यूहना 6

पांच हजार लोगां नै जिमाणो

(मत्ती 14:13-21; मरकुस 6:30-44; लूका 9:10-17)

1इंगै बाद यीसू गलील गी झील गै दूसरी पार उड़ग्यो। गलील झील गो दूसरो नाम तिबिरियास बी है। 2यीसू ऊं बीमारां नै ठीक करण गा चमत्कार देखगे भोत मोटी भीड़ बिंगै कनै आ'गी। 3यीसू चेलां गै सागै ऊंची जिग्यां पर जा'गे बेठग्यो। 4बां दिना में यहुदियां गै फसह गो त्यूंहार कनै हो।

5जद यीसू चारूंमेर देख्यो कै एक भोत मोटी भीड़ बिंगै कानी आण लागरी है यीसू फिलिप्पुस ऊं पूछयो, “आपां आं सगळा लोगां खातर रोटी कठूं ल्यावांगा?” 6यीसू आ बात बिनै परखण खातर कैई ही क्यूंकै बो तो जाणै हो कै बो अठै के करसी? 7फिलिप्पुस उतर दियो, “गुरूजी, एक एक नै थोड़ी थोड़ी रोटी खूआण खातर दो सौ दिन गी मजदूरी गै पीसा गी रोटी खरीद गे ल्यावांगा तो बी पूरी कोनी आसी।”

8बिंगा चेला मू समौन पतरस गै भाई अन्द्रियास बिनै केयो, 9“अठै एक छोटो छोरो है। बिंगै कनै जौ गी पांच रोटी अर दो मछलियां है पण इता लोगां खातर बे भोत थोड़ी है।”

10जद यीसू केयो, “सारा लोगां नै रोटी खाण खातर बिठा देवो,” बिं जिग्यां पर भोत घास ही, ईंखातर सारा लोग घास पर बेठ ग्या, बठै आदमिया गी गिणती पांच हजार ही। 11जद यीसू रोटियां ली अर परमेसर गो धन्यवाद कर'गे बाटण खातर आपगै चेला नै दे दी फेर मछलियां लेगे बिंयाई करयो। जिती लोगां नै इच्छा ही बां बिती ई खाई।

12जद बां लोगां गो पेट भरीजग्यो तो यीसू आपगै चेलां नै केयो, “झिकी रोटियां गा टुकड़ा बच गया हा बानै भेळा कर ल्यो कै बे खराब ना होवै। 13फेर चेला रोटियां गै टुकाड़ा नै भेळा करया झिका जौ गी पांच रोटियां ऊं इती रोटी बचगी अर बिंऊं बारा टोकरी भरीज गी।”

14लोगां यीसू गै ईं चमत्कार नै देखगे केण लागग्या साची ओ बो ई परमेसर गी बात बताण आळो है झिकै नै ईं संसार में आणै गो म्हे इंतजार करण लागरया हां। 15यीसू ओ जाणग्यो कै ऐ लोग मनै राजा बणाणो चावै है फेर यीसू एकलो एक ऊंची जिग्यां पर उड़ग्यो।

यीसू गो पाणी पर चालणो

(मत्ती 14:22-33; मरकुस 6:45-52)

16जद आथण होयो तो बिंगा चेलां झील गै किनारै गेया। 17अन्धेरो बोळो हो'ग्यो फेर बी यीसू बांगै कनै अजे तांई कोनी आयो अर चेला एक किस्ती में बेठगे कफरनहूम कानी चाल पड़या। 18अर आंधी गै कारण झील में पाणी गी लेहरा उठण लागगी। 19लगभग पाणी में पांच छ: किलोमीटर जाण गै बाद बां देख्यो कै यीसू पाणी गै उपर चालगे बांगै कानी आण लागरयो है। बे भोत डरग्या। 20पण यीसू बानै केयो, “डरो ना, मैं हूं।” 21चेला यीसू नै नाव में बिठाण खातर तैयार हो'ग्या, बिं टेम नाव बिं जिग्यां उड़गी जठै बां जाणो हो।

लोगां यीसू नै ढूंढणो

22दूसरै दिन लोगां गी भीड़ झिकी झील गै दूसरी पार रेगी ही जठै ऊं चेला चाल्या हा, बानै ठा हो कै बठै यीसू गा चेला किस्ती में हा पण यीसू बांगै सागै कोनी गेयो। 23फेर तिबिरियास नाम एक सैहर ऊं कोई नाव आई। बे बिं जिग्या पोंचग्या जठै परमेसर गो धन्यवाद देण गै बाद प्रभु यीसू लोगां नै रोटी खुवाई ही। 24जद भीड़ देख्यो, बिं जिग्यां ऊं चेला अर यीसू उड़ग्या तो बे लोग बिं किस्ती में बेठगै यीसू नै ढूंढता कफरनहूम उड़ग्या।

यीसू जीवन गी रोटी

25झील गै पार जद बे बिनै मिल्या तो पूछयो, हे गुरूजी थे अठै कद आया। 26यीसू उतर दियो, “मैं थानै साची साची केऊं कै थे चमत्कार देख्यो है ईंखातर थे मनै कोनी ढूंडो हो पण ईंखातर कै थे रोटी खा'गे धापग्या हा। 27मैं थानै केऊं हूं कै, ईं संसार में नास होण आळी रोटी खातर मेनत ना करो पण झिकी रोटी हमेसा रेवै है अर अनन्त जीवन देवै है बिं खातर थे मेनत करो। बा सिरफ मैं परमेसर गो बेटो दे सकूं क्यूंकै बा देण खातर पिता परमेसर एकलो मनै अधिकार दियो है।”

28लोगां बिनै पूछयो, “झिका काम परमेसर चावै है बानै करण खातर म्हे के करां?” 29यीसू बानै उतर दियो, “परमेसर गो काम ओ है कै झिकै नै बण भेज्यो है बिं पर बिस्वास करो।”

30जद बां बिनै केयो, “तनै परमेसर भेज्यो है ओ म्हे किंया बिस्वास करां तूं म्हानै के चमत्कार दिखावैगो। 31जद म्हारा बडेरा बन उजाड़ माखर जाण लागरया हा। बानै मन्ना नाम गी रोटी खाण खातर दी क्यूंकै पवितर सासतर में इंया लिखेड़ो है कै परमेसर बानै सुरग ऊं खाण नै रोटी दी।” 32यीसू बानै केयो, “मैं थानै साची साची केऊं कै सुरग ऊं खाण खातर रोटी थानै मूसा कोनी दी पण मेरो पिता थानै सुरग ऊं साची रोटी देवै है। 33क्यूंकै परमेसर कानूं आण आळी रोटी आ है झिकी सुरग ऊं उतरगे संसार गै लोगां नै जीवन देवै है।” 34लोगां बिनै केयो, “हे गुरूजी अब म्हानै बा रोटी दे अर सदां देवंतो रे।” 35जद यीसू बानै केयो, “मैं ई बा रोटी हूं झिकी जीवन देवै है झिको मेरै कनै आवै है बो कदी भूखो कोनी रेवैगो अर झिको मेरै उपर बिस्वास करै है बिनै कदी तीस कोनी लागै। 36मैं थानै पेलां ई बता दियो कै थे मनै देख लियो है फेर बी थे मेरै पर बिस्वास कोनी करो। 37हर एक आदमी झिको परमेसर मनै दियो है बो मेरै कनै आवैगो झिको मेरै कनै आवैगो बिनै मैं कदी कोनी काड़ूंगा। 38क्यूंकै मैं सुरग ऊं आपगी इच्छा गै अनुसार काम करण कोनी आयो पण मेरै भेजण आळै गी इच्छा पूरी करण आयो हूं। 39मेरै भेजण आळै गी आ इच्छा है कै झिको कीं बण मनै दियो है बामूं किनैई खोऊं ना पण अन्त में न्याय गै बां सगळा नै जींवता कर देऊंगां 40आई मेरै परम पिता गी इच्छा है हर एक आदमी झिको बेटै नै देखै है, बिमै बिस्वास करै है, बो अनन्त जीवन पावै अर आखरी न्याय गै दिन बिनै जींवंतो कर देऊंगा।”

41ईंखातर यहुदी लोग झिका बिनै ढूंडै हा बिं पर रीस बळण लागग्या क्यूंकै यीसू केवंतो हो बा रोटी मैं हूं झिकी सुरग ऊं उतरी है। 42अर बां केयो, “ओ युसुफ गो बेटो यीसू है इंगै मां बाप नै बी आपां जाणा हां फेर ओ किंया केवै है कै मैं सुरग ऊं उतरयो हूं।” 43यीसू बानै उतर दियो, “आपसरी में चुगली ना करो।” 44जद तांई मेरो भेजण आळो किनैई मेरै कनै आप कोनी ले आवै जद तांई कोई मेरै कनै कोनी आ सकै। 45परमेसर गी बात बताण आळा आपगै लेखा में लिख्यो है कै परमेसर खुद बां सारा नै सिखायेड़ा हो'सी अर झिको कीं पिता ऊं सुण्यो अर सीख्यो है बो मेरै कनै आवै है#यसयाह 54:13। 46इंगो मतलब ओ कोनी कै कणैई मेरै पिता नै देख्यो है सिरफ मैं ईं बिनै देख्यो है। कणैई मेरै पिता नै कोनी देख्यो। एकलै मैं ई बिनै देख्यो है क्यूंकै मैं परमेसर कनूं आयो हूं। 47मैं थानै साची साची केऊं झिको कोई बिस्वास करै है बो अनन्त जीवन पावै है। 48मैं ई बा रोटी हूं झिकी जीवन देवै है। 49थारै बडेरा बन उजाड़ में मन्ना खाया हा फेर बी बे मरग्या हा। 50अब जे कोई सुरग ऊं उतरेड़ी रोटी खावै तो बो कोनी मरै। 51मैं ई बा जींवती रोटी हूं झिकी सुरग ऊं उतरी हूं जे कोई ईं रोटी नै खावै है बो सदां जींवंतो रेवैगो अर झिकी रोटी मैं बिनै देऊंगा बो मेरो सरीर है इंऊं संसार गा लोग जींवता रेवैगा। 52फेर यहुदी लोग आपसरी में बेंस करण लागग्या, ओ आपगो सरीर आपां नै खाण खातर किंया दे सकै है? 53ईं पर यीसू बानै केयो मैं थानै साची साची केऊं हूं जद तांई थे मिनख गै बेटै गो सरीर ना खाओ अर बिंगो लोइ ना पीओ तो जद तांई थानै जीवन कोनी मिल सकै। 54झिको मेरो सरीर खावै है अर मेरो लोइ पीयै है अर अनन्त जीवन बिंगो है। अंत गै दिन में बिनै जींवंतो कर देऊंगा। 55मेरो सरीर सच्ची रोटी है अर मेरो लोइ पीण गी सच्ची चीज है। 56झिको मेरै सरीर नै खावै है अर मेरो लोइ पीयै बो मेरै सागै मिलगे रेवै है अर मैं बिंगै सागै। 57जींवतै पिता मनै भेज्यो है अर मैं पिता ऊं ई जींवंतो हूं बिंयाई कोई बी मनै खावैगो तो बो मेरै कारण जींवंतो रेवैगो। 58सुरग ऊं उतरी रोटी मैं हूं। आ रोटी थारै बडेरा खाई भिसी रोटी कोनी। बां लोगां बा रोटी खाई अर बे मरग्या। पण जे कोई आ रोटी खावैगो बो सदां जींवंतो रेवैगो। 59ऐ बातां बण कफरनहूम गै एक सतसंग घर में उपदेस देवंता टेम कैई।

अनन्त जीवन गा बचन

60यीसू गा भोत सारा चेला आ बात सुणगे केयो, “ऐ बाता भोत करड़ी है। आनै कुण सुणै है।” 61यीसू नै अपणै आप ई पतो चालग्यो कै बिंगा चेला ईं बात पर बड़बड़ावै है ईंखातर बण बानै केयो, “ऐ बातां सुणगे मेरै उपर ऊं थारो भरोसो कमजोर हो'ग्यो है के? 62इयां है तो थे मिनख गै बेटै नै बिंगी पेलां रेण आळी जिग्यां सुरग पर चढता देखोगा तो के बोलोगा? 63आत्मा तो जीवन देण आळी है। आदमियां गी कोसिस कीं काम गी कोनी झिका बचन मैं थानै केया है बे ई आत्मा है अर बो ई जीवन देवै है।” 64पण थारै में केई हिस्या है झिका बिस्वास कोनी करै क्यूंकै यीसू पेलां ई जाणै हो कै झिका बिस्वास कोनी करै अर बे कुण है मनै पकड़ावैगा। 65अर यीसू बानै केयो, “जद तांई मेरो पिता मेरै कनै आण गी आग्या ना देवै जद तांई कोई बी मेरै कनै कोनी आ सकै।”

पतरस गो बिस्वास

66ईं कारण भोत सारा यीसू गा चेला पाछा उड़ग्या अर बां यीसू गै लारै चालणो छोड़ दियो। 67फेर यीसू आपगै बारा चेला नै केयो कै, “थे बी जाणो चावो हो के?” 68समौन पतरस बिनै उतर दियो है, “हे गुरूजी, म्हे किंगै कनै जावांगा बे बचन तो तेरै कनै झिका अनन्त जीवन देवै है। 69अब म्हे ओ बिस्वास कर लियो अर जाणा हां तूं ई पवितर है झिकै नै परमेसर भेज्यो है।” 70यीसू बानै उतर दियो, “थानै बारा नै मैं ईं चुण्या है फेर बी थारै माऊं एक सैतान है।” 71ओ बण समौन इस्करियोति गै बेटै यहूदा गै बारै में केयो क्यूंकै बो यीसू गै खिलाफ होगे बिनै पकड़ाण आळो हो अर बो ई बिंगै बारा चेला माऊं एक हो।

Currently Selected:

यूहना 6: BGQ

Highlight

Copy