Marɨkusɨ 9
9
1Yeso a ghɛ́n nɨ mbyi ɨ soŋ ngə́, “Ma soŋ a mbó bɨŋ ə, bə tse tsi ɨwu ɨghan ba bɨ ghɨ keʼ kfo ɨ kɔʼ kuʼ nkfu za bo ghɨ zé nɨfɔ nɨ Ŋwi á nɨ ngyíŋə́ nɨ mɨtən mə wi ə.”
Adzaŋ za Nkyerɨ Yeso ɨ Kwébtɨ́nə́
(Mat 17:1-13; Alu 9:28-36)
2Njwi ghɨnə ntsá tsi ntugə, Yeso a lɔgɨ a Bita, Jemsɨ bo Yoane, ntsa mbyi ɨza bo kɔʼ ngɛn atú mbám ntsi ɨwu tsɛʼ bo bo ghe. Adzaŋ za bo kɨ́nə́ ndyiŋə, bɨ tíʼ mbənkɨ a Yeso a ɨshi bo, 3ɨtsɛʼ ɨchi tiʼə fúgə́ ngə́ bú, ndánə́ ŋwánkə́, ntsa adzaŋ za be ŋwɔn mɨsɔŋ a ntsu a sugɨ tsɨ ghɨ fúgɨ́ mbe. 4Alaja bo Mǒse fú a ɨshe ntiʼə ngamnə bo bɨ Yeso ghe. 5Bita a sóŋ a mbó Yeso ngə́, “Ndiʼ aŋwaʼnɨ, a bɔŋ mbáʼ bɨgɨnə tsinɨ ɨghan lá! Bɨgɨ mɨ vwu bɨkfúʼə bi bɨtárə́, táʼ a mbó gho, wu mɔʼɔ a mbó Mǒse ndwɨgɨnɨ nɨ wu mɔʼɔ a mbó Alaja ghe.” 6A sóŋ adzaŋ məwen lá mbɨ́ʼ ngə́ zɨ abɔʼnɨ bə mɔʼɔ ba tíʼ ntsí nɨ nɨbɔgɨ be tɨ́sə́n adzaŋ za a sé zhí anu zə soŋnə.
7Mbaʼ zɨ tse dúm mbɔm awa, nji zɨ tse fu wə mu ɨ soŋ ngə́, “Nə nɨ mɔn ɨghan wu mbáŋnɨ́ wa ma kɔŋnɨ tsɛʼ nkə; nɨ zuʼ wə ntsu ə!” 8Bɨ bənə ngvukɨ ngə́ bɨ ləŋtə a kárɨ́kɨ́ bo, nkeʼ bə ndze a ŋwɔn daŋ ntsatɨ a Yeso ghe.
9Bo ghɨnə tɨ shǐʼ mbám za, Yeso a soŋ a mbó bo nkwantɨ ngə́, “Njimbɨʼ nɨ ghumtɨ anu za nɨ zɛnɨ a mbó ŋwɔn tse, ɨ kɔʼ kuʼ njwi za Mɔn Ŋwɔn a zhwemnɨnɨ a mbó nɨvwo ə.”
10Bo tíʼ nyáʼ ndɛ́n anu za a tɨtərɨ bo, lá ntiʼ mbiʼnɨ mbítə́ a tɨtərɨ bo nɨbo ngə́, “Nzhwemnə a mbó nɨvwo diʼ lá ngə́ ke le?” 11Bo bítɨ́ a Yeso ngə́, “Bɨdiʼ bɨ Nyɔngɔŋ sóŋə́ ngə́ Alaja a tsi nɨ fom yen a mbyi Yeso lá ngə́ ke le?”
12A sóŋ a mbó bo ngə́, “Alaja a tsi nɨ ɨ fom yen taŋ ɨ byigɨ ɨnu ɨtsum adiʼ bo ghe. Lá Aŋwaʼnɨ a Ŋwi a soŋ ngə́ Mɔn Ŋwɔn a mɨ ze ngɨ́ʼ be tɨ́sə́n, á bɨ kɨ nton ayi lá ngə́ ke le? 13Lá ma sóŋə́ a mbó bən ngə́ Alaja a yenə ghe, ɨbɛn ghɨ wə ɨnye a za bo kɔ́ŋnɨ́, tsɛʼ adzaŋ za Aŋwaʼnɨ a Ŋwi a soŋnɨ mbɨ́ʼ ayi lá.”
Yeso a Tsuʼ a Mɔn Mbáŋnɨ́ wu tse wa a Tsínɨ́ nɨ Azhwi zə Tɔmnɨnɨ ə
(Mat 17:14-20; Alu 9:37-43a)
14Bo ghɨnə ngyén nkwátɨ́ abvuʼ a bɨyɛʼ za, ndzɛn ɨnɔ ɨbɛn wu wi ɨ karɨsɨ awa abɔʼnɨ bɨdiʼ bɨ Nyɔngɔŋ bɨ kwənkɨnɨ mɨgham bo bo ghe. 15Ɨnɔ ɨbɛn wa byinə ndzɛn a Yeso, anu zə wu a lanɨ nkɨʼnɨ awa, bo kɨənɨ ngɛn ntsaʼtɨ ayi ɛ. 16Yeso a bítɨ́ bɨyɛʼ ɨbyi ngə́, “Nɨ kwənkə lá mbɨ́ʼ anu ake bɨŋ bo le?”
17Táʼ ŋwɔn a tɨtərɨ ɨnɔ wa a chwɨ́gɨ́ ngə́, “Ndiʼ aŋwaʼnɨ, ma yén nɨ mɔn ɨghan wu mbáŋnɨ́ a mbó gho, mbɨ́ʼ ngə́ a tsi nɨ azhwi zə tɔmnɨnɨ nchi keʼ ghamə. 18Nkfu tsum za azhwi za a wɛmnɨ ayi, a tsɔ́ʼə ayi ntúmə́ a ɨshe; adzugɨ a funə wə ntsu, a kfurɨnɨ mɨsɔŋ ɨmyi nkə́ ntə́ntə́ ghe. Ma sóŋ a mbó bɨyɛʼ ɨbo ngə́ á bo kɨŋ azhwi məziŋ ə, lá bo kɨ chi keʼ kɨŋə.”
19Yeso a chwɨ́gɨ́ awa ngə́, “O nɨwə nə tɨ abeməntəm nen! Ma mɨ tsi bɨgɨnə lá a nye ndvuŋ nkfu ake le? Ma ghɨ chwátɨ́ ntəm ɨghan bɨgɨnə ɨ kɔʼ kuʼ lá ndvuŋ nkfu ake le? Nɨ yen nɨ zɨ a mbó me ghe!” 20Bo yén nɨ mɔn mbáŋnɨ́ wa a mbó Yeso ghe.
Tsɛʼ mbáʼ azhwi zə tɔmnɨnɨ za byínɨ́ ndzɛ́n a Yeso lá, mbyi nkɨ njiŋ a mɔn wa, a vwo a ɨshe, ntiʼə mbɨ́nkə́, mɨfuʼ fuənə wə ntsu ə. 21Yeso a bítɨ́ a ta bɨ mɔn wa ngə́, “Nɨghɔ niŋ tsinə wə ɨnye ndɔgɨnɨ nkfu ake le?”
A chwɨ́gɨ́ ngə́, “Ndɔgɨnɨ wu mbɔrɨ ə.” 22“Nkfu tsə ghaʼnɨ azhwi zə tɔmnɨnɨ zen a zhwəŋtɨnə a njwítɨ́ zɨ adzaŋ za a jiŋnə ayi ɨ maʼə a mu ɨmugɨ abɔʼnɨ nkyi ɛ. Be o chi ghɨ anu zə tsɛrə, ko a mɨlɨŋnɨ ɨwɨgɨ nkwatɨ awɨgɨ ə!” 23Yeso a sóŋ wəmbo ngə́, “E, mbáʼ be gho mboŋ o chi kɨ ghɨ a zə tsɛrə ghe! Ɨnu ɨtsum chi faʼ a mbó ŋwɔn wa a tsinɨ nɨ abeməntəm ə.”
24Ta bɨ mɔn wa a byí ntɔ́nkɨ́ ɨ soŋ ngə́, “Ma tsi nɨ abeməntəm lá a keʼ kɔʼ nkuʼnə. Kwatɨ aghan á ma tsi nɨ zɛrə á ghaʼ ngɛn nɨ mbyi ɛ!”
25Yeso a ghɨnə ndzɛ́n ngə́ ɨnɔ wa ɨ kə́ ngyiŋə níʼnə́ a nye bo, ntiʼ soŋ a mbó azhwi zə tɔmnɨnɨ za ngə́, “Azhwi akəkúgɨ́ bo akfo atú, ma soŋ a mbó gho ngə́, ‹Fu wə ɨnye, ndáʼ nkoʼ a mu ɨnye zɨ bə nkwiʼ nkuŋə!›”
26Azhwi za a tɔ́nkɨ́ nkɨ njiŋ ayi ɨ maʼ a tɨshe, a tiʼə mbɨ́ŋnə́ be tɨ́sə́n, a tiʼ ntóm fuə. Mɔn mbáŋnɨ́ wa tíʼ fí akfo a ŋwɔn; ŋwɔn tsum a tiʼ soŋ ngə́, “A kfoə!” 27Lá Yeso a chwá abó azhi, nkwatɨ ayi, a tiʼ ndo ntɛmə.
28Yeso a ghɨnə nkón a mu ndá, bɨyɛʼ ɨbyi bitɨ ayi mbáʼ bo tsínɨ́ tsɛʼ bo bo ngə́, “Bɨgɨ ló nchi keʼ azhwi za fɨgɨ lá mbɨ́ʼ ake le?”
29Yeso a chwɨ́gɨ́ a mbó bo ngə́, “Azúm zə daŋ a chi keʼ a məzen fɨgɨ ntsa atsaʼtɨ a Ŋwi ə.”#9:29 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwáʼnɨ́ kwiʼtɨ ngə́ abɔʼnɨ nchigɨ nji tsə ntsaʼtɨ Ŋwi ə
Yeso a Kwiʼ Ngam mbɨ́ʼ Nɨvwo ɨni ɛ
(Mat 17:22-23; Alu 9:43b-45)
30Yeso bo bɨ bɨyɛʼ ɨbyi ló adiʼ wa ntsa a mu Galili ə. A sé ndǒ ngə́ á ŋwɔn tsɛrə a zhi adiʼ za zɨə tsínɨ́ ɨwu; 31mbɨ́ʼ ngə́ a kə́ ndǐʼ bɨyɛʼ ɨbyi ɨ sóŋə́ ngə́, “Bɨ mɨ gha a Mɔn Ŋwɔn a mbó ɨbɛn ba bɨ mɨ zhwitɨ ayi ɛ. Lá a ndzum njwi tsi tárə́ a mɨ zhwemnɨ a mbó nɨvwo ə.”
32Lá bo sé zúʼ nkɨ́ njí anu za a díʼnɨ́ awa nɨ zɛrə lá nkə́ mbɔ́gɨ́ mbitɨ zɨə.
A nɨ ɨwa wa a nɨ Ŋwɔn wu Ngwi Ntsa Bɨtsum ə?
(Mat 18:1-5; Alu 9:46-48)
33Bo ghɨnə ngyén nkón a Kabɛrɨnaum; ntsi a mu ndá, Yeso a bitɨ awa ngə́, “Nɨ lo ngyiŋə ngamnə lá mbɨ́ʼ ake a ndómnji le?”
34Bo zúʼ ngə́ shwi; mbɨ́ʼ ngə́ bo kə́ nkwənkə a tɨtərɨ bo nɨbo ngə́ ɨwa a tɨtərɨ bo a nɨ ŋwɔn wu ngwi ntsa bɨtsum ə. 35Yeso a tíʼ shíʼtɨ́ ntsi a tɨshe ntɔŋ bɨyɛʼ ba nɨghúm ntsɔb bá ɨ soŋ a mbó bo ngə́, “Be ŋwɔn tse a tsi nɨ mbe ntsambyi, a tsi nɨ mbe ntsɨrɨndzum abɔʼnɨ ŋwɔn afaʼ a mbó ŋwɔn tsum ə.” 36A tíʼ ndɔgɨ a mɔn, ntɛgɨ a tɨtərɨ bo ghe. A nyɔ́ŋ mbó ɨmyi nkarɨsɨ a mɔn wa ɨwu ntiʼ soŋ a mbó bo ngə́, 37“Ŋwɔn tsum wa a kwarɨnɨ a mɔn tso wen a ɨkum me a kwarɨ lá aghə; ŋwɔn tsum wa a kwarɨnɨ aghan, ka a kwarɨ ayi lá tsɛʼ aghan, a kwarɨ lá a ŋwɔn wa a tságɨ́nɨ́ aghə.”
Ŋwɔn wa a Se Bɨgɨnə a Nkwə́nkə́ a Tsi a Bagɨ Bɨgɨnə ghe
(Alu 9:49-50)
38Yoane a sóŋ wəmbo ngə́, “Ndiʼ aŋwaʼnɨ, bɨgɨ kɨ zɛn a ŋwɔn a kɨŋnɨ bɨdzɨŋ nɨ ɨkum ɨgho, bɨgɨ tsuʼnɨ ayi, mbɨ́ʼ ngə́ ka a tsi ayi a mu ngǒtə ɨzɨgɨnə ghe.”
39Lá Yeso a sóŋ a mbó bo ngə́, “Njimbɨʼ nɨ tsuʼnɨ ayi; mbɨ́ʼ ngə́ ŋwɔn tsum wa a ghɨnɨ anu zə yerɨnɨ-yerɨnɨ nɨ ɨkum ɨghan a chi láʼ keʼ bə mbyi mbənkɨ ayi ngam anu zə tɔmnɨnɨ mbɨ́ʼ aghə. 40Mbɨ́ʼ ngə́ ŋwɔn tsum wa ka a nkwə́nkə́ ayi bɨgɨnə bo a tsi a bagɨ bɨgɨnə ghe. 41Mbɨ́ʼ ngə́ tsɛʼ a nkənu, ma sóŋə́ awɨŋ ə, ŋwɔn tsum wa a ghanɨ ndɔ́ŋ nkyi a mbó bən ngə́ á nɨ no mbɨ́ʼ ngə́ nɨ běm ɨkum Kristo, ndómnji tse se be wa mbáʼ a mɨ sam mɨtsɔʼnɨ mɨ afaʼ ɨmyi ɛ.”
Ɨkwaʼnɨ tsa tsɨ Tíntɨ́nə́ a Ŋwɔn a Ngɨ Ɨbvu ə
(Mat 18:6-9; Alu 17:1-2)
42“Ŋwɔn tsum wa a ghɨnɨ táʼ a tɨtərɨ wu nkɨʼnɨ wen wu tse wa a nɨŋnɨ ntəm ɨyi a ɨnye me a ghɨ ɨbvu, a kwɛ mbɔŋ wəmbo ngə́ á bɨ korɨ a təkɨŋ ngɔʼ ngɔʼ abán wə ntɔŋ ɨ maʼ ayi a mu sagɨrə wu ngwi ə. 43Ma lan, be abó azo a ghɨ ngə́ o ghɨ ɨbvu, sobɨ a zɛrə ghe! A kwɛ mbɔŋtɨ a mbó gho a nkúŋə́ a mu ntsi mbyi nɨnkoŋ nɨ táʼ abó ntsa a ngěn a mu ɨmugɨ nɨnkoŋ wa nɨ mbó ɨmo mɨmbá, ɨmugɨ wa ka ndáʼə mbyɛ́nə́ ayi lá. 44#9:44 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwáʼnɨ́ kwiʼtɨ nkaŋ 44 ngə́ ɨwu, ‘ɨkɨŋɔŋnɨ tsa tsɨ kfúrɨ́nə́ awa sě ndáʼə nkfǒ, ɨmugɨ wa ɨ tɔnə awa keʼ nkə́ ndáʼə mbyɛ́nə́ ghe.’ tso nkaŋ 48 ghe. 45A nkwiʼtə, be aku azo a ghɨ agho ngə́ o ghɨ ɨbvu, sobɨ a zɛrə ghe! A kwɛ mbɔŋtɨ a mbó gho a nkúŋə́ a mu ntsi mbyi nɨnkoŋ nɨ táʼ aku ntsa a ngěn a mu ɨmugɨ nɨnkoŋ wa nɨ mɨku ɨmo mɨmbá ghe. 46#9:46 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwáʼnɨ́ kwiʼtɨ nkaŋ 46 ngə́ ɨwu, ‘ɨkɨŋɔŋnɨ tsa tsɨ kfúrɨ́nə́ awa sě ndáʼə nkfǒ, ɨmugɨ wa ɨ tɔnə awa keʼ nkə́ ndáʼə mbyɛ́nə́ ghe.’ tso nkaŋ 48 ghe. 47Be nɨdɨgɨ ɨno ghɨ ngə́ o ghɨ ɨbvu, twɛʼ a nɛrə ɨ fɨgə! A kwɛ mbɔŋtɨ a mbó gho a nkúŋə́ a mu nɨfɔ nɨ Ŋwi nɨ táʼ nɨdɨgɨ ntsa ngə́ á bɨ maʼ agho a mu ɨmugɨ nɨnkoŋ wa nɨ ɨmɨgɨ ɨmo mi mɨmbá ghe. 48Ɨwu, ɨkɨŋɔŋnɨ tsa tsɨ kfúrɨ́nə́ awa sě ndáʼə nkfǒ, ɨmugɨ wa ɨ tɔnə awa keʼ nkə́ ndáʼə mbyɛ́nə́ ghe.
49Tso mbáʼ bɨ lɔgɨnɨ ɨmugɨ ngɨə ɨdzúm fɛmnə nɨ wɛrə lá, a nɨ ndəŋndəŋ mbáʼ bɨ nɨ́ŋnɨ́ fɨngwáŋ a nye mɨdzɨ taŋ ɨ lɛn a mɛrə ghe.
50Fɨngwáŋ bɔŋə, lá be ndəmə za ɨ mi ayi wə ɨnye, o ghɨ tiʼ bə bəŋ a fɛrə á fɨ ləm lá nɨ ake le?
A nɨ tsi nɨ fɨngwáŋ a tɨtərɨ bən, nkɨ ntsi nɨ mbɔnɨ ŋwɔn nɨ ŋwɔn ə.”
Currently Selected:
Marɨkusɨ 9: MNT
Highlight
Share
Copy
Want to have your highlights saved across all your devices? Sign up or sign in
© 2023, CABTAL
