Alukasɨ 5

Yeso a Tsɔʼ Bɨtsabɨmbyi bɨ Bɨyɛʼ ɨbyi ɛ

(Mat 4:18-22; Mar 1:16-20)

1Njwi tsɛrə Yeso a tɛ́m a ngə́rɨ́ sagɨrə Gɛnɛsarɛ ghe. Ɨbɛn tíʼə sə̌ ndóm ɨwa ɨ ghɛn kuʼ wə mbyɛn ɨ zuʼ anu a Ŋwi ə. 2Wɛrə a zɛ́n bɨ tyiŋ ɨbáŋ nkyi tsi bá ngɛn ntɛgɨ a tsɛrə a ngə́rɨ́ sagɨrə wa; ngaŋ achwiʼ tsa nyɛ́ʼtɨ́ a tsɛrə ngɛ́n a sugɨ mɨghoŋ ɨma ghe. 3Yeso a kón a mu abáŋ a nkyi za zə mɔʼɔ — a bé zə Samɔn — ɨ soŋ wəmbo ngə́ á tintɨ a zɛrə ndotɨ nɨ zɛrə a ngə́rɨ́ nkyi wa. Yeso a shíʼtɨ́ ntsi wə mu ndiʼ anu a Ŋwi a mbó ɨnɔ ɨbɛn ə.

4A ghɨnə mɛ́tɨ́ ngamə a mbó bo, ɨ soŋ a mbó Samɔn ngə́, “Kwiʼ ntintɨ abáŋ a nkyi zɛnə á kontɨ ngɛn a kɨʼ wu shwitɨnɨ ə, á bɨŋ bɨson ɨbo maʼ mɨghoŋ ɨmən a nkǒ ɨshwú ə.”

5Samɔn a chwɨ́gɨ́ ngə́, “Tə̧, bɨgɨ lye tsɛʼ a nyuʼnə a nyuʼnə lá nkeʼ tsɛʼ a təgho koə. Lá be a soŋ gho ma mɨ tam mɨghoŋ ə.” 6Mbáʼ bo támnɨ́ mɨghoŋ ɨma lá, ntiʼ nko ndvuŋ ɨshwú wa ɨ kɨ chínɨ́ tiʼ satɨ mɨghoŋ ɨma ghe. 7Bo tíʼ nkatɨ ngaŋ aku ɨtsa a mu abáŋ a nkyi zə mɔʼɔ za ngə́ á bɨ yen nkwatɨ awa ghe. Bo yén, bo bɨtsum tiʼ ndwɨgɨ ɨbáŋ nkyi tsa tsi bá nɨ ɨshwú tsɨ tiʼə ndɨrə adzaŋ za tsɨ kɨ chínɨ́ mítɨ́ a tsɛrə a mbyi nkyi ɛ. 8Mbáʼ Samɔn Bita a zɛ́nɨ́ anu za a fúnɨ́ lá, nkwem mɨkwiʼtɨ ɨmyi a ɨshi Yeso ɨ soŋ ngə́, “Lo agho a mbyi me ghe, a Maʼmbyí! Ma nɨ ŋwɔn ngɨ mɨbvu ə!”

9Ndvuŋ ɨshwú wa bo kónɨ́ lá ɨ kɨ́ʼnɨ́ awa bɨtsum ə. 10A kɨ́ nkɨʼnɨ ngaŋ aku Samɔn, mbáʼ tsɨ bénɨ́ Jemsɨ bo Yoane mbáʼ bɨ bénɨ́ ɨbɔ bɨ Zebɛdi bə mbáŋnɨ́ ə. Yeso a sóŋ a mbó Samɔn ngə́, “Koʼ bɔgə; ɨ lɔgɨnɨ tɨtsɔŋnɨ o mɨ tiʼə ghɨnə á ɨbɛn ngyíŋə́ a mbó me ghe.”

11Bo tíʼ ntyíŋ ɨbáŋ nkyi ɨtsa ngɛn nɨ tsɛrə a ngə́rɨ́ nkyi, ɨ nyɛʼtɨ azúm atsum ɨwu, ntiʼ ndzɔŋ a Yeso ghe.

Yeso a Tsuʼ a Ŋwɔn Atəchwen wu Tsɛrə ghe

(Mat 8:1-4; Mar 1:40-45)

12A njwi wɛnə Yeso a tsí a ntáʼmbagə tse wa ŋwɔn atəchwen a tsínɨ́ ɨwu ə. Mbáʼ a zɛ́nɨ́ a Yeso lá, ngvo ɨ nɔŋ a ɨshe mbuʼ mbó wəmbo ɨ sóŋə́ ngə́, “Maʼmbyí, be o kɔŋ o chi tsuʼ aghə!”

13Yeso a tságɨ́ abó azhi ɨ mɔmtɨ ayi ɨwu, ɨ soŋ ngə́, “Ma lǒ ntsuʼ gho ghe. Shwetə!” Tsɛʼ a nyom məwa nɨghɔ na nyɛ́ʼtɨ́ a ŋwɔn wa. 14Yeso a sóŋ wəmbo ngə́, “Koʼ a mbó ŋwɔn tsɛrə soŋə, lá a ngwaŋnə ngěn a mbó ntumshe á tiʼ ndəŋtɨ agho; nga mɨtsuʼnɨ mɨ atú ma ndzɔ̌ŋ ntɨgə za Mǒse a lɛ́nɨ́ lá a ndiʼə a mbó ŋwɔn tsum ngə́ bɨ tsuʼnə agho.”#5:14 Levitɨkɔsɨ 14:1-32

15Lá, nkərɨ mbɨ́ʼ a Yeso ɨ kə́ dzagɨnɨ ɨ dzagɨnɨnɨ nɨ ɨdiʼ nɨ ɨdiʼ, ɨnɔ ɨbɛn tiʼə ngyiŋə a ndzúʼ anu a Ŋwi wəmbo, a kə ntsǔʼ mɨghɔ ɨma ghe. 16Lá, wɛrə ló ngɛn ayi a mu mɨkɨghonɨ, ntsi ɨwu ntsáʼtə́ a Ŋwi ə.

Yeso a Tsuʼ a Chɛbɨ́ŋ ə

(Mat 9:1-8; Mar 2:1-12)

17A njwi tsɛrə mbáʼ Yeso a kɨ́nə́ ndiʼə anu a Ŋwi, bə Farisao bə tse abɔʼnɨ ngaŋ ndiʼ Nyɔngɔŋ ba bɨ lónɨ́ a mu ɨlaʼ ɨtsum tsa tsɨ tsínɨ́ a mu Galili, Yudiya ndzɔŋ nkwiʼtɨ a Yerosalɛm, bɨ tsí ɨwu ə. Mɨtən mɨ Maʼmbyí mɨ tsí bo Yeso ngə́ á wɛrə a tsuʼ ɨbɛn ə. 18Ɨbɛn bə tse kə́ ngyiŋə mbyɛʼ a chɛbɨ́ŋ wu tse atú abaʼ, ndǒ nkuŋə nɨ wɛrə ɨ nyɔŋ a ɨshi Yeso ghe. 19Mbɨ́ʼ ɨnɔ ɨbɛn, bo kɨ chi keʼ nɨ wɛrə kuŋə. Bo kɔ́ʼ nɨ wɛrə atú a ndá, ɨ ŋaʼ abuʼ ɨwu, ntsagɨ a ŋwɔn wa atú abaʼ azhi a shiʼ a tɨtərɨ ɨbɛn ba a ɨshi Yeso ghe. 20Mbáʼ Yeso a zɛ́nɨ́ abeməntəm aza lá, a sóŋ a mbó ngɔnɨ wa ngə́, “Ɨson ɨghan, awa bɨ lɨgɨnɨnə mɨbvu ɨmo ə.”

21Ngaŋ ndiʼ Nyɔngɔŋ bo bɨ bə Farisao tíʼə mbítə́ awa bo nɨbo ngə́, “Ŋwɔn wen a lá ɨwa mbáʼ a ghamnə mɨgham mɨ ndzɔm Ŋwi lá le! A nɨ tsɛʼ Ŋwi zɨzɨ mbáʼ be a lɨgɨnɨ mɨbvu mɨ ɨbɛn ə!”

22Yeso a zhí ɨnu tsa tsɨ tsínɨ́ a mu mɨntəm ɨma, ntiʼ mbitɨ ngə́, “Nɨ kwaʼtɨ ɨdzaŋ ɨnu tsen lá ngə́ ke le? 23A nə ngyáŋnɨ́ be a sóŋə́ ngə́, ‹Ma lɨgɨnɨ mɨbvu ɨmo,› kə ngə́, ‹Lo atɨ́ a ntɛ́mə́ ngěn le›? 24Ma lan, ma mɨ diʼ a mbó bən ngə́ Mɔn Ŋwɔn a tsi nɨ mɨtən atuəshe a ndɨgɨnɨ mɨbvu mɨ ɨbɛn ə. Ntiʼ soŋ a mbó chɛbɨ́ŋ wa ngə́, ‹Ma soŋ a mbó gho ghe, lo atɨ́, ndɔgɨ abaʼ azo nkwɛn agho!›”

25Ŋwɔn wa a tíʼ mbyi ndo atɨ́ a ɨshi bo bɨtsum, ndɔgɨ abaʼ azhi za a chínɨ́ nɔŋ wu atú lá, nkwɛn ngɛn ayi, ngǎ nɨfáŋ nɨ Ŋwi wəmbo ə. 26A tíʼ nkɨʼnɨ awa bɨtsum be tɨsɨŋə! Mbáʼ nɨbɔgɨ lónɨ́ a mu mɨntəm ɨma lá, bo bóntɨ́ a Ŋwi, ɨ sóŋə́ ngə́, “Bɨgɨnə ze ɨnu tsə kɨʼnɨnɨ ɨ sɨŋə ghe.”

Yeso a Tsɔʼ a Levi ə

(Mat 9:9-13; Mar 2:13-17)

27Məzen a tsanə, Yeso a tsa abyɛn, ndzɛn a ngaŋ nkwárɨ́ ashɛbɨ wa bɨ kɨ́nə́ ntɔ́ŋə́ ngə́ Levi a shiʼtɨ ntsi a ndá afaʼ ngaŋ nkwárɨ́ ashɛbɨ ɨzhi ɛ. Yeso a sóŋ ngə́, “Zɔŋ aghə.” 28Levi a ló atɨ́, ɨ nyɛʼtɨ ɨdzúm ɨtsum, ntiʼ ndzɔŋ a wɛrə ghe.

29Levi a kwɛ́n nkyaŋtɨ adzɨ̂ zə wi a ndá zɨ a mbó Yeso ghe. A tɨtərɨ bɨghən ba bɨ tsínɨ́ ɨwu, ngaŋ nkwárɨ́ ashɛbɨ tsɨ tsí ɨwu a ɨnɔ abɔʼnɨ ɨbɛn bə mɔʼɔ ghe. 30Bə Farisao bə tse abɔʼnɨ ngaŋ ndiʼ Nyɔngɔŋ tsə mɔʼɔ tsa tsɨ tsínɨ́ adiʼ adzɨ̂ za, tsɨ bítɨ́ bɨyɛʼ bɨ Yeso ngə́, “Nɨ dzɨ́ə nkə́ nǒ bɨŋ bɨ ngaŋ nkwárɨ́ ashɛbɨ abɔʼnɨ ngaŋ ngɨ mɨbvu lá ngə́ ke le?”#5:30 Alukasɨ 15:1-2

31Yeso a tíʼ mbyigɨ ngə́, “Ɨbɛn ba bɨ tsinɨ ɨ shiʼnɨ ka bɨ ndǒ awa a ŋwɔn ngaŋ ə, lá a lǒ ba bɨ ghɔnə ghe. 32Ka ma yen aghan lá a ntɔ́ŋ ɨbɛn ba ɨnu tsa chinɨnə, lá ma yen be ngə́ á ngaŋ ngɨ mɨbvu bəŋ mɨntəm ɨma a nye mɨbvu ɨma mbem a Ŋwi ə.”

Abítɨ a Ntósɨ́ Atú Mbɨ́ʼ Nchigɨ Nji tsɨ Ntsaʼtɨ Ŋwi ə

(Mat 9:14-17; Mar 2:18-22)

33Ɨbɛn bə tse sóŋ a mbó Yeso ngə́, “Bɨyɛʼ bɨ Yoane bo bɨ bə Farisao bɨ chigɨ nji tsɨ ntsaʼtɨ Ŋwi nkfu tsɨ ghaʼtɨnɨ nkə́ ntsáʼtə́ a Ŋwi, lá ɨbo bɨ dzɨənə nkə́ nǒ awa ghe.”

34Yeso a chwɨ́gɨ́ a mbó bo ngə́, “O chi lɛn bɨghən bɨ nɨzɔ́ʼ nɨ nji mbáʼ ndóm mɨngən a bvurɨnɨ ntsi bo bo le? Ngáŋ ə! 35Nkfu ghɨ yen za bɨ ghɨnɨ yen kwarɨ a ndóm mɨngən a mbó bo, á bo tiʼə nchigɨ nji tsɨ ntsaʼtɨ Ŋwi ə.”

36Yeso a tíʼ ná nɨgham nə nanɨ a mbó bo ngə́, “Ka ŋwɔn tse a tsi ayi ɨwu mbáʼ a lɔgɨnə abagɨ atsɛʼ zə fi ntátə́ atsɛʼ zə lvuŋ ɨwu ə. Be a ghɨ mə lan muŋ a mɨ diʼ ngə́ a tsənkɨ atsɛʼ zə fi za, atsɛʼ zə lvuŋ za keʼ kɨ ngyenɨ bo abagɨ atsɛʼ zə fi za. 37#5:37 A mu mbɔm bə Yuda bɨ kə́ nɨ́ŋə́ mɨluʼ mə fi a mu ngobɨ mɨluʼ tsə fi ə. Be bɨ nɨŋ mɨluʼ mə fi a mu ngobɨ zɨ ndvuŋ, muŋ mɨluʼ mə fi ma mɨ bebɨ ngobɨ zɨ ndvuŋ za. Ɨ bə ghɛn ɨwu, ka ŋwɔn a ndɔ́gə́ ayi mɨluʼ mə fi ɨ nɨŋə a mu ngobɨ mɨluʼ zɨ ndvuŋ, mbɨ́ʼ ngə́ mɨluʼ mə fi ma mɨ bebɨ ngobɨ mɨluʼ zɨ ndvuŋ za, á mɨluʼ ma chwinɨ, á ngobɨ za kɨ mbɨ́gə́. 38Bɨ báŋnɨ́ ntsi nɨ ɨ nɨŋ mɨluʼ mə fi lá a mu ngobɨ mɨluʼ tsə fi ə! 39Ka ŋwɔn tse a kə́ ndǒ ayi mɨluʼ mə fi mbáʼ a tsanə ɨ no a mə lvuŋ ə. Adzaŋ məwen, a sóŋə́ ngə́, ‹Mɨluʼ mə lvuŋ ma bɔŋtə.›”

Currently Selected:

Alukasɨ 5: MNT

Highlight

Copy