युहन्ना 21
21
येशु मेःन्दा तीःन योबाक्यासाःला थोङ्क्योक
1ओः तीङ्ला फीर्च्या येशु योबाक्यासाःला तीबेरीयास लाःकेन छोइ#२१:१ तीबेरीयास लाःकेन छोइ दी मीःनदी गालील छोइ राःङ्सा मीःन इःङे। सुःरला थोङ्सी। खुङगीइ राःङला एःन्डुले तेङ्सी। 2सीमोन पत्रुस, जाँउले लाःकेन थोमा, गालीलगीइ काना लाःकेन क्याःसाइ नथानेल, जब्दीयाइ पुः ङी ओःले येशुइ राःङ्सा मेःन्दा ङी योबाक्या जोम्दी एःके। 3सीमोन पत्रुसकीइ खुङक्याला लाःसी, “ङाः ङ्याः सेकाला डोदेरा एः।” खुङक्याइ पत्रुसला लाःसी, “ङीःङ ख्या ङीमु डोगे।” खुङक्या काःल्दी टुःला जासी, इःनाङ ओः कुःङ्मु खुङक्याइ ङ्याः चीगकाङ जुम्जे माःखु।
4नाःम लाःङ्जे छोल्दी एःके, येशु छोइ सुःरला लाःङ्दी तेःती एःके। इःनाङ योबाक्याइ खुङ येशुरा इःङे लाःती ङोःमासे। 5येशुइ खुङक्याला लाःसी, “ए रोःक्या, ख्याक्या ङीमु चीङ ङ्याः एःपा?” खुङक्याइ लाःसी, “म्याः।” 6येशुइ खुङक्याला लाःसी, “जाल तोःइ च्याःबुछ्योले क्योःप, ओःले ख्योक्याइ चीङ ङ्याःक्या ज्योर्केन एः।” ओःले खुङक्याइ जाल क्याःप्सी, ओःले माःङ्बुरा ङ्याःक्या पर्तीक्योक सोङ्गारा खुङक्याइ जाल टीःचे माःखु। 7येशुइ च्याःम्बु पेःगेन योबाइ पत्रुसला लाःसी, “खुङ नी प्रभु इःङेन दुबा!” “खुङ प्रभु इःङेन दुबा” लाःक्योक सीमोन पत्रुसकीइ कोःमीःजीक खुङगीइ राःङगीइ फीइ केःला केःङ्सी चीलेलाःना खुङगीइ ओःखो पीती एःके, ओःले खुङ चाङ्बुला फीर्सी। 8राःङ्सा योबाक्या टुःलारा तेःती ङ्याःइ काःङ्क्योक जाल टीःतेरा ओःङ्सी चीलेलाःना खुङक्या सालाःम्ले माःङ्बुरा थारीःङ्बु म्याःके इःनाङ ओःन्डुबारा क्याः चीग मीटरचे थारीःङ्बु एःके।
9खुङक्या चाङ्बुइ सुःर्ला पाःप्मीःजीक मेःखाला ङ्याःक्या ओःले खुराक्या थोङ्सी। 10येशुइ खुङक्याला लाःसी, “ख्याक्याइ ताःसे जुम्क्योक चीङ ङ्याः खेर्च्यो।” 11ओःले सीमोन पत्रुसकीइ टुःला जासी ओःले जाल साला टीःतेरा ख्योङ्सी। ओः जालला खाल तीःन रा च्युक्सुम थाल छ्योम्बो छ्योम्बो ङ्याःइ पर्तीदी एःके। इःनाङ ओःजे माःङ्बु ङ्याः पर्तीनाङ जाल माःराल। 12येशुइ खुङक्याला लाःसी, “स्यो ओःले जारा सोः।” योबाक्या नाःङ्ला सुइयाङ “ख्या सु इःङे?” लाःती टीःजेला आ क्याःप्चे माःखु, चीलेलाःना खुङक्याइ खुङ प्रभु इःङे लाःती ङोःसेसी। 13येशु ओःङ्सी ओःले खुरा लेःङ्दी खुङक्याला तेर्सी, ओःले ओःन्डुरा पेःदी ङ्याःङ तेर्सी।
14सीक्योकलाःम्ले सोम्बो लोःमीःजीक येशु योबाक्यासाःला थोङ्क्योक दीखो थाङ्मा सुमगीइ पाली एःके।
येशु रा पत्रुस
15खुङक्याइ साःसीःङ्मीजीक, येशुइ सीमोन पत्रुसला लाःसी, “युहन्नाइ पुः सीमोन, ची ख्याइ ङाःला दीखुङक्याइ भन्दा माःङ्बु च्याःम्बु पेःउबा?”
पत्रुसकीइ खुङला लाःसी, “इःङे प्रभु, ङाः ख्याला च्याःम्बु पेःउए लाःती ख्याइ सेउए।”
येशुइ खुङला लाःसी, “ङाःइ रीःउक्याला साःच्युदो।”#२१:१५ येशुइ दीला रीःउ लाःती खुङला सेमल्हुक लुगेन मीःक्याइ बारेला लाःक्योक इःङे।
16खुङगीइ फीर्च्या थाङ्मा ङीइ पाली लाःसी, “युहन्नाइ पुः सीमोन, ची ख्योइ ङाःला च्याःम्बु पेःउबा?”
पत्रुसकीइ खुङला लाःसी, “इःङे प्रभु, ङाः ख्याला च्याःम्बु पेःउए लाःती ख्याइ सेउए।”
येशुइ खुङला लाःसी, “ङाःइ लुःकक्याला याःबु पेःदी तादो।”
17खुङगीइ पत्रुसला थाङ्मा सुमगीइ पाली लाःसी, “युहन्नाइ पुः सीमोन, ची ख्योइ ङाःला च्याःम्बु पेःउबा?”
पत्रुस तुःङाःल काःल्सी चीलेलाःना येशुइ खुङला “ची ख्योइ ङाःला च्याःम्बु पेःउबा?” लाःती थाङ्मा सुम लाःसी। पत्रुसकीइ खुङला लाःसी, “प्रभु, ख्याइ थाम्जेर ताम सेउए। ङाः ख्याला च्याःम्बु पेःउए लाःती ख्याइ छोर्ती एः।” येशुइ खुङला लाःसी, “ङाःइ लुःकक्याला साःच्युदो। 18तेःन्दामरा ङाः ख्योला लाःके, ख्यो स्यारा एःकासुना ख्यो राःङगीइ केःला राःङगीइरा केःङ्गुके, ओःले राःङला काःला सेम थेपा ओःलारा डोउके। इःनाङ ख्यो काःपु काःल्मीःजीक, ख्योइ राःङगीइ लाःक्पा स्याङेन एः, ओःले राःङ्सा मीःक्याइ ख्योला केःला केङ्तेर्केन एः, ओःले ख्योला सेम मेःथेकेन ठाउँला खुङक्याइ खेर्केन एः।” 19(कोन्ज्योला महीमा पेःजेला पत्रुस काःन्डुले सीकोःन एःपा लाःकेन ताम येशुइ लाःतेरा एःके।) ओः तीङ्ला खुङगीइ पत्रुसला लाःसी, “ङाःला ब्य्राङ्दो।”
येशुइ च्याःम्बु पेःक्योक योबा
20पत्रुसकीइ तीङ्ला लोःदी तासुना येशुइ च्याःम्बु पेःक्योक योबाला खुङक्याइ तीङ तीङ्ला ओःङ्देरा पेःक्योक थोङ्सी। (दीखोइरा कुङ्मुइ डेनगीइ तीःजीला येशुइ प्य्राःङ्गोकला ज्यार्ती, “प्रभु, ख्याला जुम्दी तेर्केन्दी सु इःङे?” लाःती टीःदी एःके।) 21पत्रुसकीइ खुङला थोङ्मीःजीक खुङगीइ येशुला लाःसी, “प्रभु, दीखोलादी ची ओःङेन एःपा?” 22येशुइ पत्रुसला लाःसी, “ङाः माःयुङ्थुप खुङ सेन्दी तेःच्युक लाःती ङाःला सेम थेनाङ ख्योला ची काःल्बा? ख्यो ङाःला ब्य्राङ्दो।”
23ओः सोङ्गारा, ओः योबा मीसीए लाःकेन ताम राःङ्सा योबाक्याइ कील्ला फेल्सी। येशुइ खुङ मीसीए लाःती म्याःके, इःनाङ “ङाः माःयुङ्थुप खुङ सेन्दी तेःच्युक लाःती ङाःला सेम थेनाङ ख्योला ची काःल्बा?” लाःती एःके।
24दीखोरा योबाइ दी थाम्जेर तामक्या लाःतेरा एः, ओःले खुङगीइरा दी थाम्जेर प्रुःक्योक इःङे, ओःले खुङगीइ लाःक्योक थाम्जेर ताम तेःन्दाम इःङे लाःती ङीःइ सेउए।
अन्त्यला
25येशुइ राःङ्साङ माःङ्बुरा लेःगा पेःसी। ओः थाम्जेर लेःगाक्या रेः रेः पेःदी प्रुःगेन एःना, ङाःला एःन्डुबा नेकुए, खुङगीइ बारेला प्रुःक्योक पेज्याक्या जाम्बुलीङ काःङ्राङ मेस्योङ्जे एःके।
Currently Selected:
युहन्ना 21: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
