यूहना 4

यीसू अर सामरी लुगाई

1जद यीसू नै पतो लागग्यो कै फरीसियां सुण्यो है कै यीसू यूहना ऊं बोळा चेला बणागे बानै बतिस्मो देण लागरयो है। 2-3तो बो यहुदी प्रदेस छोड़गे गलील प्रदेस उड़ग्यो। यीसू आप बतिस्मो कोनी दियो पण बिंगा चेला देवा हा।

4बिंगो सामरिया प्रदेस ऊं होगे जाणो जरूरी हो। 5ईंखातर बो सामरिया प्रदेस गै एक नगर सूखार में आयो। ओ नगर बिं जिग्यां#उतपत्ती 33:19; यहोसू 24:32 कनै हो, आ जिग्यां याकूब आपगै बेटै युसुफ नै दी ही। 6बठै याकूब गो कुओ हो, यीसू आपगी यातरा में भोत थकग्यो हो। ईंखातर बो कुअ गै कनै बेठ ग्यो, आ बात लगभग दोफारै गै टेम गी है।

7बिं टेम बठै एक सामरी परदेस गी लुगाई पाणी भरण आई, यीसू बिनै केयो, “मनै पाणी प्यादे।” 8बिंगा चेला नगर में रोटी लेण गेयेड़ा हा।

9सामरी परदेस गी लुगाई यीसू नै केयो, “थे यहुदी होगे बी मेरूं पीण खातर पाणी क्यूं मांगो हो? मैं तो एक सामरी परदेस गी लुगाई हूं।” (यहुदी प्रदेस गा लोग सामरी प्रदेस गै लोगां सागै कोई बी लेण देण कोनी राखता)।

10यीसू उतर दियो तूं कोनी जाणै कै परमेसर तनै के वरदान देणो चावै है। तेरै कनूं पाणी मांगण आळै नै बी तूं कोनी जाणै पण जे तूं बिं कनूं मांगती तो बो तनै जीवन देण आळो पाणी देवंतो। 11लुगाई बिनै केयो, “हे प्रभु, थारै कनै पाणी काडण खातर बाल्टी कोनी अर कुओ बी भोत डूंगो है फेर थे जीवन गो पाणी किंया देवोगा?” 12थे के सोचो हो थे म्हारै बडेरै याकूब ऊं मोटा हो के? झिका म्हानै ओ कुओ दियो। ईं कुअ ऊं याकूब अर बिंगै टाबरां अर बिंगा पसुआं समेत सगळा इमूं ई पीयो हो।

13यीसू बिनै उतर दियो, “झिको कोई ओ पाणी पीयैगो बिनै फेर बी तीस लागसी। 14झिको पाणी मैं देवूं बो पाणी जे कोई पीवै है बिनै कदी तीस कोनी लागै। झिको पाणी मैं देऊंगा बिंगै माऊं एक बावड़ी बण जावैगी झिकी अनन्त जीवन खातर पाणी देवंती रेवैगी।”

15लुगाई बिनै केयो, “हे प्रभु, बो पाणी मनै दे देवो कै मनै कदी तीस ना लागै अर कदी मनै कुअ पर पाणी खीचण ना आणो पडै़।” 16यीसू बिनै केयो, “जा अर आपगै घर आळै नै बुला'गे ल्या।” 17लुगाई उतर दियो, “मेरो घर आळो है कोनी।” यीसू बिनै केयो, “तूं साच्ची केवै है कै मैं बिना घर आळै गी हूं।” 18तेरा पांच घर आळा हा, तूं अब झिकै घर आळै गै सागै रेवै है। बो बी तेरो कोनी। ईंखातर तूं जिंया केयो बो सच्च है।

19लुगाई बिनै केयो, “हे प्रभु, मैं समझू हूं कै थे एक परमेसर गी बात बताण आळा हो। 20म्हारै बडेरा ईं पहाड़ पर आराधना करी पण थे यहुदी लोग केवो हो कै यरुसलेम में ई आराधना करणी चईयै।”

21यीसू सामरी लुगाई नै केयो, “मेरी बात पर बिस्वास कर कै एक बो टेम आवैगो जद थे पिता परमेसर गी आराधना ईं पहाड़ गै उपर अर यरुसलेम में बी कोनी करोगा। 22थे सामरी लोग बिनै कोनी जाणो, झिकै गी थे आराधना करो हो। पण म्हे यहुदी लोग बिनै जाणा हां झिकै गी म्हे आराधना करां हां क्यूंकै बचाण आळो यहुदियां मू आवै है। 23पण टेम आण लागरयो है अर आ'ईग्यो है। जद सच्चाई ऊं आराधना करण आळा लोग पिता परमेसर नै आपगै दिल अर मन ऊं अर परमेसर गी परगट करेड़ी सच्चाई ऊं करै है बिं सच्चाई ऊं आराधना करसी क्यूंकै पिता परमेसर आपगै खातर हिसै लोगां नै ढूंढै है। 24परमेसर आत्मा है। ईंखातर झिको बिंगी आराधना करै बो आत्मा अर सच्चाई ऊं बिंगी आराधना करणी चईयै।”

25फेर बण बिनै केयो मैं जाणू हूं कै मसी झिकै नै लोग “मसी” केवै है बो आण आळो है जद बो आवैगो तो म्हानै सारो कीं बता देवैगो। 26यीसू बिनै केयो, “मैं झिकी तनै बात केऊं हूं, मैं बो ई हूं।”

चेला गो पाछो आणो

27इतै में बिंगा चेला आ ग्या, चेला यीसू नै लुगाई सागै बातां करतां देख्यो तो बानै भोत अचंभो होयो। ईं पर यीसू कनूं कणैई पूछयो कोनी कै थे ईं लुगाई ऊं के लेणो है अर इंयूं क्यूं बात करण लागरयो हो।

28जद लुगाई आपगो घड़ो छोड़गे नगर में उड़गी अर लोगां नै केण लागी। 29आओ अर देखो एक हिस्यो आदमी है मैं झिको कीं करयो बो सारो कीं मनै बता दियो, थे लोग ओ कोनी सोच्यो कै बो मसी हो सकै? 30आ बात सुणगे लोग नगर छोड़गे यीसू कनै आ ग्या।

31बिं टेम यीसू गा चेला बिंऊं बिनती करण लागग्या कै, “हे गुरूजी, कीं खा ल्यो” 32यीसू चेला नै केयो, “मेरै कनै खाण खातर हिसी रोटी है, झिकै गै बारै में थे कोनी जाणो” 33फेर बिंगा चेला आपसरी में पूछण लागग्या कै, “कोई बिं खातर खाण नै कीं ल्यायो हो'सी के?”

34यीसू बानै केयो, “मेरी रोटी आ है कै मैं मेरै भेजण आळै गी इच्छा गै अनुसार चालूं अर बिंगो काम पूरो करूं। 35थे बारी बारी केवो हो कै फसल बाडण खातर चार म्हिना बाकी है पण मैं थानै केऊं झिका लोग आण लागरया है बानै देखो बे बी खेत गै समान है झिका खेत आच्छी तरियां पाकगे सफेद हो'ग्या है। 36फसल बाडण आळा नै मजदूरी दी जावै है अर लोगां नै अनन्त जीवन में लेगे आणो ई बिंगी फसल बाडणी है। ईंखातर फसल उगाण आळो अर बाडण आळो मिलगे राजी होवै। 37ओ पद साची है एक आदमी उगावै है दूसरो बाडै है। 38मैं थानै बा फसल बाडण घाल्या है झिकी पर थे मेनत कोनी करी झिकी पर दूसरा मेनत करी अर बांगी मेनत गो फल थानै मिल्यो है।”

सामरिया गो बिस्वास करणो

39बिं नगर गै भोत सारा सामरिया यीसू पर बिस्वास करयो क्यूंकै बण लुगाई नगर में गवाई दी कै मैं झिको कीं करयो बण मनै सारो कीं साची बता दियो। 40जद सामरी लोग बिंगै कनै आया तो बां बिनै आपगै सागै रेण गी बिनती करी। ईं पर बो बठै बांगै सागै दो दिन रुक्यो। 41बिंगै बचन गै कारण अर बिं पर भोत सारा लोग बिस्वास करयो।

42अर बां बिं लुगाई नै केयो म्हे तेरी एकली गवाई केण पर बिस्वास कोनी करयो पण अब म्हे आप बिनै सुण्यो है अब म्हे जाणग्या हां कै सच्च में ओ बो आदमी है झिको संसार नै मुकती देवैगो। 43अर सामरी लोगां गै सागै दो दिन रेण गै बाद यीसू अर बिंगा चेलां बठूं गलील प्रदेस में उड़ग्या। 44यीसू आप ई केयो हो कै कोई बी परमेसर गी बात बताण आळो आपगै ई देस में कदी बी आदर कोनी पावै। 45ईं तरियां जद बो गलील आयो तो गलीलियां बिंगो आदर मान करयो क्यूंकै बण झिको कीं यरुसलेम में त्यूंहार गै टेम करयो हो बो सारो कीं बां देख्यो हो।

राजा गै अधिकारी गै छोरै नै ठीक करणो

46यीसू फेर गलील गै काना गाम में गेयो जठै बण पाणी नै दाख गो रस बणायो हो। जद काना गाम गै कनै कफरनहूम गाम में एक राजा गो अधिकारी हो झिकै गो बेटो बीमार हो। 47जद राजा गै अधिकारी सुण्यो कै यहुदियां ऊं यीसू गलील आयो है। तो बो बिंगै कनै आयो अर बिनती करी कै बो कफरनहूम में आ'गे बिंगै बेटै नै ठीक करै क्यूंकै बिंगो बेटो मरण आळो हो। 48यीसू बिनै केयो, “मोटो चमत्कार देखे बिना थे लोग मेरै उपर बिस्वास कोनी करोगा।” 49राजा गै अधिकारी बिनै केयो, “मेरै बेटै गै मरण ऊं पेलां मेरै सागै चाल।” 50यीसू केयो, “तूं जा, तेरो बेटो जींवंतो रेवैगो।” झिको कीं यीसू केयो हो, बिं पर बण बिस्वास करयो अर घर कानी चाल पड़यो। 51बो घरे जावंता टेम रा में बिंगा नोकर मिल्या अर बिनै समाचार दियो कै तेरो बेटो ठीक हो'ग्यो। 52बण नोकरां नै पूछयो, “मेरो बेटो के टेम ठीक होयो हो?” बां बिनै केयो, “काल दोफारै एक बजे बिंगो बुखार उतरग्यो हो।

53जद बेटै गै बाप नै ध्यान आयो कै बो ई टेम है जद यीसू केयो, तेरो बेटो जींवंतो रेवैगो।” ईं तरियां बिंगै सारै घराणै यीसू पर बिस्वास करयो।

54ओ दूसरो मोटो चमत्कार हो झिको यीसू यहुदियां ऊं गलील आ'गे दिखायो।

Currently Selected:

यूहना 4: BGQ

Highlight

Copy