San Marcos 8
8
Jesús ja'ay mu̶daaxk mil yajkáy
(Mt 15.32-39)
1Je̱'e̱ mu̶'it xu̶u̶ je̱'e̱ mu̶'it tiempo je̱'e̱ mayjya'ay najty ja'adu'ook tu̶ ñayyo'oymyujku̶gu̶xy ma je̱'e̱ Jesús najtyu̶ñ, y ka'p najty ni tii mu̶u̶du̶ch ajku̶xy tii kyaaygyu̶xu̶py y'uukku̶xu̶byu̶ñ. Mu̶'it je̱'e̱ Jesús dyiscípulotu̶jk yaaxu̶ y chi nu̶maay ajku̶xy:
2—Mú̶ku̶ch adaa mayjya'ay njanchpa'a''ayóy ajku̶xy, je̱' ko cham mu̶du̶gu̶u̶g xu̶u̶ maabu̶ u̶u̶ch ya nmu̶dja'tku̶xyu̶ñ y ka'p ni tii mu̶u̶du̶ch ajku̶xy tii kyaaygyu̶xu̶py y'uukku̶xu̶byu̶ñ. 3Y ko u̶u̶ch du'un ayuu n'o'kke̱jxwimbijtku̶xu̶ch ma je̱'e̱ jyu̶u̶n tyu̶jk ajku̶xyu̶ñ, tzojku̶ je̱'e̱ mumjaty tu'ugujk yu'o'kku̶xu̶ch, je̱' ko ju̶gue̱mjaty nije̱' tu̶ chóngu̶xy.
4Chi je̱'e̱ dyiscípulotu̶jk y'adzoowu̶ ajku̶xy:
—¿Peru̶ neby je̱'e̱ mayjya'ay ya nyajkaay nyaj'uuku̶mu̶ch ajku̶xy neby adaa it lugaar yaaju̶ñ maa ka'p pu̶n chu̶na'ayu̶ñ?
5Chi je̱'e̱ Jesús yajtu̶u̶wu̶ ajku̶xy:
—¿Naag je̱'e̱ tzajkaagy miich mu̶u̶du̶ch ajku̶xy?
—Chi y'adzooy ajku̶xy —juxtujk.
6Mu̶'it je̱'e̱ Jesús myu̶naañ ko je̱'e̱ mayjya'ay wan naxwe̱tztaaygyu̶xy naaxkú̶xy, chi je̱'e̱ juxtujkpu̶ tzajkaagy konu̶'ky, y ko je̱'e̱ Dioskujuuyu̶p yejky ma je̱'e̱ Diosu̶ñ, chi adugu̶u̶y y mooy je̱'e̱ dyiscípulotu̶jk ajku̶xy, y je̱' je̱'e̱ yajwa'kxku̶x ma je̱'e̱ mayjya'ayu̶ñ. 7Nan jim najty pi'k'akx'úng nije̱' me̱tzk tu̶gu̶u̶g mu̶u̶du̶ch ajku̶xy, chi je̱'e̱ Jesús je̱'e̱ Dioskujuuyu̶p yejky ma je̱'e̱ Diosu̶ñ mu̶u̶d je̱'e̱ pi'k'akx'úng kyu̶xpu̶, y mooy je̱'e̱ dyiscípulotu̶jk ajku̶xy ko wan nandu'un yajwa'kxku̶xy ma je̱'e̱ mayjya'ayu̶ñ. 8Nigu̶xyu̶ je̱'e̱ mayjya'ay kyaay y'uuky ajku̶xy janch ku'uxyu̶, y jyakyajpu̶du̶'kku̶x je̱'e̱ tzajkaagy kaaydyúk y je̱'e̱ akx tzu'tztúk juxtujk kach mu̶dyiibu̶ najty tu̶ ñadu̶gu̶'u̶yu̶ñ. 9Ja'awe̱e̱n najty kya'amu̶daaxk mílu̶ch je̱'e̱ mu̶dyiibu̶ kaay uukku̶xu̶ñ. Chi je̱'e̱ Jesús je̱'e̱ mayjya'ay u̶xke̱jxnu̶, 10y chi byarcu̶tu̶gu̶u̶yñu̶ mu̶u̶d je̱'e̱ dyiscípulotu̶jk ajku̶xy y ñú̶kxku̶xy jim Dalmanuta naaxjooty.
Je̱'e̱ fariseotu̶jk yujkwaangu̶xy je̱'e̱ ijxpe̱jt mu̶jwinma'añbyu̶
(Mt 16.1-4; Lc 12.54-56)
11Chi je̱'e̱ fariseotu̶jk jya'ty ajku̶xy ma je̱'e̱ Jesús najtyu̶ñ, chi je̱'e̱ y'u̶xpu̶jku̶ñ tu̶gu̶y yajtzibu̶u̶ygyu̶xpu̶ mu̶u̶d je̱'e̱ Jesús. Y neby mu̶baad joot'ijx winma'añ'ijxku̶xyu̶ñ, chi yujkwaanu̶ ajku̶xy ko je̱'e̱ ijxpe̱jt mu̶jwinma'añbyu̶ wan nije̱' yaj'ijxu̶gu̶xyu̶ pu̶nu̶ jaanch je̱'e̱ Dios najty tu̶ kyexyii. 12Chi je̱'e̱ Jesús taj may ñayjyu̶wu̶u̶yu̶, chi myu̶kxejy y myu̶naañ:
—¿Ti adaa ja'ay ko yujkwaangu̶xy je̱'e̱ ijxpe̱jt mu̶jwinma'añbyu̶? Janch tu̶y'ajtu̶ñ du'un nnu̶maaygyu̶xy ko ka'p je̱'e̱ ijxpe̱jt ni tu'ug yajmooygyu̶xu̶ch.
13Mu̶'it je̱'e̱ Jesús je̱'e̱ fariseotu̶jk ku'ukeeky ajku̶xy y byarcu̶tu̶gu̶u̶y ja'adu'ook ñu̶kxy jim mejy'awiimb.
Fariseotu̶jk lyevaduru̶ ajku̶xy
(Mt 16.5-12)
14Je̱'e̱ discípulotu̶jk tu̶ najty je̱'e̱ ju̶kxy pu̶ky ja'aydyu̶gooygyu̶xy ko byarcu̶tu̶gu̶u̶y ajku̶xy, y je'eyu̶ najty tzajkaagy tu'ug mu̶u̶du̶ch ajku̶xy. 15Chi je̱'e̱ Jesús ñu̶maayu̶ ajku̶xy:
—Ok'ijxku̶x, naygyweentu̶'ajtu̶gu̶x, ka'p je̱'e̱ fariseotu̶jk lyevaduru̶ mgweentu̶tuunu̶ch ajku̶xy ni je̱'e̱ Herodes lyevaduru̶.
16Chi je̱'e̱ discípulotu̶jk ñayñu̶maaydyu̶gu̶u̶yu̶gu̶xy amíñ u̶xyu̶py ko je̱'e̱ chajkaagy najty ka'p tu̶ koongu̶xy.
17Jesús ñejwu̶u̶y je̱' neby najty ñayñu̶maayu̶gu̶xyu̶ñ, y chi ñu̶maayu̶ ajku̶xy:
—¿Ti ko du'un mmu̶naangu̶xy ko je̱'e̱ tzajkaagy ka'p mmu̶u̶du̶ch ajku̶xy? ¿Nej ka'anu̶ mwinju̶wu̶u̶ygyu̶xyñu̶ y ka'anu̶ mgweentu̶tuungu̶xyñu̶ tii u̶u̶ch nduumbyu̶ñ? ¿Ti ko mjanchku'ujuuñu̶ch ajku̶xy? 18Wiin mu̶u̶d miich ajku̶xy y ka'p tii m'ijxwu̶'u̶mgu̶xy, y tadzak mu̶u̶d miich ajku̶xy y ka'p tii mmu̶doowu̶'u̶mgu̶xy. ¿Nej ka'p mja'aymye̱jtzku̶xy tijaty u̶u̶ch tu̶ nduñu̶ñ? 19Mu̶naaba u̶u̶ch je̱'e̱ mu̶gooxkpu̶ tzajkaagy nyajwa'kxy ma je̱'e̱ mu̶gooxk milpu̶ja'ayu̶ñ, ¿naag kach je̱'e̱ kaydyuk tzu'tztúk myajpu̶du̶'kku̶xy je̱'e̱ mu̶dyiibu̶ nadu̶gu̶u̶yu̶ñ?
Chi y'adzooy ajku̶xy:
—Majmé̱tzk kach.
20—Y mu̶naaba u̶u̶ch je̱'e̱ juxtujkpu̶ tzajkaagy nyajwa'kxy ma je̱'e̱ mu̶daaxk milpu̶ja'ayu̶ñ, ¿naag kach myajpu̶du̶'kku̶xy je̱'e̱ mu̶dyiibu̶ nadu̶gu̶u̶yu̶ñ?
Chi y'adzooy ajku̶xy:
—Juxtujk kach.
21Mu̶'it je̱'e̱ Jesús ñu̶maayu̶ ajku̶xy:
—¿Y ni chambaadu̶tz mga'awinju̶wu̶u̶ygyu̶xyñu̶ju̶?
Jesús je̱'e̱ wiindzja'ay tu'ug yajtzo'ogy jim Betsaida
22Chi oy jya'tku̶xy jim Betsaida, y chi je̱'e̱ Jesús je̱'e̱ wiindzja'ay tu'ug yajninú̶kxy ajku̶xy, cham mu̶waandaakku̶xy mu̶nukxtaakku̶xy ko wan ni'idóñ. 23Chi je̱'e̱ Jesús je̱'e̱ wiindzja'ay majch ma je̱'e̱ kyu̶'u̶ju̶ñ y mu̶dkajptpu̶dzu̶u̶my. Chi je̱'e̱ wyiin yajxóku̶ mu̶u̶d je̱'e̱ chujy'aanu̶u̶, chi ku̶'u̶ni'ixajy y yajtu̶u̶y pu̶nu̶ ijxp najty jinjaty we̱njaty. 24Chi je̱'e̱ wiindzja'ay aga'an wyindu̶kxu̶'ky, y nu̶maay je̱'e̱ Jesús:
—N'ijxypyu̶ch je̱'e̱ ja'ay ajku̶xy, du'un je̱'e̱ kyu̶xu̶'kku̶xy neby je̱'e̱ kepy tzaaju̶ñ, peru̶ yo'oby ajku̶xy.
25Chi je̱'e̱ Jesús je̱'e̱ wiindzja'ay wyiin ja'adu'ook ni'idoonu̶, y chi je̱'e̱ wiindzja'ay y'ijxu̶'ky oy yajxón y chooky du'un. Oy wa'adz najty ku̶xyu̶ tii ijxnu̶. 26Mu̶'it je̱'e̱ Jesús kye̱jxu̶ ma je̱'e̱ tyu̶jku̶ñ, y ñu̶maayu̶:
—Ka'p kajptjooty mwimbijtnu̶ch.#8.26 Nije̱' jaaybyu̶du̶jk myu̶naangu̶xy: y ni pu̶n adaa du'un kajptjooty mga'ayajmu̶dmu̶dya'agu̶ch.
Pedro nigapxy ko je̱'e̱ Jesús je̱' je̱'e̱ Cristo
(Mt 16.13-20; Lc 9.18-21)
27Ko adaa du'un tyuundaay jyajttaayu̶, chi je̱'e̱ Jesús ñu̶kxy mu̶u̶d je̱'e̱ dyiscípulotu̶jk ma je̱'e̱ mutzk kajpt nije̱'e̱ju̶ñ jim Cesarea je̱'e̱ Filipo naaxjooty. Tu'ugujk je̱'e̱ Jesús dyiscípulotu̶jk yajtu̶u̶y ajku̶xy:
—¿Neby je̱'e̱ ja'ay myu̶naangu̶xy ko pu̶n u̶u̶ch?
28Chi je̱' y'adzooy ajku̶xy:
—Nije̱'e̱játy je̱'e̱ ja'ay myu̶naangu̶xy ko miich je̱' je̱'e̱ Juan Bautista, y naagu̶ñ myu̶naangu̶xy ko miich je̱' je̱'e̱ Elías, y jaknaagu̶ñ myu̶naangu̶xy ko miich je̱'e̱ nidu'ugtu̶ je̱'e̱ Dios y'ayuuknajtzkapxu̶u̶ybyu̶du̶jk.
29—Chi je̱'e̱ Jesús yajtu̶u̶wu̶ ajku̶xy:
—Y miich ajku̶xy, ¿neby m'okmu̶naangu̶xpu̶ ko pu̶n u̶u̶ch?
Chi je̱'e̱ Pedro y'adzooy:
—Miich je̱' je̱'e̱ Cristo.#8.29 Je̱'e̱ Mesías
30Chi je̱'e̱ Jesús ñu̶maayu̶ ajku̶xy ko ka'p du'un ni pu̶n nu̶maaygyu̶xu̶ch ko je̱' najty je̱'e̱ Cristo.
Jesús nigapxy ko y'o'oga'añ
(Mt 16.21-28; Lc 9.22-27)
31Chi je̱'e̱ Jesús dyiscípulotu̶jk yaj'u̶xpu̶jktu̶gu̶u̶y, myu̶naañ ko tzipku̶xp ko u̶u̶ch je̱' je̱'e̱ ja'ay mu̶dyiibu̶ tzon tzajpjooty, ka'anaagnáx u̶u̶ch je̱'e̱ ayo'on nbaada'añ, ka'p u̶u̶ch xymyu̶jpu̶da'agu̶ch je̱'e̱ amu̶jja'aydyu̶jk ajku̶xy, je̱'e̱ teedy windzu̶ndu̶jk y je̱'e̱ Dios y'ane̱'e̱mu̶ñ windzu̶ndu̶jk ajku̶xy. Chi ñu̶maayu̶ ajku̶xy ko najty yaj'o'oga'añyii ajku̶xy, peru̶ ko najty kudu̶gu̶u̶g xu̶u̶ ja'adu'ook njuugypyu̶ga'añ. 32Wa'adzu̶ je̱'e̱ du'un yajwinju̶wu̶u̶ydyaayu̶ ajku̶xy neby najty tyuna'añyii jyada'añyiiju̶ñ. Mu̶'it je̱'e̱ Pedro je̱'e̱ Jesús woobu̶dzu̶u̶my; mu̶dnu̶kxy abu̶kytyuum, oy jim ojy. 33Peru̶ chi je̱'e̱ Jesús y'ijxwimbijty, windu̶kxpejty je̱'e̱ dyiscípulotu̶jk ajku̶xy y ojy je̱'e̱ Pedro, cham nu̶ma'ay:
—¡Winwa'ktuutku̶ch yaa, miich mu̶jku'u! Miich ka'p miich je̱'e̱ mwinma'añ du'un mbu̶da'agy neby je̱'e̱ Dios tzokyu̶ñ, du'un miich je̱'e̱ mwinma'añ miich mbu̶da'agy neby je̱'e̱ ja'ay tzokyu̶ñ ajku̶xy.
34Mu̶'it je̱'e̱ Jesús je̱'e̱ dyiscípulotu̶jk mu̶j'yaaxy y je̱'e̱ mayjya'ay, y chi nu̶maay ajku̶xy:
—Pu̶nu̶ jii u̶u̶ch pu̶n xypyanu̶kxa'añ, wan je̱'e̱ kyu̶'u̶mdzojku̶ñ ja'aydyu̶gooydya'ay y wan u̶u̶ch xypyanu̶kxy oy nej jyat y'abé̱du̶ch, du'un neby je̱'e̱ mgruutz nu̶wu̶'u̶y mgabu̶'kku̶xyu̶ñ y xypyanú̶kxku̶xu̶chu̶ch. 35Wan pu̶nja'ayu̶ch mu̶dyiibu̶ je̱'e̱ jyugy'ajtu̶ñ ka'p ye̱ga'añ ma je̱'e̱ o'ku̶ñ ke̱e̱ku̶ñ, yajtu̶goye̱e̱mby jyugy'ajtu̶ñ je̱'; peru̶ je̱'e̱ mu̶dyiibu̶ je̱'e̱ jyugy'ajtu̶ñ ye̱jkpu̶ñ ma je̱'e̱ o'ku̶ñ ke̱e̱ku̶ñ mu̶u̶d u̶u̶ch kyu̶xpu̶ y mu̶u̶d je̱'e̱ oybyu̶ ayuuk tu̶y'ajt kyu̶xpu̶ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, pyade̱e̱mby jyugy'ajtu̶ñ je̱'. 36¿Ti oy'ajtu̶ñ je̱'e̱ ja'ay du'un y'okpaatypy, pu̶nu̶ tu̶ ku̶xyu̶ paady je̱'e̱ kuwit'ajt kumeeñ'ajtu̶ñ ya naaxwiiñ y ka'p je̱'e̱ y'aanu̶mu̶ yajni'idzo'ogy? 37O ja'adu'knáx, ¿du'uñdyu̶ je̱'e̱ ja'ay y'aanu̶mu̶ jyugy'ajtu̶ñ da'a mu̶baad okkujuy? 38Pu̶nu̶ jii u̶u̶ch pu̶n xymyu̶dzo'oydyúñ y nan pu̶nu̶ xymyu̶dzo'oydyuunu̶byu̶ch je̱'e̱ n'ayuuk ndu̶y'ajt ma je̱'e̱ pokyjya'aydyu̶jk wyinduuy y ma je̱'e̱ mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶jkku̶xyu̶ñ, nan nmu̶dzo'oydyúnu̶byu̶ch je̱' ajku̶xy, u̶u̶ch je̱' je̱'e̱ ja'ay mu̶dyiibu̶ tzon tzajpjooty ko u̶u̶ch naty nwimbity ya naaxwiiñ mu̶u̶d u̶u̶ch je̱'e̱ nDeedy y'oy'ajt y myu̶k'ajtu̶ñ y mu̶u̶d u̶u̶ch je̱'e̱ n'ángelestu̶jk ajku̶xy mu̶dyiibu̶ je̱'e̱ jyoot wyinma'añ wa'adzu̶ñ ajku̶xy.
Currently Selected:
San Marcos 8: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
