San Lucas 15
15
Ijxpe̱jt ma je̱'e̱ borreegu̶ kweentu̶'ajtpu̶ mu̶dyiibu̶ byorreegu̶ paattu̶ñ
(Mt 18.10-14)
1Chi je̱'e̱ yajkugube̱jtpu̶du̶jk ku̶xyu̶ mu̶dyiibu̶ je̱'e̱ gobierno romano najty mu̶duungu̶xpu̶ñ mu̶u̶d je̱'e̱ pokyjya'aydyu̶jk Jesús nimu̶jwa'ktaay ajku̶xy, janch amdo'idaanu̶ ajku̶xy je̱' y'ayuuk. 2Paady je̱'e̱ fariseotu̶jk mu̶u̶d je̱'e̱ Moisés y'ane̱'e̱mu̶ñ windzu̶ndu̶jk ni'oj niyaaxu̶ydyu̶gu̶u̶ygyu̶xy je̱'e̱ Jesús, myu̶naangu̶xy:
—Adaa Jesús kyu'ubu̶jkypy pokyjya'aydyu̶jk yu̶'u̶, y yu̶'u̶ mu̶u̶d kyaaygyu̶xy y'uukku̶xy.
3Mu̶'it je̱'e̱ Jesús adayaaba ijxpe̱jt yajmu̶dmu̶dyaaku̶ ajku̶xy: 4“¿Mu̶dyii ja'ay jii ma miich ajku̶xyu̶ñ pu̶nu̶ myu̶u̶d je̱'e̱ borreegu̶ tu'kmu̶go'px y ko nidu'ugtu̶ tyu̶góyu̶ch, nej ka'p je̱'e̱da'a yajwu̶'u̶mu̶ch je̱'e̱ mu̶da'px majmókx mu̶daaxpu̶ jim ujtzjooty, y chi nu̶kxy u̶xta'ay mu̶dyiibu̶ naty tu̶ tyu̶goyu̶ñ, u̶xtu̶ koonu̶ paadu̶ch? 5Y ko paadu̶ch, chi mu̶k'eemby pu̶da'agu̶ch ma je̱'e̱ kyejykyoptu̶ñ janch jootkujk. 6Y ko jya'adu̶ch ma je̱'e̱ tyu̶jku̶ñ, chi je̱'e̱ myu̶gu'ugtu̶jk y je̱'e̱ myu̶ju̶u̶n myu̶du̶jk womúgu̶ch, y nu̶ma'awu̶ch ajku̶xy: ‘Xondaakku̶x mu̶u̶d u̶u̶ch, je̱' ko u̶u̶ch je̱'e̱ nborreegu̶ tu̶ nbaady mu̶dyiibu̶ ijty tu̶ tyu̶goyu̶ñ.’ 7U̶u̶ch miich nnu̶maaygyu̶xypy, ko nandu'un jiiby tzajpjooty ni'igyu̶ jootkujk'ajtu̶ñ jiiby ko je̱'e̱ pokyjya'ay tu'ug jyootwimbíty, ni'igu̶ ka'p je̱'e̱ mu̶da'px majmokxmu̶daaxpu̶ tu'uda'agypyu̶ja'ay mu̶dyiibu̶ ka'p tyuundu̶gooygyu̶xyu̶ñ.”
Ijxpe̱jt ma je̱'e̱ to'oxyu̶jk mu̶dyiibu̶ je̱'e̱ myeeñ paattu̶ñ
8“O pu̶nu̶ ¿jii to'oxyu̶jk meeñ majk mu̶u̶du̶ch, y ko tu'ug yajtu̶góyu̶ch, nej ka'p je̱'e̱ jyu̶u̶n da'a ju̶jpno'ogu̶'u̶wu̶ch y pe̱du̶'ktu̶gu̶'u̶wu̶ch je̱'e̱ tyu̶jk y u̶xta'awu̶ch je̱'e̱ myeeñ u̶dye'egy'eemby, u̶xtu̶ koonu̶ paadu̶ch? 9Y ko paadu̶ch, chi je̱'e̱ myu̶gu'ugtu̶jk y je̱'e̱ myu̶ju̶u̶n myu̶du̶jk womúgu̶ch y nu̶ma'awu̶ch ajku̶xy: ‘Xondaakku̶x mu̶u̶d u̶u̶ch, je̱' ko u̶u̶ch je̱'e̱ nmeeñ tu̶ nbaady mu̶dyiibu̶ u̶u̶ch ijty tu̶ nyajtu̶goyu̶ñ.’ 10U̶u̶ch miich nu̶maaygyu̶xypy ko nandu'un je̱'e̱ Dios y'ángelestu̶jk jyootkugu̶u̶ygyu̶xy ko je̱'e̱ pokyjya'ay tu'ug jyootwimbíty.”
Ijxpe̱jt ma je̱'e̱ ungteedy mu̶dyiibu̶ je̱'e̱ y'ung winme̱kxpu̶ñ
11Chi je̱'e̱ Jesús ja'adu'ug mu̶dyaaky adayaaba ijxpe̱jt: “Tu'ug je̱'e̱ ya'aydyu̶jk me̱tzk najty y'ung je̱'e̱ mu̶u̶du̶ch. 12Y chi je̱'e̱ jakmutzpu̶ tyeedy nu̶maay: ‘Tety mooygyu̶ch yu̶'u̶ pu̶da'agy mu̶dyiibu̶ u̶u̶ch xypyaatpu̶ñ.’ Mu̶'it je̱'e̱ tyeedy je̱'e̱ pu̶da'agy yajwa'kxy. 13We̱e̱nu̶ najty xu̶u̶ tiempo kujk ñu̶kxy, ko je̱'e̱ mutzpu̶ y'ung pyu̶da'agy ku̶xyu̶ toktaay mu̶dyiijáty najty jye̱'e̱'ajtypyu̶ñ, y chi choñ ñu̶kxy ju̶gue̱m'it wiingnaax wiingkajpt mu̶u̶d je̱'e̱ myeeñ, chi jim mu̶k'eemby ku̶xyu̶ yajku̶jxtaay mu̶u̶d je̱'e̱ ju̶bu̶kjugy'ajtu̶ñ. 14Y ko najty je̱'e̱ myeeñ ku̶xyu̶ tu̶ yajku̶jxta'ay, chi mu̶j yuu myiiñ ma je̱'e̱ jimbu̶ kajptu̶ñ, y chi je̱'e̱ kaayu̶ñ uuku̶ñ wit meeñ oy ja'ayajmayjyajtu̶gu̶u̶yñu̶. 15Chi je̱'e̱ ja'ay tu'ug ninu̶kxy ma je̱'e̱ jimbu̶ kajptu̶ñ tuung u̶xtaaybyu̶, myu̶duna'añ najty, chi kye̱jxu̶ ma je̱'e̱ ryánchoju̶ñ kuch kyweentu̶'ajtpu̶. 16Y oy najty ja'anijoot'áty ju̶kxa'añ je̱'e̱ kuch jyu̶kxy mu̶dyiibu̶ je̱'e̱ kuch najty jyu̶kxypyu̶ñ ajku̶xy, y nan ni pu̶n najty je̱'e̱ kya'amo'oyii. 17Ko je̱'e̱ wyinma'añ yajmiiñ yajmejch, chi myu̶naañ ma je̱'e̱ jyoot wyinma'añdyu̶ñ: ‘¡Janch maydyuumbu̶ jim ma u̶u̶ch je̱'e̱ ndeedy tyu̶jku̶ñ, y myu̶u̶d ju̶kxy pu̶ky may'eemby ajku̶xy, y u̶u̶ch ya yuu'o'ogaanu̶py mu̶u̶d je̱'e̱ yuu xu̶u̶! 18Tzonaambu̶ch yaa, nnu̶kxa'añu̶ch ma u̶u̶ch je̱'e̱ ndeedy tyu̶jku̶ñ, y du'unu̶ch nnu̶ma'awu̶ch: Tety, tu̶ u̶u̶ch nduundu̶goy mu̶u̶d je̱'e̱ Dios tzajpjootypyu̶ y mu̶u̶d miich. 19Cham ka'p u̶u̶ch xy'okpaatnu̶ mmu̶na'anu̶ch miich, ko u̶u̶ch xy'ung'adyii; yajtuungu̶ch du'un neby je̱'e̱ mduumbu̶ju̶ñ.’ 20Chi jim choñ, y wyimbijty ma je̱'e̱ tyeedy tyu̶jku̶ñ.
“Ju̶gue̱mnu̶ najty myiñ ko je̱'e̱ tyeedy y'ijxpaattu̶, y chi pya'a''ayoogóttu̶, y ñinu̶kxu̶ poyu̶'u̶gyu̶ oy jyu̶jpkubadu̶'u̶yii. Chi yo'kmu̶ne̱e̱nnajxu̶, y chu'kxu̶. 21Chi je̱'e̱ y'ung myu̶naañ: ‘Tety, tu̶ u̶u̶ch nduundu̶goy mu̶u̶d je̱'e̱ Dios tzajpjootypyu̶ y mu̶u̶d miich. Cham ka'p u̶u̶ch xy'okpaatnu̶ mmu̶na'anu̶ch miich ko u̶u̶ch xy'ung'adyii.’ 22Chi je̱'e̱ ungteedy tyuumbu̶du̶jk nu̶maay ajku̶xy: ‘Yajpu̶dzu̶u̶mgu̶x mu̶k'eemby je̱'e̱ oybyu̶ wit, y yajpu̶jkku̶x adaa n'úngu̶ch; mooygyu̶x nandu'un je̱'e̱ kyu̶'u̶jiitz, y mu̶u̶d je̱'e̱ kyu̶'u̶g. 23Nu̶kx je̱'e̱ jakni'kxu̶bu̶ waj'ung tu'ug yajtzóngu̶x, y yaj'o'kku̶x. ¡Y wánu̶tz ngaayu̶mu̶ch n'uuku̶mu̶ch y nxu̶u̶duunu̶mu̶ch ajku̶xy! 24Je̱' ko adaa n'ung du'un yu̶'u̶ najty neby o'ogypyu̶ju̶ñ, y chi tu̶ jyuugypyú̶ky. Tu̶goy yu̶'u̶ najty yajpaady, y tu̶ cham nbaattu̶m.’ Chi xyu̶u̶duundu̶gu̶u̶y ajku̶xy.
25“Y je̱'e̱ kyob'ung kamjooty najty je̱'. Ko jya'ty mu̶wingón ma je̱'e̱ tyu̶jku̶ñ, chi mu̶dooy ko je̱'e̱ ja'ay jyanchxu'uxy jyanchwopy y jyanch'ech. 26Mu̶'it je̱'e̱ tuumbu̶ tu'ug yaaxu̶, y yajtu̶u̶y tii tuunu̶p jajtu̶p. 27Chi je̱'e̱ tuumbu̶ y'adzooy: ‘Je̱'e̱ m'uch tu̶ jya'ady, y tu̶ je̱'e̱ mdeedy ni'ane'emy ko je̱'e̱ jakni'kxu̶bu̶ waj'ung y'o'ogu̶ch, je̱' ko je̱'e̱ y'ung oy mu̶k tu̶ wyimbity.’ 28Chi je̱'e̱ kyob'ung oy jyootma'ady, y ka'p najty tu̶gooty tyu̶gu̶'u̶wa'añ. Mu̶'it je̱'e̱ tyeedy ñibu̶dzu̶u̶mu̶, myu̶nukxtaaku̶ ko wan tu̶gooty tu̶gu̶'u̶y. 29Chi je̱'e̱ tyeedy nu̶maay: ‘Miich mnejwu̶u̶by janch mu̶ga'anaag jumu̶jt kujk nmu̶duñ y ka'p nimu̶naaxu̶u̶ nwin'adzoy nju̶jp'adzoy, y ni chambaadnu̶ miich ni tii xykya'amo'oyñu̶ch oydyu̶'ajty u̶xyu̶py pi'kchiivu̶'ung tu'ug, wan u̶u̶ch nxu̶u̶dunu̶ch mu̶u̶d u̶u̶ch je̱'e̱ nmu̶gu'ugtu̶jk ajku̶xy. 30Peru̶ ko yu̶'u̶ m'ung tu̶ jya'ady mu̶dyiibu̶ yu̶'u̶ mwit mmeeñ wa'adzu̶ tu̶ xyajtuundaayu̶ mu̶u̶d je̱'e̱ ju̶bu̶kwinma'añ y mu̶u̶d je̱'e̱ ju̶bu̶k to'oxyu̶jktu̶jk ajku̶xy, y chi je̱'e̱ waj'ung jakni'kxu̶bu̶ tu̶ myaj'o'ogy mu̶u̶d yu̶'u̶ gyu̶xpu̶.’
31“Chi je̱'e̱ ungteedy y'ung nu̶maay: ‘Ung, miich wiinu̶u̶xu̶u̶ yaa m'ity mu̶u̶d u̶u̶ch, y ku̶xyu̶ tijaty u̶u̶ch nmu̶u̶d miich mje̱' je̱'. 32Y cham oy yu̶'u̶ du'un, ko nxu̶u̶duunu̶mu̶ch y njootkugu̶u̶yu̶mu̶ch, je̱' ko yu̶'u̶ m'uch du'un yu̶'u̶ najty neby o'ogypyu̶ju̶ñ, y chi tu̶ jyuugypyú̶ky; tu̶goy yu̶'u̶ najty yajpaady, y tu̶ cham nbaattu̶m.’ ”
Currently Selected:
San Lucas 15: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
