मत्ती 20
20
लेःमीक्याइ पेदाम
1येशुइ लाःतेरा काःल्सी, “नाःम्खालीङगीइ क्याःल्खाप एःन्डुबा इःङे, मेःन्दा चीग अङ्गुर सीःङगीइ तोःप्ता ङामुरा राःङगीइ सीःङला लेःमीक्याला ला तेर्ती लेःगा पेःच्युजेला पाङ्ला थेङ्सी। 2ओःले खुङगीइ ङीःमा चीगकीइ ला ङुलगीइ टाङ्गा चीग डेबा तेर्के लाःती चीङ लेःमीक्याला लेःगा पेःच्युसी। 3कुः बाजेक्या खुङ फीर्च्या छोङ्साला डोगासुना खुङगीइ चीङ मीःक्याला लेःगा म्याःकारा ओःजेबारा लाःङ्दी तेःक्योक थोङ्सी। 4खुङगीइ ओः मीःक्याला लाःसी, ‘ख्याक्याङ ङाःइ अङ्गुर सीःङला लेःगा पेःगाला सुङ, ङाः ख्याक्याइ ज्योर्कोःन ला तेर्के।’ 5ओःले खुङक्या लेःगाला काःल्सी। फीर्च्या खुङगीइ चीङ्ङी बाजेक्या ओःले सुम बजेक्याक्या ओःन्डुरा पेःदी राःङ्सा मीःक्यालाङ लेःगा पेःच्युसी। 6ङा बजेक्या खुङ छोङ्साला डोगासुङ खुङगीइ ताःरुङ चीङ मीःक्याला लेःगा म्याःपाइ ओःजेबारा लाःङ्दी तेःक्योक थोङ्सी। खुङगीइ ओः मीःक्याला टीःसी, ‘ख्याक्या दीला चीले ङीःमा काःङ ओःजेबारा लाःङ्दी तेःक्योक?’ 7खुङक्याइ लेःन लोदी लाःसी, ‘खोइ ङीःला सुइयाङ लेःगा पेःमाच्यु।’ ओःले खुङगीइ लाःसी, ‘ख्याक्याङ ङाःइ अङ्गुर सीःङला लेःगा पेःगाला सुङ ना ले।’
8ओःले कुःङ्मु छेमीःजीक ओः अङ्गुर सीःङगीइ ताःक्पुइ राःङगीइ लेःगा पेःगेनक्याइ नाइकेला लाःसी, ‘लेःमीक्याला केक्याःप्ती खुङक्याइ लेःगा पेःक्योककीइ ला तेर। ला थाम्जेर भन्दा तीङ्ला ओःङेन्दीलाःम्ले छुदी तोःङ्ला ओःङेनक्याला तेर।’ 9ओःले ङा बाजे लेःगाला स्युःगेनक्याला तोःङ्ला केक्याःप्ती थाम्जेरला ङुलगीइ टाङ्गा रेः रेः तेर्सी। 10ओः तेःकासु थाम्जेर भन्दा तोःङ्ला लेःगाला स्युःगेनक्याइदी माःङ्बुरा ज्योर्टो लाःती ठीवा चेसी। इःनाङ खुङक्याइयाङ ङुलगीइ टाङ्गा रेः रेः चीग्रा ज्योर्सी। 11खुङक्याइ राःङ राःङगीइ ला खेर्ती सीःङगीइ ताःक्पुसाःला काःल्दी ङेन ङेन पेःगाला स्युःसी। 12खुङक्याइ एःन्डु लाःकाला स्युःसी, ‘तादो, दी तीङ्ला ओःङेनक्याइ नी घण्टा चीग चीग्रा लेःगा पेःसी, ङीःइ नी ङीःमा काःङ चार्पु ङीःमाला लेःगा पेःसी। इःनाङ ख्याइ नी खुङक्यालाङ ङीःला चेरा ला तेर्सी।’ 13इःनाङ ताःक्पुइ खुङक्या नाःङ्ला मेःराङ चीगला लेःन लोदेरा लाःसी, ‘तादो रोः, ङाःइ ख्याक्याला अन्याय पेःदी म्याः। ख्याइ ङुलगीइ टाङ्गा चीगला ङीःमा काःङ लेःगा पेःगे लाःती ङीःन्क्योक मीःङे ले? 14ख्या राःङगीइ ज्योर्क्योक डेबा खेर्ती खीमला सुङ। दीला तीङ्ला लेःगाला ओःङेनदीलाःङ ख्याला चेरा तेर्के। 15ङाःइ डेबा ङाःला सेम थेक्योक मीःक्याला तेर्केन आङ्ज्या ङाः ङीमु म्याःपा ले? ङाःइ तेर्क्योक थोङ्दी ख्यो चीले मीफामु पेःगेन्दी?’”
16ओःले येशुइ लाःसी, “ओः सोङ्गारा, तीङ्ला एःकेनक्या तोःङ्ला ओःङेन एः ओःले तोःङ्ला एःकेनक्या तीङ्ला ओःङेन एः।”
येशुइ फीर्च्या राःङ सीगेन बारेला लाःक्योक
(मर्कुस १०:३२-३४; लुका १८:३१-३४)
17येशु यरुशलेमछ्योले डोदेरा एःकासुना, खुङगीइ राःङगीइ चीङ्ङीरा योबाक्याला छ्योचीगले केक्याःप्सी ओःले लाःसी, 18“तादो, उःक्या यरुशलेमला डोदेरा एः, ओःला ङाः मीःइ पुःला छेस्यो पुजाहारीक्या ओःले छ्येइ ठीमगीइ लोबेनक्याइ लाःक्पाला तेर्केन एः। खुङक्याइ ङाःला मृत्युदण्ड तेर्कोः लाःती माःताक्पा च्याःङेन एः। 19ओःले राःङ्सा क्युःपाइ मीःक्याइ लाःक्पाला तेर्केन एः। खुङक्याइ ङाःला ङ्याप्च्युक पेःगेन एः, कोर्रा क्याःप्केन एः ओःले क्रुसला प्याङ्दी सेकेन एः। इःनाङ ङीःमा सुम तीङ्ला ङाः सीक्योकलाःम्ले सोम्बो लोःगेन एः।”
आमा चीगकीइ वासी
(मर्कुस १०:३५-४५; लुका २२:२४-२७)
20ओः तीङ्ला जब्दीयाइ पेःमे राःङगीइ पुः ङीला ख्योङ्दी येशुसाःला ओःङ्सी। खुङ येशुइ तोःङ्ला पीमु चुसी ओःले वासी पेःसी। 21येशुइ खुङला टीःसी, “ख्योइ ची छोल्क्योक?” खुङगीइ लाःसी, “ख्या क्याःल्बु डोगासुना ङाःइ दी पुः ङीला चीगला ख्याइ च्याःबु लाःक्पाछ्योले, ओःले राःङ्सादीला ख्याइ योमा लाःक्पाछ्योले तेःचे तेर।” 22येशुइ लाःसी, “ख्योक्याइ ची लाङ्देरा एःपा, ओःखो ख्योक्याइ छोर्तीरा म्याः। ची ङाःइ थुङ्कोःन तुःक्पुइ मेःन्ज्यालाःम्ले ख्योक्याङ थुङ्खु?” खुङक्याइ लाःसी, “ङीः खुगे।” 23येशुइ खुङक्याला लाःसी, “ङाःइ थुङ्कोःन तुःक्पुइ मेःन्ज्यालाःम्ले ख्योक्याइयाङ थुङेन एः, इःनाङ ङाःइ च्याःबु ओःले ङाःइ योमा लाःक्पाछ्योले तेःचे तेर्केन आङ्ज्यादी ङाःइ लाःक्पाला म्याः। दी तेःसाक्या नी ङाःइ आबाइ सुइ लागी तयार जोदी एःपा, खुङगीइ ओःखोक्यालारा तेर्केन एः।”
24दीखो ताम कोःदी राःङ्सा मेःन्दा च्यु योबाक्यादी ओः मेःन्दा ङी आतानोः ङीमु सीःताङ पेःसी। 25इःनाङ येशुइ खुङक्या थाम्जेरला ठाउँ चीगला केक्याःप्ती लाःसी, “ख्योक्याइ छोर्तीरा एः, राःङ्सा क्युःपाइ क्याःल्बुक्याइ खुङक्याइ मीःक्याखाला राःङला सेम थेक्योक लेःगा पेःउए, ओःले छ्योम्बो मीःक्याइदी राःङ्सा मीःक्याखाला आङ्ज्या पेःउए। 26इःनाङ ख्योक्यादी एःन्डुबा ओःङ्जे मेःयुङे। ख्योक्या नाःङ्ला काःखोदी छ्योम्बो ओःङ्जे छोल्बा, ओःखोइ राःङ्सा थाम्जेरकीइ मेःबा पेःकोःउए। 27ओःले ख्योक्या नाःङ्ला काःखोदी थाम्जेर भन्दा तोःङ्ला ओःङ्जे छोल्बा, ओःखोदी थाम्जेरकीइ लाबु ओःङेन एः। 28ओःन्डुलेरा ङाः मीःइ पुःङ राःङ्सालाःम्ले मेःबा ज्योर्चेला मीःङे, इःनाङ राःङ्साला मेःबा पेःजेला ओःले माःङ्बुरा मीःक्याला थार्च्युजेइ लागी राःङगीइ मीःली तेर्चेला ओःङ्क्योक इःङे।”
येशुइ मेःराङ ङी स्याःर्नाकला टाःच्युक्योक
(मर्कुस १०:४६-५२; लुका १८:३५-४३)
29येशु ओःले खुङगीइ योबाक्या यरीहो क्याःसालाःम्ले डोदेरा एःकासुना, मीःइ छ्योम्बो पोर्चोम खुङक्याइ तीङ्ला ओःङ्सी। 30लाःमगीइ सुःरला मेःराङ ङी मी मेःथोङेन मीःक्या तेःती एःके। येशु ओः लाःमलेरा पेःदी डोदेरा पेःक्योक छोर्ती खुङक्याइ केताङ्देरा लाःसी, “प्रभु, दाऊदकीइ पुः, ङीखाला नीङ च्योःतेर!” 31मीःक्याइ ओःखोला खाजुम तेः लाःती केतेङ्सी। इःनाङ खुङगीइ ताःरुङ छ्योम्बो के तेङ्दी लाःसी, “प्रभु, दाऊदकी पुः, ङीःखाला नीङ च्योःदो!” 32येशु ठीङे लाःङ्दी खुङक्याला केक्याःप्सी ओःले टीःसी, “ख्योक्याइ लागी ङाः ची पेःतेर्का?” 33खुङक्याइ लाःसी, “प्रभु, ङीःला मी थोङ्खुगेन्दी जोतेर!” 34येशुइ सेमला खुङक्याइ लागी नीङ च्योःदी ओःङ्सी ओःले खुङक्याइ मीला देतेर्सी। ओः तेःकासुरा खुङक्या मी थोङ्खुगेन्दी काःल्सी, ओःले खुङक्याइ येशुला ब्य्राङ्दी काःल्सी।
Currently Selected:
मत्ती 20: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
