मत्ती 21
21
यरुशलेमला मीःक्याइ येशुला सेःसा पेःदी तोःङ्ज्याङ पेःक्योक
(मर्कुस ११:१-११; लुका १९:२८-४०; युहन्ना १२:१२-१९)
1येशु ओःले खुङगीइ योबाक्या यरुशलेमगीइ थामाला एःकासुना खुङक्या जैतुन काःङगीइ बेथफागे युःलला लेप्सी। ओःले येशुइ ङीथाल योबाक्याला एःन्डु लाःती तोःङ्लारा ताङ्सी, 2“ख्योक्याइ सुःरकीइ ओः फार्च्यो युःलला सुङ। ख्योक्या ओः युःलला स्युःगासुना ख्योक्याइ ओःला पुःङ्गु चीग ओःले ओःखोइ सुःरला ओःखोइ पीःब्रुला तादी ज्याक्योक फ्रेकेन एः। ओःखोक्याला ताङ्दी ङाःसाःला खेर्च्यो। 3सुइयाङ चीङ लाःसी लाःना खुङक्याला, ‘प्रभुला दीक्या कोःती एः’ लोःप ओःले खुङगीइ ओः तेःकासुरा ख्योक्याला ओःखोला खेर्चे तेर्केन एः।”
4कोन्ज्योइ लेःङ्गो तेर्केन्दीइ लाःक्योक ताम छाङ्ज्युक लाःती एःन्डुबा काःल्योक इःङे,
5“यरुशलेमगीइ मीःक्याला लाःतेर,
‘तादो, ख्योक्याइ क्याःल्बु ख्योक्यासाःला ओःङ्देरा एः,
खुङ याङ्छाबु काःल्दी पुःङ्गुखाला जादी ओःङ्देरा एः,
खुङ पुःङ्गुइ पीःब्रुखाला जादी ओःङ्देरा एः।’#जकरीया ९:९”
6ओः मेःन्दा ङी योबाक्या काःल्सी ओःले येशुइ लाःक्योक च्योःङ्रारा पेःसी। 7खुङक्याइ पुःङ्गु ओःले ओःखोइ पीःब्रु ख्योङ्सी, ओःले ओःक्याखाला राःङ राःङगीइ केःला तीङ्सी, ओःले येशु ओःखाला जासी। 8मीःक्याइ छ्योम्बो पोर्चोमगीइ राःङ-राङगीइ केःलाक्या लाःमला तीङ्तेर्ती खुङला तोःङ्ज्याङ पेःसी। काःजे मीःक्याइदी तोःङ्बोइ याःल्गाक्या तुप्ती ख्योङ्दी लाःमला तीङ्तेर्सी। 9येशुइ तोःङ रा तीङ्ला डोगेन थाम्जेर मीःक्याइ एःन्डु लाःतेर केताङ्गाला स्युःसी, “दाऊदकीइ पुःइदी प्रशंसा काःल्ज्युक! प्रभुइ मीःनला ओःङेन्दीइ काःजे मोलाम ज्योर्ती एः! थाम्जेर भन्दा चोवाला नाःम्खालीङला तेःकेन आबा कोन्ज्योइदी प्रशंसा काःल्ज्युक!”#भजन ११८:२५-२६
10येशु यरुशलेम क्याःसाला स्युःगासुना क्याःसा काःङ्रा हल्ला काःल्सी, ओःले मीःक्याइ टीःगाला स्युःसी, “दीखो सु इःङे?” 11मीःक्याइ पोर्चोमगीइ लेःन लोदी लाःसी, “दीखो गालीलगीइ नासरतकीइ कोन्ज्योइ लेःङ्गो तेर्केन्दी येशु इःङे।”
येशु कोन्ज्योइ मन्दीरला काःल्क्योक
(मर्कुस ११:१५-१९; लुका १९:४५-४८; युहन्ना २:१३-२२)
12येशु कोन्ज्योइ मन्दीरकीइ इल्दोकला काःल्सी ओःले खुङगीइ मन्दीरला छोङ पेःगेनक्याला ओःलाःम्ले त्याःगाला स्युःसी। खुङगीइ डेबा चेःगेन मीःक्याइ#२१:१२ डेबा चेःगेन मीःक्याइ ओः तेःकासु, कोन्ज्योइ खीमला बली तेर्चेला ओःङेन मीःक्याइ डेबा कोन्ज्योइ खीमला चलाइतीगेन डेबा ङीमु चेःउके, चीलेलाःना ओःखो डेबाइ चीग्रा बली तेर्केन पशुक्या ङ्योःजे ज्योर्कुके। च्योर्तेनक्या रील्तेर्सी ओःले पुःर्कालीङ चोङेनक्याइ तेःसाक्या रोम्तेर्सी। 13येशुइ खुङक्याला लाःसी, “छ्येइ पेज्याला एःन्डुबा प्रुःदी एः, ‘ङाःइ मन्दीर रेःम्साइ खीम ओःङेन एः।’#यशैया ५६:७ इःनाङ ख्योक्याइ नी दीखोला च्याःक्पाक्या इःप्केन ठाउँ जोदी एः।”#यर्मीया ७:११
14ओः तीङ्ला मी मेःथेङनक्या ओःले स्याःल्ठाकक्या मन्दीरला येशुसाःला ओःङ्सी ओःले येशुइ खुङक्याला टाःच्युसी। 15इःनाङ छेस्यो पुजाहारीक्या ओःले छ्येइ ठीमगीइ लोबेनक्या खुङगीइ पेःक्योक दी याःमाछाककीइ लेःगाक्या थोङ्दी ओःले पीःजाक्याइ मन्दीरकीइ इल्कोकला केताङ्देरा “दाऊदकीइ पुःइदी प्रशंसा काःल्ज्युक!” लाःक्योक कोःदी खुङक्या सीःताङ पेःसी। 16ओः सोङ्गारा, खुङक्याइ येशुला लाःसी, “दीखुङक्याइ ची लाःतेरा एःपा, ची ख्योइ कोःदेरा एःपा?” ओःले येशुइ खुङक्याला लाःसी, “इःङे, कोःदेरा एः। ची ख्याक्याइ छ्येइ पेज्याला टोःदी म्याःपा, ‘पीःजाक्या ओःले ङ्याल्दुङ पीःजाक्याला ख्याइ प्रशंसा पेःच्युउए’#भजन ८:२?” 17ओःले येशुइ क्याःसाला पोःर्ती काःल्सी ओःले बेथानीया युःलला काःल्सी ओःले ओः कुङ्मु ओःलारा तेःसी।
ब्रुम्दो म्याःक्योक नेभाराइ तोःङ्बो
(मर्कुस ११:१२-१४,२०-२४)
18ङार्तो च्योःङ्रा ङामुरा खुङक्या यरुशलेम लोःदी डोदेरा एःकासुना येशुला तोःपा तोसी। 19खुङगीइ लाःमगीइ सुःर्ला नेभाराइ तोःङ्बो चीग थोङ्दी ब्रुम्दो दुबा की लाःती खुङ तागाला काःल्सी, इःनाङ ओःखो तोःङ्बोला लाःप्ती बाहेक राःङ्सा चीङ माःज्योर। ओःले खुङगीइ ओःखो तोःङ्बोला लाःसी, “ताःमीःजीक ख्योला नाःमाङ ब्रुम्दो माःकोङ्ज्यु!” ओः नेभाराइ तोःङ्बो नी ओः तेःकासुरा काम्सी।
20दीखो थोङ्दी योबाक्याइ याःमाछाक नेतेरा लाःसी, “दी नेभाराइ तोःङ्बो काःन्डुले एःजे गेबु काम्दुबा?” 21येशुइ लेःन लोदी खुङक्याला लाःसी, “तेःन्दामरा ङाः ख्योक्याला लाःके, ख्योक्याइ पाःकेन माःबेबा पेःदी सेमल्हुक लुसी लाःना नेभाराइ तोःङ्बोला ङाःइ पेःक्योक च्योःङ्रा पेःजे खुउए, ओःले एःजे चीग्रा मीःङे, इःनाङ ख्योक्याइ दी काःङ्ला ‘दीलाःम्ले लाःङ्दी चाङ्बुला ताःप्तो’ लाःसी लाःनाङ ओःन्डुबारा ओःङेन एः। 22ख्योक्याइ सेमल्हुक लुसी लाःना, ख्योक्याइ प्रार्थना पेःदी ची लाङ्बा ओःखोरा ज्योर्केन एः।”
येशुइ आङ्ज्याइ बारेला टीःक्योक
(मर्कुस ११:२७-३३; लुका २०:१-८)
23येशु कोन्ज्योइ मन्दीरला लोःदी ओःङ्सी, ओःले खुङगीइ लोप्काला स्युःगासुना छेस्यो पुजाहारीक्या ओःले छेस्यो मीःक्या खुङसाःला ओःङ्सी ओःले टीःसी, “ख्योइ काःलाःम्ले आङ्ज्या ज्योर्ती दी लेःगा पेःदेरा एःपा, दी आङ्ज्या ख्योला सुइ तेर्पा?” 24येशुइ खुङक्याला लेःन लोदी लाःसी, “ङाःङ ख्याक्याला ताम चीग टीःगे। ङाःला ओःखोइ लेःन तेर्सी लाःना, ङाःइ काःलाःम्ले आङ्ज्या ज्योर्ती दी लेःगा पेःदेरा एःपा, ओःखो ख्याक्याला लाःके। 25युहन्नाइ बप्तीस्मा तेर्केन आङ्ज्या काःलाःम्ले ज्योर्पा? कोन्ज्योलाःम्ले की मीःलाःम्ले?” खुङक्या नाःङ्लारा एःन्डुले ताम लाःकाला स्युःसी, “ताः उः ची लाःका ले? कोन्ज्योलाःम्ले लाःका लाःना ‘ख्याक्याइ चीले युहन्नाला सेमल्हुक मालुक्योक ले?’ लाःती खुङगीइ टीःउए। 26ओःले मीःलाःम्ले लाःका लाःना, ङीःला मीःक्याइ सेके की लाःती जीबा एः चीलेलाःना खुङक्याइ युहन्ना कोन्ज्योइ लेःङ्गो तेर्केन्दी मीः एःके लाःती सेमल्हुक लुउए।”
27ओः सोङ्गारा, खुङक्याइ येशुला लाःसी, “ङीः मेसेए।” ओःले येशुइ लाःसी, “ओःन्डु एःना ङाःइ काःलाःम्ले आङ्ज्या ज्योर्तीमारा दी थाम्जेर लेःगा पेःदेरा एःपा, ङाःङ ख्याक्याला मेःलाःप।”
पुः ङीक्याइ पेदाम
28येशुइ लाःसी, “ख्योक्या ची ठीवा चेकुबा? मेःराङ चीग मीःइदी पुः ङी एःके। खुङ छेस्यो पुःसाःला काःल्दी लाःसी, ‘ए पुः, तीःरीङ ख्यो अङ्गुर सीःङ्ला काःल्दी लेःगा पेःदो।’ 29ओःखोइ लाःसी, ‘ङाः नी मेःन्डो।’ इःनाङ तीङ्ला खोइ सेम लोःसी ओःले लेःगा पेःगाला काःल्सी। 30ओःले आबा छीङ्स्यो पुःसाःला काःल्दी ओःन्डुरा लाःसी। ओःखोइ लेःन लोदी लाःसी, ‘ङाः डोगे’ इःनाङ खुङ माःकाल। 31ताः दी पुः ङीला काँःदीइदी आबाइ आज्ञा ङीःन्बा?” खुङक्याइ लेःन लोदी लाःसी, “छेस्योदीइ।” येशुइ खुङक्याला लाःसी, “तेःन्दामरा ङाः ख्याक्याला लाःके, च्याल्गो तुःगेन्दी रा क्याःलाम लेःगा पेःगेनक्या ख्याक्या भन्दा तोःङ्ला कोन्ज्योइ क्याःल्खापला स्युःगेन एः। 32चीलेलाःना बप्तीस्मा तेर्केन युहन्ना तेःन्दामगीइ लाःम तेङ्जेला ख्याक्यासाःला ओःङ्सी, इःनाङ ख्याक्याइ खुङला सेमल्हुक मालु, इःनाङ च्याल्गो तुःगेन्दी ओःले क्याःलाम लेःगा पेःगेनक्याइदी खुङला सेमल्हुक लुसी। दी तामक्या थोङ्दीङ ख्याक्याइ स्याबा पेःदी लाःयो माःपोःर ओःले खुङला सेमल्हुक मालु।”
माःताक्पा कीसानक्याइ पेदाम
(मर्कुस १२:१-१२; लुका २०:९-१९)
33येशुइ लाःसी, “राःङ्सा पेदाम कोःदो। तीःनाम चीगला मेःराङ चीग सीःङगीइ ताःक्पु एःके। खुङगीइ ओः सीःङला अङ्गुर चुसी, ओःले ओःखोइ छुरफारले वाःरा क्याःप्सी। ओःले ओःला खुङगीइ अङ्गुर चीर्केन ओःप चीग कोसी, ओःले पालीप चीग जोसी। खुङगीइ ओः सीःङ कीसानक्याला पीमाला तेर्सी, ओःले राःङ्सा देशला कोर्काला काःल्सी। 34अङ्गुर छेमीःजीक खुङगीइ मेःन्दा चीग लाबुला राःङगीइ बो लेःङ्गाला ओः कीसानक्यासाःला ताङ्सी। 35इःनाङ ओः कीसानक्याइ ओः लाबुक्याला जुम्सी, मेःन्दा चीगला रोप्सी, राःङ्सादीला तोः क्याःप्सी ओःले राःङ्सादीला सेतेर्सी। 36फीर्च्या ओः सीःङगीइ ताःक्पुइ तोःङ्ला भन्दा माःङ्बुरा लाबुक्याला कीसानसाःला ताङ्सी। इःनाङ खुङक्यालाङ कीसानक्याइ तोःङ्गीइ लाबुक्याला च्योःङ्रारा पेःसी।
37थाम्जेर भन्दा तीङ्लादी खुङगीइ राःङगीइ पुःलारा एःन्डुबा ठीवा साल्दी ताङ्सी, ‘ङाःइ पुःला नी खुङक्याइ तेःन्दामरा सेःसा पेःडो।’ 38इःनाङ ओः कीसानक्याइ खुङला थोङ्दी खुङक्या एःन्डु लाःकाला स्युःसी, ‘दीखो नी सीःङगीइ तोःप्ताइ पुः इःङे। उः दीखोला सेका ओःले दीखोइ नोःर स्याःक्या उःइदीरा ओःङेन एः।’ 39ओःले खुङक्याइ ओः तोःप्ताइ पुःला अङ्गुर सीःङगीइ फीला टीःती खेर्सी ओःले सेसी।”
40येशुइ टीःसी, “ताः ओः अङ्गुर सीःङगीइ तोःप्ता ओःङ्गासुना खुङगीइ खुङक्याला ची पेःडो ले?” 41खुङक्याइ लाःसी, “खुङगीइ ओः माःताक्पा कीसानक्याला सेकेन एः ओःले राःङगीइ ज्योर्केन बो डीक्पु तीःजीला तेर्केन राःङ्सा कीसानक्याला ओः सीःङ पीमा तेर्केन एः।” 42ओःले येशुइ खुङक्याला लाःसी, “ची ख्याक्याइ छ्येइ पेज्याला प्रुःक्योक तामक्या नाःमाङ टोःदी म्याःपा?
‘खीम जोगेन्दीइ लेःगा म्याः लाःती क्युर्क्योक तोःरा
ओःखो तोःरा खीमगीइ चारकीइ मुल तोः काःल्सी।
दीखो प्रभुलाःम्ले काःल्क्योक इःङे,
ओःले उःइ तोःङ्ला दीखो याःमाछाककीइ ताम इःङे।’#भजन ११८:२२-२३
43ओः सोङ्गारा, ङाः ख्याक्याला लाःके, कोन्ज्योइ क्याःल्खाप ख्योक्यालाःम्ले फ्रोगेन एः ओःले याःबु ब्रुम्दो कोःङ्च्युगेन देशला तेर्केन एः। 44ओः तोःखाला ताःप्केन्दी थाम्जेर केःती सीगेन एः, ओःले काःखो मीःखाला ओः तोः ताःक्पा, ओःखोइ ओः मीःला चाम्बा जोगेन एः।”
45येशुइ लाःक्योक दी पेदामक्या छेस्यो पुजाहारीक्या ओःले फारीसीक्याइ कोःसी ओःले दी तामक्या खुङक्याला लाःक्योक इःङे लाःती छोर्सी। 46ओः सोङ्गारा, खुङक्याइ येशुला जुम्जे छोल्सी, इःनाङ खुङक्या मीःक्या थोङ्दी जीबा पेःसी चीलेलाःना मीःक्याइ येशुला कोन्ज्योइ लेःङ्गो तेर्केन मीः इःङे लाःती ठीवा साल्गुके।
Currently Selected:
मत्ती 21: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
