মার্ক 4
4
তয়ক লুঃউক চাঃসা ওয়েথুঃউ
(মথি ১৩:১-৯; লূক ৮:৪-৮)
1যীশু প্রেংরো গালীল ম্রঃনাদুঃ লাঃখারি, লুঃউরোগু সুয়েংসাং পিইফু কিজু। যীশু লিফাক লাকচি লুঃউম্যা চুককেলিরি; য়াংচা কিজু যীশুচা ম্রঃমা লং তাজাংমা তাকরো থৈংলিরি অর লুঃউরো ম্রঃনামা রেঃরো হিইগেলিরি।
2যীশুচা ওয়েথুউ নিঃগো য়ুউরো যেঃ যেঃ আক্রংলিলাগো সুয়েংসাং পিইলিরি। প্রচা আথিমা যীশু প্রলিরিচাগা, 3“নাথং, লুঃউকরো চাসা তয়ক আচিই প্যুউফু লাঃখারি। 4আচিই পুওয়িরি আখিংখা, লৈংগিচিইচা লেংনামা ক্যালিরি, অর ঙাহাকরোচা লাঃরো, য়াংচাগো চাঃআবলৈতি। 5অর লৈগিচিচা ক্যকচরঃ আঃরামা ক্যালিরি। য়াংদেমা ক্যুওক আম্যা মিহিলি। ক্যুওক আম্যা আনাক মিহি কিজু, আয়াং আপাংশ্যি পক তাকরি। 6নিং থুওয়কপ্রিই নক য়াংচারোচা সিই লাঃখারি অর আম্রঃ আহ্লাপা মথুঃউনৈং কিজু খ্রক লাঃখারি। 7অর লৈংগিজি আচিচা চুংখ্রুংমা ক্যালিরি। চুইবাংচা ক্রিঃ তাকরো, সারারোগু ফুং থাঃলিরি, য়জংকিজু আসিই মিসিনৈংলি। 8য়িগিলি লৈগিজিচা আকং ক্যুউমা ক্যালিরি অর আঞ্যং থুঃওয়করো আগ্রি ফ্রইরো তাকলিরি অর আসিই পিইলিরি; তাবাংতিরি আপ্রেইং সুংছিঃ, তাবাংতিরি আপ্রেইং খ্রকছি, অর তাবাংতিরি আপ্রেইং তাঃরা আসিই সিইলিরি।”
9আছুংমা যীশু প্রলিরি, “যাসুউমা নাথংফু নাআ হিকরিলি, য়াংসুউ নাথংবেচি।”
ওয়েথুঃউ প্ররি আক্রং
(মথি ১৩:১০-১৭; লূক ৮:৯,১০)
10লুঃউ আচুকচা লাঃব্রিনক যীশু লিফাকলাকচি লুঃউরোনা যীশু তিছিহ্নয়ক তিবিরো থুউ ওয়েথুঃ আক্রংলিলাগো যুরো মিংগেলিরি। 11যীশু য়াংসুউরোগু প্রলিইরি, “থাওরা ফুরা ঈ ফুংরো থাঃচা আম্হেং নেংঙেংদগো আসিক পিইরি, য়িগিলি আখ্রা লুঃউরোগু ওয়েথুঃনা আলুং চাঃগাগো প্রপ্রালিরি।, 12যাফুলিছুগি সেংস্যাংস কেইং চাঃগা আলৈই, ‘য়াংসুউরো ক্রিগিলি মাম্রাং মুহুক অর ক্রাগিলি নাঃমিলি মুহুক। য়াংচা মুহুককি য়াংসুউরো থাওরা ফুরাগো চিই খ্যারো রুসিইমি অর খুওয়ং রাঃমি।’”
লুঃউকরো চাআসা ওয়েথুউ আদিপি
(মথি ১৩:১৮-২৩; লূক ৮:১১-১৮)
13য়াংনক যীশু য়াংসুউরোগু প্রলিইরি, “নাংরো দিঃ ওয়েথুউ আদিপিগো নাঃমিলিগেলি? য়জংছুগি যাপুয়েং প্যাংরো আখ্রা ওয়েথুঃউরোগু নাঃলিগেফুলি? 14লুঃউকচাসা যা আঃচি প্যুউলিরি, য়াংচা ফ্রইতি থাওরা ফুরা ঈ চাঃগা। 15লেংনামা ক্যাচা আঃচিইকো য়ুউরো প্রচাগা, যাসুরো য়াং চাঃগাগো নাথংরি, য়িগিলি রেংসুচা খ্যাং খ্যাং লাঃরো য়াংসুউরো চিই নুনুংমা তাঃরা ওয়ংলিরি, য়াংচাগো য়ুউ লাঃখারি। 16ক্যকচরঃ লিঃমা ক্যাচা আচিইনা প্রফু ক্রিচাগা, যাসুরো তাঃরা নাথংরি অর খ্যাং খ্যাং চিই সায়ালো তাঃরাগো লাক খেংরি।, 17ছুগি য়াংসুউরোমা আম্রঃচা অাহ্লাপা প্যাংরো ক্যুইমা থুউফু মাঃরালি কিজু লৈংগারাকরা হ্রাং হিকলিইরিব্যা। নক্কা তাঃরা কিজু যাখা দুঃখাওয়ানা আঞ্যচি খেংরারি খ্যাং খ্যাং য়াংসুউরো নকতো ছুওক লাঃখারি। 18অর চুংখ্রুংমা ক্যাচা আচিইকো য়ুউরো প্রফু ক্রিচাগা যাসুরো তাঃরা নাথংরি, 19ছুগি ইংথংগো চেংজা-ছাংখ্রাংরি, ওয়াচা-পঃচিগো লঃফা তেতি অর যে যে লঃফা চিই লাঃরো তাঃরাগো ফুংরো থাঃরি; 20য়াংচা কিজু, য়াংদে তুখুউলি আসিই মিঃসিই। অর আকং লিঃমা আচিইকো য়ুউরো প্রলিচাগা, যাসুরো য়াং তাঃরা ক্রারো লাক খেংরি অর আক্যুও পিইরি। তয়কতিরি পিইরি আপ্রেইং সুংছি, তয়কতিরি পিইরি আপ্রেইং খ্রকছি অর তয়কতিরি পিইরি আপ্রেইং তা-রা।”
21যীশু অরলি প্রলিইরি, “যাসুউলি ছিইমিংগো য়ুউরো খারাং মুহুকি খেঃঅক্কা থাঃরি? য়াংসুউ ছিইমিংগো, ছিইমিংদাংমা তাং মাঃথা লঃ? 22তুখুমাঃসা হুওকরো থাঃগি, য়াংচা প্রাফুছুগিরা হুওকরো থাঃচা; অর তুখুমাঃসা ফুংরো থাঃগি, য়াংচা হ্লঃফু কিজুরা ফুংথাঃচা। 23যাসুমা নাঃথংফু নাঃআ হিকরিলি, য়াংসুউ নাঃআথংবেচি।”
24নক্কা যীশু প্রলিইরি, “নাংরো যা ক্রারিলি, য়াংচাগো চিই চুয়িইগে। নাংরো যাপুয়েং খ্রাং পিইরিলি, নাংরো কিজু য়াংপুয়েং খ্রাংফু; প্রফুছুগি, আম্যা প্যাংরো খ্রাংফু। 25যাসুমা হিকরি, য়াংসুউগো অরলি পিইফু, ছুগি যাসুমা মিহিলি-য়াংসুউমা যা হিইরি, য়াংচাগো তয়ং য়াংসুউগা য়ুউ লাঃফু।”
আসিই ওয়েথুঃউ
26যীশু অরলি প্রলিইরি, “থাওরা ফুরা ঈ নেংঙেংদচা দিঃ পুয়েং: তয়ক লুঃউচা লিঃমা আচিই ক্রিলিইরি। 27নক্কা য়াংসুউ রাক নিই ওয়িইরো-থাঃরো আখিং বৈলিইরি। য়াং আক্রামা থুঃউঃ আচিইগা আঞ্যং থুঃওয়করো আপাং আগ্রিঃ ফ্রইলিরি, য়িগিলি যাপুয়েং আগ্রিঃ ফ্রইলি, য়াংসুউ মিসিইলি। 28লিঃমা কোমাকো আসিই পিইলিরি-পাথামা আপাংশ্যি, নক্কা আফুউঃ অর আফুউঃ নক্কা আব্রিচুং আসিই ফ্রইলিইরি। 29আসিই ম্হিব্রিরি নক য়াংসুউ আসিই ফ্রেলিরি, আক্রংগা আসিই ফ্রেখিং তৈংব্যা।”
রিঃজি ওয়েথুউ
(মথি ১৩:৩১-৩৫; লূক ১৩:১৮,১৯)
30য়াংনক যীশু প্রলিইরি, “যানা ঙারো থাওরা ফুরা ঈ নেংঙেংদগো নুউংফুলি? যা উপমানা নাঃলিজিফুলি? 31য়াং নেংঙেংদচা রিঃজিনা তুউরি। লিঃমা পুওরিখা ম্রাংচাগা, য়াংচা আলুং আচিইথাক আশ্যি। 32ছুগি চৈপ্রিনক যাখা আপাং ক্রিঃতাকতি য়াংখা হিকচা আলুং হাংসুওয়েং-কিইসুওয়েং আপাং থাকপাং আগ্রিঃ ফ্রইতি, অর প্রফুচাঅং কংগং আগ্রিই আগ্রিই খাক থুঃওয়কতিচাগা, ঙাকরোতয়ং য়াং আখাকমা আসৈই তাংনৈংরি।”
33দিঃ পুয়েং অর আম্যাগ্রি ওয়েথুউ প্ররো যীশুচা থাওরা ফোরা ঈ তাঃরাদগো লুঃউরোবামা হঃপ্রালিইরি। লুঃউরো মন্হকতয়ং নাঃলিরিলি, য়ল্হকতয়ং য়াংসুউরোগু যীশু প্রপ্রালিইরি। 34ওয়েথুউ আপি যীশুচা য়াংসুউরোগু সুওয়েংসাং মিঃপি, য়িগিলি তিবিরোচা যাখা যীশুনা আতু আখ্রা নিংরি, য়াংখা যীশু আলুংচা তিবিরোগু খুওয়িরো প্রপ্রালিরি।
মুঃওগো তেংজিচা
(মথি ৮:২৩-২৭; লূক ৮:২২-২৫)
35য়াং রাকনিং ছেংছারোকমা যীশু তিবিরোগু প্রলিইরি, “লাঃ, ঙারো ম্রঃ থুঃউগাব্রাক লাঃগেমি।”
36য়াংখা তিবিরোচা লুঃউরোগু বৈরো, যীশু যা লংমা হিকলিইরি, য়াং লংনা যীশুগো য়ুউ লাঃখাগেতি। প্রফুছুগি য়াংদেমা অরলি আখ্রা লংরো হিকলিইরি। 37লং লাঃরি আখিংমা মুঃনা লিঃ লাঃলিইরি অর রিই লৈংরোচা লংমা লাঃরো আকলিচাগা, য়াং লৈংনা লংমা রিই প্রিতাকলিরি। 38য়জংছুগি যীশুচা লংমা নক্কা গংউং তুউং খ্যারো ওয়িই হিকলিইরি। তিবিরোচা যীশুগো নুওরো প্রগেলিইরি, “ছারা, ঙারো সিইফুব্যা, কোবাং মাম্রাং লঃ?”
39যীশু থাঃরো লিইগো হকলিইরি অর ম্রঃকো প্রলিইরি, “তেং, কেঙমা ফ্রইলি।” য়জংপ্রখা লিইলি তেং লাঃখারি অর হিচা আলুং কেঙমা ফ্রইরি।
40যীশু তিবিরোগু প্রলিইরি, “নাংরো যাফু ক্রককেতিলি? অাগুতয়ং নাংরো মুক্যুংগেসি লঃ?”
41দিঃচাগো ক্রারো তিবিরো কংগং ক্রককেলিরি অর কোরো কোরো প্রগেলিইরি, “দিঃ লুঃউ যাসুউলি, লিইনা ম্রঃলি দিঃ লুঃউ চাঃগাগো নাথংরি?”
Currently Selected:
মার্ক 4: BBSRMZ
Highlight
Share
Copy
Want to have your highlights saved across all your devices? Sign up or sign in
