San Lucas 16
16
Je̱'e̱ pu̶da'agy kweentu̶'ajtpu̶ ka'pu̶ tyu'uda'agyu̶ch
1Jesús yajmu̶dmu̶dyaak adayaaba nandu'un je̱'e̱ dyiscípulotu̶jk ajku̶xy: “Jii ijty kumeeñjya'ay tu'ug, tu'ug najty tyuumbu̶ je̱'e̱ mu̶u̶du̶ch mu̶dyiibu̶ je̱'e̱ pyu̶da'agy kweentu̶'ajtku̶xu̶p; y chi oy ñu̶ma'ayii ko je̱'e̱ pyu̶da'agy kweentu̶'ajtpu̶ najty nigoo jyanchmeeñyajtúñ ma ka'p pyaadyiiju̶ñ. 2Chi je̱'e̱ windzú̶n je̱'e̱ pyu̶da'agy kweentu̶'ajtpu̶ oy yajwoyii, chi nu̶maay: ‘¿Ti je̱'e̱ ja'ay ko du'un myajkapxy myajmu̶dya'agy? Ya u̶u̶ch yu̶'u̶ mgwentu̶ ku̶'u̶mooydyaagy neby tu̶ mduñu̶ñ, y ka'p u̶u̶ch miich n'oktuumbu̶'adaanu̶.’ 3Chi je̱'e̱ pu̶da'agy kweentu̶'ajtpu̶ tyajy myaay, myu̶naañ: ‘¿Ti u̶u̶ch cham n'oktunu̶py? Je̱' ko u̶u̶ch yu̶'u̶ nwindzú̶n xytyuungpu̶ga'añ. Ujtztunu̶u̶ ka'p u̶u̶ch je̱'e̱ nmu̶mada'agu̶ch, y tzo'oydyuumbu̶ch ko u̶u̶ch je̱'e̱ limoosnu̶ nyujkwa'anu̶ch. 4Ah, tu̶ u̶u̶ch nnejwu̶'u̶y tii u̶u̶ch ndyunu̶byu̶ñ neby u̶u̶ch je̱'e̱ ja'ay xykyu'ubú̶gu̶chu̶ñ ma je̱'e̱ jyu̶u̶n tyu̶jk ajku̶xyu̶ñ ko u̶u̶ch naty tu̶ nyajtuungpú̶ky.’ 5Chi tu'ugjáty tu'ugjáty mu̶jwooy pu̶njaty je̱'e̱ wyindzú̶n najty mu̶nukxy'ajtku̶xu̶p. Chi je̱'e̱ jayu̶jpu̶ yajtu̶u̶y: ‘¿Du'uñdyu̶ u̶u̶ch je̱'e̱ nwindzú̶n xymyu̶nukxy'ajtu̶?’ 6Chi y'adzoowu̶: ‘Mu̶go'px barril aceetyu̶.’ Chi je̱'e̱ pu̶da'agy kweentu̶'ajtpu̶ ñu̶maayu̶: ‘Matz adaa mnaky, u̶ña'a tzojku̶, y yajkoj ja'adu'ug, kujayu̶'u̶ je'eyu̶ juxytyikxymyajk barril.’ 7Y jak'u̶x'aam ja'adu'ug yajtu̶u̶y: ‘Y miich, ¿du'uñdyu̶ mmu̶nukxy'adyii?’ Chi y'adzoowu̶: ‘Mu̶go'px kipxu̶'u̶ñ trigo.’ Chi nu̶maay: ‘Matz adaa mnaky, y yajkoj ja'adu'ug, kujayu̶'u̶ je'eyu̶ mu̶da'px kipxu̶'u̶ñ.’ 8Je̱'e̱ windzú̶n kyu'umaay je̱'e̱ ju̶bu̶k pu̶da'agy kweentu̶'ajtpu̶ ko mu̶j wyinma'añbyaaty neby y'adu̶'u̶chu̶ñ. Y du'unu̶tz jada'achambu̶ naaxwiiñjya'ay mu̶dyiibu̶ je̱'e̱ Dios ka'p mu̶bu̶jkku̶xyu̶ñ, ni'igyu̶ je̱'e̱ kyuwinma'añdyu̶ch ajku̶xy, ni'igu̶ ka'p je̱'e̱ mu̶dyiibu̶ je̱'e̱ Dios y'ayuuk tyu̶y'ajt mu̶bu̶jkku̶xpu̶ñ.
9“U̶u̶ch miich yam nwingapx nju̶jpkapxu̶u̶ygyu̶xypy wan je̱'e̱ ja'ay xymyu̶gu'ugpu̶jkku̶xy mu̶u̶d je̱'e̱ mmeeñ ajku̶xy, mu̶dyiibu̶ yaa yajpaatp ma adayaaba naaxwiiñ pokymyu̶u̶dpu̶ju̶ñ, y ko naty m'o'kku̶xnu̶, xykyu'ubu̶jkku̶xu̶p je̱'e̱ Dios jiiby tzajpjooty.
10“Je̱'e̱ ja'ay mu̶dyiibu̶ oy yajxón kuydyuungu̶xpu̶ñ je̱'e̱ we̱e̱nu̶ba ane̱'e̱mu̶ñ, nan kyuydyunaangu̶xypy je̱'e̱ mu̶jpu̶ ane̱'e̱mu̶ñ oy yajxón; y je̱'e̱ mu̶dyiibu̶ ka'p oy yajxón kuydyuungu̶xyu̶ñ je̱'e̱ we̱e̱nu̶ba ane̱'e̱mu̶ñ, nan ka'p je̱'e̱ mu̶jpu̶ ane̱'e̱mu̶ñ oy yajxón kuydyunaangu̶xy. 11Pu̶nu̶ ka'p mjajtku̶xy neby je̱'e̱ kumeeñ'adu̶u̶ oy yajxón myajtuungu̶xu̶chu̶ñ mu̶dyiibu̶ ya yajpaatp ma adayaaba naaxwiiñ pokymyu̶u̶dpu̶ju̶ñ. ¿Pu̶n miich da'a xy'okmo'owu̶p ajku̶xy je̱'e̱ kumeeñ'adu̶u̶ je̱'e̱ oybyu̶ jaanchpyu̶? 12Y pu̶nu̶ ka'p mjajtku̶xy neby oy yajxón mgweentu̶'ajtku̶xu̶chu̶ñ je̱'e̱ tu̶u̶bu̶ mu̶wu̶'u̶mgu̶xy mu̶dyiibu̶ je̱'e̱ wiingja'ay jye̱'e̱'ajtypyu̶ñ. ¿Pú̶nu̶tz miich da'a xy'okmo'owu̶p ajku̶xy mu̶dyiibu̶ miich mje̱'e̱'ajtypyu̶ñ ajku̶xy?
13“Ka'p je̱'e̱ tuumbu̶ ni tu'ug mu̶dyiibu̶ je̱'e̱ wyindzú̶n mu̶baad me̱tzk mu̶dúñ; je̱' ko tu'ug je̱'e̱ u̶xtíju̶ch y tu'ug tzógu̶ch, o tu'ug kapxymyu̶dowu̶ch y tu'ug ka'akapxymyu̶dowu̶ch. Miich ajku̶xy ka'p je̱'e̱ Dios du'un mu̶baad mmu̶duungu̶xy y cham naty je̱'e̱ kumeeñ'adu̶u̶ mjanch'adzojkku̶xy.”
14Nan myu̶doogu̶x adaa ku̶xyu̶ je̱'e̱ fariseotu̶jk mu̶dyiibu̶ najty je̱'e̱ meeñ janch adzojkku̶xpu̶ñ, y chi je̱'e̱ Jesús nixiiky niyaaxy ajku̶xy. 15Chi je̱'e̱ Jesús ñu̶maayu̶ ajku̶xy: “Miich fariseotu̶jk ajku̶xy du'un mnaybyu̶daaku̶gu̶xy ma je̱'e̱ ja'ay wyinduuy ajku̶xyu̶ñ neby nu̶wu̶'u̶y mjanch'oyjya'ayu̶chu̶ñ ajku̶xy, peru̶ je̱'e̱ Dios xyñejwu̶ydyaayu̶py je̱'e̱ mjoot mwinma'añ ku̶xyu̶ ajku̶xy. Je̱' ko mu̶dyiibu̶ je̱'e̱ ja'ay ya naaxwiiñ y'oy'ijxypyu̶ñ ajku̶xy, Dios ka'p je̱'e̱ du'umbu̶ oy'ixy.
Je̱'e̱ Dios kyu'utujku̶ñ y je̱'e̱ Dios y'ane̱'e̱mu̶ñ
16“Je̱'e̱ Moisés kyu'utujku̶ñ y je̱'e̱ Dios y'ayuuknajtzkapxu̶u̶ybyu̶ y'u̶xpu̶jku̶ñ ajku̶xy jibaad je̱'e̱ je'eyu̶ jya'ady ma je̱'e̱ Juan Bautista je̱'e̱ Dios y'ayuuk tyu̶y'ajt kapxwa'kxtu̶gu̶u̶yu̶ju̶ñ. Je̱'e̱ mu̶'it tiempo y u̶xtu̶ chamnu̶baad du'un yajkapxwa'kxyñu̶ je̱'e̱ oybyu̶ ayuuk tu̶y'ajt neby je̱'e̱ Dios y'ane'emyu̶ñ, y oy je̱'e̱ mayjya'ay du'un jya'anay'amu̶jaduunu̶gu̶xy ko tyu̶gu̶'u̶waangu̶xy ma je̱'e̱ Dios y'ane'emyu̶ñ.
17“Ni'igu̶ ka'p chipu̶ch neby je̱'e̱ tzajp y je̱'e̱ naaxwiimbu̶ kyu̶jxta'awu̶ch tyu̶goydya'awu̶chu̶ñ. Peru̶ je̱'e̱ Dios kyuydyuunda'awe̱e̱mby je̱'e̱ du'un ku̶xyu̶ neby je̱'e̱ ñaky myu̶na'añu̶ñ. Ni tu'ug je̱'e̱ leetru̶ ka'ani'inaxa'añ ka'ayajnadu̶gu̶'u̶wa'añ, oy u̶xyu̶py jya'adimymútzku̶chpyu̶.
Jesús yaj'u̶xpú̶ky ko je̱'e̱ ja'ay tyo'oxyu̶jk u̶xmach
(Mt 19.1-12; Mc 10.1-12)
18“Pu̶nu̶ je̱'e̱ ya'aydyu̶jk je̱'e̱ tyo'oxyu̶jk u̶xmajtzp y pyu̶jktu̶gach mu̶u̶d je̱'e̱ wiingpu̶ to'oxyu̶jk, tuundu̶gooby naty je̱'e̱ du'un; y nan pu̶n pu̶jkp mu̶u̶d je̱'e̱ to'oxyu̶jk mu̶dyiibu̶ naty tu̶ yaj'u̶xmachu̶ñ, nan tuundu̶gooby naty je̱'e̱ du'un nandu'un.
Je̱'e̱ kumeeñjya'ay y mu̶u̶d je̱'e̱ Lázaro
19Chi je̱'e̱ Jesús jyakmu̶naañ: “Jii ijty kumeeñjya'ay tu'ug janch oyjyaty ijty je̱'e̱ ñayxyoxyii mu̶u̶d je̱'e̱ oyjyatypyu̶ wit tukxy y ku'umaybyu̶ y janch xu̶u̶duundu̶u̶b ijty jaboom jaboom, kyay y'u'ugy oy yajxón. 20Nan jii najty ayoobu̶ja'ay nandu'un tu'ug mu̶dyiibu̶ xu̶u̶'ajtpu̶ñ Lázaro, y jaboom jaboom najty je̱'e̱ y'u̶ña'ay ma je̱'e̱ kumeeñjya'ay tyu̶jk'aguuyu̶ñ, y janch ni'ibu'udz ku'ubu'udz najty je̱'. 21Lázaro oy najty je̱'e̱ ja'ani'i''íxy ja'aku'u'íxy kaya'añ je̱'e̱ kaydyuk ju̶kxtuk mu̶dyiibu̶ ka'ab ma je̱'e̱ kumeeñjya'ay myeesu̶ju̶ñ; y may uk najty janch pawu̶dijtu̶p y wyéyu̶xu̶ je̱'e̱ pyu'udz. 22Chi du'un jyajty ko je̱'e̱ ayoobu̶ja'ay oy y'o'knu̶. Chi je̱'e̱ ángelestu̶jk yajnu̶kxu̶ ajku̶xy ma je̱'e̱ Abraham yajpaadyu̶ñ, ma je̱'e̱ oyjya'aydyu̶jk ñi'igu̶da'agyu̶ñ ajku̶xy. Nan chi je̱'e̱ kumeeñjya'ay oy nandu'un y'o'knu̶, y oy yajnaaxtu̶gu̶u̶yu̶nu̶.
23“Y chi je̱'e̱ kumeeñjya'ay jiiby ka'a'oydyaaktuuby tzaachpyu̶ najty ju̶wu̶'u̶y. Chi y'ijxu̶'ky y mu̶j'ijxy ju̶gue̱m je̱'e̱ Abraham mu̶u̶d je̱'e̱ Lázaro. 24Mu̶'it janchmu̶k yaaxkeeky myu̶naañ: ‘¡Apteedy Abraham, u̶u̶ch pa'a''ayoog! Tun may'ajt ke̱x yu̶'u̶ Lázaro wan yu̶'u̶ kyu̶'u̶wa'axkju̶jp yajxoogy mu̶u̶d je̱'e̱ nu̶u̶ y míñu̶ch je̱'e̱ ndootz xyajtu̶jtzu̶. Je̱' ko u̶u̶ch ya mu̶k n'ayoy ma adaa mu̶jju̶u̶n yaaju̶ñ.’ 25Chi je̱'e̱ Abraham y'adzoowu̶: ‘Ok'ung, ja'aymye̱tz ko tu̶ mdzu̶na'ay tu̶ mjugy'aty mu̶u̶d je̱'e̱ mwit mmeeñ agujk jootkujk, y je̱'e̱ Lázaro mu̶k je̱'e̱ y'ayooy. Jada'acham je̱'e̱ Lázaro yaa jyootkujk'aty, y miich je̱'e̱ tzaachpyu̶ jiiby mbaatypy. 26Y ja'adu'knax, jii tu'ug mu̶jwók ma u̶u̶ch ajku̶xyu̶ñ, y ma miich ajku̶xyu̶ñ. Pu̶njaty ja'anaxaangu̶xpu̶ñ jim'eemby ma miich ajku̶xyu̶ñ, ka'p je̱'e̱ mu̶baad ñajxku̶xy, nan ka'p je̱'e̱ jim'eembyu̶ yaa mu̶baad ñajxku̶xy ma u̶u̶ch yaa nyajpaadyu̶ñ.’
27“Chi je̱'e̱ kumeeñjya'ay jaknu̶maay je̱'e̱ Abraham: ‘Apteedy Abraham, tun may'ajt ke̱x je̱'e̱ Lázaro ma u̶u̶ch je̱'e̱ ndeedy tyu̶jku̶ñ, 28jim u̶u̶ch nmu̶gue̱'e̱xk mu̶gooxk nmu̶u̶du̶ch, wan nu̶kxy yajmu̶dmu̶dyaakku̶xy, ka'pu̶ ya nandu'un myiingu̶xu̶ch ma adaa ayoodaakt yaaju̶ñ.’ 29Chi je̱'e̱ Abraham y'adzooy: ‘Myu̶u̶d naky je̱'e̱ ajku̶xy mu̶dyiibu̶ je̱'e̱ Moisés y je̱'e̱ Dios y'ayuuknajtzkapxu̶u̶ybyu̶du̶jk kyujaayu̶ñ ajku̶xy, ¡wan kuydyuungu̶xy!’ 30Chi je̱'e̱ kumeeñjya'ay y'adzooy: ‘Du'un apteedy Abraham; peru̶ ko it je̱'e̱ o'kpu̶ nidu'ugtu̶ y'okjuugypyú̶gu̶ch, y y'oknú̶kxu̶ch ma je̱' ajku̶xyu̶ñ, y y'okmu̶dmu̶dyaaku̶gu̶xu̶ch it, jootwimbítu̶p je̱'e̱ du'un ajku̶xy.’
31Chi je̱'e̱ Abraham ñu̶maayu̶: ‘Pu̶nu̶ ka'p je̱'e̱ Moisés y je̱'e̱ Dios y'ayuuknajtzkapxu̶u̶ybyu̶du̶jk y'ayuuk mu̶jpu̶daaku̶ ajku̶xy, nan ka'p je̱'e̱ mu̶bu̶jkku̶xu̶ch oy u̶xyu̶py je̱'e̱ o'kpu̶ tu'ug jya'ajuugypyu̶jkpu̶, y jya'aninú̶kxu̶gu̶xpu̶.’ ”
Currently Selected:
San Lucas 16: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
