लुका 12
12
येसुऎ टिङ्खुबाचि फारिसिचिर आलिसानॆ लोमिम्पा
(मट्टि १०:२६-२७)
1आक्रल आक्कुबि डिरिक्बाङ् डिरिक् याॽमिचि खोम्टि खारामि, गरक्ढारि रु एक्कसॆ होइक सिक्मा परकुचि। हाङ् आक्रल येसुऎ याॽल टाङ्पाम् टिङ्खुबाचि लोसुचि, “आन्ना फारिसिचिम् खाबॆक्बाङ् मिउ पेनानॆ। आक्क लोमिम्पा आक्खाचिम् काइसा निवाँ यो। 2मान्ठाभनॆ डॆक्मिम्पा खानावाँ माङ्माङ् चु, आक्खा चोब्न लाबक् हाङ् चुम्मिम्पा खानावाँ माङ्माङ् चु, आक्खा चोब्न लाटॆ। 3आन्नॆ चुम्मिम्पा खानावाँ चोप्पासॆ खेम्मे गारि लो। होइढाचिऎ मालेबान नाबाक्पि लॆॽमिम्पा खानावाँ खिम्मि वाचेन्टुबाङ् इ।”
आसानुङ् किसिमा लॆऎ लोमॆ खानावाँ
(मट्टि १२:३२)
4लाङ्काम्चि कॆ आन्ना लोकानि, “आन्नामि सालुङ् टेःॽन सेॽमा हेखुबा टर आक्कबाङ् डॆङ्पि माङ्स लॆःॽमा आहेखुबा याॽमिचि नुङ् आकिसिआनॆ। 5टर आसानुङ् किसिमा लॆऎ कॆ आन्ना चाइबान लोकानि, सालुङ् सेरुकुहाङ् नाराक्बि कहाङ्मॆ चॆक्मावा चुखुबा निवाँहाङ् नुङ् चाइबान किसिआनॆ। 6माङ् एक्क मिःक्म ढॆक्का याङ्पिॽन ङाचि बिरुम्मा इन्चाक् हॆॽनॆ? मरहाङ्स एक्क बिरुम्मा स आम्नि आपामि निवाँ मॆड्डिङ् सिखॆॽनि। 7हाङ् आन्नाम् ग झाना निवाँहाङ्ऎ आन्नाम् निङ्टॽवाबि चुहा एक्क एक्क टाङाक् सङ्क ङॆःप्डु। मसॆ आन्ना आकिसिआनॆ, मान्ठाभनॆ आन्ना आक्खा डिरिक् सवाँ पासाचिबाङ् डिरिक् सिक्खुबा लॆकानि।
याॽमिचिम् ङारिङ्पि येसु निवाँयुङ् लॆःॽमॆ
(मट्टि १०:३२-३३; १२:३२; १०:१९-२०)
8“कॆ आन्ना लोकानि, आसॆ काङा याॽमिचिम् ङारिङ्पि कॆ खो निवाँयुङ् लॆडुङ् का, काङा याॽमिमि पासाऎ स आक्क निवाँखाटॆखुबाचिम् ङारिङ्पि टाङ्पाम् याॽमि रेम कामानुङ् लोकुङ्। 9टर आसॆ काङा याॽमिचिम् ङारिङ्पि लेङानि का, कॆस आक्क निवाँखाटॆखुबाचिम् ङारिङ्पि लेॽङानि लोकुङ। 10हाङ् काङा याॽमिमि पासामि बारेबि काइसॆ खानावाँ इचासे लॆःॽमिम्पा हिङ्वामि यङ्निमा लि, टर सॆङ्सॆङॆ लावा इचासे लॆःॽमिम्पा हिङ्वामि यङ्निमा लिनि।
11“याॽमिचिऎ आन्ना लाबुकानिहाङ् याहुडिचि खोम्ठाम् खिम्पि, टुङ्घङ्पाचिबि नुङ् हाङ्चिबि लाखॆकानि, आक्रल माङ् यामुमा लॆऎ कामानुङ् आकिसिआनॆ। 12मान्ठाभनॆ आक्रल माङ् यामुमा लॆऎ कामानुङ् सॆङ्सॆङॆ लावाऎ आन्ना चिन्कानि।”
निवाँ मॆड्डिङ्मा चासुम्टाङ्पा याॽमि
13हाङ् आक्खा डिरिक् याॽमिचिबाङ् एक्कसॆ येसु लोसु, “चिन्खुबो, काङ्कामि आपॆ काङ्कामि लागि याइपिम्पा चासुम् काम् बुबु आनाम् नुसा हाबिटॆ कामानुङ् लोबिॽङॆम।” 14येसुऎ आक्क लोसु “आन्नामि चासुम् हामाम् लागि आसॆ काङा पाङ्हाङ्सिङॆ?” 15हाङ् खोसॆ आक्कुबि खोम्टि खॆॽमिम्पा चोब्न याॽमिचि लोसुचि, “काम्नुःर पेनानॆ। चोब्न खालाहा कङ्माबाङ् मिउन पेनानॆ, मान्ठाभनॆ याॽमिमि हिङ्खामा उम् चासुम्पि लिनि।”
16आक्क डॆङ्पि येसुऎ एक्क गरक्मा काठा लोसु, “एक्क चासुम्टाङ्पा याॽमिमि रोपाबि डिरिक् चरुङ् सिसु। 17हाङ् आक्कसॆ उम् निवाँबि गरक् मिनु, ‘इघा चोब्न काम् चरुङ् युङ्ठाम् ठाल कानुङ् माआ, ह माङ् लॆःॽमाङॆ?’ 18हाङ् खोसॆ लोसु, ‘ह गर लॆःॽङा, मिॽमिॽहा बॆङ्टॽवा योबकुङ्हाङ् डिड्ढा डिड्ढा मुकुङ्हाङ् आक्कुबिन चोब्न चरुङ् नुङ् कक्नाम् युङुकुङ। 19हाङ् का काम्टाङ्पॆॽन लोकुङ्, ह आनानुङ् डिरिक् लःढारि खेखुबा चासुम् चु, हेःर चाऎ, हाङ् हाङ्हाङ्डिम्डिम लॆटॆ।’
20“टर निवाँहाङ्ऎ आक्क लोसु, ‘ओ निवाँ मॆड्डिङ्मा याॽमि, आयु युटान आनाम् सक्मा खाइ हाङ् आनॆ खोम्मिम्पा चासुम् आसॆ चाकुयॆ’?” 21हाङ् येसुऎ काठा लुक्पिसे लोसु, “टाङ्पाम् लागि बाखाटेम्पि चासुम् खोम्खुबा टर निवाँहाङ्मि ङारिङ्पि चासुम्टाङ्पा आलिखुबा याॽमिचिऎ गरहा डुखा आङ्टिखॆकुचि।”
निवाँहाङ्पि निवाँयुङ् लॆःॽमॆ
(मट्टि ६:२५-३४)
22आक्क डॆङ्पि येसुऎ टिङ्खुबाचि लोसुचि, “मसॆ हिङ्चामाम् लागि माङ् चामॆ हाङ् सालुङ्मि लागि माङ् चाङ्मॆ कामानुङ् आमिनानॆ। 23मान्ठाभनॆ हिङ्खामा चामाह ठकाबाङ् हाङ् सालुङ् चाङ्माह चेबाङ् ढ्यापा यो। 24आराॽवाचि खाङाम्चिनॆ! आक्खाचि रोपा सङ्क लिःॽमिनि, चरुङ् सङ्क खोम्मिनि। हाङ् आक्खाचिम् चरुङ् खोम्भुङ्मॆ बॆङ्टॽवा सङ्क लिनि, हाङ्सङ्क निवाँहाङ्ऎ आक्खाचि चामा पिॽमॆ सिकुचि। आन्ना ग आक्खा सवाँचिबाङ् डिड्ढा लॆकानि। 25निवाँ यामुकानि हाङ् आन्नॆ आसॆ आम्नि हिङ्चामॆ डिना येप्हिकाम्नॆ? 26मसॆ गरक्मा मिःछुॽमा योम्पक् सङ्क लॆःॽहिसाम्निनि हाङ्ग मान्ठा होइढा खानावाँबि निवाँ फॆरुकानिहा?
27“आक्खा बॆॽमिम्पा लिलि बुङ् खाङानॆ, आक्खाचि योम्पक् स मुमिनि, चाङ्माम् लागि चे स डाक्मिनि। टर कॆ आन्ना लोकानि, सोलोमान लोमॆ हाङ् मरऎ चासुम्टाङ्पा लॆटा हाङ्सङ्क इघा बुङ्रकॆ सङ्क काम्नुऎ मॆखाङ्ङुडाक्। 28आइ बॆक्खुबा हाङ् वेन्डा हेक्खुबा याॽवा सङ्क निवाँहाङ्ऎ चागुकु हाङ्ग मान्टॽल खोसॆ आन्नामि लागि चाङ्माह चे पिट्टानिनि मिनुकानिहा? खोइर आन्नामि निवाँयुङ्? 29मसॆ माङ् चामॆ हाङ् माङ् चाङ्मॆ कामानुङ् निवाँबि आमिनानॆ। 30मान्ठाभनॆ निवाँहाङ् आलेक्खुबाचिऎ रे गरहा खानावाँबि निवाँ टिकुचि। इघा चोब्न ठका पाब्कानि कामानुङ् आन्नामि आप्पा निवाँहाङ्ऎ लेकु। 31याॽल निवाँहाङ्मि हाङ्डाम् यगानॆ हाङ् खोसॆ चोब्न ठका येट्टिकानि।”
पारुबिऎ चासुम्
(मट्टि ६:१९-२१)
32येसुऎ लोसु, “काम् टिङ्खुबाचि, आन्ना मिःक्म सामुङ्चिर लॆकानि। टर आकिसिआनॆ! मान्ठाभनॆ निवाँहाङ् आपाऎ आन्ना खोम् हाङ्डाम् पिॽमा चेन्चाडा। 33आन्नॆ टाङ्पाम् चासुम् इन्चाआम्नॆ हाङ् टामिम्पा याङ् माङ्स आचुखुबा याॽमिचि पिट्टाम्चिनॆ। टाङ्पाम् लागि हानाम्स ऎनाक्खुबा बॆक्खा मुसाम्नॆ हाङ् हानाम्स लुक्खॆॽनियॆ चासुम् पारुबि खोमाम्नॆ। आक्कुबि खुसुबाङ्चिऎ सङ्क खुसुचिनि हाङ् सिङ्किपाचिऎ सङ्क चउचिनि। 34मान्ठाभनॆ हाबि आन्नामि चासुम् लि, मुबिॽन आन्नामि निवाँ सङ्क लि।”
चेन्टुबाङ् लिसे पेम्मॆ
(मट्टि २४:४५-५१)
35“हानाम्स काम् योम्पक् मुमा चेन्चेन् लियाकानॆ हाङ् आन्नामि ओप्लिङ् ओब्याकाम्नॆ। 36आन्ना भ्यामि भोजाबाङ् ऎन्टाखुबा आन्नामि खिम्पिऎ टुङ्घङ्पा हुङ्खुबा याॽमिचि रक्मा यो। टुङ्घङ्पा टाहाङ् लम्भॆरॆङ्मा डुॽमा अक्सि आक्खाचिऎ खोम् लागि हेम्पक् पिकुचि। 37हाङ् टुङ्घङ्पा ऎन्टामार योम्पक् मुखुबाचि मॆइम्चारे खो हुङ्ढाङ्पा भॆट्टकुचि हाङ्ग आक्खाचिम् लागि एट्टान काम्नुऎ लि। कॆ चाइबान लोकानि, आक्क टुङ्घङ्पाऎ आन्ना टाबाङ्चिर काम्नुःर लॆसे पेम्मिकानि हाङ् चामा डुङ्मा पिकानि।
38“हाङ् खो युटा म आठावा आक्कबाङ्स डॆङ्पि टामार सङ्क योम्पक् मुखुबाचि मॆइम्चारे पेम्मिम्पा भॆट्टकुचि हाङ्ग, आक्खाचि आसिका टक्चामिम्पाचि यो।
39“टर आन्नॆ ग खानावाँ लेसाम्नॆ, खिम्पिऎ टुङ्घङ्पॆ खुसुबाङ् युटाऎ हाम्पॆ लःबि टाऎ कामानुङ् लेसुग, खो माइम्चारे पेन्खुबा लॆटा हाङ् खोम् खिम्पि खुमा आपिक्खुबा लॆटा। 40आक्रक्न आन्ना स चेन्टुबाङ् याॽमिचिर पेनानॆ। काङा याॽमिमि पासा आन्नॆ मामिॽलाम्पा लबि टाःॽङा।”
41हाङ् पाट्रुसऎ येसु सिमु, “टुङ्घङ्पो, आनॆ ग खानावाँ कानिम् लागि टेःॽन लोमिम्पा रु होइढाचिम् लागि सङ्क लोमिम्पा?”
42येसुऎ लोसु, “चेन्टुबाङ् नुङ् निवाँयुङ् लॆःॽहिमॆ योम्पक् मुखुबा याॽमि आसार? खो टुङ्घङ्पाऎ खोम् खिम्पिऎ चोब्न योम्पक्मि खाङ्खुबा मुकु हाङ् आक्कसॆ होइढा योक्पक् मुखुबाचि काम्नुःर चामा पिकुचि। 43टुङ्घङ्पा खिम्पि ऎन्टामार आक्क योम्पक् खाङ्खुबॆ आक्रक्न काम्नुःर योम्पक् मुढाङ्पा भॆट्टकु हाङ्ग आक्क डिरिक् आसिका टक्चामिम्पा योम्पक् मुखुबा याॽमि यो। 44चाइबान कॆ आन्ना लोकानि, टुङ्घङ्पाऎ आक्क खोम् चोब्न चासुम् सक्पि ढुप्पाट्ट पिकु। 45टर आक्कसॆ काम् टुङ्घङ्पा हानाम् टाक्टाक् मिम्मानुङ् हाबि ग हाबि पाइमानुङ् चासे, डुङ्से, सेङ्खेसे होइढा योम्पक् मुखुबाचि रक्पकुचि हाङ्ग, 46खोम् टुङ्घङ्पा खोसॆ ममिॽलाम्पा हाङ् मामिॽमिम्पा डिना टा हाङ् आक्क चाइर रगुकु, हाङ् आक्कमि डसा निवाँहाङ्ऎ लोमिम्पा आखेम्खुबामि रक्मन लि।
47“टाङ्पाम् टुङ्घङ्पामि निवाँबिऎ खानावाँ वाबुकु हाङ्स मुमाहा योम्पक् आमुखुबा याॽमिऎ चाइ टङ्घङ्पाबाङ् डिरिक् रःग्मा टुम्चाकु।
48“टर टुङ्घङ्पामि निवाँबिऎ खानावाँ मालेबान काइसॆ योम्पक् मुखुबाऎ चाइ मिःक्मन रःग्मा खाइहाङ्चा। आसा डिरिक् पिडा आक्कसॆ डिरिक् पिॽमा लॆ। आक्रक्न आसा हुक्पि डिरिक् डॆम्पिडा आक्कसॆ आक्कबाङ्स डिरिक् ऎम्मा लॆ।”
खिम्पिहा याॽमिचिऎ सिच्चामिम्मा
(मट्टि १०:३४-३६)
49येसुऎ लोसु, “काङा बाखाटेम्पि खिमाटुमामि मिः सुक्टिसि टाडिङ् हाङ् याॽलन मिः सुक्सिम्पा हाङ्ग काम्नुऎ लिसॆ रेम। 50काङॆ एक्क डुखामि बाप्टिस्मा लामा लॆॽङा हाङ् आक्क बाप्टिस्मा मालारढारि काम् सक्मान हाप्टि खॆ। 51माल आन्नॆ काङा बाखाटेम्पि याॽमिचि टङ्सि टाडॆ कामानुङ् मिङ्कानिहा? टर हॆॽनॆ, काङा ग याॽमिचि फाक्सि रे टाडिङ। 52हयॆबाङ् एक्क खिम्पिहा ङाचि याॽमिचिबि सुम्पाङ्ऎ होइढा हिप्पाङ् हाङ् आक्खा हिप्पाङ्ऎ आक्खा सुम्पाङ् सिच्चोकुचि। 53आपाऎ वाठाङ्पा पासा, वाठाङ्पा पासाऎ आपा, आमाऎ साम्सामा, साम्सामाऎ आमा, आक्रक्न नाम्माऎ नाम्मि हाङ् नाम्मिऎ नाम्मा सिच्चाबॆ चुक्मि।”
लः लेॽमॆ
(मट्टि १६:२-३)
54हाङ् येसुऎ आक्खा डिरिक् याॽमिचि लोसुचि, “आन्नॆ नाम्डाॽवाबि खिन्डुमा खाङ्टॽमा अक्सि ‘ह वारि टा’ काकानि हाङ् टाःक्स। 55युलाम्बाङ्कॆ हिॽयापा लुमार ह ओम्मॽओम्मॽ लि काकानि हाङ् आक्रक्न लि। 56ओ काइसा निवाँ लॆखुबाचि! आन्नॆ बाखाटेम्पिऎ हाङ् नाम्फलिॽवाऎ खानावाँ खाङ्काम्नि हाङ् वेन्डा लिमा ठाबाक्डॆ खानावाँ वाबुकाम्नि, टर ह लिढाङ्मिम्पा खानावाँ चाइ मान्ठा वाबाम्निनॆ?
खिखुबानुङ् टङ्मॆ
(मट्टि ५:२५-२६)
57“आन्नॆ ह आन्नाम् लागि माङ् लॆःॽमा चाइ काम्नुऎ लोमॆ खानावाँ मान्ठा मिॽलापाम्निनॆ? 58आना आब्डिक् पिक्खुबॆ टुङ्घङ्पाबि लाखॆटा हाङ्ग आनानुङ् खिखुबानुङ् लाम्फुब्न टङ्इटॆ। आक्र मालॆःॽना हाङ्ग खोसॆ आना टुङ्घङ्पामि ङारिङ्पि लाखॆ हाङ् टुङ्घङ्पाऎ आना टिलिङ्गाचिम् हुक्पि पि हाङ् आक्खाचिए आना सेक्चिम्पि सेक्ढाङ्मि। 59हाङ् आनॆ एक्क एक्क याङ् माफङ्लढारि आक्कबाङ् आम्पहिनानि।”
Currently Selected:
लुका 12: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
