लूका 20

यीसू गै अधिकार गो सुआल

(मत्ती 21:23-27; मरकुस 11:27-33)

1एक दिन जद यीसू मिन्दर में परबचन करण लागरया तो मुख्य याजक, सासतरी अर पंचायती नेता बठै बांगै कनै आ'गे खड़ग्या। 2अर केण लागग्या कै “तूं म्हानै बता, तूं ऐ काम किसै अधिकार ऊं करण लागरयो है अर तनै ओ अधिकार कण दियो है।” 3यीसू बानै उतर दियो कै मैं थानै बी एक बात पूछूं, मनै बताओ? 4यूहना गो बतिस्मो परमेसर गै कानू हो या मिनखां गी कानूं हो? 5जद बे आपसरी में केण लाग्या कै जे आपां केयो सुरग गै कानूं तो ओ केवैगो फेर थे बिस्वास क्यूं कोनी करयो? 6अर जे आपां केयो मिनखां गै कानूं तो लोग आपां नै दगड़ां ऊं मारैगा। क्यूंकै आनै पक्को बिस्वास है कै साची यूहना परमेसर गी बात बोलण आळो हो। 7ईंखातर बां केयो, “म्हानै तो ठा कोनी बो किंगै कानूं हो।” 8जद यीसू बानै केयो, “मैं ई थानै कोनी बताऊं कै मैं ऐ काम किसै अधिकार ऊं करूं।”

दुस्ट किसानां गी मिसाल

(मत्ती 21:33-46; मरकुस 12:1-12)

9जद बण लोगां नै एक मिसाल बताई कै: कणैई आदमी अंगूरां गो बाग लगायो अर बिनै किसानां नै ठेकै पर देगे आप परदेस उड़ग्यो। 10जद फळ तोड़ण गो टेम आयो तो बण आपगै एक नोकर नै अंगूरां गी पांती गो हिसो ल्याण खातर घाल्यो। पण बां किसानां बिनै कूट'गे खाली हात काड़ दियो। 11फेर बण एक ओर नोकर नै घाल्यो, बिनै ई बां कुटयो अर बेजती कर'गे खाली हात काड़ दियो। 12फेर बण तीसरै ओर नोकर नै घाल्यो, बां बिनै कुटयो अर अधमरयो कर'गे खाली हात काड़ दियो। 13जद बाग गो मालिक परेसान हो'ग्यो कै अब मैं के करूं? बण सोच्यो मैं मेरै लाडलै बेटै नै घालूंगा झिको बे बिंगो आदर-मान करैगा अर अंगूरां गी पांती गो हिसो बी दे देवैगा। 14जद बिंगो बेटो बाग मैं आयो तो बां किसानां देख्यो कै ओ तो बाग गो बारस है आज्यो इनै आपां जान ऊं मार देवां जिंऊ बाग गा मालिक ई आपां खुद बण जावांगा। 15अर बां बिनै बाग ऊं घिंसगे बारै ल्यागे बिनै मार दियो। अब थे सोचो बाग गो मालिक आ'गे बां किसानां सागै के करैगो? 16जद मालिक आवैगो तो सारा किसानां नै मार देवैगो अर बाग दूसरा किसानां नै सूंपैगो। ओ सुणगे लोग बोल्या “परमेसर करै हिस्यो कदी ना होवै” 17यीसू बां कानी देखगे केयो, “झिको पवितर सासतर में लिखेड़ो है बिंगो के मतलब है? झिकै पथर नै कारिगरां निकमो केयो, बो ई पथर कूंट गो सिरो बणग्यो। 18झिको बी बिं पथर पर पड़ैगो बो टुकड़ा टुकड़ा होज्यै'गो, अर झिकै पर बो पथर गिरैगो बिनै चकनाचूर कर देवैगो।”

महाराजा नै कर देणो

(मत्ती 22:15-22; मरकुस 12:13-17)

19जद मुख्य याजकां अर सासतरियां नै समझ आगी कै आ मिसाल म्हारै पर कैई है, ईंखातर बे बिनै पकड़णो तो चावा पण लोगां ऊं डरै हा। 20ईंखातर बां चाल खेल'गे आपगा आदमी बिंगै कनै घाल दिया कै बिंगै सांमै सच्चा बणगे बिनै बिंगी बात में फसाओ। अर आपां इनै पकड़गे राजा गै पेस कर दैयांगा। 21बांगा आदमी जा'गे केयो, “हे गुरूजी, म्हे जांणा थे सच्चा हो अर ठीक सिखाओ अर सारा नै बिना भेदभाव गै परमेसर गो रा सच्चाई ऊं बतावो।” 22बां पूछयो कै, “म्हानै यहुदियां नै रोमी महाराजा नै कर देणो सई है के कोनी?” 23यीसू बांगी चाल नै जाणग्या अर बानै केयो। 24“एक सिको मनै देवो अर बताओ ईं पर किंगी मोहर किंगो नाम है” बां केयो, “रोमी महाराजा गो।” 25यीसू बानै केयो, “जितो महाराजा गो हक है बितो रोमी महाराजा नै देवो अर जितो परमेसर गो हक है बो परमेसर नै देवो।” 26बे यीसू नै लोगां गै सांमै बात में फसा कोनी सक्या। पण बे बिंगो जबाब सुणगे उदास हो'ग्या अर चाल पड़या।

मरगे जीणै अर ब्या गै बारै में बताणो

(मत्ती 22:23-33; मरकुस 12:18-27)

27फेर सदूकी धारमिक दल गा केई लोग आया। झिका मरगे पाछो जीणै में बिस्वास कोनी करता। 28बां सवाल करयो, “हे गुरू, मूसा गै नेम विधान में आपणै खातर लिखेड़ो है कै झिको आदमी निपुतरो मरज्यै तो बिंगो भाई आपगी भाबी सागै ब्या कर'गे आपगै भाई खातर उळाद पैदा करै। 29तो एकर सात भाई हा। सारा ऊं मोटोड़ो भाई ब्या कर'गे निपुतरो मर ग्यो। 30फेर दूसरै भाई आपगी भाबी गै सागै ब्या कर लियो। अर बो ई निपुतरो मर ग्यो। 31इंया कर'गे सातूं भाई निपुतरा ई मरग्या। 32अर आखिर में बा लुगाई बी मरगी। 33अब थे बताओ जद बा लुगाई दुसर जींवती होवैगी तो बा साता मू किंगी बहु होवैगी क्यूंकै बण पेलां ई सातां सागै ब्या कर लियो।” 34यीसू बानै केयो, “ईं टेम संसार गा लोग ब्या करै 35पण आण आळै न्याय गै टेम#20:35 आण आळ न्याय गै टेम: सुरग में परमेसर गा चुणेड़ा लोग झिका पाछा जीवैगा, बांगो बठै ब्या कोनी होवै। 36बे सुरगदूतां दांई अमर होवैगा। क्यूंकै बे परमेसर गी उळाद होवैगा क्यूंकै बे पेलां मरेड़ा माऊं जींवता होण आळै गी उळाद है। 37पण आ बात मूसा झाड़ी आळी क्हाणी में बताई है कै मरेड़ा जींवता हो'ज्यै। अर बो परमेसर नै अबरहाम, इसहाक अर याकूब गो परमेसर केवै। 38पण परमेसर जींवता गो परमेसर है मरेड़ा गो कोनी। बे सारा लोग झिका बिंगा है जींवता है।” 39जद ओ सुणगे केई सासतरी बोल्या कै “हे गुरू, थे साची केवो।” 40क्यूंकै फेर ओर बात पूछण खातर बांगो काळजो काम कोनी करयो।

मसी किंगो बेटो है?

(मत्ती 22:41-46; मरकुस 12:35-37)

41फेर यीसू बानै पूछयो कै, “मसी नै दाऊद गी उळाद क्यामी केवै? 42क्यूंकै दाऊद भजन संहिता में लिखै कै प्रभु मेरै प्रभु नै केयो कै मेरै बराबर सजै पासै बेठ, 43जद तांई मैं तेरै दुसमणां नै तेरै बस में ना कर दैयूं#भजन संगिता 110:1। 44पण जद दाऊद खुद मसी नै प्रभु केवै तो मसी दाऊद गी संतान किंया हो सकै?”

सासतरियां ऊं सावधान

(मत्ती 23:1-36; मरकुस 12:38-40)

45जद ऐ बातां लोग सुणन लागरया जद यीसू आपगै चेला नै केयो कै, 46सासतरियां ऊं चोकस रेईयो झिका धरम गै नाम ऊं लम्बा लम्बा चोळा पेरे फिरै अर झिका नै बजारां में लोगां ऊं निमस्कार करवाणी अर सतसंग घर में झिका नै ऊंची जिग्यां में बेठणो आच्छो लागै। 47बे किनैई कोनी बख्सै अर विधवा लुगाईयां गा घर ई लूट'गे खा'ज्यै। अर लोग दिखाई खातर भोत देर तांई पराथना करता रेवै। पण परमेसर आनै भोत मोटी सजा देवैगो।

Currently Selected:

लूका 20: BGQ

Highlight

Copy