मत्ती 22
22
याःर्का क्याःप्साइ डेनगीइ पेदाम
(लुका १४:१५-२४)
1येशुइ फीर्च्या यहुदीक्याइ गोछेस्योक्याला पेदामलाःम्ले एःन्डु लाःसी, 2“नाःम्खालीङगीइ क्याःल्खाप नी मेःराङ चीग क्याःल्बु ङीमु कार्का, ओःखोइ राःङगीइ पुःइ याःर्काइ डेन जोसी। 3ओः क्याःल्बुइ डोम्बोक्या केक्याःप्काला राःङगीइ लाबुक्या ताङ्सी, इःनाङ खुङक्या ओःङ्जे माःङीन। 4ओः सोङ्गारा, खुङगीइ राःङ्सा लाबुक्याला एःन्डु लाःती ताङ्सी, ‘डोम्बोक्याला एःन्डु लोःप, ङाःइ डेन तयार जोदी एः, ङाःइ लाङक्या ओःले क्याःबा क्याःबा पशुक्या सेती एः, ओःले थाम्जेर स्याःक्या तयार जोदी एः। याःर्काइ डेनला स्यो।’ 5इःनाङ खुङक्याइ ङीःन्थेरा माःबेबा पेःदी मेःराङ चीग राःङगीइ सीःङछ्योले, राःङ्सादी राःङगीइ छोङ पेःसाले फार काःल्सी। 6राःङ्सा लीःक्योकक्याइदी क्याःल्बुइ लाबुक्याला जुम्दी रोप्सी ओःले खुङक्याला सेतेर्सी। 7ओः क्याःल्बु सीःताङगीइ मेःरा काःल्सी ओःले खुङगीइ राःङगीइ माकमीःक्या ताङ्दी ओः मीःक्सेरक्याला सेच्युसी ओःले खुङक्याइ क्याःसाला मेः ताङ्तेर्सी।
8ओःले खुङगीइ राःङगीइ लाबुक्याला लाःसी, ‘याःर्काइ डेन तयार एः, इःनाङ केक्याःप्क्योक डोम्बोक्या साःजेला डीक्पु मीःन्दु। 9ओः सोङ्गारा, ख्याक्या क्याःसाइ लाःमक्याला सुङ, ओःले काःजेला फ्रेपा खुङक्याला याःर्काइ डेन साःजेला केक्योःप।’ 10ओःले लाबुक्या क्याःसाइ लाःमक्याला काःल्सी ओःले फ्रेक्योक जती याःबु माःइबा थाम्जेर मीःक्याला केक्याप्ती ख्योङ्सी। एःन्डुले याःर्काइ खीम डोम्बोइ काःङ्सी।
11ओःले क्याःल्बुइ डोम्बोक्याला ताजे लाःती नाःङ्ला ओःङ्सी, ओःले मेःराङ चीगकीइ याःर्काला केःङ्कोःन केःला माःकेःङ्बा ओःङ्क्योक मीःला थोङ्सी। 12क्याःल्बुइ खुङला टीःसी, ‘ए रोः, ख्या याःर्काइ केःला माःकेङ्बा काःन्डुले नाःङ्ला स्युःबा?’ इःनाङ ओः मीःइ चीङ लेःन तेर्चे माःखु। 13ओःले क्याःल्बुइ लाबुक्याला लाःसी, ‘दीखोइ लाःक्पा काङ्बा ताःम्दी खोला फीला नाक्जुकला क्युर्तेर। ओःला खुङ ङुःगेन एः ओःले सो मुःर्केन एः।’”
14येशुइ ताम सीःङ्देरा एःन्डु लाःसी, “माःङ्बुरा मीःक्याला केःक्याःप्सी, इःनाङ दाम्क्योकक्यादी तीबी चीग्रा एः।”
च्याल्गो च्याल्गेन बारेला टीःक्योक
(मर्कुस १२:१३-१७; लुका २०:२०-२६)
15फारीसीक्या काःल्सी ओःले येशुला काँःदी तामला फसाइतीगा लाःती तेःदाम पेःसी। 16खुङक्याइ राःङगीइ चीङ योबाक्याला हेरोद क्याःल्बुइ मीःक्या ङीमुरा येशुसाःला ताङ्सी। खुङक्या काःल्दी येशुला टीःसी, “ए लोबेन, ख्याइ तेःन्दामगीइ ताम लाःकुए लाःती ङीःइ छोर्ती एः। ख्याला मीःक्याइ ची लाःटो लाःती ङीःन्थेरा माःबेबा ख्याइ कोन्ज्योइ तेःन्दामगीइ लाःम लोप्कुए। ख्याइ नी सुइदीङ खा तादी ताम मेःलाःप एः। 17ताः ङीःला लोःप, उःइ छ्येइ ठीम अनुसार रोमी क्याःल्बु कैसरला उःइ च्याल्गो च्याल्जे डीक्पु एःपा?” 18इःनाङ येशुइ खुङक्याइ माःताक्पा ठीवा छोर्सी ओःले खुङक्याला लाःसी, “ए खोक्नाकक्या, ख्योक्या ङाःला चीले फासाइतीजे छोल्गुबा? 19खोइ च्याल्गो च्याल्गेन्दी टाङ्गा डेबा ङाःला तेङ्दो।” खुङक्याइ येशुला ङुलगीइ टाङ्गा डेबा ख्योङ्दी तेङ्तेर्सी। 20ओःले येशुइ खुङक्याला टीःसी, “दी छेन्दा ओःले मीःन सुइदी इःङे?” 21खुङक्याइ लाःसी, “कैसरकीइदी।” ओःले येशुइ खुङक्याला लाःसी, “ओः सोङ्गारा, ची कैसरकीइदी इःङे, ओःखो कैसरलारा तेर, ओःले ची कोन्ज्योइदी इःङे ओःखो कोन्ज्योलारा तेर।” 22येशुइ ताम कोःदी खुङक्या याःमाछाक नेसी ओःले खुङला पोःर्ती राःङ राःङगीइ लाःम काःल्सी।
सीक्योकलाःम्ले सोम्बो लोःगेन बारेला टीःक्योक
(मर्कुस १२:१८-२७; लुका २०:२७-४०)
23ओः ङीःमालारा चीङ सदुकीक्या येशुसाःला ओःङ्सी। खुङक्याइदी मीःक्या सीमीःजीक फीर्च्या सोम्बो मेःयोङ्ए लाःकुके। ओःले खुङक्याइ येशुला टीःसी, 24“ए लोबेन, मोशाइ उःला प्रुःतेर्क्योक ठीम च्योःङ्राले सुइदीङ आता पुःपोःमोरा माःकाःल्बा सीसी लाःना, आताइ लागी पुःपोःमो काःल्ज्युक लाःती नोःइ नामाला याःर्का क्याःप्कोःउए।#व्यवस्था २५:५ 25ताः मेःन्दा तीःन आतानोःक्या एःके। छेस्योइ याःर्का क्याःप्सी ओःले खुङ पीःजा माकेबारा सीसी। ओः सोङ्गारा, पाःर्पा नोःइ नामाला याःर्का क्याःप्सी। 26ओःले खुङाङ पीःजारा माकेबा सीसी। ओःले पाःर्केबा नोःइ नामाला याःर्का क्याःप्सी। पाःर्केबा नोःलाङ ओःन्डुबारा काःल्सी ओःले ओःन्डुरा पेःदी ओः पीन तीःनगीइ ओः नामाला याःर्का क्याःप्सी ओःलेङ पीःजारा माकेबा सीसी। 27तीङ्ला ओः पेःन्पीःजाङ सीसी। 28ओः सोङ्गारा, मीःक्या सीक्योकलाःम्ले सेन्गासुना ओः पेःन्पीःजा सुइ पेःमे ओःङ्गुबा? खुङला नी मेःन्दा तीःनगीइरा याःर्का क्याःप्ती एःके।”
29येशुइ खुङक्याला लेःन लोदी लाःसी, “ख्याक्याइ लाःक्योक थाम्जेर डीक्पु म्याः, चीलेलाःना ख्याक्याइ नाः छ्येइ पेज्याइ बारेला सेदी एःपा नाः कोन्ज्योइ ल्हेइ बारेला सेदी एःपा। 30चीलेलाःना सीक्योकलाःम्ले सेन्गासुना मीःक्याइ याःर्का मेःक्याःपए, इःनाङ खुङक्या नी नाःम्खालीङला तेःकेन स्वर्गदुतक्या च्योःङ्रा ओःङ्गुए। 31इःनाङ सीक्योकक्या सेन्गुए लाःकेन तामगीइ बारेला कोन्ज्योइ ख्योक्याला ची लाःती एःपा, ओःखो ख्याक्याइ टोःदी म्याःपा? 32कोन्ज्योइ एःन्डु लाःती एः, ‘ङाः अब्राहामगीइ कोन्ज्यो, इसहाककीइ कोन्ज्यो ओःले याकुबकीइ कोन्ज्यो इःङे।’ खुङ नी सीक्योकक्याइ कोन्ज्यो मीःङे#२२:३२ सीक्योकक्याइ कोन्ज्यो मीःङे दीखो लाःक्योकदी कोन्ज्यो सीक्योक मीःक्याइ कोन्ज्यो इःङ्रा मीःङे लाःक्योक मीःङे। दीखो लाःक्योकदी थाम्जेर मीःक्या खुङगीइ लागी सेन्गुए लाःक्योक इःङे।, इःनाङ सोम्बोक्याइ कोन्ज्यो इःङे।” 33एःन्डुले खुङगीइ लोप्क्योक थोङ्दी थाम्जेर मीःक्या याःमाछाक नेसी।
थाम्जेर भन्दा छ्योम्बो आज्ञा
(मर्कुस १२:२८-३४; लुका १०:२५-२८)
34येशुइ सदुकीक्याला खाजुम तेःच्युसी लाःक्योक ताम कोःदी फारीसीक्या खुङसाःला ओःङ्सी। 35खुङक्या नाःङ्ले मेःराङ चीग छ्येइ ठीमगीइ लोबेनगीइ येशुला फासाइतीगेन ठीवाइ टीःसी, 36“ए लोबेन, छ्येइ ठीमला प्रुःक्योक थाम्जेर भन्दा छ्योम्बो आज्ञादी काःखो इःङे?” 37येशुइ खुङला लाःसी, “‘ख्योइ प्रभु राःङगीइ कोन्ज्योला राःङगीइ थाम्जेर सेमगीइ, थाम्जेर मीःलीइ ओःले थाम्जेर नावाइ च्याःम्बु पेःदो।’#व्यवस्था ६:५ 38थाम्जेर भन्दा तोःङगीइदी ओःले छ्योम्बो आज्ञादी दीखोरा इःङे। 39ओःले राःङ्सा छ्योम्बो आज्ञादी दीखोरा इःङे, ‘राःङगीइ टोःङ्रीला राःङला च्योःङ्रारा च्याःम्बु पेःदो।’#लेबी १९:१८ 40मोशाइ थाम्जेर छ्येइ ठीम ओःले कोन्ज्योइ लेःङ्गो तेर्केनक्याइ लोप्क्योक तामक्या दी ङीथाल आज्ञाक्यालाःम्ले ओःङ्क्योक इःङे।”
थार्च्युगेन ख्रीष्ट सुइ पुः इःङे?
(मर्कुस १२:३५-३७; लुका २०:४१-४४)
41ओःले ओःला जोम्क्योक फारीसीक्याला येशुइ टीःसी, 42“थार्च्युगेन ख्रीष्टकीइ बारेला ख्याक्या ची ठीवा चेकुबा ले? खुङ सुइ छार्क्युफुर्क्यु इःङे?” खुङक्याइ येशुला लाःसी, “खुङ नी दाऊदकीइ छार्क्युफुर्क्यु इःङे।” 43येशुइ खुङक्याला लाःसी, “ओःन्डु इःङे लाःना चीले दाऊदला कोन्ज्योइ लालाःम्ले खुङला ‘प्रभु’ लाःच्युबाले? चीलेलाःना दाऊद राःङगीइरा एःन्डु लाःती एः,
44प्रभुइ ङाःइ प्रभुला लाःसी,
‘ङाःइ ख्योइ टाःलाङक्याला ख्याइ स्याःप्टा वाःला मानेमथुप
ख्यो ङाःइ च्याःबु लाःक्पाछ्योले तेः।’#भजन ११०:१
45एःन्डुले दाऊद राःङगीइरा थार्च्युगेन ख्रीष्टला ‘प्रभु’ लाःमीःजीक काःन्डुले ख्रीष्टला दाऊदकीइ छार्क्युफुर्क्यु लाःकेन्दी?” 46ओःले सुइयाङ चीङ लेःन लोजे माःखु। ओः ङीःमुमीःजीक सुइयाङ खुङला राःङ्सा चीङ ताम टीःजेला आ क्याःप्चे माःखु।
Currently Selected:
मत्ती 22: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
