युहन्ना 12
12
येशु बेथानीयाला
(मत्ती २६:६-१३; मर्कुस १४:३-९)
1नीस्तार मेःलीङगीइ ङीःमा टुःक तोःङ्ला येशु बेथनीया युःलला ओःङ्सी। ओःला लाजरस तेःकुके, खोला येशुइ सीक्योकलाःम्ले सोम्बो जोदी एःके। 2खुङक्याइ येशुइ लागी ओःला कुङ्मुइ डेन तयार जोसी। मार्थाइ मेःबा-टहल पेःसी, ओःले लाजरसदी खुङ ङीमु साःजेला तेःकेनक्या नाःङ्ला मेःराङ चीग एःके। 3ओः तीःजीला मरीयमगीइ माःङ्बुरा रीःन पेःगेन लीटर फे जटामसीइ सीःम्बु टीःमा तेर्केन अत्तर ख्योङ्दी येशुइ काङ्बाला टुःल्सी, ओःले खुङगीइ काङ्बा राःङगीइ टाइ फ्यासी, ओःले अत्तरकीइ टीःमाइ खीम काःङ्सी। 4इःनाङ खुङगीइ मेःन्दा चीङ्ङी योबाक्या नाःङ्ला मेःराङ चीग यहुदा इस्करीयोत लाःकेन योबाइ लाःसी (दी योबाइ तीङ्ला येशुला तुःक तेर्सी), 5“दी अत्तर नी क्याः सुम ङुलगीइ टाङ्गा डेबाला#१२:५ क्याः सुम ङुलगीइ टाङ्गा डेबाला एःजे डेबादी मेःन्दा चीग मीःइ लोः चीग लेःगा पेःदी ज्योर्केन ला चे इःङे। चोङ्दी ओः डेबा प्राङ्नाक्याला केःतेर्ना याःबु मेःयुङ्जेके रा?” 6खोइ प्राङ्नाला च्याःम्बु पेःदी लाःक्योक मीःङे इःनाङ कुमेन सोङ्गारा एःन्डु लाःती एःके। डेबाइ काःल्ज्युम खोइरा ज्याउके, ओःले ओःलाःम्ले कुगेन्दी पेःउके। 7येशुइ लाःसी, “दी मोःला चीङ माःलाःप, ङाःला तीःप्केन ङीःमाइ लागी खुङगीइ ङाःला दी अत्तर टुःल्तेर्क्योक इःङे। 8प्राङ्नाक्या नी तेन्दुरा ख्याक्या ङीमु ओःङ्गुए, इःनाङ ङाः नी ख्याक्या ङीमु तेन्दुरा मेःतेए।”
9येशु बेथानीयाला एः लाःती छोर्मीजीक माःङ्बुरा मीःक्या ओःला ओःङ्सी। खुङक्या येशुला ताजेला चीग्रा मीःङे, इःनाङ खुङगीइ सीक्योकलाःम्ले सोम्बो लोक्योक लाजरसलाङ तागाला ओःङ्दी एःके। 10ओः सोङ्गारा, छेस्यो पुजाहारीक्याइ लाजरसलाङ सेकेन टेः पेःसी। 11चीलेलाःना लाजरसकीइ पेःगासुनारा माःङ्बुरा मीःक्याइ खुङक्याला पोःर्ती येशुला सेमल्हुक लुगाला स्युःदी एःके।
यरुशलेमला येशुला तोःङ्ज्याङ पेःक्योक
(मत्ती २१:१-११; मर्कुस ११:१-११; लुका १९:२८-४०)
12ङार्तोच्योङ्रा नीस्तार मेःलीङला ओःङ्क्योक छ्योम्बो पोर्चोमगीइ येशु यरुशलेमला ओःङ्देरा एः लाःक्योक कोःसी। 13खुङक्या खजुरकीइ याःल्गा लेःङ्दी खुङला तोःङ्ज्याङ पेःजेला छ्योम्बो के तेङ्देरा खुङला फ्रेकाला काःल्सी, “कोन्ज्योला प्रशंसा! प्रभुइ मीःनला ओःङेन्दीला कोन्ज्योइ मोलाम तेर्च्युक। इस्राएलगीइ क्याःल्बुला कोन्ज्योइ मोलाम तेर्च्युक!”
14ओःले पुःङ्गुइ पीःब्रु चीग फ्रेती येशु ओःखाला जासी, दीखोइ बारेला छ्येइ पेज्यालाङ एःन्डुबा प्रुःदी एः,
15“यरुशलेमगीइ मीःक्या, ख्योक्या माःजी!
तादो, ख्योक्याइ क्याःल्बु पुःङ्गुइ पीःब्रुखाला जादी ओःङ्देरा एः।”#जकरीया ९:९
16दी तामक्या खुङगीइ योबाक्याइ तोःङ्ला मासे। इःनाङ येशु नाःम्खालीङला महीमाला लोःदी काःल्मीःजीक दी ताम काःल्सी ओःले छ्येइ पेज्याला येशुइ बारेला प्रुःदी एःक्योक ताम छाङ्जेला दीखो काःल्सी लाःती टेःम्बा साल्सी।
17येशुइ सीक्योक लाजरसला तुःर्सालाःम्ले केक्याःप्ती सोम्बो जोक्योक थोङेन मीःक्याइ दी ताम काःल्क्योक इःङे लाःतीरा तेःसी। 18खुङगीइ एःन्डुबा याःमाछाककीइ लेःगा पेःदी एः लाःती कोःक्योक सोङ्गारा माःङ्बुरा मीःक्याइ खुङला फ्रेकाला ओःङ्दी एःके। 19ओःले फारीसीक्याइ चीगकीइ राःङ्साला लाःकाला स्युःसी, “तादो, ख्योक्याइ चीङ पेःजे माःखु। थाम्जेर मीःक्या खुङगीइ तीङ्ला काःल्सीःङ्सी।”
चीङ ग्रीक मीःक्याइ येशुला फ्रेचे सेम पेःक्योक
20यरुशलेमला मेःलीङगीइ तीःजीला आराधना पेःजेला डोगेनक्या नाःङ्ला चीङ ग्रीक मीःक्याङ एःके। 21खुङक्या गालीलगीइ बेथसेदालाःम्ले ओःङ्क्योक फीलीपसाःला ओःङ्दी एःन्डु लाःती वासी पेःसी, “हजुर, ङीः येशुला फ्रेचे सेम थेती एः।” 22फीलीप काःल्दी अन्द्रीयासला लाःसी, ओःले खुङक्या ङीःक्कार काःल्दी येशुला लाःसी। 23येशुइ खुङक्याला लाःसी, “ताः मीःइ पुःइ महीमा ओःङेन तीःजी ओःङ्जे चाल्दी एः। 24तेःन्दामरा ङाः ख्याक्याला लाःके, न्याःइ बुदी सेबीला लेप्ती मासी लाःना ओःखो ओःन्डुबारा तेःकुए। इःनाङ ओःखो सीसी लाःना ओःखोइ माःङ्बुरा डु कोःङ्च्युउए। 25ओःन्डुरा पेःदी राःङगीइ मीःलीला च्याःम्बु पेःगेन्दीइ मीःली गुमाइतीगेन एः। इःनाङ राःङगीइ मीःलीला जाम्बुलीङला तुच्छा टेःम्बा साल्गेन्दीइ नाःमाङ मीसीगेन मीःली ज्योर्केन एः। 26ङाःइ लागी लेःगा पेःगेन्दी ङाःइ तीङ्ला ओःङ्कोःउए। काःला काःला ङाः काःल्बा, ओःखोङ ओःलारा ओःङेन एः। ङाःइ लागी लेःगा पेःगेन्दीला ङाःइ आबाइ सेःसा पेःगेन एः।
राःङ सीगेन बारेला येशुइ लाःक्योक
27ङाःइ सेम छाबाछुबे काःल्दी एः, ओःले ङाः ची लाःचे? ‘ए आबा, दी तुःक्पुइ तीःनामलाःम्ले सेन्च्युदो’ लाःती वासी मेःबे, चीलेलाःना ङाः जाम्बुलीङला दी तुःक्पु खुर्काला ओःङ्क्योक इःङे। 28ए आबा, ख्याइ मीःनला महीमा काःल्ज्युक।” ओःले नाःम्खालीङलाःम्ले एःन्डुबा के ओःङ्सी, “ङाःइ मीःनला महीमा पेःदी एः, ओःले ओः महीमा ङाः फीर्च्या पेःगे।”
29ओःला लाःङ्दी तेःक्योक चीङ मीःक्याइ पोर्चोमगीइ दीखो कोःदी लाःसी, “दीखो चाःट्याङ इःङे!” इःनाङ राःङसाक्याइ लाःसी, “स्वर्गदुत खुङ ङीमु ताम लाःक्योक इःङ्स्वाँ!” 30येशुइ खुङक्याला लाःसी, “दी के ङाःइ लागी मीःङे, इःनाङ ख्याक्याइ लागी लाःक्योक इःङे। 31ताः दी जाम्बुलीङगीइ ठीम ओःङ्गुए। ताः दी जाम्बुलीङगीइ क्याःल्बुला तेङेन एः। 32ओःले ङाः साजाम्बुलीङलाःम्ले क्यामीःजीक थाम्जेर मीःक्याला राःङछ्योले ख्योङे।” 33खुङ काःन्डुले सीगेन्दी एःपा लाःती चुःन्डुल तेर्चेला खुङगीइ एःन्डु लाःती एःके।
34मीःइ पोर्चोमगीइ खुङला टीःसी, “उःइ ठीमगीइ थार्च्युगेन ख्रीष्ट नी तेन्दुरा सेन्दी तेःकेन एः लाःती एः। ओः सोङ्गारा, मीःइ पुःला क्याकोःउए लाःती ख्याइ काःन्डुले लाःचे खुउबा? ख्याइ लाःक्योक मीःइ पुःदी सु इःङे?” 35येशुइ खुङक्याला लाःसी, “ज्योती ताःरुङ चीङ बेरथुप ख्याक्याइ कील्ला तेःकेन एः। ज्योती ख्याक्या ङीमु एःकासुथुप राःङगीइ लाःमला सुङ मीःङे लाःना नाक्जुककीइ ख्याक्याला उप्केन एः। नाक्जुकला डोगेन्दीइ राःङ काःछ्योले डोदेरा एःपा लाःती मेःछोर एः। 36ख्याक्या ङीमु ज्योती एःकासुनारा ओःखोला सेमल्हुक लुदो ओःले ख्याक्या ज्योतीइ छार्क्युफुर्क्यु ओःङेन एः।”
एःजे लाःसीङमीःजीक येशु ओःलाःम्ले काःल्सी रा खुङक्यालाःम्ले इःप्ती तेःसी।
यहुदीक्याइ येशुला सेमल्हुक मालुक्योक
37येशुइ खुङक्याइ तोःङ्लारा ओःजेइ चुःन्डुलक्या तेङ्दी एःके, इःनाङ खुङक्याइ येशुखाला सेमल्हुक मालु। 38एःन्डुले कोन्ज्योइ लेःङ्गो तेर्केन यशैयाइ लाःक्योक दी ताम पुरा काःल्सी–
“प्रभु, ङीःइ लाःक्योक लेःङ्गोला सुइ सेमल्हुक लुबा?
ओःले सुला प्रभुइ ल्हे तेःङ्बा?”#यशैया ५३:१
39ओः सोङ्गारा, खुङक्याइ सेमल्हुक लुजे माःखु, चीलेलाःना यशैयाइ फीर्च्या एःन्डु लाःती एः–
40“कोन्ज्योइ खुङक्याइ मी कातेर्ती एः
ओःले खुङक्याइ सेम ताःम्बु ज्योतेर्ती एः,
ओः सोङ्गारा, खुङक्याइ मीइ माःथोङ्ज्युक,
ओःले खुङक्याइ सेमगीइ मासेज्युक,
मीःङे लाःना नी खुङक्या ङाःछ्योले लोःजेके ओःले ङाःइ खुङक्याला टाःच्युजेके।”#यशैया ६:१०
41यशैयाइ एःन्डु लाःसी, चीलेलाःना खुङगीइ येशुइ महीमा थोङ्सी ओःले खुङगीइ बारेला लाःसी।
42एःनाङ माःङ्बुरा यहुदी गोछेस्योक्याइ येशुखाला सेमल्हुक लुसी। इःनाङ फारीसीक्याइ जीबाइ पेःगासुना खुङक्याइ दी ताम सुलाङ माःलाःप चीलेलाःना राःङ्साइ छोर्क्योक एःना खुङक्याला यहुदीइ जोम्साखीमलाःम्ले तेङ्तेर्चेके। 43चीलेलाःना कोन्ज्योइ प्रशंसा भन्दा मीःइ प्रशंसा खुङक्याइ सेम थेकुके।
सेमल्हुक मीलुगेन्दी माःताक्पा ओःङ्गुए
44येशुइ छ्योम्बो केइ लाःसी, “ङाःला सेमल्हुक लुगेन्दीइ ङाःला चीग्रा मीःङे, इःनाङ ङाःला ताङेन्दीखाला सेमल्हुक लुउए। 45काःखोइ ङाःला थोङ्बा, ओःखोइ ङाःला ताङेन्दीला थोङेन एः। 46ङाःखाला सेमल्हुक लुगेन्दी सुङ नाक्जुकला माःतेःच्युक लाःती ङाः जाम्बुलीङला ज्योती च्योःङ्रा काःल्दी ओःङ्सी। 47सुइयाङ ङाःइ ताम कोःसी लाःना ओःले ओःखो माःङीःन लाःना, ङाः ओःखोइ ठीम मेःबे। चीलेलाःना ङाः जाम्बुलीङगीइ ठीम पेःजेला ओःङ्क्योक मीःङे, इःनाङ ङाः जाम्बुलीङला सेन्च्युजेला ओःङ्क्योक इःङे। 48ङाःइ लाःक्योक तामला ग्रहण मेःबेगेन्दी ओःले ङाःला इन्कार पेःगेन्दीइ लागी मेःन्दा चीग ठीम पेःगेन्दी एः। ङाःइ लाःक्योक तामगीइरा ओःखोला अन्त्यइ ङीःमाला माःताक्पा च्याःङेन एः। 49चीलेलाःना दी ताम ङाःइ राःङगीइ सेमलाःम्ले लाःक्योक मीःङे, इःनाङ ङाःइ ची लाःकोःन्दी ओःले काःन्डुले लाःकोःन्दी लाःती ङाःला ताःङेन आबाइरा ङाःला आज्ञा तेर्ती एः। 50खुङगीइ आज्ञाइ नाःमाङ मीसीगेन मीःली ज्योर्कुए लाःती ङाःइ छोर्ती एः। ओः सोङ्गारा, ङाःइ ची लाःपा, ओः ताम आबाइरा ङाःला लाःच्युक्योक इःङे।”
Currently Selected:
युहन्ना 12: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
