Lŭka 7

Jezŭ Mèhmage Klĭbodo Azôpho

(Mattĕo 8.5-13)

1B́ĕ Jezŭ d́ò̆htôd́ò̆dèlè hwă bija tòcò d́ō, Ze lenīgè d́ŏ Kapèrnaum U bu nu. 2B́ĕnu klĭ abwè dègèjè akho klĭbodo dèbwè azôpho htè cè b́èlò̄ dèbwè nu scwisôgè pwĕ ca thamò̆ thĭgè nu. 3Klĭbodo dèbwè nu thîhè̆b́è Jezŭ awîakè̆ d́ō, zo thodŏlegè Jŭdapho adoabwe tòcò d́ŏ Jezŭ ò nu cab́ô̆htè Zè gè̄ mèhmagebò̄ lōwa nu. 4B́ĕ cè tòcò dohtî Jezŭ nu, za damò lōwa azî̄azô̄ kî cò d́ò, “Zò mò tani tèpwè Nè gè̄ mèni cè dè ajo nu. 5Manè̄ kòd́òdo dō, cè b́èlò̄ wi khwĭpho kî cè thè̆ne pranigè wa Sinagŏgā,” cò d́òge lōwa d́o.

6Mègōnu d́ō Jezŭ lekôgè ca kă. B́ĕ Zo dole b́ôhtî lōwa ahi nu, klĭbodo thodŏlegè athò tòcò akò d́ò̆sa Cè, “B́ĭcè, khasòwè̆bò̄ ḿè, manè̄ d́ō, ja da ta mè Ne gē lenī ji hikholè̄ ńò. 7Mègōnu jo gomokò̆ htè jè thè̆ne ja da ta mè agē lehtî Nè ńò nu. Ḿî d́òbò̄ ne lē dôhmô̆ lò kî jô zôpho gā hmage tèpwè. 8Manè̄ kòd́òdo dō, ji ḿî bija aò dèkălè̄ dèbwè, kî klĭpho aò ja kălè̄ tòcò cò, kî b́ĕ jò d́ò klĭpho dèbwèbwè, ‘Le!’ d́ō ze le tèpwè. Kî jò d́ò alewe dèbwèbwè, ‘Le b́ĕjo!’ d́ō ze lehtî tèpwè jè, kî b́ĕ jò d́ò jô zô jè bwè dèbwèbwè, ‘Mè dè ajo!’ d́ō ze mè tè pwĕ.”

9B́ĕ Jezŭ thîhè̆b́è dè ajo d́ō, Zè htèdômô̄dahmă, Ca tcab́a hwă bija aboahò alôkô ze le tòcò d́ō, “Jò d́ò̆sa thĭ adî̄ahma, d́ŏ Israè̆lpho tòcò aklè̆ hnò̆nu, ja da pahtî dèb́u ado pwĕ gōjo ńò.”

10Kîd́ò̆ b́ĕ bija ab́è thè̆le tòcò doge hi nu, za tcahtîb́è zôpho ascwisôgè dèbwè òmô̄òhmage tèpwègè nu.

Jezŭ Mèthôḿô̆htage Ahmugèmè Aphokhŏ

11Alekă dini nu, Jezŭ legè d́ŏ u htè bija jo Nain u nu. Zo bōhmubicè kî bija aboahò lekôgè Ca kă. 12B́ĕ Zo do b́ôhtî u akhaglè̄htî nu, tcabò bija j́ale amikhŏ athĭ dèbwè aco, htè ahmugèmè apho ò dèbwè lò nu. Bija aboahò aò d́ŏ u bu tòcò ḿî ḿî lekôgè ca kă kă. 13B́ĕ B́ĭcè Jezŭ tcahtî cè nu, Zò khòwèhmòb́è lōwa d́ō Cò d́ò, “Habò̄ ḿè!” 14Mèhwă d́ō, Ze le ahlò̆mò̄ kî tòb́ègè hlò̆, kî bija aj́a lū tòcò sò̆htoògè. Mèhwă Cò d́ò, “Ab́òĺòpho, Jò d́ò nè, wè̄htobò̄ dakha.” 15B́ĕnu lò, athĭ dèbwè wè̄hto sańă kî jî̄b́ègè. Kîd́ò̆ Jezŭ igegè cè d́ŏ zo mo acukhòbu nu.

16Bija lŏcăcè scisăthabo d́ō cè tòcò bè̄dòbè̄thegè Kib́ĭcè, cò d́ò, “Prò̆fèt ado pòhtagè wè klè̆ dèbwè, kî Kib́ĭcè lehtîgè Zi bija,” cò d́ògè do.

17Dè awîakè̆ jo, d́èlò̄d́èkhò̆gè d́ŏ Judĕage kî ge wē ge wa tòcò nu.

Zowănnī Baptĭsta thodŏle Abwèzo

(Mattĕo 11.2-19)

18Zowănnī abōhmubicè tòcò le d́ò̆sagè cè dè awîakè̆ ajo. Mègōnu d́ō, Zowănnī jo hwă abōhmubicè tòcò aklè̆ gībwè d́ō 19zo thodŏlegè lōwa d́ŏ B́ĭcè Jezŭ ò kî d́ògè, “Nî ḿî Cè htè agē lelab́è dèbwè nu ā? Ḿî̆dîḿî ńò wa gā wahlèb́è alewe dèbwèbwè ā?” cè d́è̆gè lōwa d́o.

20B́ĕ cè tòcò dohtî Jezŭ d́ō, cò d́ò, “Zowănnī Baptĭsta thodŏlegè wa d́ŏ Ńò ò nu, za hna d́è̆tca wa, ‘Nî ḿî Cè htè agē lelab́è dèbwè nu ā? Ḿî̆dîḿî ńò wa gā wahlèb́è alewe dèbwèbwè ā?’” cè d́è̆gè lōwa tòcò do.

21B́ĕnu akhî ḿî Jezŭ mèhmage bija ascwiasè̆ kî dèsè̆ amŏamo, dèhnè phîb́è tòcò kî Zè mèhlî̆htage bija agādŭkhî òè̆bwè nu. 22Mègōnu d́ō Cò d́ògè lōwa tòcò, “Ge kî d́ò̆sabò̄ Zowănnī dè htè thĭ thîhè̆b́è kî tcahtîb́ègè tòcò nu. Agādŭkhi tcahtîb́ège, akhad́e tòcò khè̆zage, anigu toŏ tòcò aè̆ phlò̆htage, akaĺaki tòcò plî̆tcăge, athĭ tòcò htaboge, assègnè̆pho tòcò b́è d́òŭd́ò̆sa Vanzĕlō adèthôdèthò̆. 23Kî ab́èhôwî ḿî bija htè atò òkî dèthablè̄thajô Jo kho Jè cè̆ ńò tòcò nu,” Cò d́ò̆sagè lōwa tòcò do.

24B́ĕ Zowănnī Abwèzo tòcò ge hwă nu Jezŭ d́ò̆sagè bija tòcò ab́èkja Zowănnī awîakè̆ gōjo, “Thĭ le tcagè da d́ŏ hmîlè̄klè̆ nè? Gòbòthèjè̆ htè agleglā d́ŏ gīlliklè̆ nu ā? 25Ḿî thĭ le tcahlègè danè̄? Bija akô̆athò gobōphŭ dèbwè dòkhò̆ ā? Tcabò̄, bija akô̆ thi thò thi, kî a aẃi ascĭ tòcò nu ò tèpwè d́ŏ sophrŏsaphra ahibu lò. 26Ḿî thĭ le tcagè danè̄? Prò̆fèt dèbwè ā? B́èhŏ, jò d́ò̆sa thĭ, adokhlŏ kî Prò̆fèt nu. 27Ajo ḿî cè htè dèhweladòlògè zî wî zè kè̆ nu, ‘Tcabò̄, Jo thodŏle Jè bwèzo d́ŏ ńò hlò̆mò̄ nu, htè agā prahnè nè klè ńò thòò̆ nu.’ 28Jò d́ò̆sa thĭ, gajă bija aòlakô amihmu tòcò aklè̆ Prò̆fèt ado d́olĭ Zowănnī nu tò ò ńò; barasă aòla d́ŏ Kib́ĭcè ahtĭage bu asciphogudu dèbwè hnò̆nu dō d́olĭ we cè.”

29Kîd́ò̆ b́ĕ bija tòcò thîhè̆b́è hwă Zè dèjî̄b́è d́ō, bija lŏcăcè kî adadèhmŭ tòcò htăhtai Kib́ĭcè d́ŏ cè tòcò nib́ègè Zowănnī adèŭsab́ăhtĭ akhoacè̆ nu. 30Barasă Pharizè̆pho kî Skrĭbāpho tòcò di nib́ègè zè dèŭsab́ăhtĭ ńò akhoacè̆, htèkè̆htèôgè dè htè Kib́ĭcè mènigè cè tòcò nu.

31“Jô kô d́ôthò̆dròigè bija ajo dôzô kî danè̄? Cè tòcò la kî danè̄? 32Cè tòcò la tèpwè abĭsèpho asańăla ò d́ŏ bija bwîsè̆dè alle, kèwohta kî d́òhlè lōwa, ‘Wu u ni thĭ htwè̆ barasă thĭ dè wè̄hto gecugekha ńò, wa thăbô̄ dèthĭ adèd́ò̆lē barasă thĭ da ha ńò.’ 33Manè̄ d́ō, Zowănnī Baptĭsta le, ca ta atoko ńò, cò tò ò̆ thobiscihtĭ ńò kî thĭ d́ò tèpwè ‘Hnè pô cè.’ 34Bija Apho le, ca akî cò ò̆ò̆, mègōnu thĭ d́ò, ‘Tcabò̄ bija adoa, aò̆ thobiscihtĭ dèbwè nu! Zî ḿî adadèhmŭ kî dèkhòwèpho tòcò athò.’ 35Barasă dèthîhè̆ dèzadèbla ḿî ahlî̆htaphlò̆hta tèpwè d́ŏ zo pho zi li tòcò alò nu.”

Amihmu Asalage Atha

36Pharizè̆pho dèbwè jogè Jezŭ Lumuhè Adèa anikhĭ, mègōnu d́ō Jezŭ lenīgè d́ŏ Pharizè̆ anu dèbwè ahibu nu kî le ò dòlògè d́ŏ dèa alle nu. 37Kî tcabò̄, amihmu htè aḿî dèkhòwèpho d́ŏ u bu nu dèbwè, thîhè̆b́è htè Jezŭ le a dèa d́ŏ Pharizè̆pho ahi nu d́ō, ze leigè lob́ô̆ ahmwe aòpĕhta kî sihnŭẃi dehmwe, 38kî sò̆htoògè d́ŏ Jezŭ akădusŭlă nu. Zè htè̆lăgè za gādŭhtĭ d́ŏ Jezŭ akhahlèkho kî htô̆b́ăigè zu khulŭ kî cî cwîgè. Mèhwă zô thôphrôgè lōwa akhakhò kî sihnŭẃi. 39B́ĕnu Pharizè̆pho tcahtîgè d́ō, co d́ò d́ŏ ca thaobu, “Bija ajo dèbwè, Zi gî̄ ḿî ma Prò̆fèt d́ō, amihmu atòb́è Cè dèbwè ḿî bò̄bwè nu zi gi thîhè̆ ladŭè, manè̄ zî ḿî dèkhòwèpho,” zo gomo d́o.

40Jezŭ d́òscĭge cè, Cò d́ò, “Simŏnè, Jò mò d́ò̆sa nè dè ò dimi,” Cò d́ò lōwa do.

Kî Cò d́ò, “Sara, d́ò̆sabò̄ jè,” cò d́òscĭge Jezŭ d́o.

41“Bija ailò bija hô̆ dèbwè nu, aki igeb́è zô hô̆ ò gībwè. Dèbwè ki igeb́è cè denărio jè̄gèjè, alewe dèbwè, jè̄ khè̆. 42Cè tòcò ti ige kèhta ńò d́ō, ca b́ahlô̆ lōwa gībwè lōlō. Mègōnu d́ō, akè b́èlò̄ d́okhlŏ cè ḿî d́òlè̄ dèbwèbwè?” Cè d́è̆gè lōwa d́o.

43“Jo gomo ḿî aki igeb́è dosè dèbwè nu,” Simŏnè d́òscĭgegè Cè d́o.

Jezŭ d́ògè cè, “Ńò d́ò dî̄ d́ò hmagè hŏ.” 44Ca tcab́a hwă amihmu d́ō Cò d́òge Simŏnè, “Na tcahtî tèpwè amihmu jo ā? Je lenīgè d́ŏ ni hibu, ni ti igè Jè htĭ aku ŭsab́ă Ja khakhò ńò. Barasă cè nu, cu ŭsab́ăgè Ja khakhò kî za gādŭhtĭ, kî htô̆thô̆igè zu khulŭ. 45Ni di cwîgè Jè ńò, barasă cè nu, dă Je lenī hwă hibu lò nu, zò dòsòd́è̆gè acwî Ja khakhò tîkî̆ ńò. 46Nò dô thôphrôi Jo ko kî dètho dimĭ ńò, barasă cè nu, zò hlòlagè Ja khahlèkho sihnŭẃi. 47Mègōnu d́ō Jò d́ò̆sa nè, zè dèkhòwè òèòò nòthò̆ hnò̆nu, d́ŏ zè dèb́èlò̄ do akhoacè̆ zè dèkhòwè tòcò b́è b́ahlô̆ lŏ htŏ,” cò d́ò̆sagè lōwa d́o.

48Mèhwă cò d́ògè amihmu, “Nè dèkhòwè tòcò b́è b́ahlô̆ lō htŏ,” cò d́ò lōwa d́o.

49B́ĕnu bija aòplo Cè d́î̆wāhtî tòcò d́ògè d́ŏ atha bu, “Bija ajo dèbwè ḿîgè bò̄bwè? Ca b́ăplè ma bija adèkhòwè nè?”

50Barasă Cò d́ògè amihmu, “Nè dèb́u mèhlô̆htage htŏ nè, gebò̄ d́ŏ dècodèmò abu nu,” cò d́ò lōwa do.

Currently Selected:

Lŭka 7: GRNT21

Highlight

Copy

Want to have your highlights saved across all your devices? Sign up or sign in

Learn More About Geba Roman New Testament

Popular Bible Verses from
Lŭka 7

Videos for Lŭka 7

Luke 1-9

The Bible Project

Jesus Forgives Sinful Woman

Jesus Film Project

Lŭka 7

Popular Bible Verses from
Lŭka 7

Videos for Lŭka 7

Luke 1-9

Jesus Forgives Sinful Woman

Bible:

Karen, Geba

Version: Geba Roman New Testament - GRNT21

Lŭka 7

Lŭka 7

Popular Bible Verses from Lŭka 7

Videos for Lŭka 7

Luke 1-9

Jesus Forgives Sinful Woman

Bible:

Karen, Geba

Version: Geba Roman New Testament - GRNT21

Lŭka 7

Popular Bible Verses from
Lŭka 7