San Marcos 13
13
Jesús nigapxy ko je̱'e̱ mu̶jtzajptu̶jk nu̶kxy taj xit wyu̶'u̶my
(Mt 24.1-2; Lc 21.5-6)
1Ko je̱'e̱ Jesús pyu̶dzu̶u̶my ma je̱'e̱ mu̶jtzajptu̶jku̶ñ, chi je̱'e̱ dyiscípulotu̶jk nidu'ugtu̶ ñu̶maayu̶:
—¡Windzú̶n, ok'ix adaa maychaa mu̶jjátypyu̶ y adaa mu̶jtzajptu̶jk oy yu̶'u̶ jyanch'oydyúñu̶ch!
2Chi je̱'e̱ Jesús y'adzoowu̶:
—¿M'ijxypy adaa mu̶jtzajptu̶jku̶? Pues taj xit adaa wyu̶'u̶mu̶ch, ka'p pochkyopt ni tu'ug wyu̶'u̶mu̶ch. Ku̶xyu̶ yu̶'u̶ wyindu̶gooydya'awu̶ch.
Je̱'e̱ tu̶y'ajt ko je̱'e̱ naaxwiimbu̶ ka'anu̶ kyu̶xa'añ tyu̶goya'añ
(Mt 24.3-28; Lc 21.7-24; 17.22-24)
3Chi ñú̶kxku̶xy ma je̱'e̱ Olivos koptu̶ñ, ma je̱'e̱ mu̶jtzajptu̶jk tu̶yu̶ yajmu̶j'íxyu̶ñ. Chi je̱'e̱ Jesús ñaxwech, y chi je̱'e̱ Pedro, je̱'e̱ Santiago, je̱'e̱ Juan y je̱'e̱ Andrés amechu̶ yajtu̶u̶wu̶ ajku̶xy: 4ko mu̶naa je̱'e̱ du'un tyuna'añyii jyada'añyii neby najty tu̶ myu̶na'añu̶ñ y tii ijxpe̱jt jii yaj'íxu̶bu̶ñ ko naty adaa du'un tyimytyún tyimyjyadaanu̶na.
5Chi je̱'e̱ Jesús y'adzoowu̶ ajku̶xy: “Naygyweentu̶'ajtu̶gu̶x ka'pu̶ pu̶n xywyin'u̶u̶ngu̶xu̶ch. 6Je̱' ko minaamb je̱'e̱ ja'ay may, mu̶dyiibu̶ nayyajnaxaanu̶gu̶xpu̶ñ neby u̶u̶chu̶ñ. Myu̶na'anaangu̶xy: ‘U̶u̶ch je̱' je̱'e̱ Cristo,’ y may je̱'e̱ ja'ay win'u̶u̶naangu̶xy.
7“Ko naty je̱'e̱ ayuuk miich mmu̶doogu̶xy ko naty je̱'e̱ ja'ay xii yaa chiptuungu̶xy, ka'p mdzu̶gu̶u̶ygyu̶xu̶ch. Je̱' ko ni'igu̶'u̶tún ni'igu̶'u̶jadu̶u̶wu̶p je̱'e̱ du'un, y ka'p naty je̱'e̱ naaxwiimbu̶ du'un timykyu̶jxp timytyu̶gooybyu̶ch. 8Nayñibu̶du̶'u̶gu̶u̶wu̶p je̱'e̱ naax kajpt mu̶u̶d je̱'e̱ wiingpu̶ naax kajpt y gobierno mu̶u̶d je̱'e̱ wiingpu̶ gobierno, y minaamb mu̶k temblor mayñaax maygyajpt, y minaamb mu̶j'yuu xii yaa#13.8 Nije̱' wiingpu̶ versión myu̶na'añ: y ka'p je̱'e̱ ja'ay ñaymyu̶jootkujk'ada'anu̶u̶ju̶ch ajku̶xy. Y tzondaaknu̶ naty adaa tzaachpyu̶ du'un.
9“Naygyweentu̶'ajtu̶gu̶x miich ku̶'u̶m, je̱' ko xykyu̶'u̶ye̱gaangu̶xp je̱'e̱ ja'ay ma je̱'e̱ tuungmu̶u̶dpu̶du̶jk ajku̶xyu̶ñ y xychaachtyuungu̶xu̶p ma je̱'e̱ judío ja'ay ñaymyujktaakt ajku̶xyu̶ñ. Xyajnú̶kxku̶xu̶p mach ma je̱'e̱ gobernador y ma je̱'e̱ mu̶j'ane̱'e̱mbu̶ winduuy ajku̶xyu̶ñ, je̱' gyu̶xpu̶ ko u̶u̶ch naty xymyu̶bu̶jkku̶xy y du'unu̶tz je̱'e̱ tu̶y'ajt mu̶baad mye̱jkku̶xy mu̶u̶d u̶u̶ch kyu̶xpu̶ ma je̱' wyinduuy ajku̶xyu̶ñ. 10Ma naty je̱'e̱ tiempo ka'anu̶ paatyñu̶ mu̶naa je̱'e̱ naaxwiimbu̶ kyu̶xa'añ tyu̶goya'añu̶ñ, yajkapxwa'kxta'awu̶p je̱'e̱ ayuuk tu̶y'ajt jayu̶jp mu̶dyiibu̶ aanu̶mu̶ ni'idzooku̶ñ ye̱jkpu̶ñ ma je̱'e̱ naax kajpt kú̶xyu̶ju̶ñ. 11Y ka'p mdajku̶xu̶ch mmaaygyu̶xu̶ch neby mmu̶naangu̶xu̶chu̶ñ ko naty xykyu̶'u̶ye̱jkku̶xy mach ma je̱'e̱ tuungmu̶u̶dpu̶du̶jk ajku̶xyu̶ñ. Ko naty je̱'e̱ hooru̶ timypyaady mu̶naa mgápxku̶xu̶chu̶ñ, je̱' mgápxku̶xu̶py je̱'e̱ ayuuk mu̶dyiibu̶ je̱'e̱ Dios naty xymyooygyu̶xpu̶ñ, je̱' ko ka'p naty miich kapxaangu̶xp, je̱'e̱ Espíritu Santo naty kapxaamb. 12Je̱'e̱ tu'kke̱'e̱xkpu̶ ja'ay amíñ u̶xyu̶py je̱'e̱ ñaygyu̶'u̶ye̱gaanu̶gu̶xy ko wan yaj'o'ku̶gu̶xyu̶, je̱'e̱ teedy je̱' je̱'e̱ y'ung ku̶'u̶ye̱gaangu̶xp; y je̱'e̱ ung ana'k myu̶dzibu̶'u̶waangu̶xypy je̱'e̱ tyaj tyeedy y yaj'o'ogaangu̶xy. 13Y ku̶xyu̶ je̱'e̱ ja'ay miich xykya'a'ixa'an xykya'atzoga'anu̶ch ajku̶xy, je̱' gyu̶xpu̶ ko u̶u̶ch naty xymyu̶bu̶jkku̶xy, peru̶ pu̶n u̶u̶ch amuumdu'ugjoot xymyu̶bu̶jkpu̶ñ u̶xtu̶ mabaad y'o'ogyu̶ñ, je̱' je̱'e̱ y'aanu̶mu̶ ni'idzo'ogu̶p ajku̶xy.
14“Ko naty miich m'ijxku̶xy je̱'e̱ ju̶bu̶kpu̶ tu̶ tyu̶gu̶'u̶y ma je̱'e̱ mu̶jtzajptu̶jku̶ñ ma ka'p mu̶baad y'ityu̶ñ,#13.14 Nije̱' wiingpu̶ versión myu̶na'añ: je̱'e̱ mu̶dyiibu̶ je̱'e̱ Dios y'ayuuknajtzkapxu̶u̶ybyu̶ Daniel jékyu̶p ñimu̶dyaaku̶ñ. —pu̶n adaa naky kapxpu̶ñ, wan winju̶wu̶'u̶y—, mu̶'it miich ajku̶xy pu̶njaty naty jim Judea naaxjooty tzu̶naaygyu̶xpu̶ñ, mgue̱e̱kku̶xu̶ch mnú̶kxku̶xu̶ch yuugjooty e̱e̱myjyooty; 15y pu̶njaty naty tu̶jkku'uduum yajpaatku̶xpu̶ñ, ka'p je̱'e̱ mu̶baad myu̶najkku̶xy, ni tyu̶gooty kya'atu̶gu̶u̶ygyu̶xu̶ch nu̶kxy tii yajpu̶dzu̶u̶mgu̶xy; 16y pu̶njaty naty kamjooty yajpaatku̶xpu̶ñ, ka'p je̱'e̱ mu̶baad wyimbijtku̶xy ma je̱'e̱ tyu̶jku̶ñ nu̶kxy je̱'e̱ wyit yajpu̶dzu̶u̶mgu̶xy. 17¡Ayo'onbadaamb je̱'e̱ to'oxyu̶jktu̶jk ajku̶xy mu̶dyiibu̶ naty ungjom'ijtku̶xpu̶ñ je̱'e̱ mu̶'it xu̶u̶ o je̱'e̱ mu̶dyiibu̶ naty ungma'axúng yajtzi'tzku̶xpu̶ñ! 18Mmu̶bu̶jktzoogu̶x je̱'e̱ Dios ka'pu̶ adaa du'un tyunu̶u̶ jyadu̶u̶ju̶ch tu̶u̶chpyojjooty. 19Je̱' ko mu̶j je̱'e̱ tzaachpyu̶ ayo'on tyuna'añyii jyada'añyii, neby ka'p nimu̶naaxu̶u̶nu̶ tyuñyii jyadyiiñu̶ju̶ñ maabu̶ je̱'e̱ Dios je̱'e̱ naaxwiimbu̶ yajkojyu̶ñ, y ka'p du'un nimu̶naaxu̶u̶ y'okjajtu̶nu̶ch. 20Y pu̶nu̶ ka'p je̱'e̱ Windzú̶n Dios yajwe̱e̱nu̶ju̶'u̶y je̱'e̱ mu̶jtzaachpyu̶ mu̶j'ayo'on, ka'p u̶xyu̶py ni pu̶n ñi'idzo'ogy; peru̶ tu̶ je̱'e̱ yajwe̱e̱nu̶ju̶'u̶y je̱'e̱ mu̶jtzaachpyu̶, je̱' gyu̶xpu̶ ko je̱'e̱ jya'ay tzoky ju̶wu̶'u̶y je̱'e̱ mu̶dyiibu̶ tu̶ win'ixyu̶ñ.
21“Pu̶nu̶ jii miich naty pu̶n xyñu̶maaygyu̶xy: ‘Ok'ijxku̶x, chaa je̱'e̱ Cristo’, o ok'ijxku̶x, ‘chim'eemby je̱'’, ka'p mmu̶bu̶jkku̶xu̶ch. 22Je̱' ko minaangu̶xp anu̶u̶'ajtpu̶du̶jk y myu̶na'anaangu̶xy ko jye̱'e̱ju̶ch ajku̶xy je̱'e̱ Cristo y ko jye̱'e̱ju̶ch ajku̶xy je̱'e̱ Dios y'ayuuknajtzkapxu̶u̶ybyu̶du̶jk, y tyuungu̶xu̶py je̱'e̱ ijxpe̱jt y mu̶jwinma'añ neby je̱'e̱ ja'ay du'un win'u̶ngu̶xu̶chu̶ñ, u̶xtu̶ je̱'e̱baad wyin'u̶ngu̶xu̶py je̱'e̱ mu̶dyiibu̶ je̱'e̱ Dios ku̶'u̶m tu̶ win'ixyu̶ñ. 23¡Naygyueentu̶'ajtu̶gu̶xu̶! Tu̶ yam du'un ku̶xyu̶ jayu̶jp n'awaanu̶ ajku̶xy.
Neby je̱'e̱ Dios y'Ung myiinu̶chu̶ñ ja'adu'ook
(Mt 24.29-35, 42, 44; Lc 21.25-36)
24“Peru̶ ko naty je̱'e̱ mu̶jtzaachpyu̶ ayo'on tu̶ tyuunda'ayii jyajtta'ayii, je̱'e̱ xu̶u̶ wingodzu̶'u̶wu̶p je̱', je̱'e̱ po'o ka'p je̱'e̱ y'ok'aanu̶ch, 25je̱'e̱ mu̶dza'a ka'awu̶p je̱'e̱ tzajpjooty y yu'kxu̶p je̱' ku̶xyu̶ tijaty jiiby tzajpjooty mu̶k'ajtmu̶u̶du̶ñ. 26Mu̶'it u̶u̶ch nyaj'íxu̶ch u̶u̶ch je̱' je̱'e̱ ja'ay mu̶dyiibu̶ tzon tzajpjooty ko u̶u̶ch naty nmiñ jokjooty mu̶u̶d u̶u̶ch je̱'e̱ nmu̶jmu̶k'ajtu̶ñ y nmu̶j'oy'ajtu̶ñ. 27Chi u̶u̶ch je̱'e̱ n'ángelestu̶jk ngué̱xu̶ch wan u̶u̶ch je̱'e̱ nja'ay ku̶xyu̶ xyajmujktaayu̶ch ajku̶xy, je̱'e̱ mu̶dyiibu̶ u̶u̶ch tu̶ nwin'ixyu̶ñ, ma je̱'e̱ xu̶u̶ pyu̶dzu̶myu̶ñ y ma je̱'e̱ xu̶u̶ kya'ayu̶ñ, ma je̱'e̱ ju̶u̶mboj pyu̶dzu̶myu̶ñ y ma je̱'e̱ tu̶u̶chpyoj pyu̶dzu̶myu̶ñ, ma je̱'e̱ naax chonda'agyu̶ñ y ma je̱'e̱ tzajp kyugu̶xu̶'u̶yu̶ñ.
28“Jajtku̶x abu̶jkku̶x adaa higueeru̶ u̶xpu̶jku̶ñ: Ko je̱'e̱ y'aakx naty y'ungjátyu̶ch y jyitztu̶gu̶'u̶y, mu̶'it mnejwu̶u̶ygyu̶xy ko tu̶ wyingoonu̶ mu̶naa pyoottu̶gu̶u̶yñu̶ju̶ñ. 29Y nandu'un ko naty adaa du'un m'ijxku̶xy mdú̶kxku̶xy tyuñyii jyadyii neby yam tu̶ nnu̶maaygyu̶xyu̶ñ, nejwu̶u̶ygyu̶x du'un ko je̱'e̱ xu̶u̶ tiempo naty tu̶ timypyaatnu̶ mu̶naa u̶u̶ch nwimbídu̶chu̶ñ u̶u̶ch je̱' je̱'e̱ ja'ay mu̶dyiibu̶ tzon tzajpjooty. 30Janch tu̶y'ajtu̶ñ du'un nnu̶maaygyu̶xy ko adaa du'un ku̶xyu̶ tyunu̶u̶ jyadu̶u̶ju̶ch, ma naty je̱'e̱ ja'ay ka'anu̶ y'o'ktaaygyu̶xyu̶ñ je̱'e̱ mu̶dyiibu̶ jada'achámbu̶ xu̶u̶ tiempo tzu̶naaygyu̶xp jugy'ajtku̶xpu̶ñ. 31Je̱'e̱ tzajp y je̱'e̱ naaxwiimbu̶ kú̶xu̶p tu̶góyu̶p je̱', peru̶ u̶u̶ch je̱'e̱ n'ayuuk ka'p je̱'e̱ nimu̶naaxu̶u̶ kyú̶xu̶ch tyu̶góyu̶ch.
32“Peru̶ je̱'e̱ xu̶u̶ y je̱'e̱ hooru̶ ni pu̶n je̱'e̱ ka'anejwu̶'u̶y mu̶naa je̱'e̱ du'un tyuna'añyii jyada'añyiiju̶ñ, ni je̱'e̱ ángelestu̶jk tzajpjootypyu̶ je̱'e̱ ka'anejwu̶u̶ygyu̶xy, ni je̱'e̱ Dios y'Ung. Je̱'e̱ Dios Teedy je̱'e̱ je'eyu̶ nejwu̶u̶by.
33“Ni'ixu̶'u̶ miich ijtku̶x y naygyweentu̶'ajtu̶gu̶x,#13.33 Nije̱' wiingpu̶ jaaybyu̶du̶jk myu̶naangu̶xy: y mmu̶bu̶jktzoogu̶x je̱'e̱ Dios jaboom jaboom. je̱' ko ka'p mnejwu̶u̶ygyu̶xy mu̶naa du'un tyuna'añyii jyada'añyiiju̶ñ. 34Je̱'e̱ xu̶u̶ je̱'e̱ tiempo mu̶dyiibu̶ minaambu̶ñ, du'un je̱' neby ja'ay tu'ug mu̶dyiibu̶ tzonaamb nu̶kxaambu̶ñ wiing naaxjooty ju̶gue̱m it. Ma ka'anu̶ naty chooñ, chi je̱'e̱ tyuumbu̶du̶jk yajni'ipú̶ky, ko je̱'e̱ tyu̶jk wan kweentu̶'ajtu̶xyu̶ ajku̶xy, nidu'ug nidu'ug je̱'e̱ tyuung yajni'ipú̶ky tii tyuungu̶xu̶byu̶ñ, y nu̶ma'ay je̱'e̱ tyuumbu̶ mu̶dyiibu̶ je̱'e̱ tyu̶jk'aguuy kweentu̶'ajtu̶xu̶p ko ka'p mya'awu̶ch. 35Y paadyu̶tz, juugy miich ijtku̶x, je̱' ko ka'p mnejwu̶u̶ygyu̶xy mu̶naa je̱'e̱ kudu̶jk wyimbida'añ ma je̱'e̱ tyu̶jku̶ñ, pu̶nu̶ naamgodzu̶u̶by, o pu̶nu̶ mu̶jkuwa'kxychuum, o pu̶nu̶ tu'ug tzeyyaaxp o ko naty tu̶ xyu̶u̶mu̶u̶yñu̶. 36Ka'p jyékyu̶ch ko tzojku̶ xyajja'tpe̱jtku̶xu̶ch y xypyaatku̶xu̶ch mjanchmaagu̶xy naty. 37Yu̶'u̶ mu̶dyiibu̶ miich tu̶ nyajmu̶dmu̶dyaakku̶xyu̶ñ nan nyajmu̶dmu̶dyaakypyu̶ch je̱'e̱ ja'ay du'un nigu̶xyu̶ ajku̶xy: ¡Ni'ixu̶'u̶ ijtku̶x!”
Currently Selected:
San Marcos 13: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
