San Lucas 14
14
Jesús ja'ay yajtzo'ogy ki'ixypya'ammu̶u̶dpu̶
1Chi du'un jyajty ko je̱'e̱ Jesús najty pokxyxyu̶u̶ kaaybyu̶ ñu̶kxy ma je̱'e̱ fariseo windzú̶n tyu̶jku̶ñ, y jim najty wiingpu̶ fariseotu̶jk y'u̶x'ijx pya'ijxu̶gu̶xyu̶. 2Nan jim najty ja'ay tu'ug ma je̱'e̱ Jesús wyinduuyu̶ñ mu̶dyiibu̶ ki'ixypya'ammu̶u̶du̶ñ. 3Chi je̱'e̱ Jesús yajtu̶u̶y je̱'e̱ Moisés y'ane̱'e̱mu̶n windzu̶ndu̶jk mu̶u̶d je̱'e̱ fariseotu̶jk, nu̶maay ajku̶xy:
—¿Nej mu̶baad je̱'e̱ pa'amja'ay pokxyxyu̶u̶ nyajtzooku̶mu̶ o ka'p?
4Chi y'amoondaay ajku̶xy. Mu̶'it je̱'e̱ Jesús ku̶'u̶ni'ixajy je̱'e̱ pa'amja'ay, chi yajtzooky, y nu̶maay ko ñu̶kxnu̶ch. 5Chi je̱'e̱ Jesús je̱'e̱ fariseo ja'ay nu̶maay ajku̶xy:
—¿Pu̶n ma miich ajku̶xy pu̶nu̶ nu̶u̶jutku'uga'ab je̱'e̱ m'ung,#14.5 Nije̱' wiingpu̶ versión myu̶na'añ: ¿Pu̶n ma miich ajku̶xy pu̶nu̶ nu̶u̶jutku'uga'ab je̱'e̱ mbuurru̶? o je̱'e̱ mwajyuubu̶ ajku̶xy, nej ka'p je̱'e̱ da'a nu̶kxy mu̶k'eemby myajpu̶dzu̶u̶mgu̶xy oy naty jya'apokxyxyu̶u̶ju̶ch?
6Y ka'p jajty ajku̶xy neby y'adzoowimbijtku̶xu̶chu̶ñ.
Je̱'e̱ pu̶njaty yajwoob ma je̱'e̱ pu̶jkpu̶ yajwinxu̶u̶duñu̶ñ
7Ko je̱'e̱ Jesús du'un ijxy ko je̱'e̱ ja'ay je̱'e̱ tu̶u̶bu̶ najty mu̶gaaybyu̶ yajwoogu̶xy janch win'ijxku̶xy je̱'e̱ u̶ñaaybye̱jt ku'uduumdu̶goybyu̶ jim ma je̱'e̱ meesu̶ju̶ñ, chi adayaaba kapxwiju̶ñ mooy ajku̶xy:
8—Ko miich mu̶gaaybyu̶ myajwowu̶ch ma je̱'e̱ pu̶jkpu̶ yajwinxu̶u̶duñu̶ñ, ka'p mnaxwe̱e̱dzu̶ch ma je̱'e̱ ku'uduumbu̶ u̶ñaaybye̱jtu̶ñ, ka'p jékyu̶ch ko nu̶kxy jya'ady je̱'e̱ mu̶dyiibu̶ naty mu̶gaaybyu̶ tu̶ yajwoy mu̶dyiibu̶ ni'igyu̶ ku'umay ijtpu̶ñ ni'igu̶ ka'p miichu̶ñu̶ba, 9y chi xyñu̶ma'awu̶ch je̱'e̱ mu̶dyiibu̶ naty mu̶gaaybyu̶ tu̶ xywyoyu̶ñ: ‘Mo'o adaa mmu̶gu'ug adaa ku'uduumbu̶ u̶ñaaybye̱jt.’ Y chi miich mu̶k mjanchtzo'oydyúnu̶ch y mnu̶kxu̶ch ma je̱'e̱ u̶x'aambu̶ u̶ñaaybye̱jtu̶ñ. 10Ko je̱'e̱ ja'ay mu̶gaaybyu̶ xywyowu̶ch ma je̱'e̱ pu̶jkpu̶ yajwinxu̶u̶duñu̶ñ, jim mnaxwe̱e̱dzu̶ch ma je̱'e̱ u̶x'aambu̶ u̶ñaaybye̱jtu̶ñ, y ko je̱'e̱ ja'ay myínu̶ch mu̶dyiibu̶ naty mu̶gaaybyu̶ tu̶ xywyoyu̶ñ, chi xyñu̶ma'awu̶ch: ‘Mu̶gu'ug, nax ma yu̶'u̶ ku'uduumbu̶ u̶ñaaybye̱jtu̶ñ.’ Mu̶'it ku'umay m'idu̶ch ma je̱' ajku̶xy mu̶dyiibu̶ naty u̶ñaaygyu̶xpu̶ñ mu̶u̶d miich meesu̶winduuy. 11Je̱' ko je̱'e̱ mu̶dyiibu̶ ku̶'u̶m naygyu'umaayu̶p, tzo'oydyu'umbaadu̶p je̱'; y je̱'e̱ mu̶dyiibu̶ yuung naaxypy naybyu̶daaku̶p, je̱' ku'umaay idu̶p.
12Chi je̱'e̱ Jesús je̱'e̱ ja'ay nandu'un nu̶maay je̱'e̱ mu̶dyiibu̶ najty mu̶gaaybyu̶ tu̶ wyoyiiju̶ñ:
—Ko mxu̶u̶dunu̶ch ka'p je̱'e̱ ja'ay mu̶gaaybyu̶ mwowu̶ch mu̶dyiibu̶ mu̶u̶d oy mnaymyu̶gu'ug'adyiiju̶ñ ajku̶xy, ni je̱'e̱ mmu̶gue̱'e̱xk ajku̶xy, ni je̱'e̱ m'ajuugy m'amu̶gu'ug ajku̶xy, ni je̱'e̱ mmu̶du̶jk kumeeñbyu̶ ajku̶xy; ka'p jekyu̶ch ko nandu'un xywyodu̶gatzu̶ch, y xyajwimbijttu̶gajtzu̶yu̶ch. 13Ko miich mxu̶u̶dunu̶ch, je̱' mu̶gaaybyu̶ mwowu̶py je̱'e̱ ayoobu̶du̶jk ajku̶xy, je̱'e̱ ka'pu̶ yo'oy ajku̶xy, je̱'e̱ tekymya'atja'ay ajku̶xy y je̱'e̱ wiindzja'ay ajku̶xy. 14Y mu̶'it mjootkujk'adu̶ch, je̱' ko ka'p je̱'e̱ jadu̶ch ajku̶xy neby yajwimbijtku̶xu̶chu̶ñ. Jiinu̶ je̱'e̱ Dios xyajwimbijtu̶ch je̱'e̱ mu̶'it xu̶u̶ ko naty je̱'e̱ tu'uda'agyjya'ay jyuugypyu̶jkku̶xy.
Je̱'e̱ ijxpe̱jt ma je̱'e̱ mu̶jpu̶ adzuu'ajtu̶ñ
(Mt 22.1-10)
15Chi je̱'e̱ ja'ay tu'ug mu̶dyiibu̶ najty u̶ñaaby mu̶u̶d je̱'e̱ Jesús meesu̶winduuy ko mu̶dooy neby je̱'e̱ Jesús myu̶naañ, chi nu̶maay:
—¡Jootkujk je̱'e̱ ja'ay ajku̶xy mu̶dyiibu̶ jiiby kayu̶p u'ugu̶p ma je̱'e̱ Dios y'ane'emyu̶ñ!
16Chi je̱'e̱ Jesús myu̶naañ:
—Tu'ug je̱'e̱ ja'ay, mayjya'ay najty je̱'e̱ yaj'adzuu'ade̱e̱mby, chi je̱'e̱ mayjya'ay oy jayu̶jp yajwoyii. 17Ko je̱'e̱ adzuu paaty, chi je̱'e̱ tyuumbu̶ kejxy ko wan nu̶kxy nu̶maaygyu̶xy je̱'e̱ tu̶u̶bu̶ najty mu̶gaaybyu̶ yajwoogu̶xy: ‘Jaamgu̶x, tu̶ je̱'e̱ kaayu̶ñ uuku̶ñ yam ku̶xyu̶ yajni'ixu̶'u̶y.’ 18Chi nigu̶xyu̶ y'adzooy ajku̶xy: ‘Tun may'ajt okwinmé̱kxku̶ch.’ Chi je̱'e̱ jayu̶jpu̶ ja'ay myu̶naañ: ‘Naax u̶u̶ch yam tu'ug tu̶ nnaamjuy, y je̱' u̶u̶ch nu̶kxy jayu̶jp n'ixy, paady u̶u̶ch ka'p nu̶kxa'añ, tun may'ajt okwinmé̱kxku̶ch.’ 19Chi je̱'e̱ ja'adu'ukpu̶ ja'ay myu̶naañ: ‘Wajyuubu̶ u̶u̶ch mu̶gooxk par tu̶ njuy, je̱' u̶u̶ch nu̶kxy jayu̶jp n'ok'ijxmadza'añ, oktunmay'ajt okwinmé̱kxku̶ch.’ 20Chi je̱'e̱ ja'adu'ukpu̶ ja'ay myu̶naañ: ‘Timyñaamnu̶ u̶u̶ch nbu̶ky paady u̶u̶ch ka'p mu̶baad nu̶kxy.’ 21Ko je̱'e̱ tuumbu̶ wyimbijtnu̶, chi je̱'e̱ wyindzú̶n du'un wa'adzu̶ awaandaayu̶ neby je̱'e̱ ja'ay y'adzooyu̶ñ ajku̶xy mu̶dyiibu̶ najty oy tu̶ ja'awowa'añu̶ñ. Mu̶'it je̱'e̱ windzú̶n mu̶k jyootma'ty, y chi je̱'e̱ tyuumbu̶ nu̶maay: ‘Nu̶kx mu̶k'eemby kajptjooty ma je̱'e̱ mu̶jnu̶u̶ mu̶jtu'uju̶ñ y ma je̱'e̱ ja'ay may yo'oygyu̶xy ñajxku̶xyu̶ñ y mwoomínu̶ch yaa je̱'e̱ ayoobu̶du̶jk ajku̶xy, je̱'e̱ ka'pu̶ yo'oy ajku̶xy, je̱'e̱ wiindzja'ay ajku̶xy y je̱'e̱ tekymya'atja'ay ajku̶xy.’ 22Chi je̱'e̱ tyuumbu̶ kujeky myu̶naañ: ‘Windzú̶n, tu̶ u̶u̶ch du'un nduñ neby u̶u̶ch tu̶ xyñu̶ma'ayu̶ñ, y jakchiinu̶ u̶ñaaybye̱jt ñadu̶gu̶'u̶yñu̶.’ 23Chi je̱'e̱ windzú̶n tyuumbu̶ jaknu̶maay: ‘Nu̶kx ma je̱'e̱ mu̶jnu̶u̶'aa mu̶jtu'u'aaju̶ñ y kajptwiiñ kajppa'a y woomín je̱'e̱ wiingpu̶ ja'ay adzip ajku̶xy wan u̶u̶ch je̱'e̱ ndu̶jk y'udzu̶ch. 24U̶u̶ch miich nnu̶maaygyu̶xypy ko ka'p je̱'e̱ ja'ay ni tu'ug y'adzuu'ajtku̶xu̶ch mu̶u̶d u̶u̶ch, je̱'e̱ mu̶dyiibu̶ jayu̶jp mu̶gaaybyu̶ ja'ayajwoogu̶xu̶ñ.’
Janch tzip ko je̱'e̱ Cristo nbanu̶kxu̶mu̶ch
(Mt 10.37-38)
25Mayjya'ay najty janch panu̶kxku̶xp je̱'e̱ Jesús, chi je̱'e̱ Jesús wya'agwimbijty, nu̶maay ajku̶xy: 26“Pu̶nu̶ jii u̶u̶ch pu̶n xypyamíñ, y pu̶nu̶ mu̶k ni'igyu̶ tzoky je̱'e̱ tyaj tyeedy, je̱'e̱ tyo'oxyu̶jk ajku̶xy, je̱'e̱ y'ung y'ana'k ajku̶xy, je̱'e̱ pyuya'ay ajku̶xy, je̱'e̱ pyudo'oxy ajku̶xy, y je̱'e̱ kyu̶'u̶mjugy'ajtu̶ñ y ka'p u̶u̶chu̶ñu̶ba, ka'p u̶u̶ch je̱'e̱ du'umbu̶ ja'ay mu̶baad ndiscípulo'adyii. 27Y pu̶n je̱'e̱ kyu̶'u̶mgruutz ka'p kabu̶'u̶ga'añ y xypyamíñu̶ch, pu̶nu̶ ka'p ñaygyu̶'u̶ye̱ga'añyii ma je̱'e̱ o'ku̶ñ ke̱e̱ku̶ñ, ka'p u̶u̶ch je̱'e̱ du'umbu̶ ja'ay mu̶baad ndiscípulo'adyii. 28Pu̶nu̶ miich nidu'ugtu̶ mu̶jtu̶jk mgojaangu̶xypy, ¿nej ka'p da'a jayu̶jp mnaxwé̱tzku̶xy y m'a'ixu̶u̶ygyu̶xy du'uñdyu̶ myeeñdyuna'añu̶ñ, y pu̶nu̶ mu̶u̶d ajku̶xy tii mu̶u̶d myajmaaygyu̶xu̶ch, o pu̶nu̶ ka'p? 29Ka'p jékyu̶ch ko naty je̱'e̱ tu̶jk tu̶ yajpojtzu̶'u̶gy, y chi naty ka'p okjajtnu̶ neby yajmayu̶chu̶ñ, y pu̶njaty naty tu̶ y'ixy tu̶ tyu̶kxyii, chi je̱'e̱ ñixiik ñiyaaxtu̶gu̶'u̶wu̶u̶ju̶ch ajku̶xy, 30myu̶naangu̶xu̶ch: ‘Adayaaba ja'ay nigoo yu̶'u̶ tyu̶jk tu̶ pojtzu̶'u̶gy y ka'p tu̶ ok'yajmaayñu̶.’ 31O pu̶nu̶ tu'ug mu̶j'ane̱'e̱mbu̶ chona'añ tziptuumbu̶ mu̶u̶d je̱'e̱ wiingpu̶ mu̶j'ane̱'e̱mbu̶, ¿nej ka'p da'a jayu̶jp y'oknaxwe̱e̱dzu̶ch wyinmayu̶ch pu̶nu̶ mu̶baad chiptúñ mu̶u̶d je̱'e̱ majk milpu̶ jya'ay, pu̶nu̶ jii je̱'e̱ myu̶dzip myiñ mu̶u̶d je̱'e̱ jya'ay ni''ipx mil? 32Y pu̶nu̶ ka'p naty winguwa'agu̶'u̶wa'añ, ko naty je̱'e̱ ja'adu'ukpu̶ mu̶j'ane̱'e̱mbu̶ ju̶gue̱mnu̶ myiñ, chi je̱'e̱ wingapxpu̶du̶jk ke̱xu̶ch kapxnukxtaakpu̶, ka'pu̶ je̱'e̱ tzip tyunu̶u̶ jyadu̶u̶ju̶ch. 33Y du'un wanpu̶nu̶ch ma miich ajku̶xyu̶ñ pu̶nu̶ ka'p ku̶xyu̶ tijaty m'u̶xmajtzku̶xy mu̶dyiibu̶ mu̶dajtku̶xypyu̶ñ, ka'p u̶u̶ch je̱'e̱ du'umbu̶ ja'ay mu̶baad ndiscípulo'adyii.
Ko je̱'e̱ kaan tyaamtz'ajt tyu̶gooyñu̶
(Mt 5.13; Mc 9.50)
34“Je̱'e̱ kaan janch'oy je̱' pu̶nu̶ myu̶u̶d je̱'e̱ tyaamtz'ajtu̶ñ; peru̶ pu̶nu̶ tu̶gooby je̱'e̱ tyaamtz'ajtu̶ñ, ¿neby je̱'e̱ da'a du'un y'okjaktúnu̶ch? 35Je̱'e̱ kaan mu̶dyiibu̶ je̱'e̱ tyaamtz'ajtu̶ñ tu̶ tyu̶goyu̶ñ, nan ni ka'p je̱'e̱ y'oybyu̶daaknu̶ju̶ch ma je̱'e̱ naaxu̶ñ, ni ma je̱'e̱ pu'uxk mu̶dyiibu̶ abonu̶'ajtpu̶ñ. Je̱' je̱'e̱ tu̶y'ajtu̶ñ yaj'u̶xxídu̶p je̱'. Pu̶njaty winju̶wu̶'u̶waamb adaa ayuuk wan winju̶wu̶'u̶y.”
Currently Selected:
San Lucas 14: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
