Matiu 17
17
Iesua vasimolu muxiu musaxi iou vilemo
1Ioxe, voxo 6 mulai mukalu laso Iesua mu'avali'a Pita xe Tiemisi xe Tioni so imulinu. Mimulinu la mitelai no la'olu vile teitexi mo ane'isisi mixoxolu ne. 2Mixolu xe mimalei loxo 'o la vasimolu muxiu musaxi iou vilemo. Anu alaiou lamanaxu loxo aso xe lavulutiou muvalukea aloxo laiti 'o. 3Sila Mosisi ilou Elaitia mipa ne mo tatisaipeli tatalu mimaisi'a ivikala noxou Iesua. 4Mimaisi'a axone la Pita muvikala lexe, “Tatananexi, laixe so nenge taxolu aloxo 'osi. Loxo nini namasaxau la ta'alaxu tani tatalu 'o. Vile sine xe vile noxou Mosisi xe vile noxou Elaitia.”
5La Pita a uvikalasio sila sauma vile muvalukeasi musuasi'a. Laso xoli vile molu no sauma ne muvikala lexe, “Ano'o alixeli ane asexalaxu, eni a'osasou misevile. Ngingi ngalomuxu.” 6Xe tatisaipeli milomusou vaikala ne la milalusi miai no lia mo ume mukasi'asi. 7Ia Iesua mune'e mukasi noxi'a la muvikala lexe, “Ngatulu, nga'ume uasi.” 8Xe ie'i muka mutelo xo'o la imaisou evilela uasi, Iesua anusisi muxolu ne.
9Ioxe, oli'a milutu no la'olu mo a ilulu'e la anu muvikalane'i pakia'u aloxo 'o, “Mimi ngesaxisou 'o ngapala'anixu noxou evile uasi, ulai xo mo Itema ane molu noxou Mosinge utulu no anu soli, laso ane.”
10La tatisaipeliou mitali'isou lexe, “Axova so tamitema so lavulavu no anu lavuloto ivikala lexe Elaitia u'uli une'e tei kaio Itema ane molu noxou Mosinge uxali ili'i?” 11La anu mukoline'i lexe, “Ia xo ma'i, anene manina. Mosinge vaikalaou lexe Elaitia u'uli so upaipounu vote'i. 12Ia no anu tali'i noxinge ne la avikalangengi aloxo 'o. Elaitia a mune'e mukalu ia tamitema itongonu uasi, mi'oxonu ili'ilixo masua noxou no anu masamasaxa noxi'a. Xe loxo Itema ane molu noxou Mosinge la utavulenu navunavu no avo'a iou vilesisi axonesi.” 13Iesua muvikala axone laso anu mupalasi noxi'a tatisaipeli lexe anu muvivikalasou Tioni itema so u'oxonu kelele ane.
Iesua mukusaou angelo masua vile ane tatisaipeli imomomo no anu uasi
14Ioxe, Iesua oli'a tatisaipeli tatalu milai xo la mixali noxi'a tamitema tavu'alo e milolutusi. La itema vile mune'e noxou Iesua ka muxolasou tava'u no laxunu mo muvikala lexe, 15“Tatilao, naiaiama noxou alixeli xo xovulaulau ukasou utotomu mo mi ne uvila'isou vasimolu. Xo alaxu tavu'alo anu usu'anu u'una no navu xe alaxu tavu'alo usu'anu u'una no lexa. 16Mo ene'enu noxi'a tatisaipelimeni ia imomomo so ipaipounu uasi.”
17Iesua mulomusou itema ne mukalu la muvikalane'i tamitema latala ne lexe, “Uo, ngingi tamitema vaimomo 'o ne ngalopala uasisi. Axolu noxinge voxo veveni axova mo so ngano'u lavulavu? Ngamolo kalakala'ilo axo'o la ukalu talu? Ngano'u molomolo ne une'e noxilo.” 18Xe Iesua mulavixu angelo masua ne sila alaxu vilesisi muxexesou molomolo ne sika laixenusi.
19Mukalu xe ili'i ane'isisi mixolu la tatisaipeli mitali'isou Iesua lexe, “Axova so nexi tamomomo so takusaou angelo masua ne uasio?” 20La anu mukoline'i lexe, “Ngingi ngalopala malaxo uasi, laso maixene ngamomomo uasi ne. Xo eni avikalangengi manina lexe loxo lopala noxinge manina ia isusu'a se aloxo masiteti ngiaxu se isusu'a ne, la ngingi ngamomomo so ngavikalanu la'olu 'o lexe, “Navula nalai olele,” la anu uvula ane. Axone la ngamomomo no anu xaixai mukalusi. 21Ia angelo masua kaini axone, anu vote'i vilesisi so ngakusaou, a no anu ilixo so nga'apingenge avile no anu ani'ani voxo se'i mo ngavivikala noxou Mosingesi.”#17.21 Tamitema so lavulavu se'i ixavutala lexe Matiu molu ukaukavunu vaikala ane uxolu no anu 17:21 uasi, itema vilemo masi mukaukavunu.
Vaikalaou Iesua e lexe usoli ka umaulila, a mulemolula
22Mukalu la Iesua oli'a tatisaipeli mipita no xale lia ne Xalili. La muvikalane'i lexe, “Anu Itema ane molu noxou Mosinge la usu'a no avo'a tamitema. 23Laso ane'i ivau usoli ia no anu voxo tatalusou la anu utulu umaulila.” Xe ane'i tatisaipeli milomu axone la opone'i tu'umaxu misevile.
Iesua musu'anu taxisi e so tasou Mosinge
24Ioxe, ili'i la Iesuaena milai mixali ne Kapeniamu. La tamitema so itaxusou taxisi so tasou Mosinge mine'e mitali'i noxou Pita lexe, “Axova, tisamengi ulavusou usu'anu taxisi so tasou Mosinge uasi?” 25La Pita mu'oxo lexe, “Ia xo ma'i, anu usu'anu ane.” Mukalu xe Pita mu'unalai no tani mo uvikala uao la Iesua muvikalanu lexe, “Saimoni, naxavutala axova? Ane'i takingi so lialia itaxusou taxisi iouiou noxi'a ta'ei? Noxi'a ta'ili'a u'isalili o noxi'a leviani?” 26La Pita mukolinu lexe, “A noxi'a leviani to.” La Iesua mu'oxo lexe, “Ia xo ma'i, ane'i ta'olu u'isalili ixolu lalavulusi no anu, isu'anu uasi. 27Ia mi vile uasi, masi opone'i tu'umaxuinge ane. Laso na'oxo aloxo 'o. Nalai na'uku no kupa xe sinana ane u'ala tei la nano'u ka na'a'anixu anaxu. La nano'u lamoli a uai nonano no anaxu ne. Mukalu la nalai nalosi'a so ulotonu taxisi noxinge nengei.”
Currently Selected:
Matiu 17: ATA
Highlight
Share
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
