Marɨkusɨ 8
8
Yeso a Dzɨgɨ Ɨbɛn Nchwuʼ tsi Nɨkwa ghe
(Mat 15:32-39)
1Abaŋ a bənə mbe ɨwu, ɨnɔ ɨbɛn wu wi kwiʼ ngǒtɨ lá nkeʼ nɨ azúm zə dzɨnɨ chyɛ. Yeso a tɔ́ŋ bɨyɛʼ ɨbyi ɨ soŋ a mbó bo ngə́, 2“Ma kǒ a mɨlɨŋnɨ a nye ɨnɔ wen, mbɨ́ʼ ngə́ ma tsinə bɨgɨ bo atú njwi tsi tárə́ lá bo keʼ nɨ azúm zə dzɨnɨ chyɛ. 3Be ma soŋ ngə́ á bo ghɛn nɨ njwuʼ ɨtsa nɨ nji muŋ bo mɨ tsúmnkɨ́ a ndómnji mbɨ́ʼ ngə́ bo bə mɔʼɔ tsi ɨwu ba bɨ lonɨ nəghagɨ ə.”
4Bɨyɛʼ ɨbyi bítɨ́ ayi ngə́, “Ŋwɔn mɨ lɔgɨ abán za a kuʼnɨ a ndzɨ́gɨ́ ɨbɛn ben ɨwu lá ɨ ghé a mu mɨkɨghonɨ men le?”
5Yeso a bítɨ́ awa ngə́ “Nɨ tsi nɨ mbɛʼ abán tsi sɛʼ le?”
Bo chwɨ́gɨ́ ngə́, “Tsi samba ghe.”
6Wɛrə a tíʼ sóŋ ngə́ á ɨnɔ wa ɨ shiʼtɨ ntsi a tɨshe ə. Wɛrə a tíʼ ndɔgɨ mbɛʼ abán tsa tsi samba, ntsaʼtɨ a Ŋwi, mbatɨ a tsɛrə nga a mbó bɨyɛʼ ɨbyi ngə́ á bɨ yɛbtɨ a mbó ɨbɛn ba; bo tíʼ nkɨ́ ngyɛ́btɨ́ a mbó ɨnɔ wa. 7Bo tsí nɨ mbum ɨbɔ bɨ ɨshwú ə; wɛrə a ghɨnə ntsáʼtɨ́ a Ŋwi ɨ fɔ́gɨ́ a tsɛrə, ɨ soŋ ngə́ á bɨ kɨ ngyɛbtɨ a tsɛrə a mbó bo ghe. 8Bo dzɨ́ nzhwúrɨ́; bɨ sɛʼ ɨbagɨ ɨbvuʼ mɨdzɨ tsa, tsɨ bə nduŋ nkye tsi samba ghe. 9Ɨbɛn ba bɨ tsínɨ́ ɨwu bɨ bé tso nchwuʼ tsi nɨkwa ghe. 10Yeso a tíʼ ngɨ bo kwɛn awa; a tiʼ mbyi nkon a mu abáŋ a nkyi bo bɨ bɨyɛʼ ɨbyi tiʼ ngɛn a Mbuʼ Dalɨmanuta#8:10 Ka bɨ zhi ayi adiʼ zə wu ə. ghe.
Bə Farisao Bitɨ Anu zə Yerɨnɨ-yerɨnɨ ə
(Mat 12:38-42; 16:1-4)
11Bə Farisao yén mbiʼnɨ mɨgham, nkwə́nkə́ bo bɨ Yeso ghe. Bo kə́ ndǒ mbentɨ zɨ, ntiʼ soŋ ngə́ á ghɨ anu zə yerɨnɨ-yerɨnɨ a ndiʼə ngə́ ayi a tságɨ́ Ŋwi ə. 12A tsám achwɛrɨ tsɛʼ nkan ɨmu ɨmu, ntiʼ mbitɨ ngə́, “Nɨwə nɨ sɨŋə lǒ anu zə yerɨnɨ-yerɨnɨ lá ngə́ ke le? Tsɛʼ a nkənu, ma soŋ a mbó bɨŋ ə, bɨ ghɨ keʼ diʼ anu zə tse a mbó nɨwə nɨ sɨŋə ghe.”
13A tíʼ nyɛʼtɨ awa, mbə nkón a mu abáŋ a nkyi za ntom ngɛn a ndáŋ ndzɨŋə sagɨrə wa zɨ mɔʼɔ ghe.
Mbɛgə zɨ bə Farisao abɔʼnɨ zɨ Ɛrɔd ə
(Mat 16:5-12)
14Bɨyɛʼ bɨ Yeso sé tiʼtɨ abán á ghaʼtə; bo lɨ́gɨ́nɨ́ ntiʼtɨ abán á ghaʼtɨ, adzaŋ məwen, ntsi tsɛʼ nɨ táʼ mbɛʼ abán a mu abáŋ a nkyi za. 15A tíʼ nkwantɨ awa ɨ soŋ ngə́, “A nɨ lə ɨtú ɨtsən a nye mbɛgə bə Farisao abɔʼnɨ mbɛgə Ɛrɔd ə.”#8:15 Alukasɨ 12:1; Marɨkusɨ 6:14; 12:13 16Bo ghámnɨ́ bo nɨbo ɨ sóŋə́ ngə́, “A chya ngámə́ lan lá mbɨ́ʼ ngə́ ka bɨgɨnə tsi awɨgɨnə nɨ abán ə.” 17Mbáʼ Yeso a zhínɨ́ anu za bo kɨ́nə́ sóŋə́ lá, mbitɨ a mbó bo ngə́, “Nɨ ghamnə ngə́ nɨ se nɨ abán tsi lá ngə́ ke le? Nɨ bvurɨ tɨ a ndzě kə ndzúʼə nkə́ njíɛ le? Nə nɨ adzaŋ za mɨntəm ɨmɨŋ tɨnkɨnɨ le? 18Nɨ tsi nɨ ɨmɨgɨ lá nkeʼ ndzě, ntsi nɨ ɨtoŋnɨ nkeʼ ndzúʼə le? Nɨ sě nkə́ ngwáʼtə́ le? 19Mbáʼ ma bátɨ́nɨ́ mbɛʼ abán tsa tsi tə̧̂ a mbó ɨbɛn nchwuʼ tə̧̂, nɨ sɛ́ʼ lá ɨbagɨ abán a mu nkye tsɨ lonɨ tsi sɛʼ le?”
Bo chwɨ́gɨ́ wəmbo ngə́, “Nɨghúm ntsɔb bá ghe.”
20Yeso a bə́ nkwiʼtɨ ngə́, “Mbáʼ ma kɨ́nɨ́ mbátɨ́ a tsa tsi samba a mbó ɨbɛn ba nchwuʼ nɨkwa, nɨ sɛ́ʼ lá ɨbagɨ abán a mu nkye tsɨ lonɨ tsi sɛʼ le?”
Bo chwɨ́gɨ́ ngə́, “Tsi samba ghe.”
21A tíʼ mbítɨ́ a mbó bo ngə́, “Nɨ kɨ mbvurɨ tsɛʼ tɨ zuʼ nkɨ nji le?”
Yeso a Tsuʼ Ɨfɨgɨ zɨ tse a Bɛtɨsaida ghe
22Mbáʼ Yeso bo bɨ bɨyɛʼ ɨbyi yénɨ́ nkón a Bɛtɨsaida, ɨbɛn bə tse yén nɨ ɨfɨgɨ zɨ tse a mbó Yeso, mbuʼ mbó ngə́ á mɔmtɨ ayi ɛ. 23Wɛrə a tságɨ́ abó azhi nchwa a zə ɨfɨgɨ za ɨwu; ndɔgɨ ayi ɨ fu nɨ zɨ a mu atom za. A ghɨnə ntfugɨ mɨtwe wə ɨmɨgɨ, ɨ nyɔŋ mbó ɨmyi wə ɨnye, ntiʼ mbitɨ ayi ngə́, “O zě azúm zə tse le?”
24Ɨfɨgɨ za tíʼ nden atɨ́, ɨ soŋ ngə́, “Ma zě ɨbɛn; lá bo fi ɨtɨ, ntɛ́mə́ ngěn ghe.”
25Yeso a bə́ nkwiʼ nyɔ́ŋ mbó ɨmyi a nye ɨmɨgɨ mɨ ŋwɔn wa. A nkfu məwen, ɨfɨgɨ za tíʼ nkyerɨ ɨdiʼ a nye nkfu zɨ tse, ɨmɨgɨ ɨmyi bə nkyɛnɨ, a tiʼ ndzɛn azúm atsum ɨ shiʼnɨ ə. 26Yeso a tíʼ sóŋ ngə́ á kwɛn ngɛn ayi a njwuʼ zɨ, nɨ ntɨgə zen ngə́, “Koʼ a mu atom za byi mbə́ nkúŋə́.”
Bita a Soŋ ngə́ Yeso nɨ Wa Bɨ Zɔ́ʼnɨ́ ə
(Mat 16:13-20; Alu 9:18-21)
27Yeso a tíʼ ngɛn bo bɨ bɨyɛʼ ɨbyi, a mu ɨtóm a Seseria Filibi; a ndómnji a bítɨ́ bɨyɛʼ ɨbyi ngə́, “Ɨbɛn sóŋə́ ngə́ ma lá ɨwa le?”
28Bo chwɨ́gɨ́ wəmbo ngə́, “Bə tse sóŋə́ ngə́ o nɨ Yoane Ngaŋ Nga Nkyi ɛ; bə mɔʼɔ sóŋə́ ngə́ o nɨ Alaja; bə mɔʼɔ ghə, o nɨ táʼ abɔʼnɨ ntóm Ŋwi ə.”
29A tíʼ mbítɨ́ awa ngə́, “Ɨzɨŋ nkfu nɨ soŋ ngə́ ke le? Nɨ sóŋə́ ngə́ ma nɨ ɨwa le?”
Bita a chwɨ́gɨ́ wəmbo ngə́, “O nɨ Wa bɨ Zɔ́ʼnɨ́ ə.”
30A tíʼ ngá ntɨgə a mbó bo ngə́, “Njimbɨʼ nɨ gham mbɨ́ʼ aghan a mbó ŋwɔn tsɛrə ghe.”
Yeso a Gham Mbɨ́ʼ Ngɨ́ʼ ɨzhi Abɔʼnɨ Nɨvwo ɨni ɛ
(Mat 16:21-28; Alu 9:22-27)
31Yeso a tíʼ mbiʼnɨ a ndíʼ bɨyɛʼ ɨbyi ngə́: “Mɔn Ŋwɔn a mɨ zagɨ ze ngɨ́ʼ a mu ɨnu tsɨ ghaʼtɨnə. A bɨkum, bɨntumshe bə wi abɔʼnɨ bɨdiʼ bɨ Nyɔngɔŋ tiʼ nton ayi ɛ. Bɨ mɨ zhwitɨ ayi, a ndzum njwi tsi tárə́ á zɨə zhwemnɨ a mbó nɨvwo ə.” 32A fɨ́ʼtɨ́ a məzen a lanɨ ndán a mbó bo ghe. Ma lan, Bita a shwúŋtɨ́ ayi bo zɨ ghɛntɨ a ngɔbə, a tiʼ mbiʼnɨ nkágə́ ayi ɛ. 33Lá Yeso a bə́ŋ ayi ndyiŋ bɨyɛʼ ɨbyi, ngamtɨ a Bita, ɨ soŋ ngə́, “Lotɨ agho a mbyɛn me, a Satan! Ka ɨkwaʼtɨ ɨtso lo ayi a mbó Ŋwi ə, tsɨ lo be a mbó mbe ŋwɔn mɨsɔŋ a ntsu ə!”
34Yeso a tíʼ ntɔ́ŋ ɨnɔ ɨbɛn wa abɔʼnɨ bɨyɛʼ ɨbyi ɨ soŋ a mbó bo ngə́, “Be ŋwɔn a tsi nɨ ndzɔŋə a ndzum me a nyɛʼ ɨnu tsa mbáʼ ntəm ɨyi lɔnə lá mbyɛʼ abaŋnɨ-baŋnɨ azhi ndzɔŋ aghə. 35Mbɨ́ʼ ngə́ Ŋwɔn tsum wa mbáʼ a lɔnɨ ndoŋ ntsi mbyi ɨzhi a mɨ sam a zɛrə; lá ŋwɔn tsum wa a samnɨ ntsi mbyi ɨzhi mbɨ́ʼ aghan abɔʼnɨ nkən wu shiʼnɨ, a mɨ loŋ a zɛrə ghe. 36Ɨbɛn chyɛ̌ nɨ abi mbáʼ be bɨ tsi nɨ mbyi tsum lá ɨ sam ntsi mbyi ɨza le? Kə́ kə́! 37Ŋwɔn chi lanɨ gha lá ake ɨ kwebtɨ ntsi mbyi ɨzhi ɨwu le? 38Be ŋwɔn a dɨrɨ atú mbɨ́ʼ aghan abɔʼnɨ ɨnu tsa ma diʼnə a nye nɨwə nɨ tɨbeməŋwi abɔʼnɨ nə abɨgəntəm nen, muŋ Mɔn Ŋwɔn a ghɨ kɨ dɨrɨ atú mbɨ́ʼ ayi a nkfu za a yenɨ a mu nɨfáŋ nɨ ta ɨyi bo bɨ bɨtsen bɨ ndá bɨ Ŋwi bə fɛmnɨ ə.”
Currently Selected:
Marɨkusɨ 8: MNT
Highlight
Share
Copy
Want to have your highlights saved across all your devices? Sign up or sign in
© 2023, CABTAL
