Luk 4

Satan mum Jesus

(Matio 4.1‑11; Maak 1.12‑13)

1-2Mo Joon wayin Jesus e ndzəv yee Jordan, wù nèn lò, a dù, Kiyoy ke Ranén kí wáa run e wùn shiliv, e yiì, wù dù e kwaʼ. Kí wáa dànèr wun fo kishiíy mkweè, Satan wáa wìy, a mùm ji wù jáy á kinyo. A Jesus dzə́ e kwaʼ bèy, e làa yòʼ a yi kifá gheéy. Ghán see shooy si wìy mày, jìŋ wáa yar wun. 3Satan nèn wìy, e sùúy sho jii, «Mo à dzəə̀n Wan Nyùy, suúy ri, é tíy rə́ne binkir ji kibán.» 4#Remrí 8.3. Jesus bìnèr jii, «Vé‑eè sàŋ é Ŋwàʼ Nyùy jii, ‹Bó yòʼ jòʼsì ji wìr yí kibán, e bóo lùŋ.› »

5Satan nèn lì, e kòʼ shó e kirə̀ʼ kímóʼ kí é yuv, e dìn woŋ woó kitu ke nsay sho e dzə̀m, Jesus ku nèn yèn ji ghaàr. 6Wù suúy shó jii, «Vé‑eè fò ne kitú ke nsay kìn e mò, a dzə̀ m fò e wìr wo m koŋè. A m yíi fo e wò, áà wáa saʼ, a ker bùʼ wo wù dzəə̀n shó e dzə̀m. 7Kù dzə̀ cáʼ jii, à gbu e mǒ si, e ghvə̀m mo ji Nyùy, bo kitú ke nsay kìn kidzə̀m ki sì ké.» 8#Remrí 6.13. Jesus bìnèr sho jii, «Vé‑eè sàŋ é Ŋwàʼ Nyùy jii, ‹Wìr wáa ghvəm Tàr wov Nyùy, a yu a dzə̀ fó fo.› »

9Satan nèn lì lèn, e dù sho e Jerusalem, e tìír e ntoò kitu ke lav cù, e sùúy sho jii, «Mo à dzəə̀n Wan Nyùy, líy ri fo fèn, e tìím fo nsay. 10Vé‑eè sàŋ é Ŋwàʼ Nyùy jii, ‹Nyùy wíy suúy, é nsheèlav sə́ sí wáa shìy wò. 11#Nsùyrì Nyùy 91.11‑12. Sí wíy a ker wò e kiwo fo à tín kiwuú é tiy.› » 12#Remrí 6.16. Jesus bìnèr kfə́ jii, «Vé‑eè sàŋ sá jii, ‹Lá wìr yòʼ a ghiʼ Nyùy Tàr woo Nyùy və ghíʼín ji wù yii kinyo.› »

13Satan màysì dzə́ə se dzə̀ wù mùm Jesus sho sidzə̀m, e nèn lò, e dù, a shìy ghán símóʼ sí.

Jesus sí keʼ lim rə́ é Galeli

(Matio 4.12‑17; Maak 1.14‑15)

14Jesus nèn lò, a kfən e mbìv wòŋ yee Galeli, Kiyoy ke Ranén kí kú a run e wùn shiliv, a fo wun vitaáví. Leŋ vəə́ wáa sàmèr mbìv see fó sidzə̀m, 15bìʼ fo wù‑uù yéʼey wíri é ŋgày se bùnrì see fó, a wìr dzə̀m yuúri, búri wun.

Á káy Jesus aáwuné ntèʼ yee Naasarer

(Matio 13.53‑58; Maak 6.1‑6)

16Wù nèn wìy lò, e dù sa e ntèʼ yee Naasarer fo vé‑eè lìyìn wun. Kishiíy kév ké bam ki gheén, wù dù e ŋgày bùnrì mo wù kù‑uù yii du. Wù yiì lò, e nànèn ji wun‑éè yoŋ Ŋwàʼ Nyùy, 17á nèn lì ŋwàʼ wo Aysaya woo ŋgaà ntum Nyùy‑iì saŋen, e fò shó. Wù mvə̀ʼ, e lèéy kirə́ʼ kímóʼ kí, a yòŋ. A kí dzə̀ jii:

18 # Aysaya 61.1‑2 (Grik). «Kiyoy ke Nyùy Tàr kí shiy mo, bìʼ fo kí yoʼon ne mo,

e tùm ji m wáa fìʼtì sáʼka wo juŋ e vé ŋgeʼe,

a tiisí e wír ve á koon é shùu rərí ji á yíi bòyìr áwune fó vikwàn,

e kfə̀n a fìʼtì aàmfìri ji á wíy mvə̀ʼtì sí yév.

Kí kfən tùm mo ji m fəə́r wír ve á nəʼsì áwune fó ŋgeʼ,

19a fìʼtì jii, kiyá kìn ki sì ke Nyùy buʼ wíri.»

20Jesus yòŋ bèy, e sə̀tí ŋwàʼ, e siìr e wìr wo wù‑uù lemè, e dzə̀ʼə̀m ji wun naarì kinyo kee shooy. Wìr dzə̀m wo wù‑uù dzəə̀n é ŋgày bùnrì foo fèy nèn shòvtí sí, a kiy wun. 21Wù wáa naàrì jii, «Kinyo ke vèn yuun fó Ŋwàʼ Nyùy kìn ki ghèén ne e kishiíy ké lán ki.» 22Wíri wáa yuurí vinyo ve wù suuyì, a ví boŋ e ŋàŋ, a ker gháʼ, a binsí wun, e bóo kfə̀n a kfə̀ynìn jii, «Bó və̀n yòʼ dzə̀ wan Joosev à?»

23Jesus lò, e sùúy aáwune jii, «Kù bèr ne shishàr, é vèn té ŋgàn e mǒ wùn jii, ŋgaà shìv, fer ri kitú ké ki. Virom ve vèr‑iì yú ji à kì shóʼ e Kapeenahum vìy, yiì ri sa lèn e věn ntèʼ fen.» 24Wù nèn lò, e sùúy jii, «M suuy ven kinyo ke ru kí jii, bó á yòʼ yii ghvə́m *ŋgaà ntum Nyùy aáwuné ntèʼ. 25Vèn yú kinyo kímóʼ kí. Yì‑iì dzə̀ é ghan se Elija‑aà dzəə̀n ŋgaà ntum Nyùy, Nyùy tiír wuú viyá vitaár e ŋwee ntuùfú, jìŋ koó woŋ e dzə̀m. Vèn kì sá rú ji vikǐy ŋkfəə‑əə̀ ló a dzə e wòŋ Isray fèn e ghan see shooy anín, 26a bó Nyùy yòʼ‑oò lo tùm Elija ji wù du, e sə̀ vee shooy. Wù‑uù tùm a dzə̀ fo wiíy ŋkfə wùmòʼ é ntèʼ yeé Tsarefat, a dzə̀ é wòŋ Sidon.

27«Wáa dzə e ghan se Elisha‑aà dzəə̀n ŋgaà ntum Nyùy, kímóʼ kí koóy sa bèy. Wíri‑iì joy shivnsay e wòŋ Isray fèn aneénín, a bó Elisha yòʼ‑oò lo fèr áwune. Wù kù‑uù fèr a dzə̀ Naaman cáʼcáʼ, a dzə̀ wír woó wòŋ Siiria.»

28Wír ve vé‑eè dzəə̀n é ŋgày bùnrì foo fèyi yú vinyo vìn, ví nəə́ aáwuné vighìy. 29Á nèn tò, e bàm Jesus, e sə̀ŋ, e fəə̀sín ntèʼ shó ji á du, e dòm e koŋ. A ntèʼ yee shooy dzə̀ é gwan, a mbìv yìmòʼ dzə̀ kóŋ. 30Á lòo dù, wù siìr ŋkfənèr, e tòʼnín áwune, a dù du rə́.

Jesus júm *nyùy wo wù jívir wír

(Maak 1.21‑28)

31Jesus nèn sə̀y é ntèʼ yee Kapeenahum, a yì dzə̀ sá e mbìv wòŋ yeé Galeli foo fèy. Wìy lòo dzə e kishiíy ké bam, wù wáa yeʼéy wíri é ŋgày bùnrì. 32Á wáa yuurí, a ker gháʼ, bìʼ fo wù‑uù yéʼey kfə́, kiiy kinyo ke wù suuyì. 33Wìr wùmòʼ wáa dzə e ŋgày bùnrì foo fèy, a nyùy wùmòʼ jívir wun. Wù nèn lò, a waamé jii, 34«Ábáy, Jesus woó Naasarer, à taʼ ji à yée le e vèr? À wìy ne ji à laar ver a? M kìíy ne wò. À lò fo Nyùy, à dzə̀ Wan Nyùy.»

35Jesus kàntì nyùy və̀y jii, «Sə́sín, e fəə̀ fo wìr və̀n wùn.» Wù nèn rə̀vír wír və̀y, e màʼ e wírí si, e bóo màʼtì, yii bèy, e làa yòʼ lemér gheéy. 36Wíri yén bey, a ker gháʼ, a ghaynín jii, jí se Jesus si sà dzə̀ é le ben a? Wù kér vitaáví, kantì anyùy, aá màʼtì a wíri. 37Léŋ Jesuse ku nèn ghànén ntèʼ seé mbìv fóo fèy sidzə̀m.

Jesus fér wír anín

(Matio 8.14‑17; Maak 1.29‑39)

38Jesus yiì fəə̀ fó ŋgày bùnrì fèy, e dù e Simon lav, a kinjàʼ ki shúr yeè wiiy Simon feyì. Á ku nèn a lon ji wù sə́ á wun. 39Wù nèn dù, e tìím fo wù‑uù néŋé, e kàntì kinjàʼ kìy. Kí nèn màʼtì wiíy və̀y, wù bónén, e kù nèn lò e yuv, a ker áwune, a yiír.

40Shùy yiì lòo nəə́, wír ve vé‑eè kér aŋgàa yàsí aáwuné melaʼa nèn a lì, a wìy, a yen Jesus sho. A wìr fə̀m‑eè joy ka, á kù wìy sho. Jesus wáa neèr wó rə́ aáwuné vitu, á wáa bonén adzə̀m. 41Wír aníne wáa dzə ve anyùyi jívir áwune. Á wiy sho, anyùy vee shooyi nèn a fəəkír fo wír vee shooyí wùn, a nyeŋ. Lóo nyeŋ, á wàa waamé, a yòŋ Jesus jii, «À dzə̀ Wan Nyùy.» Jesus nèn a kàntì fo áwune wáa suŋnín, bìʼ fo áwune‑eè kiìn ji Jesus dzə̀ á *Mfə̀ə́r wo Nyùy‑iì kàʼàn.

42Ndzə yiì lòo ran, Jesus fəə́, e dù e kirə̀ʼ fo bó wíri yòʼ‑oò dzəə̀n. Á siíy, e tàʼ wun ntéŋ, e nèn fəə̀, a tàʼ, e lòo yen, a wù kì sí lo loòn fo áwuné ntèʼ, e nèn a lon ji wù ku gòʼ a wùn áwune. 43Wù sháʼnín, e sùúy aáwune jii, «M kér fó dù sa e ntèʼ símóʼ sí, a fìʼtì sáʼka wo juŋ woo mo sáʼ Nyùyi dzəə̀n. Nyùy‑iì tùm mo é ndzə fèn, a dzə̀ bìʼ kee shooy.» 44Wù nèn lò, a dù, a ghan woŋ e dzə̀m, a fìʼtì sáʼka woo shooy e ŋgày se bùnrì.

Currently Selected:

Luk 4: LNB

Highlight

Copy