लूका 19

चुंगी लेण आळो बावनो जक्केई

1फेर जद यीसू यरीहो नगर माखर जाण लागरया। 2बठै जक्केई नाम गो रोमी सरकार गै खातर चुंगी लेण आळा गो मुखिया हो अर बो भोत अमीर हो। 3बो यीसू गा दरसण करणो चावै ओ पण बोळी भीड़ गै कारण बो देख कोनी सक्यो क्यूंकै बो बावनो हो। 4जद बो भाजगे, आ'गै रा पर एक मोटै दरखत पर चढग्यो। क्यूंकै यीसू बिं रा ई आण लागरयो। 5यीसू जद बिं दरखत कनै आयो तो जक्केई नै उपर चढेड़ो देखगे हेलो मारयो कै, “अरै ओ जक्कई, दबादब नीचै आ'ज्या क्यूंकै मनै आज तेरै घरे रेणो है।” 6बो दबादब उतरयो अर राजी राजी बानै आपगै घरे लेग्यो। 7ओ देखगे सारा बड़बडाण लागग्या कै ओ तो पापी आदमी गै घरे ई जावै। 8जद यीसू बिंगै घरे आयो तो जक्केई खड़यो होगे केयो, “हे प्रभु, आज मेरो आदो धन गरीबा नै देऊं अर झिकै आदमी कनूं मैं ठगी मारी है बिनै चोगुणो कर'गे देऊं।” 9जद यीसू बिनै केयो, “आज ईं घर गो कल्याण होयो है कै ईंखातर ओ ई परमेसर गै दास अबरहाम गै घराणै गो है।” 10ईंखातर “मिनख गो बेटो इंगै बरगा पापियां नै ढूंढ'गे आंगो कल्याण करण ई आयो है।”

दस म्होरां गी मिसाल

(मत्ती 25:14-30)

11जद लोग बांगी बातां सुंणता सुंणता यरुसलेम नगर गै कनै आया तो लोग सोचा कै यीसू म्हारो राजा बणण आळो ई है जद यीसू बानै एक मिसाल बताई कै, 12एक बारी एक राज घराणै गो आदमी आपगै देस गो राजा बणगे पाछो आण खातर दूसरै देस में उड़ग्यो। 13जाण ऊं पेलां बण आपगै दस नोकरां नै बुला'गे बानै दस सोनै गी म्होरां देगे केयो, “जद तांई मैं पाछो नां आऊं जद तांई थे आऊं बोपार करियो।” 14पण बिंगै ई नगर गा केई आदमी झिका बिनै राजा बणाणो पसंद कोनी करै हा, बां आपगै दूतां नै बिंगै लारै ओ केगे भेज्या कै म्हे कोनी चावां कै ओ म्हारो राजा बणै। 15पण बो राजा बणगे पाछो आयो तो बण आपगै नोकरां नै झिका नै म्होरां देगे गेयो बानै कनै बुलाया कै बाऊं लेण देण गो हिसाब करां कै कितो कमायो है। 16जद पेलै आ'गे बोल्यो, “हे स्वामी, तेरी एक म्होर ऊं मैं दस ओर म्होरां कमा'ली।” 17बण केयो, “स्याबास, धन्य है तूं उतम दास। तूं थोड़ै में ई बोळो बिस्वास आळो निकळयो। जा, तनै दस गामां गो प्रधान बणा दियो।” 18दूसरै केयो, “हे स्वामी, तेरी म्होर ऊं मैं पांच ओर कमा'ली।” 19बण बिनै केयो, “स्याबास, जा तनै पांच गामां गो प्रधान बणा दियो।” 20तीसरै आ'गे केयो, “हे स्वामी, देख तेरी म्होर आ'री। इनै मैं पलै गै बांदगे राखी। 21क्यूंकै मनै तेरूं डर लागै हो कै तूं भोत करड़ो आदमी है क्यूंकै तूं झिको बीजै'ई कोनी, बिनै ई तूं बाडल्यै अर झिको तेरो कोनी बो तूं ले'ल्यै है।” 22बण बिनै केयो, “हे दुस्ट दास, मैं तेरी बातां ऊं तेरो न्याय करूंगा। जद तूं मनै जाणै ओ कै मैं करड़ो आदमी हूं अर झिको मैं बिज्यो कोनी बिनै मैं बाड़'ल्यूं अर झिको मेरो कोनी बिनै चकल्यूं। 23तो मेरी म्होर नै ब्याज पर दे देंतो मैं आपी आ'गे सणै ब्याज ले लेंतो। 24अर झिका लोग बिंगै कनै खड़या बानै केयो कै ईं कनूं आ म्होर लेगे झिकै आदमी दस कमाई है बिनै दे देवो।” 25बां केयो स्वामी, “बिं कनै दस म्होरां तो है।” 26जद यीसू लोगां नै केयो, “मैं थानै केऊं झिकां गै कनै है बानै ओर देईजैगो गो अर झिका गै कनै कोनी है बां कनूं बो ई लेईजैगो झिको बां कनै है।” 27फेर राजा आपगै सिपाईयां नै हुकम दियो, “मेरा दुसमण झिका मनै कोनी चावै कै मैं बां पर राज करूं, बानै अठै ल्यागे मेरै सांमै मारदैयो।”

यरुसलेम में स्याही यातरा

(मत्ती 21:1-11; मरकुस 11:1-11; यूहना 12:12-19)

28आ मिसाल बतागे यीसू यरुसलेम कानी आपगै चेला गै आ'गै-आ'गै चाल पड़यो। 29जद बे बेतफगे अर बैतनिय्याह गाम गै कनै जेतुन प्हाड़ कनै पूग्या तो बां आपगै दो चेला नै केयो, 30कै सांमलै गाम जाओ बठै थानै एक गधी गो बच्चों बांदेड़ो मिलैगो झिकै पर अजे तांई कणैई सवारी कोनी करी, बिनै खोलगे ल्याओ। 31जे थानै कोई कीं पूछै तो के देईयो प्रभु नै इंगी लोड़ है। 32फेर चेला जा'गे देख्यो तो बानै बिंयाई मिल्यो जिंया बा केयो। 33जद बे गधी गै बच्चै नै खोलण लाग्या तो बिंगै धणि केयो कै “इनै क्यामी खोलो?” 34बां केयो, “प्रभु यीसू नै इनै मंगायो है अर बण केयो है जद धणि बानै कीं कोनी केयो।” 35अर बिनै खोलगे यीसू कनै लिआया। अर आपगा खेसला उतारगे बिं पर बिछा'गे यीसू नै बिं पर बिठा दियो अर चाल पड़या। 36अर जद बे चाल्या तो सगळा लोग आदर करण खातर बांगै आगै आगै आपगा खेसला बिछांता गेया। 37अर जद बे जेतुन प्हाड़ गै कनै पूगग्या तो बिंगै चेला अर सारा लोग बांगै चमत्कारां गी झिका बां देख्या, बांगै खातर जोर जोर ऊं परमेसर गी बडाई करण लागग्या। 38“धन्य है बो राजा झिको धरती पर परमेसर गै नाम ऊं आवै। ईंखातर सुरग में सांती अर आकास में परमेसर गी बडाई होवै।” 39जद लोग बडाई करा तो फरीसी लोग बोल्या, “हे गुरूजी, आनै चुप कराओ।” 40यीसू बानै केयो, “जे ऐ लोग चुप हो'ग्या तो ऐ पथर जय जयकार करण लागज्यैगा।”

यरुसलेम गै खातर रोणो

41जद बो यरुसलेम नगर गै कनै आयो तो बिनै देखगे आंख्या पाणी ऊं भरिजैगी अर केण लागग्यो, 42“हे यरुसलेम गा लोगो, जे सांती गी बातां नै जाण लेंता तो ठीक रेंता पण अब परमेसर बे बातां थारूं लको दी। 43क्यूंकै थारै पर हिस्या दिन आवैगा कै थारा दुसमण थानै च्यारूं-पासूं घेर'गे थानै दबा'ल्यैगा। 44अर तेरै में रेण आळा सारा लोगां नै नास कर देसी अर सारो कीं ढा देसी। क्यूंकै प्रभु थानै बचाण आयो जद तो थे बांगी कोई बात मानी कोनी।”

मिन्दर माऊं बोपारिया नै बारै काडणो

(मत्ती 21:12-17; मरकुस 11:15-19; यूहना 2:13-22)

45फेर यीसू मिन्दर में जा'गे बोपारी झिकां बठै दुकानां लगा राखी बानै बारै काडण लागग्या। 46अर रीसा में आ'गे केयो, “पवितर सातर में तो लिखेड़ो है कै ‘ओ मेरो पराथना गो घर होवैगो’ अर थे इनै डाकुआं गो अड्डो बणा राख्यो है।” 47यीसू रोज मिन्दर में परबचन करण जांता जद मुख्य याजक अर सासतरी लोग, मुखिया लोग बानै मरवाण गो मोको ढूंढता रेंवता हा। 48बे बिनै फसाण गी कोई तरकीब कोनी निकाळ सक्या। क्यूंकै बिनै मानण आळा भोत लोग हा बे बांगी बातां नै भोत ध्यान ऊं सुंणता हा।

Currently Selected:

लूका 19: BGQ

Highlight

Copy