San Marcos 9
9
1Nandu'un je̱'e̱ Jesús jyaknu̶maayu̶ ajku̶xy:
—Janch tu̶y'ajtu̶ñ du'un nnu̶maaygyu̶xy ko nije̱'e̱játy je̱'e̱ ja'ay mu̶dyiibu̶ ya cham yajpaatku̶xpu̶ñ, ka'p je̱'e̱ y'o'kku̶xu̶ch, u̶xtu̶ koonu̶ je̱'e̱ Dios y'ane̱'e̱mu̶ñ jayu̶jp ijxku̶xu̶ch myiñ mu̶u̶d je̱'e̱ myu̶k'ajtu̶ñ.
Jesús ñi'kx yajtu̶gách
(Mt 17.1-13; Lc 9.28-36)
2Kududujk xu̶u̶ je̱'e̱ Jesús ñu̶kxy ma tu'ug kopt janch kú̶xpu̶ju̶ñ, mu̶dnu̶kxy je̱'e̱du̶'ajty je̱'e̱ Pedro, mu̶u̶d je̱'e̱ Santiago y mu̶u̶d je̱'e̱ Juan. Y jim je̱'e̱ Jesús ñi'kx yajtu̶gajch ma je̱' wyinduuy ajku̶xyu̶ñ. 3Chi je̱'e̱ wyit oy jyaty janch adu̶kxp ajajp y janch poob, ni pu̶n wyit du'un ka'ayajwa'ach oy naty du'uñdyu̶ ja'adimypyujpu̶. 4Chi je̱'e̱ Elías ijxy mu̶u̶d je̱'e̱ Moisés mu̶dkapx mu̶dmu̶dyaakku̶xy najty je̱'e̱ Jesús. 5Chi je̱'e̱ Pedro je̱'e̱ Jesús nu̶maay:
—Windzú̶n, ¡oy du'un ko u̶u̶ch nyaaju̶ch ajku̶xy! N'o'kkojku̶xyu̶ch tu̶jkkémy tu̶gu̶u̶g; tu'ug miich mje̱'e̱'ádu̶ch, tu'ug je̱'e̱ Moisés je̱'e̱'ádu̶ch y ja'adu'ug je̱'e̱ Elías je̱'e̱'ádu̶ch.
6Je̱'e̱ discípulotu̶jk janch tzu̶gu̶u̶ygyu̶xp je̱'e̱ najty, y paady je̱'e̱ Pedro najty ka'p nejwu̶'u̶y tii du'un kyapxypy myu̶dyaakypyu̶ñ. 7Timymyu̶'ityu̶ je̱'e̱ jok ye̱e̱g ñaaxku̶daaky y yajni'idu̶gooydyaayu̶ ajku̶xy. Mu̶'it je̱'e̱ ayuuk tu'ug jokjooty yajmu̶dooy, myu̶naañ: “U̶u̶ch adaa n'ung mu̶dyiibu̶ u̶u̶ch oy ndzojkypy nju̶wu̶u̶ybyu̶ñ: amdo'ijtu̶ ajku̶xy je̱' y'ayuuk.” 8Timymyu̶'ityu̶ ju'uwu̶dítyu̶ jya'a'ijxwu̶dijty ajku̶xy, y ka'p ni pu̶n maa ijxku̶xy je'eyu̶du̶'ajty je̱'e̱ Jesús naydyu'umbajk ijxku̶xy.
9Mu̶najkku̶xnu̶py najty koptku̶xp, chi je̱'e̱ Jesús yajni'ipu̶jku̶ ajku̶xy ko ka'p du'un ni pu̶n yajmu̶dmu̶dyaakku̶xu̶ch neby najty tu̶ ijxku̶xyu̶ñ, u̶xtu̶ koonu̶ u̶u̶ch je̱' je̱'e̱ ja'ay mu̶dyiibu̶ tzon tzajpjooty naty tu̶ njuugypyú̶kyu̶ch. 10Paady je̱'e̱ du'un ka'p jya'amu̶dyaaky ajku̶xy; amoñyu̶ je̱'e̱ du'un jya'a'ijtku̶xy agu̶ je̱', oy najty ja'amu̶daj ja'amu̶maaygyu̶xy ñayyajtu̶u̶wu̶gu̶xy amíñ u̶xyu̶py tii du'un tyijpyu̶ñ ko jyuugypyu̶ga'añ. 11Mu̶'it je̱'e̱ Jesús yajtu̶u̶y ajku̶xy:
—¿Ti je̱'e̱ Dios y'ane̱'e̱mu̶ñ windzu̶ndu̶jk ko du'un myu̶naangu̶xy ko je̱'e̱ Elías jayu̶jp minaamb mu̶dyiibu̶ jékyu̶p tzu̶naayu̶ñ y ka'p jye̱'e̱ju̶ch je̱'e̱ Cristo?
12Chi je̱'e̱ Jesús y'adzoowu̶ ajku̶xy:
—Tu̶y'ajtu̶ñ je̱'e̱ du'un ko je̱'e̱ Elías jayu̶jp myiinu̶ch y ka'p jye̱'e̱ju̶ch je̱'e̱ Cristo, y ko je̱' ku̶xyu̶ yaj'oyu̶ydya'awu̶p. ¿Y ti je̱'e̱ Dios ñaky ko du'un myu̶na'añ ko u̶u̶ch je̱' je̱'e̱ ja'ay mu̶dyiibu̶ tzon tzajpjooty nyajnaxa'añu̶ch je̱'e̱ tzaachpyu̶ ayo'on y may u̶u̶ch je̱'e̱ ja'ay xykya'a'ixa'anu̶ch? 13Peru̶ u̶u̶ch miich nnu̶maaygyu̶xypy ko je̱'e̱ Elías tu̶ je̱'e̱ ya y'oy, y je̱' ajku̶xy tyuungu̶x je̱' neby je̱'e̱ y'aa jyoot najty ku̶xyu̶ timychojkku̶xyu̶ñ; kuydyuuñ du'un ajku̶xy neby najty kuja'ay myiñu̶ñ ma je̱'e̱ Dios ñakyu̶ñ mu̶u̶d je̱'e̱ Elías kyu̶xpu̶.
Jesús ye̱e̱g'ana'k tu'ug yajtzo'ogy mu̶dyiibu̶ najty ka'a'oybyu̶mu̶u̶d
(Mt 17.14-21; Lc 9.37-43)
14Ko je̱'e̱ Jesús wyimbijty ajku̶xy ma je̱'e̱ jaknimaybyu̶ discípulotu̶jk najty tu̶ wyu̶'u̶mgu̶xyu̶ñ, chi je̱'e̱ mayjya'ay ijxy ju'uwu̶dítyu̶ ma je̱' ajku̶xyu̶ñ y nije̱' Dios y'ane̱'e̱mu̶ñ windzu̶ndu̶jk ajku̶xy, ayuuk janch yajtzibu̶u̶ygyu̶xy mu̶u̶d je̱'e̱ discípulotu̶jk ajku̶xy. 15Ko je̱'e̱ mayjya'ay je̱'e̱ Jesús ju̶jpku'ixu̶u̶y ajku̶xy, chi mu̶k'eemby poyu̶'u̶gyu̶ yajpókxpu̶ ninu̶kxy ajku̶xy cham yajnú̶kx yajju̶wu̶u̶ygyu̶xy. 16Chi je̱'e̱ Jesús yajtu̶u̶wu̶ ajku̶xy:
¿Ti ayuuk myajtzibu̶u̶ygyu̶xypy mu̶u̶d u̶u̶ch je̱'e̱ ndiscípulotu̶jk ajku̶xy?
17Chi je̱'e̱ ja'ay nidu'ugtu̶ y'adzooy mu̶dyiibu̶ najty jimu̶ñ:
—Windzú̶n chaa tu̶ nyajnimíñ adaa n'ungu̶ch mu̶dyiibu̶ ka'a'oybyu̶mu̶u̶d, tu̶ je̱'e̱ ka'a'óybyu̶ yaj'umu̶'u̶yii. 18Oymya'eemby je̱'e̱ myachyii y yaj'yách yajki'idyii naaxkú̶xy, y jyanchwin'ooby jyanch'aa'ooby, y jyanchtu̶u̶tzkeedy y janch juuñ je̱'e̱ ñi'kx kyopt jyaty. Tu̶ u̶u̶ch je̱'e̱ may'ajt nja'ayujkwa'añ ma yu̶'u̶ mdiscípulotu̶jku̶ñ ko je̱'e̱ ka'a'óybyu̶ wan yajpu̶dzu̶u̶mgu̶xy, peru̶ ka'p je̱'e̱ tu̶ mu̶madaakku̶xy.
19Chi je̱'e̱ Jesús y'adzooy:
—¡Miich ja'ay ajku̶xy mu̶dyiibu̶ ka'amu̶bu̶jkku̶xpu̶ñ je̱'e̱ Dios y'ayuuk tu̶y'ajt! ¿Naag xu̶u̶ naag po'o da'a n'okjakmu̶d'ijtku̶xu̶ch? ¿Naag xu̶u̶ naag po'o da'a n'okjakmu̶me̱kxtujkku̶xu̶ch? Mu̶dmiingu̶x yu̶'u̶ ye̱e̱g'ana'k yaa.
20Chi je̱'e̱ ye̱e̱g'ana'k mu̶dnu̶kxy ajku̶xy ma je̱'e̱ Jesús wyinduuyu̶ñ. Peru̶ je̱'e̱ ka'a'óybyu̶ je̱'e̱ Jesús ijxy, chi je̱'e̱ ye̱e̱g'ana'k yajmo'ttu̶gu̶u̶y; yajku̶daay naaxkú̶xy y yaj'yajch yajki'ty, cham jyanchwin'ooby jyanch'aa'ooby. 21Chi je̱'e̱ Jesús je̱'e̱ ye̱e̱g'ana'k tyeedy yajtu̶u̶wu̶:
—¿Mu̶naag jumu̶jt kujk ñu̶kxy maabu̶ adaa m'ung pya'ambétyu̶ñ?
Chi je̱'e̱ ungteedy y'adzooy:
—Ma'axúngnu̶ yu̶'u̶ najty ko pya'ambejty. 22Y ka'anaag'ook je̱'e̱ ka'a'óybyu̶ tu̶ yajju̶u̶ndu̶gu̶'u̶yii y tu̶ yajnu̶u̶du̶gu̶'u̶yii, neby du'un tu̶ ja'ayaj'o'oga'añu̶ñ. Pu̶nu̶ mu̶mada'age̱e̱mby, tun je̱'e̱ may'ajt pa'a''ayoogu̶ch ajku̶xy y pube̱jtku̶ch ajku̶xy.
23Chi je̱'e̱ Jesús ñu̶maayu̶:
—¿Nej ko ‘pu̶nu̶ mu̶mada'age̱e̱mby’? ¡Ka'p ni tii chípu̶ch pu̶n mmu̶bu̶jkpu̶ñ!
24Mu̶'it je̱'e̱ ye̱e̱g'ana'k tyeedy mu̶k'eemby yaaxkeeky:
—U̶u̶ch nmu̶bu̶jkypyu̶ch. ¡Pube̱jtku̶ch neby u̶u̶ch mu̶baad ni'igyu̶ njakmu̶bu̶kyu̶ñ!
25Ko je̱'e̱ Jesús ijxy ko je̱'e̱ mayjya'ay najty ni'igyu̶ myujk'adu̶u̶tzku̶xy ma je̱'e̱ju̶ñ, chi je̱'e̱ ka'a'óybyu̶ u̶x'ojy, y nu̶maay:
—Miich ka'a'óybyu̶ yaj'umu̶u̶byu̶ y yajnajtpu̶, u̶u̶ch miich yam n'ane'emby ko mbu̶dzú̶mu̶ch ma adaa ye̱e̱g'ana'ku̶ñ y ka'p nimu̶naaxu̶u̶ m'oktu̶gu̶u̶yñu̶ch ma yu̶'u̶ jyoot wyinma'añdyu̶ñ.
26Chi je̱'e̱ ka'a'óybyu̶ yaaxkeeky, y yajmo'ttu̶gu̶u̶y je̱'e̱ ye̱e̱g'ana'k ja'adu'ook. Y chi pyu̶dzu̶u̶my, yajwu̶'u̶my neby o'ogypyu̶ju̶ñ. Chi je̱'e̱ mayjya'ay mu̶dyiibu̶ najty jim windu̶kxnaaygyu̶xpu̶ñ myu̶naañ ajku̶xy ko najty tu̶ y'o'ogy. 27Chi je̱'e̱ Jesús je̱'e̱ ye̱e̱g'ana'k majch ma je̱'e̱ kyu̶'u̶ju̶ñ y wijtzu̶'ky, chi je̱'e̱ ye̱e̱g'ana'k tyu̶naaygyugu̶u̶y.
28Mu̶'it je̱'e̱ Jesús tyu̶jktu̶gu̶u̶y, y chi je̱'e̱ dyiscípulotu̶jk adu'uktuuy yajtu̶u̶wu̶ ajku̶xy:
—¿Ti u̶u̶ch ko u̶u̶ch ka'p tu̶ nmu̶madaakku̶xy neby u̶u̶ch je̱'e̱ ka'a'óybyu̶ nyajpu̶dzu̶u̶mgu̶xu̶chu̶ñ?
29Y chi je̱'e̱ Jesús y'adzoowu̶ ajku̶xy:
—Adaa du'umbu̶ ka'a'óybyu̶ ajku̶xy je̱'e̱ yu̶'u̶ mu̶u̶d pyu̶dzu̶my ajku̶xy ko je̱'e̱ Dios nmu̶bu̶jktzoowu̶mu̶ch ajku̶xy.#9.29 Nije̱' jaybyu̶du̶jk myu̶naangu̶xy: y n'ayuu'ajtu̶mu̶ch ajku̶xy.
Jesús mu̶me̱jtz'ook nigapxy ko y'o'oga'añ
(Mt 17.22-23; Lc 9.43-45)
30Ko je̱'e̱ Jesús jim chóngu̶xy ma je̱'e̱ jimbu̶ ittu̶ñ, chi Galilea ñaaxjooty ñajxku̶xy. Peru̶ ka'p najty tzoky nu̶kxy je̱'e̱ mayjya'ay ñejwu̶'u̶yii ma najty ñú̶kxku̶xyu̶ñ. 31Je̱' ko je̱'e̱ dyiscípulotu̶jk najty yaj'u̶xpu̶jkypy ajku̶xy. Nu̶maaygyu̶xy najty:
—U̶u̶ch je̱' je̱'e̱ ja'ay mu̶dyiibu̶ tzon tzajpjooty yajku̶'u̶yé̱gu̶bu̶ch ma u̶u̶ch je̱'e̱ nmu̶dziptu̶jk kyu̶'u̶'aam ajku̶xyu̶ñ y je̱' u̶u̶ch xyaj'o'ogu̶p ajku̶xy, peru̶ kudu̶gu̶u̶g xu̶u̶ u̶u̶ch ja'adu'ook njuugypyú̶gu̶ch.
32Je̱' ajku̶xy ka'p najty adaa ayuuk winju̶wu̶u̶ygyu̶xy neby du'un jya'anu̶maayu̶gu̶xyu̶ñ, y nan tzu̶gu̶u̶ygyu̶xp najty yajtu̶u̶gu̶xu̶ch.
¿Pu̶n ni'igyu̶ jakmu̶j?
(Mt 18.1-5; Lc 9.46-48)
33Chi oy jya'tku̶xy jim Capernaum. Ko tyu̶jktu̶gu̶u̶y ajku̶xy, chi je̱'e̱ Jesús yajtu̶u̶wu̶ ajku̶xy:
—¿Ti ayuuk najty miich nayyaj'amayu̶u̶yu̶gu̶xp jim tu'u'aam?
34Peru̶ je̱' du'uñyu̶ je̱'e̱ y'amoondaay ajku̶xy, je̱' ko najty jim tu'u'aam tu̶ ñay'amayu̶u̶yu̶gu̶xy ko pu̶n ma je̱' ajku̶xyu̶ñ ni'igyu̶ jakmu̶j'ijtp. 35Mu̶'it je̱'e̱ Jesús ñaxwech, chi je̱'e̱ nimajmé̱tzkpu̶ dyiscípulotu̶jk mu̶j'yaaxy y nu̶maay ajku̶xy:
—Pu̶nu̶ jii pu̶n tii nigu'ubajk'ada'añ, wan du'un naybyu̶da'agyii neby ka'pu̶ tii nigu'ubajk'átyu̶ñ, y wan je̱'e̱ myu̶gu'ugtu̶jk ku̶xyu̶ kapxymyu̶doogu̶xy.
36Chi je̱'e̱ Jesús je̱'e̱ pi'k'ana'k tu'ug kujkjooty pu̶daaky ma je̱' ajku̶xyu̶ñ, y chi tze̱nu̶'ky; ñu̶maayu̶ ajku̶xy:
37—Pu̶n mu̶u̶d u̶u̶ch kyu̶xpu̶ nxu̶u̶ je̱'e̱ pi'k'ana'k ku'ubu̶jkpu̶ñ du'un neby adayaaba pi'k'ana'ku̶ñ, u̶u̶ch naty je̱'e̱ du'un xykyu'ubu̶jkp; y pu̶n u̶u̶ch xykyu'ubu̶jkpu̶ñ, ka'p naty je̱'e̱ u̶u̶chtyu̶'ajty je'eyu̶ xykyu'ubu̶jkp, nan kyu'ubu̶jkypy naty je̱'e̱ nandu'un je̱'e̱ mu̶dyiibu̶ u̶u̶ch ya naaxwiiñ xykye̱jxu̶ñ.
Mu̶dyiibu̶ ka'p xymyu̶dzip'ajtu̶m ajku̶xy, je̱' xypyube̱jtp ajtu̶m ajku̶xy
(Mt 10.42; Lc 9.49-50)
38Chi je̱'e̱ Juan myu̶naañ:
—Windzú̶n, tu̶ u̶u̶ch je̱'e̱ ja'ay tu'ug n'ijxku̶xy mu̶dyiibu̶ je̱'e̱ ka'a'óybyu̶ u̶x'ojpu̶ñ mu̶u̶d miich mxu̶u̶ y mmu̶k'ajtu̶ñ, y tu̶ u̶u̶ch je̱'e̱ nyaj'u̶xmajtzku̶xy, je̱' ko ka'p je̱'e̱ u̶u̶ch xyjya'ay'ajtu̶m ajku̶xy.
39Chi je̱'e̱ Jesús y'adzooy:
—Ka'p myaj'u̶xmajtzku̶xy, je̱' ko je̱'e̱ mu̶dyiibu̶ je̱'e̱ mu̶jwinma'añ tuumb mu̶u̶d u̶u̶ch nxu̶u̶ y nmu̶k'ajtu̶ñ, ka'p u̶u̶ch je̱'e̱ mu̶baad ju̶bu̶kjaty axu̶u̶gjáty xytyijy xyñigapxy. 40Je̱'e̱ mu̶dyiibu̶ ka'p xymyu̶dzip'ajtu̶m ajku̶xy, je̱' xypyube̱jtp ajtu̶m ajku̶xy. 41Wanpú̶nu̶ch pu̶n je̱'e̱ nu̶u̶ miich xymyooygyu̶xpu̶ñ oy je'eyu̶ timytyu'kvasu̶du̶'ajty, je̱' ko myajpaatku̶xy ma je̱'e̱ Crístoju̶ñ, janch tu̶y'ajtu̶ñ du'un nnu̶maaygyu̶xy pyaadu̶py y'oy'ajtu̶ñ je̱'.
Je̱'e̱ mu̶dyiibu̶ mu̶k kudzu̶gu̶'u̶ñdyu̶ñ ko xyajpokykya'awu̶mu̶ch
(Mt 18.6-9; Lc 17.1-2)
42“Wanpú̶nu̶ch pu̶n adaa ja'ay nidu'ugtu̶ yajwinma'añdyu̶goobyu̶ñ mu̶dyiibu̶ je̱'e̱ y'u̶xpu̶jku̶ñ we̱e̱nu̶ mu̶u̶du̶ñ ajku̶xy ma je̱'e̱ Dios tyu̶y'ajtu̶ñ mu̶dyiibu̶ u̶u̶ch je̱'e̱ n'ayuuk ndu̶y'ajt xymyu̶bu̶jku̶byu̶ñ ajku̶xy, ni'igu̶ oy ko u̶xyu̶py yaj'yo'kxodzu̶'u̶yii tu'ug mu̶jpu̶ molinu̶tzaa y yajku'uju̶bijpnáxu̶ch mejyjyooty. 43Pu̶nu̶ jii je̱'e̱ mgu̶'u̶ miich xyajtu̶goya'añ, timy'u̶xpux; ni'igu̶ oy ko ku̶'u̶dúk mdu̶gu̶'u̶wu̶ch ma je̱'e̱ jugy'ajt wiinu̶u̶xu̶u̶bu̶ju̶ñ, y ni'igu̶ ka'p ko myajpu̶da'agu̶ch mu̶u̶d je̱'e̱ mgu̶'u̶ me̱jtz'adu'um jiiby ka'a'oydyaaktuuby, ma je̱'e̱ ju̶u̶n ka'p nimu̶naaxu̶u̶ pyi'ichu̶ñ. 44[Ma je̱'e̱ ukxytyu̶u̶ng ka'p nimu̶naaxu̶u̶ y'o'ogyu̶ñ y ma je̱'e̱ ju̶u̶n ka'p nimu̶naaxu̶u̶ pyi'ichu̶ñ].#9.44 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy. 45Y pu̶nu̶ jii je̱'e̱ mdeky xyajtu̶goya'añ, timy'u̶xpux; ni'igu̶ oy ko tekytyuk mdu̶gu̶'u̶wu̶ch ma je̱'e̱ jugy'ajt wiinu̶u̶xu̶u̶bu̶ju̶ñ, y ni'igu̶ ka'p ko myajpu̶da'agu̶ch mu̶u̶d je̱'e̱ mdeky me̱jtz'adu'um jiiby ka'a'oydyaaktuuby#9.45 Nije̱' wiingpu̶ versión myu̶na'añ: ma je̱'e̱ ju̶u̶n ka'p nimu̶naaxu̶u̶ pyi'ichu̶ñ. 46[Ma je̱'e̱ ukxytyu̶u̶ng ka'p nimu̶naaxu̶u̶ y'o'ogyu̶ñ y ma je̱'e̱ ju̶u̶n ka'p nimu̶naaxu̶u̶ pyi'ichu̶ñ].#9.46 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy. 47Y pu̶nu̶ jii je̱'e̱ mwiin tu'ug xyajtu̶goya'añ, timyyajpu̶dzú̶m; ni'igu̶ oy ko je̱'e̱ mwiin tu'k'adu'um mmu̶du̶gu̶'u̶wu̶ch ma je̱'e̱ Dios y'ane̱'e̱mdaaktu̶ñ, y ni'igu̶ ka'p ko myajpu̶da'agu̶ch mu̶u̶d je̱'e̱ mwiin me̱jtz'adu'um jiiby ka'a'oydyaaktuuby, 48ma je̱'e̱ ukxytyu̶u̶ng ka'p nimu̶naaxu̶u̶ y'o'ogyu̶ñ y ma je̱'e̱ ju̶u̶n ka'p nimu̶naaxu̶u̶ pyi'ichu̶ñ.
49“Nigu̶xyu̶ je̱'e̱ mu̶bu̶jkpu̶du̶jk je̱'e̱ chu̶naay jyugy'ajtu̶ñ wan yajwaatzku̶xy mu̶u̶d je̱'e̱ ju̶u̶n. [Y ku̶xyu̶ ju̶yujk animal mu̶dyiibu̶ windzu̶gu̶'u̶ñ'ajtp yajkaanu̶'u̶wu̶ch mu̶u̶d je̱'e̱ kaan ka'pu̶ wyindu̶góyu̶ch].#9.49 Adayaaba texto tu'ktúkypyu̶ korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy. 50Je̱'e̱ kaan janch'oy je̱' pu̶nu̶ myu̶u̶d je̱'e̱ tyaamtz'ajtu̶ñ; peru̶ pu̶nu̶ tu̶gooby je̱'e̱ tyaamtz'ajtu̶ñ, ¿neby je̱'e̱ da'a du'un y'okjaktúnu̶ch? Mmu̶dajtu̶gyu̶ch je̱'e̱ n'ayuuk ajku̶xy ma je̱'e̱ mjoot mwinma'añ ajku̶xyu̶ñ, je̱' ko du'un je̱' neby je̱'e̱ kaanu̶ñ, y tzu̶naaygyu̶x juugy'ajtku̶x agujk jootkujk nixim niyam.
Currently Selected:
San Marcos 9: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
