गी दे़ नाङसीन। ओहले ओ़ह मिहगी या़हबु पेहती तासीन। ओहले खो थोङ ख़ूएँ काहल्सीन ओहले खोगी थाम्ज्यीराङ से़हया़ छ्यिसाल-नाहङसाल पेहती थोङ ख़ूएँ काहल्सीन। 26ओ़ह तिङले येशूगी खोला खाङबाला ताङदी सुङ नाङसीन, “दि युहलला येहपाराङ मा़हस्युहबा पेहती स्यार्क्याङॱराङ खाङबाला सोङ।”
येशू सु यिहम्बा लाह?
(मत्ती १६:१३-२०; लूक ९:१८-२१)
27ओ़ह तिङले येशू स्याहप्च्यीया़ ङ्याम्बु कैसरिया फिलिप्पी क्याहसागी साहर-सुहरया़ला येहकेन्गी युहलया़ला फार फेप नाङसीन। लाहमला येशूगी स्याहप्च्यीया़ला टी़ह नाङसीन, “मिहया़गी ङाहला सु यिहम्बा म़ेदी माउ दुबा ले?” 28खुङया़गी येशूला मासीन, “लाहलागी राहङला बप्तिस्मा तेर्केन्गी यूहन्ना यिहम्बा म़ेदी माउ दु लाहलागी एलिया यिहम्बा म़ेदी माउ दु ओहले लाहलागीदी लुहङतेम्बाया़ नाहङगी लुहङतेम्बा च्यी़ यिहन्डो म़ेदी माउ दु लाह।”#मर्क ६:१४,१५; लूक ९:७,८ 29येशूगी टी़ह नाङसीन, “ओहले ख्यागीदी ङाहला सु यिहम्बा म़ेदी माएँ ले?” पत्रुसगी, “राहङ थार्पा नाङगेन्गी मास्यीका यिहम्बा” म़ेदी ल़ेहन क्याहप्सीन।#यूह ६:६८,६९ 30ओहले येशूगी खुङला “दि केच्या सुॱलाङ माहस्ये” सुङदी का नाङसीन।
राहङ टोहङ कोहएँगी तेहन्दाला येशूगी लुहङदेन
(मत्ती १६:२१-२३; लूक ९:२२)
31ओ़ह तिङले येशूगी स्याहप्च्यीया़ला राहङगी तेहन्दाला दि ल़ेहमु जेती सुङज्ये छ़ूसीन, “मिहगी स़ेबुगी माहङबुराङ तुहक्पु खुर कोहच्ये येह। गोबा, पूजाहारी छ्यिम्बु दाङ छ्य़े-ठिम ताङगे गोबाया़गी खोला चा़ पेहच्ये म़ेह ओहले सेच्ये येह। यिहॱनाङ ङ्यिहमा सुम तिङले खो येहपाराङ स्यिक्योलेगी सोम्बो लो़हज्ये येह।” 32दि ल़ेहमु जेती स्याहप्च्यीया़ला दि स्याहल या़हबु जेती प्रा साल नाङसीन। ओहले पत्रुसगी येशूला ग्या़ च्यी़ला ख्येर्ती “दि ल़ेहमु जे माहनाङ” म़ेदी बार्ता लाङसीन। 33ओहजेला येशूगी छुर लो़हदी लेहमेन स्याहप्च्यीया़ला ज़ी़सीम्बाॱराङ पत्रुसला दि ल़ेहमु सुङदी काप्क्येन नाङसीन, “ए ती़ह गो-छ्येवा, ख्ये दिलेगी थेन्दी सोङ! ख्येगी सेम किन्ज्यो ङो़लेगी मिहम्बा गा मिह ङो़ले यिहम्बा।”
स्याहप्च्यीया़गी क्युर कोहएँ से़हया़गी तेहन्दाला सुङदेन
(मत्ती १६:२४-२८; लूक ९:२३-२७)
34ओ़ह तिङले येशूगी राहङगी स्याहप्च्यीया़ दाङ ओ़हला येहकेन्गी मिहया़ला क़े क्याहप्ती सुङ नाङसीन, “त़ेदोङ, सु ङाहगी स्याहप्च्यी डोज्ये सेम पेहकें खोगी राहङला मा-लोक पेह कोहएँ ओहले राहङगी क्याहङस्यीङ खुर्ती ङाहला तिङ ङ्या़ कोहएँ 35च्यिबेमाना राहङगी तेहन्दाला सी़ज्ये छोल्गेन्दीगी राहङगी मिहली तोर च्य़ूज्ये येह, यिहॱनाङ राहङगी मिहली ङाहगी तेहन्दाला ओहले या़हबु लेहङगुगी तेहन्दाला तोर च्य़ूगेन्दीगीनी ओ़ह ज्योर्च्ये येह।#मत्ती १०:३९; लूक १७:३३; यूह १२:२५ 36मिहगी थाम्ज्यी जाम्बुलीङॱराङ राहङगी लाहक्पाला लेहन्दी राहङगी सो़-दी#८:३६ सो़ : दि सो़ माक्योदी नाहमॱआङ मिहस्यीएँ मिहलीकी तेहन्दाला माक्यो यिहम्बा। तोर्च्युसीमाना खोला च्यि खेप्साङ काहल्बा ले? 37ओ़ह तोर च्युक्योगी मिहली च्यि से़हगी लो़ ख़ूएँ ले? 38दि छ्येउ-छ्येंमुवा दाङ तिहक्च्येम्बा मिहदोला का़हन्दीगी ङाह दाङ ङाहगी लोप्च्युङला ङोहजा पेहकें, मिहगी स़ेबुगीॱआङ याहपगी ज़िज्यिद नोम्दी नाम्पार-ताहक्पा स्यिहङगामगी स्याहप्च्यीया़ ङ्याम्बु फेप नाङगेमु खोला राहङदी माज्येला ङाह ङोह छाज्ये येह।”
Currently Selected:
मर्कूस 8: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
