মার্ক 5
5
মকং নেঃএ কৈংচা লুঃউঃউ
(মথি ৮:২৮-৩৪; লূক ৮:২৬-৩৯)
1য়াংনক যীশুনা তিবিরোচা গালীল ম্রঃকো কোউরো গেরাসেনীরো হেঃতেবে আঃরাদুঃ লাঃখাগেতি। 2যীশু লংগা ছাংরি খ্যাং খ্যাং, মকং নেঃএ কৈংরো লুঃউ তয়ক সাংখ্যয়েংগা থুঃওয়করো যীশু হ্রিইদুঃ লাঃলিইরি। 3য়াং লুঃউচা সাংখ্যয়েংমা নিংরি অর সেংক্যক্রোনা তয়কলি য়াংসুউগো খ্যয়েং মাঃথাহ্নং। 4য়াংসুউ আখ্রিঃ আলাককো তাখামুক্যয়েং সেংক্যক্রোনা খ্যয়েংগেতি, য়িগিলি য়াংসুউচা সেংক্যক্রোগু ফ্রে বৈতি অর খলৈংগো খ্যুওরো বৈতি। তয়কলি য়াংসুউগো মুনৈংগে। 5য়াংসুউচা ঞিনারাক সাংখ্যয়েংগা সাংখ্যয়েং অর তদংগা তদং অঃরো পেঃতি অর ক্যকনা কোগুকো হ্লিইরি।
6-7যীশুগো আওয়িগাকাবাং ম্রাংরো, য়াংসুউ ব্রি লাঃরো যীশুগো হ্রিঃ খুঃলিরি, অর য়াংসুউ অঃরো প্রলিরি, “মাহা থাওরা ফুরা ঈ সাঃ যীশু, ঙানা কোবাং যা অলুলিঃ? থাওরা ফুরা নাঃমিনা কিং কৈংরি, কোবাং ঙাগো ওয়িদানা মিপিইগি।” 8য়াং নেঃছুচা দিঃ চাঃগা প্রলিরি আক্রংগা যীশু য়াংসুউগো প্রলিরি, “নেঃছু, দিঃ লুঃউগা থুঃওয়করো লাঃলি।”
9যীশু য়াংসুউগো মিংলিরি, “নাক নাঃমি যালি?”
য়াংসুউ প্রলিরি, “ঙাক নাঃমিচা সুরুয়িই, আক্রংগা ঙারো আম্যা হিকরি।” 10য়াংসুউ যীশুগো আপ্রইেং আপ্রইেং আতংবেং থাঃরো প্রলিরিচাগা, কোবাংচা ঙারোগু দিঃ হেঃতেবেগা লৈ মুথুঃউকি।
11য়াং আখিংখা, য়াং আঃরাবামা তঃনামা কংগং ওয়াকরুওয়ি তুরুওয়িগো ক্যং হিকলিরি। 12নেঃছুরোচা যীশুগো আতংবেং থাঃরো প্রগেলিইরি, “থুঃউ ওয়াকরুয়িরোদুঃ ঙারোগু রুওয়ে; য়াংসুউরোমা ঙারোগু ওয়ংফু পিই।”
13যীশু খুওয়ং রুওয়েপ্রি নক, য়াং নেঃছুরোচা থুঃওয়করো ওয়াকরোদুঃ লাঃখাগেতি। য়জংছুগি আলুং ওয়াকচা তংজৈং স্যকরো আঃম ব্রিখাগেতি অর ম্রঃমা ক্যারো নঃঅ সিই লাঃখাগেতি। য়াং ওয়াকরুয়িমা নৈইথং লক ওয়াক হিকলিইরি।
14যাসুউরো ওয়ক ক্যংগেতি, য়াংসুউরো য়াংখা রুওয়াদুঃ ব্রি লাঃখাগেতি অর য়াং নেংবুনেংবা আলুং আঃরামা দিঃ সাদাংগো পিইগেলিইরি। য়াংখা লুঃউচা ক্রিফু লাঃগেতি, যা ফ্রইরিলি। 15য়াংসুউরো যীশুবামা লাঃরো ম্রাংগেরি, যাসুউগো কংগং আম্যা নেঃছু কৈং হিকলিরি, য়াং লুঃউচা আওয়ে-আঃচা ওয়েরো কেইংমারি চিইনা থৈহিকরি। দিঃ চাগো ম্রাংরো লুঃউচা ক্রককেরি। 16দিঃ প্রাসানাগো যাসুউরো ম্রাংগেরি, য়াংসুউরো থুউ নেঃছু কৈংচা লুঃউনা ওয়াক আক্রং আরারোগু লুঃউরোগু প্রপ্রাগেলিইরি। 17য়জংছুগি লুঃউরোচা যীশুগো আতংবেং থাঃগেলিচাগা, কোবাং ঙারো হেঃতেবেকো বৈরো লাঃলি।
18যাখা যীশু লংমা তাকতি য়াংখা যাসুগো নেঃছু কৈংলিইরি, য়াং লুঃউচা যীশুনা আতু লাঃফু কিজু আতংবেং প্যাংলিরি। 19ছুগি যীশুচা য়াংসুউগো দিঃ চাঃগা প্ররো রুওয়েলৈতি, “নাং নাক ইংদুঃ প্রেং লাঃলি অর আস্যাং ফুরা নাক কিজু মন্হকতয়ং আগ্রিই অলুক লুকরিলি অর নাক আপমা মন্হকতয়ং ওয়াসানা ফ্ররিলি, য়াংচারোগু নাক ইংসারোগু প্রলি।”
20য়াংখা থুউ লুঃউচা লাঃখারিব্যা অর যীশু য়াংসুউ কিজু মন্হকতয়ং আগ্রি অলুক লুঃউকরিলি, য়াংচাগো দিকাপলি হেঃতেবে প্রপেলিইরি। য়াংচাগো ক্রারো আলুংসুউ এংঅগেলিরি।
তয়ক আসিই মিঃমাশ্যি অর সানাসি মিঃমা তয়ক
(মথি ৯:১৮-২৬; লূক ৮:৪০-৫৬)
21যাখা যীশু লংমা প্রেংরো ম্রঃ থুউগাব্রাক লাঃখারি য়াংখা যীশু লিফাকলাকচি লুঃউম্যা চুককেলিরি। যীশু য়াংখালি ম্রঃ কাইংনাঃমা হিইলিরিসি। 22য়াং আখিংমা যায়ীর নাঃমিনা যিহূদী তাঃরা চেরেমা গংখ্যুক তয়ক য়াংদুঃ লাঃলিইরি অর যীশুগো ম্রাংরো, যীশু আখ্রিইমা ওয়েলিরি। 23য়াংসুউচা যীশুগো আতংবেং থাঃরো প্রলিইরি, “ঙাক সিঃমিংচা সিইফুব্যা। কোবাং লাঃরো, সিঃমিং আপমা আলাক থাঃগি; ঙাসা সিঃমিং কেইংমারো থাঃফুব্যা।”
24য়াংখা যীশু য়াংসুউনা আতু লাঃলিইরি। লুঃউম্যারোচা যীশুনা আতু আতু লাঃগেতি অর যীশু লিফাকলাকচি তয়ককো তয়ক তুগেলিরি। 25য়াং লুঃউ আঃথেমা মিঃমা তয়ক হিকলিরি, যাসু তিছিন্হন্হ পেলুং স্যুইসুয়েং রগা কেঃ হিকলিরি। 26য়াং রগাসিচা কংগং আম্যা ছিইসামা লাকমা, কংগং আম্যা ওয়িদানা রাঃব্যা, অর য়াংসুউমা যা হিকরি, য়াংচা আলুং য়াংসুউ ছিই কুউব্রিব্যা, য়িগিলি কংফুগো থাঃরো রাকমা রাকমা অর আম্যা সিঃ লাঃরি। 27যীশু আক্রংআরাগো ক্রারো, থুউ লুঃউ আথেঃ আথেঃ আক্রাগা যীশু নক্কা লাঃরো, যীশু কোরুংগো ম্হেংলিরি, 28আক্রংগা য়াং মিঃমাচা তুওয়কলিরি, যীশু আওয়েকো য়াংসুউ তাখ্যাক মেংরারিছুগি-য়াংসুউ কেইংমাফু। 29যীশু কোরুংগো ম্হেংরি খ্যাং খ্যাং, য়াং মিঃমা স্যুইসুয়েংচা তেংলিরি অর য়াংসুউ কোঃ কাইংথামা, কোঃ রগা কং লাঃচাগো সিইলিরি।
30যীশু খ্যাং খ্যাং সিইলিরি, কোঃগা গুংধ থুওয়ক লাঃচাগো। য়াংচা কিজু যীশু য়াং লুঃউ আচুকমা লিফাক লাকচি ক্রিরো মিংলিরি, “যাসুউ ঙাক আওয়েকো ম্হেংরিলি?”
31যীশু তিবিরো প্রগেলিইরি, “কোবাংগা ম্রাংরি, লুঃউরো কোবাং লিফাক লাকচি তুঃগেতি, য়িগিলি কোবাং প্ররি, যাসু কোবাংগু ম্হেংরিলি?”
32য়িগিলি দিঃ অলুককো যাসুউ লুকরিলি, য়াংচাগো ক্রিফু কিজু যীশু লিফাক লাকচি ক্রিলিইরি। 33থুউ মিঃমাচা যা ফ্ররিলি, য়াংচাগো সিইরো, তুংরো তুংরো য়াংসুউ যীশু আখ্রিইমা ওয়েলিরি অর আলুং আক্রংলিলাগো প্রঃ প্রালিইরি। 34যীশু য়াংসুউগো প্রলিইরি, “মিখাং, নাং ক্যুংরি কিজু কেইংমালিরি। চিই আখেংসানা লাঃলি, নাকমা অর দিঃ রগাচা মফ্রকিফি।”
35যীশু য়াংখালি চাঃগা প্ররিসিই, য়াং আখিংমা, থুউ তাঃরা চেরেমা গংখ্যুক যায়ীর ইংগা লৈগায়ক লাঃরো যায়ীরগো প্রগেলিইরি, “কোবাং সিঃমিং সিইব্যা; ছারাগো অর দুঃখুওয়া মিপিগিফি।”
36য়াং লুঃউরো চাঃগাগো ক্রারো, যীশু যায়ীরগো প্রলিইরি, “মক্রককি, আক্যুংগোরা থাঃ।”
37যীশু পিতর, যাকোব অর যাকোবমা ঞিং যোহন দিঃ সুংয়ককোরা কোঃ নক্কা য়ুউ লাঃখারি। 38নক্কা যায়ীর ইংমা রকরো, যীশু ম্রাংলিইরি কংগং রংরাং ফ্রইকেতি। লুঃউ কংগং আঃনা ঙুগেতি। 39যীশু আথিদুঃ ওয়ংরো লুঃউরোগু প্রলিইরি, “কোবাংরো যাফু রংরাং অর ঙুগেতিলি? মিঃমাশ্যিচা মিঃসিইসি, ওয়িইতি।”
40দিঃ চাঃগাগো ক্রারো লুঃউরোচা আরিঃ আসুয়েং প্রুক্কেলিরি। য়াংখা যীশু য়াংসুউরো আলুংসুউগো ইং প্রাংদুঃ থুঃওয়কফু কিজু প্রলিরি। য়াংনক যীশু মিঃমাশ্যি মিকখাং-ফাঃখাং অর য়াংসুউ নক্কা পাঃচা তিবিরোগু য়ুউরো, থুউ মিঃমাশ্যি যা খেংমা হিকরিলি, য়াং খেংদুঃ ওয়ংখাগেতি। 41-42মিঃমাশ্যি আসাক হিকলিইরি, তিছি ন্হৈন্হ। যীশু মিঃমাশ্যি আলাককো কৈরো প্রলিরি, “টালিথা কুম,।” দিঃ চাঃগা আদিপিচা ফ্রইতি, “মিঃমাশ্যি, নাককো প্ররি থাঃ।” অর খ্যাং খ্যাং মিঃমাশ্যিচা থাঃরো লিঃলিইরি। য়াংচাগো ম্রাংরো য়াংসুউরো কংগং এংঅগেলিরি। 43দিঃ প্রাসানাগো তয়ককোলি মপ্রগিছুরো যীশু কংগং তদৈং প্যাংরো আঃনা পিইলিইরি অর মিঃমাশ্যিগো তুখুমাসা চাঃফু পিলৈই প্রলিইরি।
Currently Selected:
মার্ক 5: BBSRMZ
Highlight
Share
Copy
Want to have your highlights saved across all your devices? Sign up or sign in
