Luk 8

Vikìy ámóʼó ghán, sə́ Jesus

1Vishiíy ví lòo tumsín, Jesus wùn à wón və́ lìm vee nshòv sibaà e ghvə̀me nèn lò, a kfən, a ghan e mvə̀m sé laʼ, a ghan e ntèʼ sí. Wù wáa fìʼtì sáʼka Nyùy wo juŋ, a naàrì mo sáʼ Nyùyi dzəə̀n. 2Vikìy ámóʼó wáa ghan sa wùn áwune, a dzə̀ vikìy ve wù‑uù fèrìn ayàsí vév, ámóʼó, ve wù‑uù jùmèn *anyùy ve vé‑eè jívir áwune. Wùmòʼ‑oò dzə̀ Maria wo vé‑eè yoŋ sa ji Magdalen, a Jesus‑eè jùm anyùy saàmbà fo wùn wó. 3Wùmòʼ kfə́n a dzə Joana, a dzə̀ wiiy Cusa wo yì‑iì dzəə̀n nshìylav Fòn Heror. Wùmòʼ Susanna wùn à vikìy ámóʼó sá anín. Aá ghán wùn à Jesus, taʼ vibam vév, sə́ wùn à wón və́ lìme shó.

Ŋgàn wìr wo wù maʼ ŋgoòy

(Matio 13.1‑9; Maak 4.1‑9)

4Jesus wáa ghan bèy, wíri ku nèn a lòkìr fo ntèʼ sí, ntèʼ sí, a wìy, a yen wun. Màŋgòŋ bánén nyanyày, wù wáa yòv ŋgàn yìmòʼ aáwune. 5A yì dzə̀ jii, «Wìr‑iì dù, a màʼ ŋgoòy kifa e sum. Wù lòo màʼ, símóʼ sí túmkír é dzəə, wíri siíy, a koʼrí sho, menə́n mè kfən tàyrí, e yì. 6Símóʼ sí túmkír a dzə̀ é woʼ, e fəə̀, e kù nèn yòvrí, bìʼ fo kirə́ʼ kee shooy ki‑iì yumen é ŋàŋ. 7Símóʼ see ŋgoòy si túmkír é mvə̀m vikwìíy, e wìy fəə̀, vikwiíy ví kúy, e sə̀tí, vifá vee shooy vi saásí. 8Símóʼ sí túmkír a dzə̀ é nsay ye juŋ, e fəə̀, e kùy, e wàyrí. Á nèn wìy kàv vifá kàŋ wií, e shaà mo vé‑eè màʼàn.» Jesus fèr bèy, e lò, e yìysí jii, «Vituʼùr ví dzə̀ vibaà, kímóʼ kí tén fó yu, kímóʼ kí waà yù.»

Kinyè ké kinyò ke Jesus súŋnin a dzə̀ é ŋgàn

(Matio 13.10‑17; Maak 4.10‑12)

9Wón lìm Jesuse nèn yiì lò, e dzə̀r nsàv ŋgàn ye wù kì yòvìn rə̀y sho. 10#Aysaya 6.9 (Grik). Wù suúy aáwune jii, «Dzə̀ ven vin ve Nyùy yiìn ne, vèn kiíy vinyo ve saʼ rə́ ye yí dzəə̀n é kilìr. Yii bèy, a wír ámóʼó yú kév cáʼcáʼ ji ŋgàn. A kí dzə̀ bey ji kí fíʼ a dzə mo kí‑iì dzəə̀n jii, ‹Áwune lóo leéy, é la á yòʼ a yen kinyo ke kí dzəə̀n, lóo yuurí, é la á yòʼ a yu nsàv.› »

Nsàv ŋgàn yee kùm ŋgaà ŋgoòy

(Matio 13.18‑23; Maak 4.13‑20)

11Wù nèn sùúy jii, «Nsàv ŋgàn rə̀n dzə̀ jii, ŋgoòy kifa dzə̀ kinyo ke Nyùy. 12Ŋgoòy ye yì tumkin é dzəə nén a dzə wír ve á yú kinyo ke Nyùy, Satan siiy, wù nèn wìy, e fə̀ə́r kinyo kee shooy fo áwuné meliv fo áwune biímé, e wìy lùŋ. 13Ŋgoòy ye yì tumkin é woʼ dzə̀ wír ve á yú kinyo ke Nyùy, á kù nèn biìmé e kishéʼrì ki, e làa yòʼ way shilív shó. Kinyo ke Nyùy ki nén a dzə fo áwune moo kifá kee là gháŋ. Ŋgeʼ keʼ lóo koóy bìʼ kinyo kee shooy, áwune nèn yèʼtí e bàm. 14Ŋgoòy ye yì tumkin é mvə̀m vikwìíy wáa dzə wír ve á yú kinyo ke Nyùy, lóo bìn ndzə̀m, á nèn a yaŋrí a dzə̀ vifá, a tàʼ vikuʼùy, a kòŋ fó a yi a dzə̀ vitú. Kinyo ke Nyùy ki nèn lày kisáŋ aáwuné meliv. 15Ŋgoòy ye yì tumkin é nsay ye juŋ nén a dzə wír ve á yú kinyo ke Nyùy, á ghàr shilív shimòʼón, a yiì mo kí dzəə̀n, a dù duùn fó mbìy.

Ŋgàn yee kùm lam

Lá wìr yòʼ a lìtì kinyo ke Nyùy fo wíri

(Maak 4.21‑25)

16«Bó wìr yòʼ yii səʼ lam, wù kfə̀n lì mbìʼ, e sùm sho. A bó yòʼ dzə̀ wù kfə̀n wày sá e ntsə́nkun. Wù yii səʼ, wù tìír a dzə̀ é kitu ke kifa ji wíri lóo nəə́ e lav, á wàa yen fó. 17Vèn wáa kiíy jii, kinyo ke vé‑eè lìtìn kidzə̀m ki kér fó wíy yensín, é vinyo ve ví dzəə̀n fó mesənér vidzə̀m vi fəə́sín fó meranén. 18Kí nén a dzə jii, vèn lóo yuurí kinyo ke Nyùy, vèn wàa kiíy, a səə̀m a kijuŋ, a kiíy jii, wír wo wù kér kifá, á yíi dzə̀sì. Wìr wo wù buŋen, aá maysì shishàr she wù kwaʼ ji wun kérí, e gèr gérín.»

Wír ve dzəə̀n kfə́ə Jesus

(Matio 12.46‑50; Maak 3.31‑35)

19Jesus kú a yeʼéy wíri bey, yè wov wùn aàfə́r vəə́ nèn wìy ji á yén a wun. Wíri kùʼ ŋkóŋkóŋ, áwune mùm ntéŋ fó nəə́ e lav. 20Á suúy shó jii, «Yè won wùn aàfə́r vée wìy, a tàʼ wò fo ndzə.» 21Jesus bìnèr kfə́ jii, «Yè wor wùn aàfə́r vémé kù dzə̀ wír adzə̀m ve á yú kinyo ke Nyùy, yii mo kí dzəə̀n.»

Jesus kér vitaáví fo shwér wùn à ndzə́ví

(Matio 8.23‑27; Maak 4.35‑41)

22Wìy lòo dzə e kishiíy kímóʼ kí, Jesus suúy e wón və́ lìme jii, «Vèsən túmsín kibáŋ, e kfə̀n é ndzən və̀sə.» Wùn áwune nèn nə̀ə́ e kikoŋ, a dù. 23Á lòo dù, Jesus wáa buuné. Kinsəm ki nèn sàsìn, e sə̀y fó gwan kitávín, a tsəy ndzə́v. Mendzə́v mè wáa nəə́ e kikoŋ, a tàʼ, e run, áwune wáa fàn fó làykìr e ndzəv. 24Á nèn a yìm Jesus jii, «Tàr à wíri, Tàr à wíri, vèsən sí lay e ndzəv.» Jesus yìmèn, e lò e yuv, e wàm kinsəm, e kfə̀n wàm ndzə́v ye yí kì tsə́ynin rə̀y. Kinsəm ki ku nèn yàr, ndzə́ví tiím, e kfə̀n ji nyoòŋ. 25Wù nèn dzə̀r aáwune jii, «Vèn yòʼ dzəə́ wáy shilív e mǒ wùn a?» Wúné kú a beemé áwune beémén, á wáa ker gháʼ, a ghaynín jii, wìr woo ben sà dzə̀ woó le, wo wù kantì shwér wùn à ndzə́ví, a yí yúnin wun a?

Jesus kér vitaáví fo *anyùyi

(Matio 8.28‑34; Maak 5.1‑20)

26Áwune ku nèn tùmsín kibáŋ kiy, e meèsín e ndzən və̀sə, a sì é mbìv wòŋ yeé Gerasin, aá máʼtí ne yeé Galeli. 27Jesus lòo fəə fo kikoŋ e ghaa ntèʼ yìmòʼ, wùn wìr woó ntèʼ fóo fèy wùmòʼ tárnín, aànyùyi jívir vifií və́. Wù‑uù ghán e kwaʼ kinshóʼ, shiiy a dzə̀ é mbvə̀ʼ fo vé‑eè dzəəmè wíri, a ntàm dár ne mo wù‑uù màʼtìn láʼ.

28Mo wù yenen Jesus, e nèn rəə̀mé, e dù, e tsə̀m é si wo, a waamé kitávín jii, «Jesus woo Wan Nyùy woo Taà Vitu, à taʼ ji à yée le e mò? Kii wò, lá à yòʼ fò mo ŋgeʼ.» 29A wù suuy bèy, bìʼ fo Jesus kì wamen nyùy wo wù jívir wun ji wù maʼti á wír və̀y. A nyùy woo shooy‑iì lo, wù ŋàʼáy fo wìr və̀y wùn, á wàa jùm, a koo koón. Vé‑eè sí koó akàŋ anín, kúr aàsháŋé, wáy e kibuʼ, e bó a shìy, a wù tiíne asháŋ, bvə́ʼti vibúʼ, a nyùy və̀y dom, a wù nyéŋ, du duùn é kwaʼ.

30Jesus lò, e dzə̀r e wìr və̀y jii, «Yír yée dzə̀ la?» Wù bìnèr jii, «Yír yémé dzə̀ Mànjòŋ.» A wù‑uù yoŋ bèy, bìʼ fo anyùyi‑iì dzəə̀n é wùn wó anín. 31Anyùy vìyi nèn a lon jii, lá Jesus yòʼ tsə̀nsí áwune a dzə̀ é biíntùr, aá wáa yen a ŋgeʼ. 32A ŋgoo kǔnnyàm kì yíkir e bvə̀m gwan wùmòʼ fó, anyùy vìyi nèn kfə̀n a boòrì jii, wù ku tsə̀nsí áwune, aá nəə́ a dzə̀ áàkǔnnyàmé wùn. Wù nèn biímé, 33á màʼtì wír və̀y, e tùmsín e kǔnnyàm wùn. Kǔnnyàm bvəə́rí fó fo, e dù, e dzə̀ŋrí kóŋ, e sheèmé e kibaŋ, e làykìr.

34Wír ve vé‑eè shiy kǔnnyàme yén kinyo ke kí kooyin, e nèn nyèŋ, e dù, a sàmèr kinyo kee shooy e ŋgvə̀n kwaʼ, e kfə̀n a sàmèr e mvə̀mlaʼ fèy. 35Wíri wáa yú, a fəəkír, a dù fó yen sa kinyo kee shooy. Á wìy, e bàʼtí fo Jesus kì dzəə̀n, e yèn wír və̀y, aànyùyi máʼtí ne, wù wáa dzə e Jesus ghaŋ, a wù máʼ ne ndzə̀y sə́, a vifií və́ ví kfə́n ne fo. Wíri nèn a fàn. 36Wír ve vé‑eè yenen kinyo ke kí kooyin wír wo anyùyi‑iì jívir və̀yi nèn a fèr e ve vé‑eè jum, wiy fo bàmé mo kí ghanen, bo wù bónén.

37Wír veé wòŋ foo fèy adzə̀me nèn a fàn, a yaŋyáŋ, a boòrì Jesus bóorin jii, wù ku lò a fo áwuné wòŋ. Jesus nèn lò e wún vəə́, e nə̀ə́ e kikoŋ ji wun waà sí du. 38Wù lòo dù, ŋgaà anyùy və̀y wáa lon ji bo wùn wun kì gháné. Jesus sháʼnín, e sùúy sho jii, 39«Kú a kfən a dzə̀ fó laʼ. À du, à wàa fèr kinyo ke Nyùy yiìn e wò kigháʼán kin.» Wìr və̀y nèn dù, a ghan mvəmlaʼ yee shooy e dzə̀m, a fèr e wìr dzə̀m mo Jesus yiìn e wun.

Jesus kér vitaáví fo yàsí wùn à kpúu

(Matio 9.18‑26; Maak 5.21‑43)

40Jesus tùmsín kibáŋ, e kfə̀n é mbìv fésə. A màŋgòŋ kì sí shiy wun fo, á səə́sí wun. 41Wìr wùmòʼ wìy fo, aá yoŋ ji Jayur, a dzə̀ taà ŋgày bùnrì yee fó. Wù wìy, e shaà, e dù tsə̀m e Jesus si, a buʼ wó ji wù ku wìy e wùn lav, 42wan və waà sí kpú. Wù‑uù kér wán və̀n e mòʼón cáʼcáʼ, a dzə̀ woo wiíy, a wù sì kiyá nshòv sibaà e ghvə̀m.

Wùn Jesus nèn a dù, màŋgòŋ wáa jùmrì, a fatír e Jesus ghaŋ. 43A wiíy wùmòʼ kì shèm sá e mvə̀m ŋgoo foo fèy, a wù joyì, a sì kiyá nshòv sibaà e ghvə̀m mo wù‑uù kèʼèn, a shaà, vé shìvi mùm ntéŋ. 44Wù nèn kòʼtí e Jesus bàm, e sòór kiwó, e kùm shúu və́ ndzə̀y. Mo wù kùmèn, yàsí və ku nèn tìnén. 45Jesus dzə́r jii, «Kùm la mo?» Wíri sháʼnín adzə̀m. Pita nèn lò, e yòŋ jii, «Tàr à wíri, à yòʼ yén mo màŋgòŋ gìmèn wò, e tàr, a fatír wò à?» 46Jesus kú a suúy jii, «Wìr nyàʼtí, e kùm mo, a m lo yù mo vitaáví vém ví yiìn ne lim.» 47Wiíy və̀y yén ji Jesus kìíy ne kinyo ke kí kooyin, a yàʼ feyì, e dù, e tsə̀m e Jesus wuù, a fèr e màŋgòŋ si kinyo ke kí kì yiìn, bo wù kum Jesus, e kfə̀n a fèr mo wù kùmèn, yàsí və ku nèn bònén. 48Jesus lò, e yòŋ jii, «Yaà, à bònén bèn, bìʼ fo à wayin shilív e mǒ wùn. Dù ri kijuŋ.»

49Jesus kú a súŋnin wùn wiíy və̀y bèy, wìr wùmòʼ nèn wìy fo Jayur lav, e sùúy sho jii, «Wan wò və̀y kpù ne. Bó shií yòʼ dzə̀ə́ wo á kfə́n a jivír Ŋgaà Yèʼéy və̀n.» 50Wù lòo suúy, Jesus yú, e sùúy e Jayur jii, «Lá à yòʼ a fàn. Wáy a dzə̀ shilív shí e mǒ wùn, é wan wò luŋ.» 51Wùn Jayur nèn lò, a dù. Á meé é laʼ, Jesus sháʼnín fo wìr nəə́ é lav, e lì a dzə̀ Pita wùn à Jeem, à Joon, e kfə̀n lì taà wàn wùn yeè wàn. 52A wíri kì sí tóŋnin, diy a dzə̀ kpú, Jesus suúy jii, «Lá vèn yòʼ dzəə dìy, wàn yoʼ kpù, wù buúne buùnén.» 53Á nèn a kèŋ Jesus kéŋen, bìʼ fo vé‑eè kiìn ji wàn kpù á ne. 54Wù nèn dù fo wàn‑eè néŋé, e ghàr kiwó ke wan, e yòŋ jii, «Wánlè wiiy, lò é yuv.» 55Wù ku nèn kfə̀n lùŋ, e tùm é yuv kàŋ mòʼón. Jesus suúy jii, á taʼ kifá ke yi, e fò á sho, é wù yí. 56Taà wàn wùn yeè wàn yén kinyo kee shooy, shúu yúm áwune. Jesus kàntì ji á wáa yen a fó yiì, é wìr kiíy kinyo ke kí kooyin.

Currently Selected:

Luk 8: LNB

Highlight

Copy