Mataio 19
19
Kua Akoako e Iehu e uiga ki te Tatala Āvaga
(Maleko 10.1-12)
1Kua uma te tautala o Iehu ki nā mea iēnei, oi fano kehe ai ma Kalilaia, kua fano ki te itūmālō o Iutea i tētahi itū o te vaitafe ko Iolitana. 2Kua mulimuli atu ki a te ia te tokalahi o tagata, oi fakamālōlō ai ki lātou e ia i kinā.
3Oi ōmai ai te kau Falehaio, kua taumafai ke tofotofo ia Iehu i he fehili. Kua lea vē atu ki lātou, “E fakataga nei i te tātou Tūlāfono he tamāloa ke tatala e ia tana āvaga i ho he māfuaaga e fofou ia ki ei?”
4 #
Ken 1.27; 5.2 Kua tali atu ia Iehu, “Ko koutou nei e hēki faitau ki te tuhituhiga paia e lea mai, na fai e te Atua i te kāmataga nā tino, he tamāloa ma he fafine. 5#Ken 2.4Oi vāgana ai te Atua, ‘Ko te mea ia ka tukua ai e te tamāloa tona tamana ma tona mātua kae fakatahi ma tana āvaga, ma kavea ai ki lāua ma tino e tahi.’ 6Ka hē toe toka lua kae kua tino e tahi. Ko te mea la kua tuku fakatahi e te Atua, e hē toe tuku kehekehea e he tino.”
7 #
Teu 24.1-4; Mat 5.31 Kua fehili atu nā Falehaio ki a Iehu, “He ā la na tuku mai ai e Mohe te tūlāfono, e mafai ai e he tamāloa oi kave ki tana āvaga he tuhi e fakailoa ki ei ko te lā āvaga kua tatala, ma uga ai ke fano?”
8Ka kua tali mai ia Iehu, “Na tuku atu e Mohe te fakatagaga ki a te koutou ke tatala ai autou āvaga, auā outou loto e makaka. Ka nae hē vēnā i te kāmataga. 9#Mat 5.32; 1 Kol 7.10-11Ko au la e lea atu ki a te koutou, ko ai lava he tamāloa e tatala e ia tana āvaga i he māfuaaga e kehe mai i lo te kua hē fakamāoni o te fafine, ma fakaipoipo ki hētahi fafine, kua agahala ia i te mulilua.”
10Kua lea atu te kau hoko ki a Iehu, “Kāfai ko tēnā te tūlaga i te va o te tamāloa ma tana āvaga, e hili ai la te hē fakaipoipo.”
11Kua tali mai ia Iehu, “E hē ko tamāloloa uma te ki lātou mafaia oi talia te akoakoga tēnei, kae nā ko ki lātou lava kua uma te tuku atu ki ei e te Atua. 12Auā e i ei nā māfuaaga kehekehe e hē mafai ai ia tamāloloa ke āvavaga; ko iētahi e māfua ona na fānanau mai lava e vē; ko iētahi ona ko nā mea na fai ki a te ki lātou e iētahi tino, ma ko iētahi e hē āvavaga kae ke mafai ai ki lātou ke tautua ki te Mālō o te lagi. Ko te tino e ia mafaia oi talia te akoakoga tēnei, oi talia loa.”
Kua Fakamanuia e Iehu nā Tamaiti
(Maleko 10.13-16; Luka 18.15-17)
13Kua kaumai e ni tino ni tamaiti ki a Iehu ke fakaeke atu ona lima ki o lātou ulu ma tatalo mo ki lātou, kae kua mumuna atu ki ei te kau hoko. 14Kua vāgana atu ia Iehu ki ona hoko, “Tuku nā tamaiti ke ōmamai ki a te au, nahe vavaoa, auā ko te Mālō o te lagi e mo ki lātou e vē ko ki lātou iēnei.”
15Kua fakaeke atu ona lima ki o lātou ulu, oi fano kehe ai.
Ko te Tamāloa Maumea
(Maleko 10.17-31; Luka 18.18-30)
16Nae i ei he tamāloa na hau ki a Iehu oi fehili vē atu ki ei, “Te Faiakoga, he ā nei he mea lelei e tatau ke kō faia, kae ke maua ai e au te ola e fakavavau?”
17Kua tali mai ia Iehu, “He ā te kua fehili mai ai koe ki a te au ki te mea e lelei? E fokotahi oioti lava te tino e lelei ko te Atua. Kāfai e fia maua e koe te ola e fakavavau, tauhi la ki nā fakatonuga.”
18 #
Eho 20.13-16; Teu 5.17-20 Kua fehili atu te tamāloa, “Ni fakatonuga vēhea?”
Ma kua tali mai ia Iehu, “Ia koe nahe tāmate tino; ia koe nahe mulilua; ia koe nahe kaihohoa; ia koe nahe molimau pepelo; 19#Eho 20.12; Lev 19.18; Teu 5.16āva ki tō tamana ma tō mātua; ma alofa ki tō tuākoi e vē oi alofa koe ki a te koe lava.”
20Ka kua lea atu te tamāloa ki a te ia, “Ko nā fakatonuga uma iēnei e tauhi au ki ei. He ā la hētahi mea e tatau ke kō faia?”
21Oi vāgana atu ai ia Iehu ki ei, “Kāfai koe e fia lelei kātoatoa, fano oi fakatau au mea uma lele ma fōki te tupe ma nā tino mātitiva, ma ka maua ai e koe nā koloa e lahi i te lagi; oi hau ai oi mulimuli mai ki a te au.”
22I te lagonaga atuga e te tamāloa o te mea iēnei, oi fano kehe ai ma te loto fakanoanoa, auā ko ia ko he tino maukoloa.
23Oi vāgana atu ai ia Iehu ki nā hoko o ia, “E takutino atu e au ki a te koutou, ka faigatā lele mo nā tino maukoloa ke hao atu ki te Mālō o te lagi. 24Ko au e toe lea vēnei atu ki a te koutou, e faigatā lele atu mo he tino maukoloa ke hao atu ki te Mālō o te lagi, i lo mo he kāmela ke ulu i te pu o he gila.”
25Na ofo lahi lele te kau hoko i te ki lātou lagonaga o te mea tēnei, oi fehili vē atu ai, “Ko ai nei la te i na mafai ke fakaola?”
26Kua kikila hako atu ia Iehu ki a te ki lātou ma tali vē atu, “Ko te mea tēnei e matuā hē mafai lava e tagata, kae e mafai ia mea uma e te Atua.”
27Oi tali atu ai ia Petelu, “Kikila, kua tuku e ki mātou a mātou mea uma lele kae mulimuli atu ki a te koe. He ā nei ta ki mātou ka maua?”
28 #
Mat 25.31; Luk 22.30 Kua vāgana atu ia Iehu ki a te ki lātou, “E takutino atu e au ki a te koutou, i te ōlaga fou koi hau, ko te Ataliki o te Tagata ka nofo i luga o tona nofoāliki mamalu. Ma ko koutou iēnā kua mulimuli mai ki a te au, ka nonofo foki i nā nofoāliki e hefululua, ke pūlea nā puikāiga e hefululua o Ihalaelu! 29Ma ko ho he tino e ia tukua tona fale, pe ko ona uho, pe ko ona tuafafine, pe ko tona tamana, pe tona mātua, pe ko tana fānau, pe ko ona fenua ona ko au, ka maua e ia he taui e hautua helau, ma vēnā foki oi maua e ia te ola e fakavavau. 30#Mat 20.16; Luk 13.30Kae e tokalahi ki lātou e muamua nei ka kavea ma mulimuli, ma e tokalahi foki ki lātou e mulimuli nei ka kavea ma muamua.”
Currently Selected:
Mataio 19: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
