Mataio 20
20
Ko nā Tino Gālulue i te Tōvine
1Kua toe vāgana atu ia Iehu, “Ko te Mālō o te lagi e fakatuha vēnei. E i ei he faitōvine na uhu i te taeaopō, oi hakili ni tino ke gālulue i tona tōvine kae totogi. 2I te mauaga o he māliliega fakatahi ma nā tino faigāluega ke ia totōgia ki lātou i te totogi māhani, e tahi te tupe hiliva i te aho, oi uga ai e ia ke gālulue i tona tōvine. 3Na toe fano ki te māketi i te iva i te taeao, oi toe kitea ai foki e ia iētahi tino e tutū tauanoa e hēai ni a lātou mea e fai, 4oi lea vē atu ai ki ei, ‘Olo oi gālulue i te tōvine kae totogi koutou e au i te totogi e fetaui.’ 5Oi olo ai nā tino oi gālulue. Na toe fai foki e ia te mea tēnei i te hefulu lua ma te tolu i te afiafi. 6Kua tāli ta te lima oi toe fano ai foki ki te māketi, ma na ia kitea ai iētahi tino koi tutū lava i kinā. Oi lea vē atu ai ki ei, ‘He ā te tutū tauanoa ai koutou i kinei i te aho kātoa e hēai ni mea e faia?’ 7Kua tali mai nā tino, ‘Auā e hēai he tino e fia fakafaigaluegagia ki mātou.’ Oi lea atu ai te faitōvine, ‘Olo la oi gālulue i te tōvine.’
8 #
Lev 19.13; Teu 24.15 “Kua pa ki te afiafipō, oi lea atu ai te faitōvine ki te pule o te kau faigāluega, ‘Fakamāopoopo mai loa te kau faigāluega oi fōki ki ei o lātou totogi, totogi muamua nā tino na kāmata mulimuli oi fātoā totogi ai nā tino na kāmata muamua.’ 9Ko nā tino na kāmata gālulue i te lima na totogi i te taki tahi tupe hiliva. 10Kua pa nei ki te taimi e totogi ai nā tino na gālulue muamua, oi ōmamai ai ma o lātou manatu e lalahi atu o lātou totogi ka maua; kae na taki tahi foki ia tupe hiliva na totogi ai. 11Kua kave o lātou totogi ka kua kāmata oi mūimui e ki lātou te faitōvine. 12Kua lea vē ki lātou, ‘Ko nā tino na gālulue mulimuli e fokotahi oioti te itūlā na gālulue ai, ka ko ki mātou iēnei na gālulue i te aho kātoa i te vevela o te la — ka kua fakatutuha e koe o lātou totogi ma ki mātou!’
13“Oi tali atu ai te faitōvine ki hētahi o ki lātou, ‘Te uho, fakalogo mai koe. E hēai haku mea piko kua fai ki a te koe. E hēki mālilie fakatahi nei ki tāua ke totogi koe i te totogi māhani e tahi te tupe hiliva i te aho? 14Kave la tō totogi ma fano ki tō fale. Ko te mea e fofou au ki ei, ke tutuha te mea e fōki e au ki te tino na galue mulimuli, ma te mea e fōki atu e au ki a te koe. 15E hē ia te au nei te faitalia ke fakaaogā ai aku tupe ki te mea e fofou au ki ei? Pe ko koe e loto kino auā ia au e kaimakoi?’ ”
16 #
Mat 19.30; Mlk 10.31; Luk 13.30 Kua fakauma te akoakoga a Iehu oi lea vē atu ai, “Ko te mea ia, ko ki lātou e mulimuli ka kavea ma muamua, ka ko ki lātou e muamua ka kavea ma mulimuli.”
Ko te Fakatolu oi Tautala ia Iehu e uiga ki tona Mate
(Maleko 10.32-34; Luka 18.31-34)
17Ka koi malaga atu ia Iehu agai ki luga ki Ieluhalema, oi fakamāopoopo mai ai e ia ona hoko e toka hefululua nā ko ki lātou, oi tautala atu ai ki ei kae havavali fakatahi i te auala. 18Kua lea vēnei atu ki a te ki lātou, “Kikila, ko ki tātou e olo ki Ieluhalema. Ko kinā ka tukulima atu ai te Ataliki o te Tagata ki te pule a nā ohitāulaga hili ma nā faiakoga o te Tūlāfono. Ka ki lātou fakahalagia ia i te oti, 19ma tukulima atu ki tagata nukukehe ke ki lātou tauemua, ma kini, ma fakahātaulo; ma ka toe fakatū mai ai i te oti, i tona tolu o aho.”
Ko te Talohaga a he Mātua
(Maleko 10.35-45)
20Oi hau ai te mātua o nā ataliki o Hepetaio ki a Iehu, fakatahi ma ona ataliki, kua tōtuli i mua o Iehu ma lea atu ki ei i he mea e fofou ia ki ei.
21Kua fehili atu ki ei ia Iehu, “He ā te fofou koe ki ei?”
Kua tali mai te fafine, “Takutino mai ko ki a te au, kāfai e pa mai tō Mālō, ko oku ataliki iēnei e toka lua ka fakanofo e koe tētahi i tō itū taumatau ma tētahi i tō itū tauagavale.”
22Kae kua tali atu ia Iehu ki nā ataliki, “E hē koulua iloa te mea tēnā e lea mai ai koulua. E koulua mafaia moni oi inu ki te ipu o nā puapuagā ka inu e au?”
Kua tali mai ki lāua, “E ki mā mafaia”.
23Oi lea atu ai ia Iehu ki ei, “E moni ko koulua ka inu ki taku ipu, kae e hē ia te au te pule e filifili ai pe ko ai te ka nofo i toku itū taumatau ma toku itū tauagavale. Ko nā nofoaga iēnei e mo ki lātou kua filifilia e toku Tamana ke nonofo ai.”
24I te lagonaga e iētahi hoko e toka hefulu e uiga ki te mea tēnei, oi na feita lahi lele ai ki te kau uho e toka lua. 25#Luk 22.25-26Oi fakapotopoto uma mai ai e Iehu ona hoko, ma lea vē atu ai ki ei, “E koutou iloa ko nā tupu o nā mālō o tagata nukukehe, e pūlea fakamālohi e ki lātou ia tagata, ma ko o lātou takitaki, e kātoatoa te lātou pule ki tagata. 26#Mat 23.11; Mlk 9.35; Luk 22.26Kae ko koutou e hē vēnā; ko ai lava o koutou e fia kavea ma pule, e tatau te tino tēnā ke fai ma kaukauna ki iētahi o koutou; 27ma ko ai lava o koutou e fia kavea ma muamua, e tatau te tino tēnā ke fai ma tāvini ki iētahi o koutou — 28e vē ko te Ataliki o te Tagata e hēki hau kae ke kaukauna ake ai ia tagata ki a te ia, kae na hau ke kaukauna ki tagata ma tuku atu tona ola ke fakaola ai te tokalahi.”
Kua Fakamālōlō e Iehu nā Tāuaho e Toka Lua
(Maleko 10.46-52; Luka 18.35-43)
29Kua olo kehe ia Iehu ma nā hoko o ia mai Ieliko, oi mulimuli ai ki ei he kaifenua e tokalahi. 30E toka lua ia tamāloa tāuaho nae nonofo i tafa o te auala. I te lagona atuga e ki lāua ko Iehu e kui mai i te mea e i ei ki lāua, oi kāmata loa oi tau kālalaga vē atu ki ei, “Te Ataliki o Tavita, alofa mai ko ki a te ki māua!”
31Kua mumuna mai ki ei te kaifenua ma lea ki ei ki lāua nahe piha, kae kua ātili ai te tau kālalaga leo lahi vē atu, “Te Aliki, te Ataliki o Tavita, alofa mai ko ki a te ki māua!”
32Oi tū ai ia Iehu kua vāgana atu ki a te ki lāua, “He ā te fofou koulua ke kō faia mo koulua?”
33Kua tali mai ki lāua, “Te Aliki, ko ki māua e fofou ke fakapupula e koe o mā mata.”
34Na lagona e Iehu te alofa ki a te ki lāua ma na tago ai ki o lā mata; ma ko te taimi lava tēnā na mafai ai ke kitea e o lā mata, oi mulimuli atu ai ki lāua ki a Iehu.
Currently Selected:
Mataio 20: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
