यूहना 5

अड़तीस सालां गै रोगी नै ठीक करणो

1इंगै बाद यीसू यहुदियां गो त्यूंहार मनाण खातर यरुसलेम गेयो। 2यरुसलेम में भेड़ फाटक गै कनै एक बावड़ी है, इब्रानी भासा में इनै बेतहसदा केयो जावै है। इंगै किनारै पांच बरामदा है। 3बरामदा में भोत सारा आंधा, लंगड़ा अर लकवै गा मारेड़ा पड़या रेवंता हा। 4(क्यूंकै टेम टेम पर परमेसर गो सुरगदूत बावड़ी में उतरगे पाणी नै हिलावंतो हो। पाणी गै हालतां ई झिको पेलां पाणी में उतरतो बो ठीक हो जावंतो)। 5बठै एक आदमी हो झिको अड़तीस सालां ऊं बीमारी में बठै पड़यो हो। 6यीसू बिनै बठै पड़यो देख्यो जद बिनै ठा लागग्यो कै भोत सालां ऊं ईं हालत में पड़यो है। यीसू बिनै पूछयो, अरै भाई तूं ठीक होणो चावै।

7बीमार आदमी केयो, “हे गुरूजी, मेरै कनै कोई कोनी है झिको पाणी हालण पर मनै बावड़ी में उतार देवै अर मेरै जाण ऊं पेलां कोई दूसरो उतर जावै है।”

8यीसू बिनै उतर दियो, “खड़यो हो, आपगी लोई चकले अर चाल पड़।” 9बो आदमी बिं टेम ई ठीक हो'ग्यो, अर आपगी लोई चक'गे चालण फिरण लागग्यो। बो सबत गो दिन#निरगमन 20:8-11 हो 10ईंखातर ठीक होएड़ै आदमी नै यहुदियां केयो, आज सबत गो दिन है अर तेरो लोई चक'गे चालणो ठीक कोनी क्यूंकै ओ यहुदियां गै नेम गै बिरोध में है। 11बण बिनै उतर दियो, “झिकै मनै ठीक करयो है बण ई मनै केयो कै आपगी लोई चकले अर चाल फिर।”

12बां लोगां बिनै पूछयो, “पण बो कुण आदमी है, झिकै तनै केयो हो, आपगी लोई चक अर चाल फिर।” 13बो आदमी झिको ठीक होयो बो कोनी जाणै हो कै बो कुण हो। क्यूंकै बिं जिग्यां भोत भीड़ ही अर यीसू बठूं चुपचाप उड़ग्यो हो। 14बाद में ठीक होएड़ै आदमी नै यीसू मिन्दर में मिल्यो। यीसू बिनै केयो, “सुण, तूं ठीक हो'ग्यो है, ईंखातर फेर पाप ना करी, नई तो पेलां ऊं मोटो दुख तेरै पर आवैगो।” 15अर बण आ'गे यहुदियां ऊं केयो, मनै यीसू ठीक करयो है।

16यीसू ऐ सगळा काम सबत गै दिन करया हा ईंखातर यहुदी लोगां बिनै तंग करणो सुरु कर दियो। 17यीसू बानै उतर दियो, “मेरो पिता अब तांई जिंया काम करण लागरयो है ईंखातर मैं बी बिंयाई काम करण लागरयो हूं।” 18यहुदी लोग यीसू नै मारण गी योजना बणाण लागग्या क्यूंकै बो ना एकलै सबत गै नेम नै तोड़ै पण अपणै आपनै पिता परमेसर गै बराबर समझै।

बेटै गो अधिकार

19यीसू उतर दियो, “मैं थानै साची साची केऊं कै परमेसर गो बेटो अपणै आप कीं कोनी कर सकै। बो एकलो बो ई काम करै है झिको पिता परमेसर नै करतां देखै है अर पिता परमेसर जिंया करै है परमेसर गो बेटो बी बिंयाई करै है। 20पिता परमेसर आपगै बेटै ऊं प्रेम करै है अर सारो कीं बिनै दिखावै है झिका काम आप करै है अर बां काम ऊं बी मोटा काम बिनै दिखावैगो जिंऊं थे लोग अचंभो करोगा। 21जिंया पिता परमेसर मरेड़ा नै उठावै है बिंया परमेसर गो बेटो बी झिकै नै चावै है बिनै जींवंतो करै है। 22पिता परमेसर किंगो बी न्याय कोनी करै पण न्याय करण गो अधिकार परमेसर आपगै बेटै गै हात में दे दियो है, 23कै सारा लोग जिंया पिता परमेसर नै आदर करै है बिंयाई परमेसर गै बेटै गो बी आदर करै। झिको परमेसर गै बेटै गो आदर कोनी करै, बो पिता परमेसर गो झिकै बिनै भेज्यो है बे बिंगो बी आदर कोनी करै। 24मैं थानै साची बताऊं झिको मेरै बचन नै सुणगे मेरै भेजण आळै पर बिस्वास करै, बो अनन्त जीवन पावै है अर न्याय गै दिन सजा गी आग्या बिं पर कोनी होवै पण बो मोत ऊं निकळगे जीवन में उठग्यो है। 25मैं साची केऊं कै बो टेम आ'ग्यो है अर चालण लागरयो है जद बे झिका आत्मा गै रूप ऊं मरग्या है बे परमेसर गै बेटै गो बचन मानैगा अर झिका मानैगा बे जींवंता हो जावैगा। 26क्यूंकै जिंया पिता परमेसर जीवन देण आळो है बिंयाई बो आपगै बेटै नै जीवन देण गो अधिकार दियो है। 27अर झिकै बण बिनै न्याय करण गो अधिकार दियो है क्यूंकै बो मिनख गो बेटो है। 28-29झिको मैं केऊं बिं पर अचंभो ना करो क्यूंकै बो टेम आवै है जिता लोग कबर में है बे बिंगो बचन सुणगे बारै आवैगा अर झिका आच्छा काम करया है बे अनन्त जीवन खातर मरेडा ऊं जी उठैगा। पण झिका बुरा काम करया है बे सजा लेण खातर जी उठैगा।

यीसू गै बारै में गवाई

30मैं आपणै आप कीं कोनी कर सकूं जिंया परमेसर मनै केवै है बिंयाई मैं न्याय करूं हूं। मेरो न्याय साच्चो है मैं आपगी मरजी ऊं कीं कोनी करूं पण आपगै भेजण आळै गी इच्छा ऊं करूं हूं। 31मैं मेरै बारै में बात करूं तो लोग कोनी मानैगा#व्यवस्ता विवरण 17:6; 19:15; मत्ती 18:16। 32मेरै बारै में बताण आळो एक ओर है, मेरै बारै में झिको बोलै है बो साची है। 33थे लोगां यूहना कनै मेरै बारै में पूछताछ करण खातर भेज्या हा बण मेरै बारै में सच्चाई बताई। 34मैं आपगै बारै में माणस कनूं गवाई कोनी चावूं फेर बी यूहना गी गवाई गै बारै में मैं थानै ईंखातर केऊं कै थानै मुकती मिलै। 35जिंया दीयो चानणो देवै है बिंयाई यूहना एक दीयै गी तरियां परमेसर गी सच्चाई लोगां गै समझाणै में मदद करी अर थानै कीं देर तांई बिं चानणै में रेणो आच्छो लाग्यो। 36पण मेरी गवाई यूहना गी गवाई ऊं मोटी है क्यूंकै झिको कीं काम मैं करण लागरयो हूं बे काम परमेसर पिता मनै पूरो करण खातर दियो है। ईंखातर मैं करूं हूं अर बे काम मेरी गवाई देवै है कै पिता मनै भेज्यो है। 37परमेसर पिता झिकै मनै भेज्यो है। मेरी गवाई दी है। पण थे लोग बिंगो बचन कदी कोनी सुण्यो अर ना थे बिंगो रूप देख्यो है। 38थे बिंगो बचन आपगै मना में कोनी राख्यो क्यूंकै बिंगै भेजेड़ै पर थे बिस्वास कोनी करयो। 39थे पवितर सासतर नै दिल ऊं ढूंडो हो, क्यूंकै थारो बिचार है कै बिमै अनन्त जीवन मिलण गो ग्यान मिल जावैगो। पण ऐ सारा सासतर मेरै बारै में बतावै है। 40फेर बी अनन्त जीवन पाण खातर मेरै लारै चालणो कोनी चावो। 41मैं लोगां कनू आदर कोनी चावूं। 42मनै पतो है कै थे परमेसर ऊं प्रेम कोनी करो। 43मेरो बाप झिकै मनै अधिकार दियो बिं अधिकार ऊं मैं आयो हूं फेर बी थे मनै स्वीकार कोनी करो पण जे कोई आपगै नाम ऊं आवै तो थे बिनै स्वीकार कर ल्योगा। 44थे बिस्वास किंया कर सको हो क्यूंकै थे तो एक दूसरै नै आदर देणो चावो हो पण बो आदर कोनी चावै हो झिको एकलो बिंऊं मिलै बो ई परमेसर है।

45थे इंया ना सोचो कै मैं पिता परमेसर गै सामणै थारै उपर दोस लगाऊंगा। पण थारै पर दोस सिद्ध करैगो बो तो मूसा है झिकै पर थे थारी आपगी आस लगाऐड़ी है। 46ईंखातर जे थे मूसा पर सचमुच बिस्वास करो तो मेरै पर बी बिस्वास करो। ईंखातर कै बण मेरै बारै में लिख्यो है। 47क्यूंकै थे मूसा गी लिखेड़ी बातां पर बिस्वास कोनी करो तो थे मेरी बातां पर बिलकुल बिस्वास कोनी करोगा।”

Currently Selected:

यूहना 5: BGQ

Highlight

Copy