यूहन्ना 17

यीशु अपु मने कांच्छा परमेश्वर जे बोलुण

1ए सम्हाई बोक बोलुणे पता, यीशु खड़िया हेर कइ बोलु, “बोउआ, से घड़ी#17:1 यीशु कष्ट सेही कइ क्रूस पुठ मरणे घड़ी एई गई। अभेईं तुस मेह्‍णु हरालिण दिए कि तुं कुआ जे अउं भो, में कति शान असी।#यूहन्ना 12:23; 13:31 त अउं बि हरालता कि तुं कति शान असी। 2किस कि तुसी मेन्धे हक दुतो असा कि अउं तेन्हि सोबी जे अमर जीवन दिउं जे जे में पता एण जे तुसी चुणो असे। 3त अमर जीवन पाणे तरीका ई असा कि तेन्हि पक्का पता लगे कि तुस ईं यक सच्चा परमेश्वर भो त अउं जे यीशु भो, सेईंए मसीह भो जे तुसी लंघो असा। 4जे कम तुसी मेन्धे दुतो थी तस पूरा कइ कइ मेईं धरती मेह्‍णु बुच तुं शान बधाई। 5त बोउआ, अभेईं तुस बि धरती बणाणे पेहले तुसी जोई जे में शान थी, तस दुबारी मेन्धे दिए।”

यीशु अपु चेली जे प्रार्थना करीण

6तोउं तेन बोलु, “बोउआ, धरती पुठ जे चेले तुसी मेन्धे दुतो थिए, तेन्हि जे मेईं तुं बारे बोलो असा। से तुं थिए पर तुसी से मेन्धे दिते। तेन्हि तुं बोके मनो असी। 7त अभेईं तेन्हि पता लग गो असा कि जे किछ बि तुसी मेन्धे दुतो असु, से सोब तुसी केआं अओ असु। 8किस कि जे जे निआंग तुसी मोउं जे दिती, मेईं से तेन्हि जे बोल छेई त तेन्हि से सोब मनो असी। तेन्हि सुसुर पता लग गो असा कि अउं तुसी केईआं अओ असा, त तुसी अउं लंघो असा। 9अभेईं अउं होरी जे नेईं, पर एन्हि जे दुआ करण लगो असा जे तुसी मेन्धे दुतो असे, किस कि से तुं भो। 10त जे बि में असे से सम्हाई तुं भो; त जे बि तुं भो, से सम्हाई में भो। त एन्के बेलि मेह्‍णु पता लगता कि अउं कत बोडा असा। 11बोउआ, अउं त अब धरती पुठ ना बिश्ता, किस कि अउं तोउ केईं एन्ता। पर ए इठि धरती पुठ रेहन्ते। तुस शुचे असे। त जे तुसी मेन्धे दुतो थिए, बोउआ अपु नओं बेलि तेन्के रक्षा कर ताकि ए बि हें ईं यक भोई घियेल। 12#यूहन्ना 13:18जोउं तकर अउं तेन्हि जुए साते थिआ, मेईं तुं नओएं शक्ति बेलि जे तुसी मेन्धे दुतो असी तेन्के रक्षा की। मेईं तेन्के ख्याल रखा। त धरमे कताबे बोक#छुआंरी 41:9; यूहन्ना 13:18 पूरी भुणे लिए सद तस चेले छड़ दी कइ जे खतम भुणे बाड़ा थिआ, बाकी सम्हाई बचाई रखे। 13पर अभेईं अउं तुसी केईं जे एन्ता, बोउआ! त ए सोब बोक इस धरती पुठ तोउं बोलुण लगो असा, ताकि इन्के मन बि तीं खुश भो, जीं में मन तुं ए जे एणे लिए भुण लगो असा। 14मेईं तुं बोक इन्हि शुणाई छो असी त एन्हि तेन्हि पुठ विश्वास कइ छो असा। पर धरती मेह्‍णु एन्हि भुंजान्ते, किस कि जीं अउं इस धरती मेह्‍णु के ईं नेईं, तीं ए बि इस धरती मेह्‍णु के ईं नेईं। 15अउं ई दुआ करण नेईं लगो कि एन्हि इस धरती केआं घिन घिए, पर ई लगो असा कि एन्हि तेस दुष्ट#17:15 इठि दुष्ट मतलब शैतान केआं केआं बचाई रखे। 16जीं अउं इस धरती नेईं, तीं ए बि इस धरती नेईं। 17तुं बोक जे सच्ची असी, तसे बेलि एन्हि तुं सेवा करुण जे शुचा करे। 18जीं तुसी अउं मतोक अन्तर लंघो असा, तीं मेईं बि ए मतोक अन्तर जे लंघो असे। 19त तेन्के लिए अउं अपु भकत देन्ता#17:19 मूल भाषा अन्तर “अउं अपफ जे शुचीन्‍ता” लिखो असु। ताकि ए बि शुचा भोई घियेल त पूरे सच्चाई जुए तुं कम करण जे तेयार भोल।”

सम्हाई विश्वासी जे यीशु प्रार्थना

20तोउं तेन बोलु, “बोउआ! अउं ना सद एन्हि चेली जे दुआ कता, पर तेन्हि जे बि दुआ कता, जे इन्के बोकी बेलिए मोउं पुठ विश्वास करियेल। 21बोउआ! तेन्हि सम्हाई यकजूट करे जीं अउं तुसी अन्तर त तुस मोउं अन्तर असे#यूहन्ना 10:38 तीं से बि असी जुओई भो लौते ताकि धरती मेह्‍णु ईं विश्वास करे कि तुसी अउं लंघो असा। 22त जे शान#17:22 इठि “शान” मतलब “सम्मान”, त “इज्जत”। पर यीशु जे कष्ट सेही कइ मर कइ दुबारी जीआ, तसे बारे बतान्ता। तुसी मेन्धे दुतो असी, से मेईं तेन्के धे बि दुतो असी, ताकि से बि यक भुओल, जीं अस दुहिए असे। 23अउं तेन्के अन्तर त तुस में अन्तर भुओ लौते, ताकि से पूरे यकजूट भोई घिए त धरती मेह्‍णु पता लगाल कि तुसी अउं लंघो असा, त तुसी तेन्हि जोई तिहांणि परेम किओ असा, जीं तुसी मोउं जोई किओ असा।”

24“बोउआ! अउं चहन्ता कि जे तुसी मेन्धे दुतो असु, जेठि अउं रेहन्ता, तठि से बि बिशियेल, ताकि से में महिमा जे तुसी मेन्धे दुतो असी तस हेर सकियेल। किस कि तुसी धरती बणाण केआं पेहले ईं मोउं जुओई परेम किओ असा। 25ए धर्मी बोउआ, इस धरती मेह्‍णु तुस ना पिछाणे। पर अउं तुसी जाणता, त ए बि जाणते कि तुसी अउं लंघो असा। 26त अउं तुं कोउं भो तसे बारे तेन्हि जे बोलो असु त बोता रेहन्ता, ताकि मोउं जुए जीं तुसी परेम किआ, तीं तुस तेन्हि जुए बि परेम करे त अउं तेन्हि जुए बिश्ता।”

Currently Selected:

यूहन्ना 17: pgg

Highlight

Copy