Matiu 18
18
Iesua mupelototo lexe ena'ei so u'uli laxune'i tamenexu
1Xe no voxo ne tatisaipeli mine'e mitali'i noxou Iesua lexe, “Ena'ei noxixe ane so u'uli'uli no voxo so Mosinge molu u'uli laxune'i tamitemaou no tualasou?” 2La Iesua mu'avalou molomolo vile mune'e noxou ka mutulusou no laxune'i. 3La muvikala lexe, “Eni avikalangengi manina aloxo 'o. Loxo ngaxiu avile so ngaxali aloxo tamolomolo uasi, la vote'i uasi so ngingi nga'una ngaxolu no voxo so Mosinge molu u'uli laxune'i tamitemaou no tualasou. 4Loxo itema vile molu ulu'enu so uxali vitanisi a loxo molomolo soxu 'o, la no anu voxou e no tualasou Mosinge ne, anu so u'uli laxune'i tamenexu ane. 5Itema aneva usexelaxu molomolo aloxo 'o so usu'ulinu no anu ualasilo, la anu loxo usexelaxu molomolo nesi uasi. Eni ane.”
Vasimenge pa'upa'usou uolenenge no anu susu
6Xe Iesua musolonu aloxo 'ola, “Noxi'a tamolomolo ane ilopala noxilo 'o, loxo itema vile uxovulaulanixu lopala noxi'a la utavulenu tu'umaxusou ane. Xo loxo tamitema isakinu lavo'o toxoxu ulili no limilaxu ka isu'anu no luaki xe uuo'uo la anu loxo mi vitanisi ane. Ia loxo Mosinge ukolinu susu noxou ne la tu'umaxu e tu'umaxu manina.
7Anu masua manina noxi'a laili so lialia 'o xo ane'i ixalixu mimi ane so u'oxone'i tamenexi'a itulaki ka ilapau no anu susu. Laso noxinge, la anu manina lexe mimi uxali so ngatulatulaki no anu. Ia masua noxou itema aneva uxalixu tulaki mo upalusi'a tamenexu no anu susu axone. 8Xe aloxola. Loxo avone o tava'ine ulapuneni no anu susu la naxotonu uxexe. Xo loxo naxolu avone vilesisi o tava'ine vilesisi la ialuxu sevile. Ia anu umomomo uasi no anu tu'umaxu so naxalisou no anu navu so mamulo e usita uasi. 9Mo ieni kalumo. Loxo ieni vile ulapuneni no anu susu la naxexenu mo usua'si. Xo loxo naxolu ieni vilesisi ia namauli la anu laixe no anu ane so ieni tamei ia nasu'a no navu so mamulosi.
10Laso ngingi ngalaxa'i laixe lexe ngingi ngamatapiane'i ta'aliku moso 'o uasi. Xo eni avikalangengi lexe ta'angelo so isaxila'a a utotomu isaxisou iou Mamilo no tualasou. 11Xe loxo Itema ane molu noxou Mosinge la anu mune'e so upamauline'i ane'i ta'ei milusi.#18.11 Tamitema so lavulavu se'i ixavutala lexe Matiu molu ukaukavunu vaikala ane uxolu no anu 18:11 uasi, itema vilemo masi mukaukavunu.
Latilovo so itema ukamulinu sipisipiou loxo ulusi
12La Iesua mu'oxonu latilovo aloxo 'o, “Ngingi ngaxavutala axova? Loxo itema vile tasipisipiou 100 ia soxu vilesisi mupolo va'axu mo mulusi la unava? Anu u'italone'i tasipisipi 99 olele ixolu no la'ola'olu ia anu ulai ukamulinu soxu vilesisi ane mupolo va'axu. 13Ukamulinu xo xe uxalisoui laso u'osa'ilasou misevile. La avikalangengi manina lexe osa noxou so muxalisou soxu ne uua'ulixu osa noxou si'a 99 ane ipolo va'axu uasi. 14Laso anu axone kalumo noxou Maminge e uxolu no tualasou lailaixe. Xo anu oponu ututulu lexe vile noxi'a ta'aliku moso 'o imamulo uasisi.
Vote'i so talovonixu vivinge ane mususu
15Ioxe, Iesua muvikala aloxo 'ola, “Loxo vivine vile ususu#18.15 Tamitema so lavulavu se'i ixavutala lexe vaikala “ususu” no anu 18:15 la uvikala lexe “ususunixene”. la nalai noxou so ngingisi ngaxolu la nalemolu vaikala so nalovonixu. Xe loxo ulomuxene la nelivunoxu vivine mulivu ane. 16Ia loxo ulomuxene uasi la na'avalou tangaxene vile o tameila so ngalai ngavikalanula. Laso axone la anu umulinu vaikalaou Mosinge lexe tamitema tamei o tatalu so ivalaxu vaikalai'a mukalusi lexe manina. 17Ia loxo ulomuxu vaikalai'a kalumo uasi la ngalai ngapala'anixu mi ne no anu pita. Xe loxo ulomuxu vaikali'a tatemanu pita mukalusi uasi la nga'oxonu noxou a loxo anu itema so isivoxo o itema so utaxusou taxisi.
18Eni avikalangengi manina lexe mi ma'ia ngingi ngasakinu no lialia la Mosinge usakinu no tualasou kalumo. Xe mi ma'ia ngalulusou no lialia la Mosinge ululusou no tualasou kalumo.
19Mo avikalangengi aloxo 'ola. Loxo tatamei noxinge no lialia 'o opongengi vilesisi no anu mi vile so ngalingau la Mamilo no tualasou uxalixu noxi'a ane. 20Xo loxo tamitema tamei o tatalu ine'e ipita no anu ualasilo la eni axolu no taine'i to ne.”
Latilovo so uokuvoi uiasou tina'uxu menexu uasi
21Ioxe, no voxo anene la Pita mune'e noxou Iesua ka mutali'isou aloxo 'o, “Tatananexi, loxo vivilo vile utotomu ususunixilo la opoleli ululu'e so susu noxou ne alaxu ta'eimo? Ulai umomomo no anu alaxu 7 o axova?” 22La Iesua mukolinu lexe, “Eni avikalaneni lexe oponeni ulu'e so susu alaxu 7-si uasi. Avikala lexe umomomo no anu 70, ia vilesisi uasi, 70 alaxu 7.
23Laso ngalomu, eni a'oxonu latilovosou voxo so Mosinge molu u'uli laxune'i tamitemaou no tualasou aloxo 'o. Anu loxo kingi vile mumasaxau lexe tamitema ta'ei tinatina'uxa'a noxou la ilovonixu. 24Ioxe, musoko'u so u'ava'avali'a tamitema ine'e ilovonixu la mine'enu itema vile ane tina'uxu muai noxou mumomomo no anu 10 milioni kina. 25Ia itema ne lomolixu so ulotonu tina'uxu uasi. Laso kingi muvikala lexe isalimune'i oli'a ta'olu ixali tasilevi mo isalimunu mimi'a mukalusi xe lamolisou la une'e so lakolisou tina'uxu ne. 26Xe uokuvoi mulomu axone la mulalusi muai avile no lia mo muvikalanu kingi lexe, 'Nini naiaiama noxilo mo navisimelo sevileo so eni akolinu tina'uxo noxine mukalusi.” 27Laso tilasou ne tanuxu sika mu'italonu mulai mo muiasou tina'uxu avile.
28Ioxe, mukalu xe uokuvoi ne mulai noale la muxalisou menexu uokuvoi vile ane tina'uxu 10 kina muai noxou. La mutetelisou ka mukapi laxu mo muvikala lexe, 'Napalea nakolinu tina'uxene muai noxilo 'o.' 29La menexu uokuvoi ne mulalusi mo mukatu noxou lexe, 'Nini naiaiama noxilo mo navisimelo sevileo so eni akolinu tina'uxo noxine.' 30Ia itema ne u'osa so uvisimolu axone uasi laso mulaixu no tasou lakalavusu so uxolu xo mo ukolinu tina'uxu ne.
31Ia loxo tamenexu tauokuvoi leviani mimaisou mi e muxali ne la opone'i tu'umaxuou manina xo mole milai mia'aloxu noxou tilasi'a. 32Ioxe, laso tilasi'a ne mu'avalou mune'e ka muvikalanu lexe, 'Nini uokuvoi ne, ilixomeni masuamo. Xo tei nini nekatu noxilo laso eiasou tina'uxene ne avile. 33Eni eiaiama noxine, laso axova so nini kalumo naiaiama noxou menexine uokuvoi ne ua?' 34La tilasou ne la'iaxu manina mo mupilixinu no avo'a tamitema so ilosou navunavu. La muvikala lexe uxolu axonesi xo mo uokuvoi ne ukolinu tina'uxu noxou avile.
35Ioxe, Mamilo e uxolu no tualasou lailaixe u'oxo iou vilesisi axonesi noxinge loxo opongengi ulu'e manina so susu noxi'a tavivinge uasi.”
Currently Selected:
Matiu 18: ATA
Highlight
Share
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
