Lŭka 8

Amihmu Aphîzomèzo Dèmè tòcò

1Tò òjî̄ ńò Jezŭ hèpôd́ŏgè d́ŏ u tòcò kî d́ŏphă tòcò abu, kî Zô thôithò̆idè kî d́òŭd́ò̆sagè bija Kib́ĭcè Ahtĭage aVanzĕlo. Aòkô ca kă ḿî bōhmubicè scigībwè, 2kî amihmu ab́è mèhlô̆mèlage dèscidèhnè kî dèscwidèsè̆ tòcò nu. Marĭa, bija jo ami Madalè̆nā htè B́ĭcè hna hèhtaphlòḿĭgè d́ŏ zi hîklè̆ dèscidèhnè thăthôtod́ŏ nu dèbwè, 3kî Zowănna, Èrŏdè abwèdo Khjuza ahmè̆ dèbwè, kî Zuzăna, kî amihmu òèòò aiatcage dè d́ŏ adèòni cè tòcò tîkîtòkò̆ tòcò nu.

Abā Dèkhwĭ Agèlè

(Mattĕo 13.1-9; Mărko 4.1-9)

4B́ĕ bija òèòò aò d́ŏ u alewe tòcò le b́òkhlo Jezŭ akhî nu, Cò d́ò̆sagè lōwa tòcò dègèlè dèdè̆:

5“Bija dèbwè le bāgè dèkhwĭ. B́ĕ za bā dèkhwĭ akhî nu, tòcò cò ladē klè wōkhowōlò kî bija khè̆htajāhta ni akho, kî htŏpho tòcò còakè̆ cè. 6Tòcò cò ladēnī losòkho, ahtuhta tod́o lò kî athĭwidrô hwĕlōkralō, manè̄ d́ō htĭ tòcòpwî ńò acè̆ nu. 7Dèkhwĭ alewe tòcò ladē ni dèscudèphî̆ klè̆, adohtaplo lōwa barasă dèscudèphî̆ jîthĭ tèpwè. 8Dèkhwĭ aladēnī hahîwî akho tòcò nu dohtasahta hwă athèhtaphò̆hta tèpwè apla dègèjè abu,” Cò d́ò do.

“Bija anigu ò tòcò gi thîhè̆ d́ò̆è,” Cò d́ògè do.

Dègèlè Ahtabohtab́ă

(Mattĕo 13.10-17; Mărko 4.10-12)

9Zo bōhmubicè tòcò d́è̆tcagè Cè htè dègèlè ajo ahtabohtab́ă ḿîgè danè̄ nu. 10Cò d́ò̆sa lōwa tòcò, “Mò̄kho Ahtĭage adèòhu nu thĭ thîhè̆b́è tèpwè. Barasă bija alewe tòcò anikhĭ nu ḿîgè acab́ô̆ dèd́ò ò adĕ nu lò. ‘Ca tca nòthò̆ cè tè kèhtî ńò, zò sòkhĕńe nòthò̆ zî dî thîhè̆ ńò,’ Cò d́ògè lōwa tòcò do.

Jezŭ D́ò̆sa Abā dèkhwĭ Agèlè

(Mattĕo 13.18-23; Mărko 4.13-20)

11“Khŏnujo dègèlè ḿî gōjo; dèkhwĭ ḿî Kib́ĭcè Alēahwè; 12Dèkhwĭ aò klè awōlò tòcò ḿî bija htè athîhè̆b́è hwă Kib́ĭcè Alēahwè d́ō Mod́èlî le kî phîkè̆ tèpwè d́ŏ ca tha abu nu cab́ô̆htè cu ku tu b́u ńò kî b́èhlô̆htagebò̄ ńò nu. 13Dèkhwĭ aladē losòkho tòcò ḿî bija htè athîhè̆b́è hwă Kib́ĭcè alēahwè, d́ō aphîni thalōthalai tèpwè. Barasă mè acab́ô̆ dèkhwĭ htè akhawi da lajò̄ ńò akhò̆ nu. Cè tòcò adèb́u ḿî tod́odasa, kî b́ĕ dèhnakă b́è cè akhî ze gephlò tèpwè. 14Dèkhwĭ aladēnī dèscudèphî̆ aklè̆ tòcò ḿî bija htè asòkhĕńe hwă Kib́ĭcè alēahwè alôkô adèthaèni akă ab́èohtathĭ d́ŏ dèb́èhjŏb́èma kî ŭcalèkhjă kî dèmèmòmèma ane abu nu d́ō athèaphò̆ di hmĭ za ńò tòcò nu. 15Barasă dèkhwĭ htè aladēnī hahîwî akho tòcò nu, ḿî bija htè aòi dèthowîthamò tòcò nu thîhè̆b́è hwă Kib́ĭcè alēahwè d́ō phîglopôglo hme kî thèhtaphò̆hta d́ŏ dèkhòthad́ò̆wîthazo abu tòcò nu.

Hmîŭd́ŏ Aò Pahlulè̄

(Mărko 4.21-25)

16“Bija do dola hwă hmîŭd́ŏ kî phlalab́i ṕahlu d́akŏ, ḿî̆dîḿî ńò d́ò̆lă leḿĭ adadālè̄ dèbwè̆ ńò. Ḿî bija b́è̆hta cè d́ŏ alehtajî nu cab́ô̆htè bija alenī hibu tòcò gā tcahtî zabò̄ dèhlî̆ nu.

17“Manè̄ d́ō, dè ahuazò adîhlî̆htaphlò̆hta ńò nu tò ò dimĭ ńò, kî bija lè̄hu dè tòcò nu gi lî̄htakò̆ dèhlî̆ aklè̆.

18“Mègōnu d́ō, thĭ sòkhĕńe cadè̄ nu thidĭibò̄. Manè̄ bija adèò tòcò gi nib́è d́okhlŏkò̆, ḿî bija adè tò ò ńò dèbwè nu zo gomo cè è̆ ò tîkîtòkò̆ hnò̆nu kè̄ b́è phîthĭwīkò̆ cè,” Cò d́ò̆sagè lōwa tòcò do.

Jezŭ Amo kî Cè Thè̆buthè̆we tòcò

(Mattĕo 12.46-50; Mărko 3.31-35)

19Jezŭ amo kî Cè thè̆buthè̆we tòcò lehtîgè Jezŭ, ḿî d́ŏ bija aboahò acè̆ zo do donīhtîzagè lōwa ńò. 20Bija tòcò d́ò̆sagè Cè, “No mo kî nè thè̆buthè̆we tòcò sò̆hto ò d́ŏ akhlŏ nu, cè tòcò thaè tcahtî Nè,” cò d́ò̆sa lōwa d́o.

21Cò d́òge lōwa tòcò, “Jo mo kî jè thè̆buthè̆we tòcò ḿî gajă asòkhĕńe Kib́ĭcè Alēahwè kî amèkô akă tòcò nu.”

Jezŭ Hna òzòlò Gīllimob́ĭ

(Mattĕo 8.23-27; Mărko 4.35-41)

22Dinidèthè̆ Jezŭ kî Zo bōhmubicè tòcò htanī khlĭbu kî Cò d́ògè lōwa tòcò, “Lĕ gē le d́ŏ hnòdo alewe dòkhòwō nu.” Mègōnu d́ō cè tòcò legè d́ŏ pèllè htĭkho. 23B́ĕ cè tòcò wa thebĕ khlĭ nu, Jezŭ sòḿĭnigè. Jŭkheńĕ Gīlli dobōsôgè d́ŏ hnòbu nu d́ō, cè tòcò ògè dèb́èhjŏb́èma abu. 24Mègōnu d́ō, bōhmubicè tòcò lehtî Jezŭ, htowè̄ cè, kî d́ò, “Sara! Sara! Wi gī thĭgè hlè̆mè̄ tèpwègè jo!” cò d́ò lōwa do.

B́ĕnu Jezŭ wè̄hto kî hò̆gè Gīlli kî htĭ khlodo d́ō, asò̆tab́a d́ō pwè alaṕwè, dèòzòlògè. 25Kî Jezŭ d́ògè Zo bōhmubicè tòcò, “Thĭ dèb́u ò d́òlè̄?” Cò d́ògè lōwa d́o.

Cè tòcò scisă, htèdômô̄dahmă kî d́òhlè lōwa, “Ajo ḿîgè bò̄bwè? Zô htulahmèla gīllimob́ĭ kî pèllèdo d́ō asòkhĕńe magè Zè lē nè!” cè tòcò d́ògè d́o.

Dèhnahèhta Dèhnè d́ŏ Gerăza nu

(Mattĕo 8.28-34; Mărko 5.1-20)

26Cè tòcò dolegè d́ŏ Gerăza agebu nu, htè aòwè̄ gana Galilĕage nu. 27B́ĕ Zè khè̆hta khò̆kho nu, upho htè dèhnè phîb́è òjî̄òkja dèbwè lescĭ Cè. Cò tò òhiòphă ńò, tô kô̆ tò thò ńò kî hè ògè d́ŏ lū ab́ikho tòcò aklè̆ nu. 28B́ĕ za tcahtî Jezŭ nu, zò gò̄la b́îtèd́è lōwa ahlò̆mò̄, zo htŏhta ze lē kî cò d́ò, “Jè b́èkjab́èthò̆ kî Nè danè̄, Ŏ Jezŭ, B́ĭcè Ahtajîgudŭ Apho? Jò damò Nè, mèssègnè̆bò̄ ḿè jè ḿè,” cò d́ò lōwa d́o. 29Manè̄ do, Jezŭ hmèlagè dèhnè akî̆kkè agè̄ hèhta d́ŏ bija anu dèbwè alò akhoacè̆ nu. Òè̆pla apôglohjaglo cè, kî bija cŏglogjî̄glo cè htaglò kî htaĺabi kî dôi nòthò̆ cè hnò̆nu ca d́ahto htè̆dū hwă htaĺabi dèhnè hmòle cè d́ŏ lothĭḿizekho nu.

30Kî Jezŭ d́è̆ cè, “Ni mi ḿî danè̄?” Kî cò d́ògè, “Ji mi ḿî Legiŏnè,” manè̄ dèhnè lenī òèòò zî hîklè̆.

31Dèhnè tòcò dakhòwè Jezŭ agè̄ dè hmèlabò̄ cè tòcò agē gela d́ŏ dèlajò̄codibi abu ńò nu.

32B́ĕnu htò òèòcara agè asè d́ŏ khòlò̆lò dobo. Mègōnu d́ō dèhnè dalā damò zî̄ Jezŭ aki icè tòcò lenī d́ŏ htò tòcò abu nu d́ō, Jezŭ i tèpwè cè akhwè. 33Dèhnè tòcò hèhta kî lenīgè htò tòcò abu, htòhò tòcò cwèla blabu, ladē hnòbu kî lapruthĭ tèpwè htĭ.

34Atcaî htò tòcò tcahtî dèphî̆hta gōnu d́ō, cè tòcò cwèle d́ŏ u bu kî d́ŏlaphăbŭ kî d́ò̆sagè bija. 35Kî bija tòcò hèhta kî le tcagè da phî̆htagè nè nu. Cè tòcò lehtî Jezŭ kî tcahtîgè bija hnè hèhtagè ahîklè̆ dèbwè sanălăò Jezŭ akhahtî, kô̆thò thuŭthèègè kî ò thăbrācwi do d́ō, cè tòcò scisăgè. 36Kî bija atcahtîgè tòcò ḿî ḿî d́ò̆saigè dè htè legiŏnè hlô̆htagè cadè̄ nu. 37Bija htè aò Gerasĕne thèd́è̆ge tòcò damò Jezŭ agè̄ hèhta zi htĭ ze ge abu, manè̄ d́ō, kaḿapho tòcò scisă thaganāsôgè. Jezŭ khè̆htanī khlĭbu kî geb́agè alekă. 38Bija htè dèscidèhnè hèhta hwă ahîklè̆ dèbwè dakhòwè Cè akò òkô Ca kă.

39Barasă Jezŭ hnage cè, Cò d́ò lōwa, “Gebò̄ ni hi kî d́ò̆sabò̄ bija htè Kib́ĭcè mènigè nè tòcò nu,” Cò d́ò lōwa d́o.

Mègōnu ze legè d́ŏ u abu kî hèbò̄igè lŏ dè htè Jezŭ mènigè cè tòcò nu.

Jaĭrus Aphohmu kî Amihmu Thwiphlò Dèbwè

(Mattĕo 9.18-26; Mărko 5.21-43)

40B́ĕ Jezŭ dob́age nu, bija aboahò scĭigè Cè, manè̄ d́ō, cè tòcò cò òsô̆wôgè dôlai Cè klè. 41Kî tcabò̄, bija atcai Sinagŏgā akhoane ami ḿî Jaĭrus dèbwè le, zò gò̄la hwă d́ŏ Jezŭ akhahtî nu za dakhòwè lōwa agē le d́ŏ zi hi nu, 42manè̄ kòd́òdo dō, zo phomu dèbwè lò aòkò̆ scigīd́e nu, thamò̆ thĭgè acè̆ nu.

B́ĕ Jezŭ lekô klè akhî nu bija aboahò sathîńîwè̄ Zò lò. 43Amihmu athwiphlò b́agè scigīd́e ògè dèbwè, kî kaḿapho lōhô̆lōhtè̆ nòthò̆ d́ŏ dihwi sara tòcò asôahlè̆ hnò̆nu, sara dèbwè̆ da prahlè̆mè̄ zagè ńò. 44Ze le d́ŏ Jezŭ alekă kî phîb́ègè zi scid́ŏ akăbèzwè kî taplakhă lò zi thwiphlò sò̆tab́agè. 45Jezŭ d́è̆gè bija, “Bò̄bwè tòb́è Jè bwè?” Cò d́ò do.

Bija tò d́ògè atòb́è Cè dèbwè̆ ńò. Petru kî bija aòkô Ca kă tòcò d́ò, “Sara, bija aboahò sagînîgônô tèpwè Nè pwĕ gōnu d́ō, bò̄bwè tòb́è Nè bwè? Nè d́è̆ zawe tèpwè d́ò̆ do ā?” cò d́òscĭgegè do.

46Barasă Jezŭ d́ò, “Bija tòb́è Jè dèbwè, manè̄ kòd́òdo dō, Ji thîhè̆ tèpwè htè dècô̆thèlè̆ hèhtagè d́ŏ Jò lò nu,” Cò d́òscĭgegè lōwa tòcò do. 47B́ĕ amihmu dèbwè tcahtîgè htè cò tò ò tib́ĭtab́a za be ńò nu d́ō, ze le ahlò̆mò̄, za ganādîzî hwă gò̄lagè d́ŏ Jezŭ akhahtî kî d́ò hlî̆htaphlò̆htagè htè cò tòb́è ma lōwa awîakè̆, kî zè dèsè̆ hlè̆mè̄gè taplakhă lò awîakè̆ d́ŏ bija lŏcăcè ahlò̆mò̄ nu. 48Jezŭ d́ò cè, “Aphohmu, nè dèb́u mèhlô̆hta htŏ nè htŏ. Ge mòmòbò̄.”

49B́ĕ Zî jî̄b́è phătha nu, d́ŏ atcai Sinagŏgā akhoane ahibu bija legè dèbwè kî cò dò lōwa, “No phomu thĭ htŏ. Mè sòẃè̆b́è̆thabebò̄ ḿè Sara ḿè,” cò d́ògè do.

50Barasă b́ĕ Jezŭ thîhè̆b́è dèjî̄b́è ajo d́ō, Cò d́ògè amihmupho apa gōjo, “Scisăbò̄ ḿè, òibò̄ dèb́u lò kî zô gô̄ hlô̆htage tèpwè,” Cò d́ògè lōwa do.

51B́ĕ zo dole hi akhî nu, Ci ti igè bija gē lenīkô Ca kă hibu dèbwè̆ ńò, ḿî Petru, Zăkomo, Zowănnī kî amihmupho amo apa lò. 52Kî bija lŏcăcè haigè amihmupho dòkhò̆. Barasă Jezŭ d́ò cè tòcò, “Habò̄ ḿè, zò sòḿĭ. Tè b́è ci thĭ ńò.” Cò d́ògè lōwa tòcò d́o.

53Mègōnu d́ō, cè tòcò jè̄karaigè Jezŭ, manè̄ cè tòcò thîhè̆gè amihmupho thĭ htŏ nu. 54Barasă Jezŭ phòglo zu cukhò, htŏhta Ze lē kî d́ò, “Amihmupho, wè̄htobò̄.” 55B́ĕnu ca tha geb́ahtî zi neb́î̆cè kî zè wè̄hto danāgè. Kîd́ò̆ Jezŭ hnagè bija i ca a dèa dimimi. 56B́ĕnu zo mo ca pa htèdômô̄dahmă sôgè, barasă Jezŭ hmèla cè tòcò akò tò d́ò̆sa bija dèphî̆hta ajo dèbwè̆ ńò nu.

Currently Selected:

Lŭka 8: GRNT21

Highlight

Copy